قصيدة للشاعر : فلاح المورقي
يا فكري اسبح في فضاك الرحب وابحث عن خبر ..
لو تقضي الاربع ليالي من مدار إليا مدار
أبعد مداك ومد عزمك والصبر ثم الصبر ..
والصعب هين واختبار النفس طول الانتظار
والعبرة أقسى علم فالدنيا وياكثر العبر ..
في عين من شاف النهار الليل والليل النهار
تجذبني الاقدار و وجيه المتاهات الغبر ..
وأرفع مقامي كل ما راجعت نفسي باختصار
واستوعب دروس الزمان وكن صدري مختبر ..
وآمالي أوسع من بحور الشعر واحلامي كبار
كم لي سنة وأنا اطوي دروب التعب باع وشبر ..
بـ اسمي فلاح المورقي ماهوب بأسمٍ مستعار
نفسي تطاوعني على العزة رضى وإلا جبر ..
حتى و لو لحّت بأوامرها علي الاختيار
ماهوب شرط ادخل مع ابواب التجارب عن كبر ..
كم من فتىً جاوز بتجربته طويلين العمار
وإن كان ساقتني مساراتي لسرداب الكبر ..
أتذكر إني من عباد الله و القى لي مسار
الآدمي لو ملبسه سندس ومسكانه تبر ..
لا صار شخصه وعْمله ما وقره ما له وقار
والعمر فلكٍ يتبع شراعه ومرساه القبر ..
وألد ساعاته ليا ناجيت ربي بانكسار
سجادتي صفحة من الاسرار ودموعي حبر ..
وأشد خوفي من مكانٍ لا مجير ولا مجار
أعتى طواغيت الآودام يجزعه وخز الأبر ..
وش عاد من ظلمة سعير ما لغبتها قرار