مما راق لي
كانوا يقولون الهوى سقم وهبال
ما جرّبه مخلوق حتى غدا به
وأقول : كذبه .. واحمد الله على الحال !!
ذولا في الواقع مجرّد غلابه
عمر الهوى يا ناس ما زحزح جبال
تبقى الجبال جبال قدر وصلابه
ولا عرفت إن الهوى يذبح رجال
حتى غدت بي في هواك الصبابه
من يومها ما صار غيرك على البال
إنتي طعام القلب وانتي شرابه
أتبع ربيع رضاك نازل ورحال
فيك انتما قلبي وعنك اغترابه
سيرة حياتي صابها منك زلزال
وتصرفاتي صار فيها غرابه
لا حل ذكرك شلت ذكراك موّال
القوس من ذكرك وقلبي ربابه
واتذكرك ورموشك العكش شلال
فوق الخدود اللي تضم الذرابه
والفارع اللي وسط الالماس يختال
كن الكتوف ليا تثنى تهابه
واللي برز بالصدر ماهو بذلال
واقف كما جندي نوى بالحرابه
ما همه اللي واقفٍ له على الجال
يتحيّن الفرصه ويعزم عقابه
وأنا عشانك كم تحديت الاهوال
فيني طنا الجاهل وعقل الشيابه
كله على شان الهوى سقم الاجيال
كم ليلةٍ غنيت لجله عتابه
من شافني مشغول والفكر جوال
يقول ذا مسكين ضيّع شبابه
إن ظل سقمه .. عمر ذا الرجل ما طال
كله شهر – يمكن - ويغدي نهابه
اثر الهوى يا ناس للرجل قتال
واللي هوى لا شك سقمه غدابه
تحياااتي