ياهل القصر الموالي من الديره
لا يجي للكبر منفذ ومدخالي
يوم أجي وآخذ على القصر تدويره
من غرام المترف اللي برى حالي
جادل يفرق عن الغيد تصويره
لا مع أهل الجيل الاول ولا التالي
تل قلبي تلة الدلو من بيره
من يدين اللي حداه أشهب اللالي
والصراحه من دلاله وتأثيره
ماخذيت الا وانا أسابق أظلالي
غير كن العين ما خايلت غيره
ماطرى في بال غيري ولا بالي
آه لا سولف عن آخر مشاويره
من حكاياه أطعم السكر الحالي
وان غفل والرمش غطى محاجيره
دوروني وانشدوني من أحوالي
الكلام أضيع أسلوب تعبيره
وأذكر اسمه وافقد اسمي ومدهالي
ياعيون اللي لفوا به مداويره
أشقر غالي ومهدا على غالي
وأكثر شيوخ الخليج وصقاقيره
هملوا من عقبه الصيد طوالي
مادريت أن الهوى سيرته سيره
لين صرت آخر ضحيه من أجيالي
أن تهيالي طفت شعلة النيره
والبلا ياربعي ان ما تهيالي
سجلوني واحد من جماهيره
لايضيع أسمي ولارقم جوالي