الحمد لله قلبي محسن النيه
دايم وانا اعطي و لافكرت في ذاتي
اعامل الناس بإخلاص ومثاليه
ياكثر با كتب عن المخلوق مشكاتي
ومن شافني قال ياسعده ويا هنيه
لا هو بداري عن همومي وآهاتي
اشوم نفسي عن الهفوات والسيه
وارفع عيوبي و احاول اجمع شتاتي
و احاسب النفس بالروحه والجيه
اخشى عيوب النفس يلحقها ملاماتي
وان شفت ناس بنقل الهرج مبليه
حمدت ربي على نعمة معافاتي
وليا طلبني رفيقي وانتخا فيه
جيته من اقصى اطوي له مسافاتي
وان ضاق صدري وزادت في الحشا كيه
سألت ربي يخفف من معاناتي
والنفس بالكون مأموره ومنهيه
لابد ما قدر الرحمن ما ياتي
و يالله يا عالم باللي قسم ليه
تغفر ذنوبي وتجبر كل عثراتي