[سلطان البراري]

اذا سبح فكري من الجال للجال

قعدت اقزر من همومي واشوي

الله لايجزاك بالخير جوال

لخبطت تفكيري وعكرت جوي

اببتعد بك عن محطات الارسال

تحرم عليك الذبذبه والمقوي

وان جيت لي في مرتع تو ماسال

قربت معمالي وشبيت ظوي

ريح الثرى عقب المطر يبري الحال

الليل قمرا والسما فيه نوي

آخذ مع الافكار حله وترحال

واسري بفكري في ظلام مدوي

أصد من مجلس ضحوك ومحتال

كنه صديق لي وقلبه عدوي

اصد عن هرجة أهل القيل والقال

العذل يضعف والعزائم تقوي

لاصحاب مابديها على كل الاحوال

الله اعلم وش يرسم الوقت توي

ان كان ماعشت الاماني والامال

مع الضروف القاسيه وش اسوي

الشاعر : عبدالرحمن بن بديع