أكبرغلط سـرك للانـذال تبديه
وتصاحب الخاين قليـل المـروه
وتسوي المعروف في غير راعيه
وتجامل الغلطان وتقـول خـوه
وتشره على اللي مايعرف المشاريه
ويلقا على سبـك طريق المفـوه
واكبر خطأ راع الجهاله تلاغيـه
بنفس الكـلام اللـي تفـوه تفـوه
وتلعب على الحبلين والحق تخفيـه
وعلى نضيف القلب تقـدر تمـوه
ونفس الكلام اللي تجيبـه توديـه
ولسمعـة الاجـواد تقعـد تشـوه
وتعجبك قوة سلطة السان وتيـه
وتقول انا اللي منزلي فـي علـوه
أعلم تراك انسان وضعيف ياهيـه
ماغير قـوة خالـق الكـون قـوه
هذي نصيحة من تحكمـه مباديـه
من المجتمع ماراق بالـه وجـوه
ولاقول كل المجتمع ماذكّـر فيـه
الناس فيهم مـن براسـه حمـوه
إذا إتعضت أشكرك هذا اللي ابيـه
وإذا جهلت اللـي يناسبـك سـوه
ولاني وكيل أدم على أخطأ ذراريه
حبيت أحذر عن بعضهـا وأنـوه