شبكة البراري - حصريا من مطبخي-- محاشي شموع للبراري

المحاشي

https://up.albrari.com/uploads/13158918662.jpg

هذي الحشوة تنفع لجميع المحاشي من الخضار
بطاط- كوسا – باذنجان – فلفل بارد – فلفل الحار الكبير- خيار - كرنب ( الملفوف ) .

الحشوة :

طبعا الكمية حسب العايلة تحطينها بس دايما خلوا اللحم مبين يعني مو تكثرون الرز لدرجة انه ينعدم وجود اللحم

- رز منقوع ( أي نوع رز تفضلونه – انا احب رز المزة للمحاشي وطبعا انقعه بماء مغلي واغسله بالماء المغلي مرتين وبعدين التنقيع علشان ماتبقى فيه الريحة ويصير نثري وطيب بالمحشي )
- لحم مفروم ( انا اخلط لحم مفروم امريكانا – مع لحم غنم عربي مفروم مع شوية شحم علشان النكهة )
- كمية بصل مقطع ناعم مقدار بصلتين كباااار
- 4-5 فصوص ثوم
- 4 حبات طماطم متوسطة الحجم مقطعة صغيرة
- كمية كبيرة من الكرفس او البقدونس
- واهم شي الشبنت
- البهارات ( بزار اصفر مخلط – شوية دارسين –
- شوية ليمون اسود – كمون ناعم – فلفل اسود –
- مكعبات ماجي – وشوية ملح للتضبيط – دبس الرمان )

الطريقة :

- نسلق اللحم مع عصرة ليمون وكم حبة قرنفل وعود دارسين وهيل واول ما يغلي نصفيه من الماء
- نحط نصف كمية البصل بمقلاة كبيرة مع زيت ذرة
ويكون الزيت زايد
- اول ما يبدأ يتحمر البصل نضيف له اللحم المسلوق
ونتبل بكل البهارات والملح الا الماجي ودبس الرمان
- نضيف الثوم المدقوق ناعم على اللحم طبعا ما حمرناه علشان مايفقد نكهته
- لما نحس اللحم تشرب البهارات نضيف الماجي ونقلب شوي لين يذوب
- نضيف الطماطم ونقلب لين يذبل شوي مو كثير
- اخيرا نضيف الكرفس والشبنت ونخلي الحشوة تتجانس الحين بس نقدر نحط الرز بعد ما نصفيه تماما من الماء ونقلب الخليط على نار هادية لما تتجانس الحشوة ونضبط الملح ونحط دبس الرمان
نطفي النار ونخلي الحشوة تبرد
- نكون فرغنا الخضار من الداخل وجاهزة للحشو
- والا اذا نبغاها للملفوف

وطبعا في ناس كثيرة تشتكي من الملفوف انه صعب ينلف ويروحون يسلقون الورق ويتعبون
الطريقة الحلوة للملفوف علشان يكون اللف سهل
اول ما تشترين الملفوفة كيسيها وحطيها بالفريزر
اقل شي يومين لما تتجمد صح
ووقت ما نويتي تشوين المحاشي طلعيها برا لين يفك الثلج عنها والا اذا مستعجلة ممكن تنقعينها بماء دافيء لين تفك وتفتحين الورق وحدة وحدة وتقطعينها على حسب الحجم اللي تبغينه وتكون بكذا جاهزة للف بكل سهولة

لما تحشون وتخلصون وتملون القدر نجي للخلطة الخارجية اللي تطبخون فيها المحشي وهذي اهم شي بالطبخة

صبة المحشي

- معجون طماطم علبة كرتون كاملة
- فصين ثوم
- تمرهندي مقدار ملعقتين او ثلاث ينقع بماء ويصفى
- مكعبات ماجي حسب الكمية
- شبنت او اذا تحبون نعناع ناشف او طازج
- شوية بزار –وفلفل اسود حسب الرغبة
- دبس رمان تقريبا 3 ملاعق
- كمية ماء

توضع جميع المقادير بالخلاط الكهربائي
واخلطيها جيدا وصبيها على المحشي واذا احتاج ماء
حطي بنفس الخلاط وحركيه علشان اللي تبقى من الخلطة وصبيه على المحشي وطبعا الخلطة لازم تغطي المحشي على الاقل حوالي 3-4 سم
ولا تنسون تحطون صحن فخار والا الزجاج الثقيل
على المحشي علشان ما يتناقز ويختل لما يغلي
ويطبخ المحشي على نار عالية لين يبدأ بالغليان
وبعدين نخليه على نار هادية لمدة ساعة ونص الى ساعتين حسب النار والخضار انتوا افتحوا القدر بعد ساعة وشيكوا عليه بس مو كل شوي على ما تخلص الطبخة والا القدر فاضي من الخضار ههههههه

https://up.albrari.com/uploads/13158918661.jpg

وصحة وعافية على قلوبكم