شبكة البراري - الاميرةمها الاحمد السديري تعود للساحه الشعريه بمرثية في زوجهآ الأمير الراحل / نايف بن عبدالعزير

الأميرةوالشاعره / مهآ الأحمد السديري
« غيوض »اسم غني عن التعريف

تعود للساحه الشعريه بمرثية
في زوجهآ الأمير الراحل / نايف بن عبدالعزير
العام يا أم سعود كان الحزن ضيف
و اليوم دق أوتادة الحزن فينا

الحزن غيمة غيبت نجمة الصيف
و بأسباب جوره يا جواهر شكينا

غاب الحبيب ولا بقى للهنا طيف
و الآآآآآه يا نورة تهاوت علينا

كن الظهر يا سعود فيه انغمد سيف
و الصدر صار لكل الاوجاع مينا

اقول يا محمد متى فارق و كيف
و اصيح يا سارة متى هو بيجينا

يا نوف من عقبه ترى بسمتي زيف
جف الفرح من حولنا و انطفينا

أبوك يا نواف ماله تواصيف
و انشد مشاعل كان مثله لقينا

و الكون يا هيفاء بلا ظله مخيف
و اعذر بكانا يا فهد لو بكينا

كان القمر كان البحر و المجاديف
كان الحنان اللي بحضنه دفينا

و كان الملاذ لشاكي الضيم و الحيف
كم شال عنا كم خذا عن يدينا

عاش و رحل كله مهابه و تشريف
جار الحرم فوق الحكي و ان حكينا

والله لو كان المقدر على الكيف
ما غبت يا نايف ولا احنا ظمينا

كل ما رخيت الجفن جدت عواصيف
و الشوق ثار و فارقتني السكينا

و شفتك مثل شمس بروس المشاريف
نورك يناديني و انا اقول وينا

و ألقاك و اصحى و ألمحك راقي النيف
حي ولو صلت عليك المدينا

أحسك بجواي ماهي تخاريف
يا ساكن عيون المهاة الحزينا

في ذا جلسنا بين صمت و سواليف
و في ذا الممر اثنينا كم مشينا

و في هالزوايا كم جمعنا مواليف
و ياما على ذيك المرايا ضوينا

عشرة عمر ما تنتهي بالصواديف
و ذكرى تبي تحيا ولو ما بقينا

الموت يا نايف كتاب و تصاريف
و حنا بحكم اللي خلقنا رضينا

.. مها بنت محمد الأحمد السديري.