السلام عليكم ورحمه الله وبركاته
لا تـازن الرجـال لاشفـت زولـه
وزن الرجال عقولها يا فتـى الجـود
دلايـل الـرجـال فعـلـه وقـولـه
تحكم عليـه بمنطقـه علـم موكـود
ما ينفـع الرجـال جسمـه وطولـه
لا صار ما يدري عن النقص والزود
كسب المعالي مـا يجـي بالسهولـه
يصعب على اللي ما يجامل على الكود
المجد عشـاق الكسـل مـا ينولـه
دربه على اللي يجهل الطيب مسـدود
وحفظ الشرف مبدأ صفات الرجولـه
والمتزن ما هو علـى درب منقـود
ومرافق الجهـال يـا بـن الحمولـه
نقص ٍعلى السمعه وتعقيـد وعقـود
كـل ٍجليسـه يقتـدي فـي فعولـه
المعتدل واللي عن الخيـر مصـدود
ومع الأسف بعض العقـول معزولـه
ما تقـل بالدنيـا لهـم رب معبـود
ما خافوا المولى وطاعـوا رسولـه
اللي لـه العبـاد خشـاع وسجـود
ما حسبـوا يـوم ٍحسابـه وهولـه
يشيب راس اللي هاك اليوم مولـود
يطـرق منافيـذ الخوافـق ذهولـه
يوم الحساب اللي به العبـد موعـود
بأخر نفـس لانوخـت بـه ذلولـه
يوم التفاهـم بيـن ناشـد ومنشـود
عند الضريح أخـر محطـة نزولـه
النفس تصعد والجسد مرتـع الـدود
ياأهل العقول المبصـرات احسبولـه
ترى الحياة بلا عمل مـا بهـا فـود
اعمل عمل واطلب مـن الله قبولـه
منهج طريق الخير واضح ومحمـود
دامـك نشيـط وكـل شـي ٍتنولـه
ترى السفر له حد والعمـر محـدود
الشاعربــدر عــواد الـحـويـفـي الحـربـي