[عابر سبيل]

ليا صار لك قدره على نفعة المحتاج
لا تذخر عساها لك من الذنب كفاره
لولا حاجته ما وقف بماقف الاحراج
ولا قام يكشف لك خفاياه واسراره
ولا جاك من ضيقه يدور على الافراج
همومه تسوقه لك والاعصاب منهاره
يشابه دريكٍ في البحر تدفعه الامواج
ينادي ويومي لك بيمناه ويساره
تخيل ظروفه يمكن انك بعد تحتاج
والناس لبعضها والمقادير دواره
واذا كان ما عندك من الضيق له مخراج
فلا تجرح شعوره ولا تهين مقداره