من لا حفظ دينه وعرضه ودنياه
هذاك مخه مثل مخ البهيمـــــه
اغنم من الحاضر على ما تمنــاه
من دون لا تاصل حدود الجريمه
الحـد حــد ولا تفـكــر تخطــــــاه
وما دون حد الحـد ربك رحيمــه
اللــي مع المعبود لا بد يحمـــااه
يعيش طول العمر ما احدٍ يضيمه
واللي مــع الشيطان تكثر خطاياه
خسران من يجعل عـــدوه نديمــه
دامه عدوك ليش تمشي بممشاه
أبعد عنه دام العواقب سليمــــه
الله خلقك من العدم كيف تعصاه
لولا الولي ماصار لك أي قيمه
عليك باللي لااذن الفرض لبّـــاه
وعليك باللي ســيرته مستقيمــه
لا تقرب الكــذاب حاول تلافــاه
وابعد عن النقاق راع النميميه
اماالبخيل أصحى تمره وتنصـاه
إرفع مقامك لا تشوف الحريمــه
وعليك باللي لا لفى الضيف حياه
راع الكــــرم والجـود ربك يديمـه
الله على اللي لا ملك مــال زكــاه
كسبان من يمسح دموع اليـتـيـمه
وخسران من ماله إلى النار وداه
بالدرك الاسفل يحترق في جحيمه
كم واحدٍ وقت الغضب ضاع مبداه
ترى الشجاعه بالقلوب الحليمـــه
حســن التعامل فن حاول تحـلاااه
وابعد عن أهل الغطرسه والشتيمه
من يعـمل المعروف لابــد يلقــــاه
إلا الذي يفســد جميلـــه كليـمـــه
أبــوك وامك رايهــــم لا تعـــــداه
إخفض جناح الــذل قدرٍ وشيمــه
في ما ملكت أكرم وحذرا تـحــداه
الله يحب أهــل القلــوب الرحيمـه
ما بالتعصـــب غير كثــر المعاناه
وما بالتطـــرف غير زود الهزيمه
اللي مضى من عمرالانسان ينساه
ومســتقـبــل الايــام ربك عليمــــه
إحذف من الماضي همومه وذكراه
إنسى المأسي والجروح الأليمــــه
إطنخ هوى نفسك على كيف مشهاه
بكره يصير اليــــوم ذكــرى قديمـــه
والحمـــد للي ما تعـدد ثنايــــاه
الله ولا غيره نعيــــش بنعيمــه
..