ثنتين تشفي الهم , خـوت رياجيـل
وشوف الفياض اللى زهرها كما الزل
مرسلهـا الرحمـن غـرً همالـيـل
بأمر الكريم انشى من الغرب واقبـل
وقـام يتقحـم مقدمـه كنـه الليـل
والبـرق يبـرق والربـاب يتعـزل
والشرق تضرب في اخشوم المخاييل
متركـدً ممشـاه ويـحـن ويـهـل
من مبتدى الوسمي وسيلً بأثر سيل
خمسين ليل يـروّح المـزن ويعـل
وتجملت الارض من نبتهـا تجميـل
تشبه عروسً طيبهـا الكـاد والفـل
متشكـلً تلعبـه الـنـود ويمـيـل
عشبً لقى غير الدفى والمطر طـل
والبدو مايطـري لهـم بالمحاويـل
كلن بداره شبعـت الضـان والبـل
عشبن عليه من التريبـي تفاصيـل
والا مثـل صبـاب عامـن لنـا زل
يازين في وقـت الربيـع التعاليـل
ويازين مد الشوف مع نايـف التـل