راكب اللي لامشى الخط الطويل
لومشى يومين ما جاب الملل
اسمحوا لي باصفه وصف قليل
عقب وصفي يا عسى دربه سهل
اقصد gx-rما غيره بديل
لعنبوا من صممه لين اكتمل
امدحه وان ما مدحت آخر مود يل
وايش بابمدح موتر غيره اجل
وارد اليابان ماجا له مثيل
اقطم في السوق ما مثله نزل
كحلي لونه مثل زبده صميل
وارثم خشمه مثل خشم الفحل
لون زيكه لمعة السيف الصقيل
لمع برق في خيال منهمل
والعلامة لاسرى مثناه ليل
في جبينه كنها كوكب زحل
والإشارة لونها جمر كليل
يتلالا مثل منتوج النحل
والخطوط بشاشة صفة فصيل
تزهر أرقامه مثل ورد النفل
والازره داخل الكشنل الجميل
دائرية حجمها كبر الهلل
ويتهزأ مثل نقاض الجديل
منوته مثناه خط لنسحل
ويتنهض لبرمه في القاع ويل
وان بغيته يعتلي راس الجبل
كن تشيله عن عزاز الأرض شيل
فيه من قدام دفرنس الدبل
اسود كنه حصاه من حجيل
للنفوذ مصممينة والوحل
ما ورد مثله مواتر مستحيل
أن رضي راعي السفا ري وان زعل
الجيوب أوصافها في الرأس خيل
من خويه جيب ماجاه زمل
افترد عبد اللطيف ألهن وكيل
وعامل اليابان وانصح في العمل
فوقها اللي لامشى الغد راء دليل
ويتحمل للشقا مثل الجمل
في لزومي عن طريقه ما يميل
ولانخيته ما تمشى بالمهل
حوله مع حافة الضلع المهيل
لين عنه طويق قدام انعزل
باسمح له يا عسى جاله يسيل
لاسمح له زيد سواقه وصل
ولاتساوى مر مرات يعيل
ولاتعدى من وراء شقراء عدل
ثم تنهض مابقي لوكان ميل
داخل الطبلون والخط النحل
وشد حيله مابقى في الحال حيل
لين ضاق الكون جا كبر الدحل
والهواء عن رفرفه جاله شخيل
راسي ومرسيه عرض العجل
المراكز ما تعرض له سبيل
خابرينه عن هدفهم مستقل
ثم تنصى الأصيل ابن الأصيل
لاوصفته فاصفطه قدم المحل
تاجد اللي داخل المجلس ثقيل
ولاتكلم ما تلفظ بالزلل
الكرم تلقى أوله بن وهيل
والسوالف والحجاج المسفهل
والشبب ومعز بك ذباح حيل
تفعله يمناه لاجاها شلل
قل لبو فهد كساب الجميل
وايش رأيك ندرج اسمك في السجل
غنوا الشعار ومرير الحبيل
تيحت الفرصة لرجال يحل
واستلم ما قيل واجني بالحصيل
واركب المبروك وارج لي عجل