[تناهيد]

من قيض دنياي جيت ادور ظلالك
وارتاح من عقب ماأشقتني مسافاتي

~~~~

هالك وضامي مشاعر والبدن هالك
يايبس ريق الخفوق وقل حيلاتي
~~~~

واللي جعلني بلا تفكير أسعى لك
اني لأحسدك على صبرك بغيباتي
~~~~

ياقو قلبك اقل القول ؟ وش حالك
شحّيت وش عاد لوني قلت لك تاتي
~~~~

هبّتني اشواق لك وارسيت في جالك
وبالفعل الأشواق تجري عكس مشهاتي
~~~~

لو هو بيديني أبد والله مااعنا لك
لكن شوقي فضح بقلبي بنظراتي
~~~~

جيتك مجمّع حكي من يوم ترحالك
وصوّخ اذانك لصوتي واسمع الآتي:
~~~~

ماأبدن سئمتك ولا ببدل إبدالك
به حي قد قال لك سئمت نبضاتي ؟
~~~~

نعم أحبك ولا علي بإهمالك
وان كان حبك غلط ؟ ياحلو غلطاتي
~~~~

هذا انا ياحبيبي بآترضّا لك
من يوم قفّيت وانا العله بذاتي
~~~~

قفيت بالحالك ؟ ابدن ماانت بالحالك
خاوتك فرحة خفوقي وإبتساماتي
~~~

للشاعر /سعيد بن مانع القحطاني