أولاً : أنا برد بقصه لي بأحد السفريات وليس الكشتات
ما هوب مثل غيري بس يضحك ويغير المتصفح أو يقول نحتري القصص
طيب أبو البر مشقي عمرهـ وأنتم سافهينه ليش ردو بسوالف ومواقف
ثانياً : سالفتي (بس لا أحد يدري) وتراها (سر) يا أبو البر (كني خابر بطنك ما هوب جراب لأحد) ... لكن يالله بنقولها
أنا رجال مرة كنت مسافر برى واللغة عندي صفر على الشمال لو يقولي الواحد هاي ما فهمت له
وكنت حاضر معرض دولي للتقنيات والكمبيوترات والأجهزة الدقيقة (من زين الوجه ما هنا لغة ورايح لمكان كله رطن إنقليزي)
طبعاً كنت رايح مع واحد من الربع معه لغة وجايته دعوة من شركة DELL (عساها صح الكلمه) بحكم إنه مدير مشاريع وتجهيزات بأحد الدوائر الحكومية عندنا
وقال خاوني (كالعادهـ نحسب الدعوهـ بران وهو صديق خاص للبر) ما قلنا لا ولا نعرف الريوس قدام
المهم مالك بالطويله
دخلنا المعرض من الصبح بدري (طبعاً ما هوب مثل معارضنا يبيلك يومين أو ثلاثة تفرهـ)
قال خويي بدخل إجتماع مع الشركة أدخل معي (يعني تكملة عدد) والله أنا أتكي وهالخواجات طايرين بي (يحسبون عندي علم أو سالفة) والدعوهـ يرطنون قلينزي ما فهمت شي قلت لخويي حنا متعودين على رعيان وراعين حلال وكشاته وضبان نجتمع معهم بالبران ما هوب ربعك وهقتنا بهم والظاهر إنكم تحشون بي وأنا ما أدري الوعد تلقاني تحت بفر بالمعرض
وأنا أقول هالكلام ضحك واحد من الحضور كان لآبس بدلهـ فرنجي
وبسرعه ضفيت قشي وطلعت من غرفتهم طلع خويي بعد ساعة أو حولها
ونسيت السالفة
قال خويي يا خبل ضحك علينا الرجال
قلت أي رجال
قال كان على يميني
وأنا أسويي نفسي ما شفت أحد يضحك (جحيد وأمر بعيد) أكذبه عيني عينك
قالي المهم الرجال اللي ضحك من ديرك
قالت وشو
قال نعم جاك العلم من الزلفي
وعلمته بإسمك وعرفك وعرف الجماعه (يعني فضيحتي بجلاجل)
وإنه فلان الفلاني مدير معاهد .... للكمبيوترات وتعليم الحاسب الآلي بالمملكه
رجعنا للسعودية وأول ما دخلت البيت كان مصادف جمعه للعايلة عند الوالده
وبدال ما الواحد يقول الحمد لله على السلامه أو السلام عليكم
كلهم يتسابقون بالعياره
اللي يقول حدك البران والضبان
واللي يقول مرة أخرى لا تعدى الصمان وخلك عليه
واللي يتكلم معي قلينزي (يواحن)
بسم الله ما أمداني آصل من علمكم
الإستخبارات شغاله
قالوا لي فلان الفلاني راعي المعهد حق الكمبيوترات
بعد شهر إكتشفت إن اللي معلم الإخوان وناشر الموقف
هو خويي مرسل رساله لخوي إللي أصغر مني وقالهـ على إن اللي معلمكم فلان
أثاري الرجال بريء
وصار الخبر من هالنمس رفيزي
يالله على الله إنها تجوز لك أخوي أبو البر
وأهنيك على كفاحك وإصرارك
وأوعدك بثلاث قصص لنفس المعرض
والمواقف المضحكه فيه
حتى ما أنساهن
1/ سالفة مكينة الماء
2/ سالفة الصورهـ
3/ سالفة عم بأحكي معك عربي
بس شب على الأعضاء خلهم يتفاعلون معك
دمت بحفظ الله