اقتباس:
المشاركة الأصلية كتبت بواسطة عبادي العامري
الف تحيه لأخوي ابو البر وكمان الف تحيه لأخوي المشرف ابوحمد
حبيت اشاركم مادام الدعوه فيها قصص وذكريات جميله لن ننساها ابدا
في عام 1410 تقريبا قبل واحد عشرين سنه لزم والح علينا احد الأخوه المتعينين حديثا للتدريس في حفر الباطن لزيارته خصوصا انوه الجو كان ايام شتاء وبرد وربيع وظهور الفقع
فعقدنا العزم وتوكلنا على الله ومشينا يوم الثلاثاء بعد الغداء بسياره ددسن غمارتين 86 وعددنا خمسه وصلنا العشاء لصاحبنا وتعشينا وبعد الفجر ليوم الاربعاء انطلقنا لمنطقة الصداوي تبعد عن الحفر شرق حوالي 85 ك على طريق القيصومه دخلنا بعد محطة البنزين واتجهنا شمال شرق حوالي 25 ك وكانت الارض متشابهه ارض الدبدبه بساط اخضر على مد البصر لايوجد جبال او معالم بارزه مجرد خيام بيضاء واغنام وأبل وكلها ددسن غماره وغمارتين وخيمه عامود وعامودين ولا كان يوجد قارمن او ماجلان نمشي على الخطوط القويه ونسأل البدو
اخذنا ذبيحتنا الصبح وشفنا مكان زين ومافيه عالم واجد وبعد ان افطرنا جلسنا نتمشا على ارجلنا ونبداء بالبحث عن الفقع للغداء وبعد ان تغدينا احلا كبسة بالعالم
فيه واحد معنا الله يهديه تلقف وقال تتحدوني اروح للمحطه اجيب لكم ببسي فيه واحد اشد منه حمقا قال انا اتحداك حاولنا نثنيهم مافيه فايده ركبهم الشيطان ياجماعه مامعنا الا سياره وحده والدروب تشابه وبنجلس لوحدنا بالخيمه والارض والسماء برد مافيه فايده
رد علينا الاحمق وقال ابروح سيده وارجع سيده واذا قابلني خيمه او عقم الف عنه وارجع لخطي شف المخ الزايد والتفكير الارعن
توكلو على الله وراح الشخص المتحدي هووالمدرس راعي الحفر وقلنا لهم حنا عارفين انكم بتضيعون لكن اذا غربت الشمس ارجعو للشقه بالحفر ونامو وقبل الفجر حركو لنا والوعد بكرا الصبح محطة البنزين لاتعدونها لين نجيكم
اظلم الليل وشبينا ضونا وحمدنا ربنا وسوينا احلا عشاء وسمرنا ونمنا والصباح رباح
يوم صار الفجر صلينا وشبينا ضونا وسوينا القهوه والحليبه والفطور ومعنا واحد طير بر وفطين بالحيل الله يجزاه خير قال انشاء الله بجيبهم لكم لاتضيق صدوركم قام من عندنا وعرض لواحد من البدو النشامه يرعى حلاله وقاله القهوه زاهبه ياوجه الخير افطر معنا البدوي يوم قام لحقه خوينا وقاله السالفه وقاله ابيك توديني للمحطه وترجعني لخيمتي وبحقها ركب معه وبعد ساعه جابهم والاحمق خوينا ظايقن صدره حمدنا ربنا وقلنا هذي نبيها تكون درس لنا ولغيرنا
واستفدنا من هالموقف
1 الحرص ثم الحرص اذا كانت المنطقه بعيده وصعبة المداخل ان يكون معكم اكثر من سياره بكامل استعدادها ووسائل الاتصال
2 اختيار امير لكم يكون رزين وذو علم وصاحب خبره والابتعاد عن الامور اللي تظر ماتنفع
3 في حالة اختلاف وجهات النظر ان يكون الرأي لأهل الخبره والأغلبيه
4اهم شي التوكل على الله سبحانه فهو الحافظ
5 يوجد بعض الاشخاص لايعرفون الا الاكل والشرب والنوم حتى براد شاي لايعرف عمله فلو يتطوع احد الاخوه بتعليمهم الطبخ وخلافه من امور الرحله
هذا مافي جعبتي ولكم مني الشكر الجزيل وتقبلو اطيب تحيه
اخوكم
عبادي العامري
|
والله إنك صاذ أخوي عبادي
يا كثر الرفلين بالبر والأحمقين
وما شاء الله على خويكم عز الله هذا اللي يصلح أمير على قولك
وأما النقاط اللي طرحتها من الإستفادة بصراحه أشكرك عليها
وبإنتظار مواقف إخرى منك أو غيرك
دمت بحفظ الله