|
♡♢ هواجيس ~~ شطر ♢♡
بسم الله الرحمن الرحيم..
اسعد الله اوقاتكم جميعا.. زاويه خاصه لأبياتي المتواضعه ارجو ان تنال الاستحسان.. |
بين ترتيب الحروف وحسها المتناغم
المشاعر كنها في ليلة(ن) شتويه هاجسي ياهاجسي لرضاه جيتك راغم جفت عروق الغلا وعدودها المطويه |
لو تفارقنا جسد ..أشواقنا تجمعنا
كل بيت(ن ) فيه شطر وفيه شطر(ن) ثاني لو يضيق الكون كله.. بيتنا يآسعنا ان تباطيت الغياب بمجلسه تلقاني |
غدير الغرام اللي جلسنا على جاله
أمره وأصد وكن ماعاد له ذكرى تجيه السحايب بين فترات هماله تصب الشغايا فيه والجرح مايبرى |
《على جال ضو الشوق لي دله وبراد
وهاجوس شعرن بين الاضلاع وقادي لأجل كامل الاوصاف اجيب البيوت جداد وادون بها التاريخ هجري وميلادي》 |
شموع الغلا اللي تشتعل من لهيب الشوق
هبوب الفراق البارده جات واطفتها مع ان الفتايل في ذرى القلب والمعلوق ولكن ماجتها من رياح كفتها |
تلوح البروق بغيمة الشوق طول الليل
ويطحن حنين رعودها صدري البالي الا جر قلبي جر غصن يجره سيل لحته الصخور وطشه السيل من عالي |
تبل العروق ابيات شعرك ليا من جات
وهي قبل شفقانه على الحرف والحبكه عسى الله يجيرك من عنا الوقت والصكات تجرعت حبك لين سببت لي ربكه |
تموت الحروف من العطش والضلوع حطام
وصحراء غرامك خاليه مابها مرعى لو ان الضمير المستتر عاش بالاحلام كان اكثر قلوب الناس في سكته صرعى |
♡حبيبي فمان الله مشكور ماقصرت
تخيرت دربي وانت دربك تخيرته وقلبن فتحته لك انا اليوم له سكرت وعن جملة الحلوين شلته وكسرته♡ |
يلوم المفارق واحدن ماشكى الفرقى
وﻻ جرب اللي يشتكي المشتحن منه اﻻ ياوجودي يااريش العين يالطرقى وجود الصويب اللي جدا حالته ونه |
اسعد الله صبح قلبك مع صباح احبابك
يامصبحني بصوتك جعل ما اعدم صوتك والله اني يوم افارق بسمتك واهدابك مايصبرني سوى ترديد نظم بيوتك |
أشرقت شمس الصباح وشعشعت بالديره
والسماء لحن الحياه يلج به طايرها إنسياب الماء وكنه ماشي(ن) في حيره مع مخاضير الشغايا أعجبت زايرها |
اسلى وانا قلبي بلاماك مشغول
ماكن مخلوقن من الناس حولي ﻻحول ياسيد الغنادير ﻻحول من عام الاول وانت سبة ذهولي |
ما انته من العالم وﻻ انته بمعقول
وﻻظنتي مثلك محلي ودولي حتى بحكيك يطلع الحرف معسول افقد شعوري منه وآقول ..قولي |
يادر ياياقوت ياالماس يالول
احترت في وصف الجمال الطفولي بالمختصر انا متيم ومقتول وﻻهمني هرجن يقوله عذولي |
ياغصن الاشواق ماشفته؟؟
بالله ماداعب أوراقك!! طير ليا رف بأجنحته يرفرف العشق بأعماقك |
الجفن سهران ويفره
هاجوس له وقت ماقد نام به مقلتيني شكن حره ذابن من الشوق ماتنلام |
دله على الجمر مركوزه
وقنادها فاح بأشواقي تضبط لي الراس وفيوزه واكتب من الشعر بأوراقي |
يكفكف الدمع بالمنديل
سهران مانام في ليله يكتب وهو مشعل القنديل ويله من الله ياويله |
اقاسي الجرح والصده
والنار بالصدر وقاده وليا طرالي طرف خده تزايد الهم بزياده |
الله يسعد أوقاتك مشرفنا بكل خير
أحسنت صُنعاٍ مدونه رائعه تستحق الإطلاع عليها أسأل لك التوفيق كل التحايا |
الله يسعد ايامك اخوي
الله يحفظك ويوفقنا واياك مشكور على التثبيت وسامحونا على التقصير |
اكتب من الشعر واوزانه
وارسل له الشوق بألحاني واللي نظمته على شانه يردده هو على شاني |
بسمتك في يوم(ن) تجلى صباحه
تسعد قلوب(ن) ودها في مشاهدك ياصاحبي والكون تعصف رياحه انا على ماضي هوانا معاهدك |
طيفك اللي كل مالديت وانه جنبي
اشهد انه ولع اشواقي وهي قد طفت صاحبي .. لامن ذكرتك قلت وش هو ذنبي اكتب بيوت القصايد.. والمشاعر جفت،،!! |
الحياه دروس والدنيا تجارب واجد
واللبيب يشوف مايحصل وياخذ عبره في دروب الخير خلك دايم(ن) متواجد الحساني تنفع الانسان داخل قبره |
طويت الغرام وكنه اليوم ماقد كان
وغيرت رمز حروف شعري وقيفانه توكلت باللي خالق الجن والانسان عظيم الرجاء رب المخاليق سبحانه |
♤على هامش الذكرى القديمه وحبن فات
ودربن مشيته بين حسنه وسياته جذبني شعور قد نسيته واظنه مات أثاريه باقي ماانتهت قو لوعاته♤ |
فرقى وغيبه حنين وحرق
وضلوع بالصدر منطرقه متى على الله يلوح البرق من ساحل الغرب الى شرقه |
شبوب الحطب في خايع يبهج الانظار
وخوتك مع ناس بخوتهم تماري تزيل العنا وتهيض الجاش بالاشعار يوم ان الردي لمقابل اهل الردى ضاري |
أسج القدم وابعد عن المشي فوق القار
أدل الديار وكم انا جيتها ساري أدربل واشوف الصيد من عالي المسبار واثور من البلجيك بعد ما اوكد عياري |
سقى الله زمان الورد والشوق والاشعار
ونبض الخفوق وكل مايعترض طاري على واحدن اشعل بصدري لهيب النار مريض المحبه منه ولاني بعد باري |
طوتنا الليالي وانتهى دورنا اللي كان
لو ان الصحاري لشوف الامطار شفقانه بأقاسيك لين آموت يالغالي الفتان وابكتب واغني لك من الشعر والحانه |
مزون الغرام اللي بها عشقنا براق
تهل العتب واللوم وتسيل اشناقه لها اعوام ما انزاحت وهمالها دفاق وحتى شعاع الشمس مابان مشراقه |
الا يالهجوس المركمه إتركي المشحون
ترى فيه مايكفيه قد زادت غبونه عن ضلوعه انزاحي وطيري بكل الكون دليل المفارق بان بالراس وعيونه |
صباح الغلا اللي منه ريح العبير يفوح
صباح الحروف اللي من شفاك مبحوحه صباح القصيد وبسمة الخاطر المشروح صباح الجمال ونكهة العشق وصروحه |
البارحه جيت شفقان لمداهيلي
في راس ضلع طويل نايف عالي وشبيت نار القصايد تالية ليلي واجر الالحان وارفع صوت موالي قدوعي الشوق والفرقى فناجيلي وهجوس فكري تجيني بالخلا الخالي |
أخذت لين الفجر مركب معاميلي
ماغير انا مع هجوسي جالس لحالي أسج عن ماجمعته من محاصيلي واقول للنفس فال الله ولا فالي ياويل حالي من الهجران ياويلي اظن موتي بعد فرقاه اشوالي |
لبيه ياللي غلاها ذوب عروقي
يمشي مع الدم ساكن داخل اعماقي لو بيت شعري يترجم شي عن شوقي قصايد الكون ماتستوفي اشواقي |
| الساعة الآن 06:23 AM |
Powered by vBulletin .
جميع الحقوق محفوظة © لشبكة ومنتديات البراري 2010