[فهد المفرج]

اتعب على الطيب تلقى الخير قدامك
و ابعد عن اهل الردى وتعيش في راحه
ماكل من ينصحك يصبح من اخصامك
ولا كل بابٍ مقفّل معك مفتاحه
واعرف طريقك قبل تمشي به اقدامك
كم واحدٍ في طريقه ضيّع ارباحه
و حافظ على فروض ربك واوصل ارحامك
و نور المحبه بقلبك شب مصباحه
وفكّر بعقلك و حدد مصدر الهامك
ما جاب شهرة نيوتن غير تفاحه
وابذل للاسباب و احقر كل من ضامك
و افرد جناحك ما دام النفس مرتاحه
و مع ربك اليا عصيته جدد اسلامك
العمر يا صاحبي يا سرع مرواحه
و الحاقد اترك غثاه و جوّد احزامك
خل البعير الحقود يموت بمراحه
*كم واحدٍ ودّه انه يفني ايامك
و يعيّشك في جحيم الوقت و اتراحه
تبني قصور الامل و تحقق احلامك
اليا تجاهلت صوت الكلب و نباحه

[align=left]فهد المفرج[/align]