ياعلي وين اللي رعينا بهم هيت **** حال اللحد من دونهم والظلامي
البارحه ياشمعة الربع ونيت ***** ونة صويب ومكسره بالعظامي
أوما الشجر وأنا بعدمثله أوميت **** أوماي صقار لطيره وحامي
طير لياجا الصيد يشبع هل البيت **** جته هبوب مع جراد تهامي
عز الله اني تو ياعلي ذليت **** تبينت وانا على الناس كامي
وعز الله اني مع شفا البير هفيت **** هفة قفي من عجوز المقامي
واليوم من باقي حياتي تبريت **** عقب الشيوخ معدلين الجهامي
وياعلي عفت الحي من كثر ماريت **** وجريت للونات والقلب دامي
وعذبت قلبي في كثير التناهيت **** والعين عيت من بلاها تنامي
راح العقاب الصيرمي شايع الصيت ***** ياعلي من عقبه تراعد عظامي