|
مسابقة البراري الشعرية الأولى لعام 1430هـ
السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين مسابقة البراري الشعريه اولا : اللجنه 1/ابوعبدالله (الشاعر يوسف الخليفه) 2/ذيب طميه 3/الغربي الية المسابقه نقوم بطرح بيتين ويقوم الشعراء باكمالها بشرط الا تقل عن 10 ابيات ولا تزيد عن 15 بيت وان تكون مجاريه لها في المعنى والجائزة تسلم من ادارة البراري المطلوب مجاراتها تكون تكلم عن القيظ يابجاد لاتنشد عن الحال يابجاد **** حالي كما طير (ن) عديم الهدادي يبغا الهدد ومقيدينه بالاقيــاد **** سبعة شهور(ن) حالته في ترادي ذيب طميه |
القصيدة في يالله يالربع شدوا حيلكم الله الله بالمدح فيني ولاتصير علوووووم :36_15_8[1]: لا عاد خلوها عن القيظ والهمة يالاخوان :0018::0018::0018::0018: |
بيض الله وجهك يامشرفنا الغالي ويالله ياشعارنا مثل ماعودتونا لاتاردون الا على الجزلات واطربونا يامال العافيه |
ماشالله عليك اخوي مزن البرد صح لسانك |
ياسلام عليك يابو خالد
بيض الله وجهك على هالمجاراه الرائعه وين الشباب نبي تفاعل |
ماشاء الله عليك
وين الشعار.. |
صح لسانك يابو خالد ياخوان حنا حاطين جائزه وحاطين لجنه على الفاضي !!! وين الشعار ماتقدم الا ذيبان مزن البرد يلا شدوا حيلكم |
الله يعطيكم العافية وعساكم على القوة
طيب اللي يحبون يسمعون الشعر مالهم جائزة |
أبشروا بس الوقت متأخر الفجر قرب الوعد ان شاء الله غدا
|
يالله ياشباب نبي تفاعل
|
اقتباس:
بشرك الله بالجنه نحتريك ياشاعرنا والله يوفقك يالغالي |
الشكر الجزيل وبارك الله فيكم ووفقكم لكل خير وحفظكم ورعاكم |
يابجاد لاتنشد عن الحال يابجاد **** حالي كما طير (ن) عديم الهدادي يبغا الهدد ومقيدينه بالاقيــاد **** سبعة شهور(ن) حالته في ترادي يابجاد كفخه بالجناحين مافاد****ولا تشوف عيونه الا سوادي في موق عينه نضرة الغبن تزداد****ولايبي من غير مخلبه زادي العام صاد وتالي الوقت منصاد****يابجاد حده من عنى الوقت حادي هذي حياته أسر وقتال وحداد****بين السما والارض ميل وجهادي ياكم تغنابه من الناس نشاد****طير(ن)غدا مع كل تحليق شادي ولا يعيب الحرواشي ونقاد****والقيض عنده مثل نفح البرادي اجل لويش الطير ياصاحبي ساد****واصبح وسام ورمز هاك البلادي وليش في هاك الزمن للخوي جاد****ايام دونه ما يفيد اجتهادي واللي خلق يابجاد طغاة وعباد**** انك لاعاد تزيدها يابجاد(ي) لكن دام انك عن الحال نشاد****يابجاد كلي شكر رب العبادي وكف الكريم تخامس كفوف الاجواد****ولايصم اذنه عن اللي ينادي وختامها بالمسك والورد والكاد****صلاة ربي للنبي الهادي والعذر والسموحه |
يابجادلاتنشدعن الحال يابجاد حالي كما طيرٍ عديم الهدادي يبغاالهددومقيدينه بالاقياد سبعة شهورٍحالته في ترادي تصخف له قلوب النشاما والاجواد يبكي على ايام الهدد والبرادي يا طير لا تبكي ترى النوح ما فاد اصبر وصبرك لا يجي له نفادي لا بد من يوم ٍ يجي فيه ميعاد اما وعدنا صبح والا هجادي مع خوة ٍ معهم شغاميم الاولاد اهل الفعول الطيبه والمبادي ويقال زل القيظ وسهيل منقاد يضوي جنوب الدار ما نيب غادي يا القيظ لا عاد المحل منك لا عاد ما شفت منك الا الشقا والنكادي لا نيب منشود ٍ ولانيب نشاد وضعي على ذا الحال ما هوب عادي دمعي على خدي مجاويز وافراد لا ياسموم القيظ نكدت زادي لا عيشة ٍ تسوى ولا راتب ٍ زاد حرمتني من روحتي واجتهادي وين انت يا عشب الفلا مثل الاطواد ظني شواك القيظ شوي الجرادي وين الغدير اللي ورى الضلع من غاد جف الغدير وهاك علم ٍ وكادي يا القيظ وش سويت فينا كذا عاد تقلب بياض ايامنا للسوادي |
الله الله صحت السنتكم جميع وبيض الله وجيهكم عضو لجنة التحكيم |
يابجادلاتنشدعن الحال يابجاد حالي كما طيرٍ عديم الهدادي يبغاالهددومقيدينه بالاقياد سبعة شهورٍحالته في ترادي تصخف له قلوب النشاما والاجواد يبكي على ايام الهدد والبرادي يا طير لا تبكي ترى النوح ما فاد اصبر وصبرك لا يجي له نفادي لا بد من يوم ٍ يجي فيه ميعاد اما وعدنا صبح والا هجادي مع خوة ٍ معهم شغاميم الاولاد اهل الفعول الطيبه والمبادي ويقال زل القيظ وسهيل منقاد يضوي جنوب الدار ما نيب غادي يا القيظ لا عاد المحل منك لا عاد ما شفت منك الا الشقا والنكادي لا نيب منشود ٍ ولانيب نشاد وضعي على ذا الحال ما هوب عادي دمعي على خدي مجاويز وافراد لا ياسموم القيظ نكدت زادي لا عيشة ٍ تسوى ولا راتب ٍ زاد حرمتني من روحتي واجتهادي وين انت يا عشب الفلا مثل الاطواد ظني شواك القيظ شوي الجرادي وين الغدير اللي ورى الضلع من غاد جف الغدير وهاك علم ٍ وكادي يا القيظ وش سويت فينا كذا عاد تقلب بياض ايامنا للسوادي هكذا هو الشعر الأصيل الشعر الذي تتلذ الأسماع بسماعه ونغماته المتوازنة هكذا الشعر الذي تشوقنا له من أيام الصبا لله درك يا شاعر البراري المتميز دائما والله لقد أبكتني أبياتك الجميلة وتعايشت معها معايشة صادقة اسمح لي فلقد احتفظت به في ملفي الخاص لكي أحفظها عن ظهر قلب وأرويها في مجالس الأدب كما لايفوتني أن أشكر جميع المشاركين واللجنة المنظمة ولجنة التحكيم على هذه البادرة الفريدة من نوعها في هذا المنتدى الجميل. |
يابجاد لاتنشد عن الحال يابجاد **** حالي كما طير (ن) عديم الهدادي يبغا الهدد ومقيدينه بالاقيــاد **** سبعة شهور(ن) حالته في ترادي ترا أنا بالاملاء ضعيف راسب ثلاث سنين الله يخلف لا تشرهون زلّ البراد وأقبل الصيف وقّاد وشتدّ لفح الشمس فوق العبادي في جونا فرق ٍ عن اديار الأبعاد حر ٍ وعج ٍ مع عديم البرادي لاجيت أبرقد كن بالجوف هداد يهدني هدّ الجبال الشدادي أزيد التكيف والحال ما فاد والجفن ما ذاق الهنا والرقادي والطامة الكبرى على كل الأعباد وقت الظهر حره شديد الوقادي وآخر شهر فاتورة ٍ سعرها زاد تقصم ظهر من حده الوقت حادي والنشره اللي ما تبين للأشهاد تقول توّ الجو ياناس عادي ستين تاصل والواهيب تزداد تحمس جميع الناس حمس الجرادي والله مالي حيل بالحر مقعاد بادق سلف الجيب للغرب ناوي بنوي مصايف جوها جو ّمعتاد معتاد دايم بالمطر البرادي خص ٍ ليا جيت الهدا جوها عاد تسمع مزون ٍ ترتزم بالرعادي |
الله عليكم وصح السنتكم وبيض الله وجيهكم
ايه ياشعار البراري هذ القصيد الزين الله يبارك فيكم ويجزاكم خير بس باقي اسماء ماشفناها الى الان |
ليتني شاعر كان تصير علوم ثانية ربي يوفق و يجزي خير من جلب الفكرة فكرة الموضوع ممتازة و رائعة دمتم يا شعار البراري سالمين |
بسم الله الرحمن الرحيم
السلام عليكم ورحمة الله وبركاته اشكر الجميع على هذي الفكرة ونتمى لها النجاح واقبلوا مشاركتي البسيطة لعدم علمي عنها غير بوقت متأخر من لليلة البارحة يابجادلاتنشدعن الحال يابجاد حالي كما طيرٍ عديم الهدادي يبغاالهددومقيدينه بالاقياد سبعة شهورٍحالته في ترادي يالذيب جاك القيض ماعنه نشاد ولاضنتي يفرح بها إلا السرادي اللي ماشاق سموعهم صوت رعاد لبكر الوسمي وهب البرادي وإصبح رباب المزن طافح ومنقاد ثم ساقه الله وأرتوى كل وادي وأخذ ثلاث ايام والخير يزداد مع مثلهن ثلاث واربع وكادي غيث ً يغيث إبلاد ويداوي إكباد اللي عليها القيض حرة نكادي من بعدها يامحلا جمع الأولاد اللي بهم للبر غاية مرادي ربعُ على الهقوات مافيهم أوغاد الكل منهم عن خوية يفادي ثم انتحينا والطويلات ميعاد نبغى مكانً ماعليه أنتقادي نضبط به الدله ونلحقه براد ونقضي لنا يومُ كايوم العيادي هذا مراد القلب ماغيره أمراد لكن وقت القيض بعلن حدادي لاطلعتً تطرب ولاصيد ينصاد والحر شارك في عشاه الحنادي ولكم مني الشكر والتقدير أخوكم / عبدالله السليمي |
اقتباس:
صح لسانك يالغالي وبيض الله وجهك اسعدتنا بمشاركتك معنا ياشباب الله يجزاكم خير ارجو عدم الخروج عن الموضوع المحدد للمسابقه |
الرجاء تثبيت الموضوع حتى نهاية المسابقة
مشكوووورين سلام |
الله لايهينكم ياشعار البراري الأشاوس بيض الله وجيهكم يالأبطال وأحب أعتذر من أخي أبوبطي على التأخير لاوالله إلا شلت هم إبن الأجواد / يقول حالي يابن الأجواد غادي * اصبر وأنا لا أحتجتني ذخر وإسناد / هذا الكلام وخل عنك الدوادي * أرجوا أنها نالت إستحسانكم وطلعت بالشكل المنتظر والمطلوب وكل الشكر العذر بنفس الوقت لأبوبطي والله يعينني عليه https://www.albrari.com/vb/images/icons/038.gif |
اسعدني مرورك وتعليقك اخوي
لاهنت |
والجائزة تسلم من ادارة البراري
هل هي سريه ؟ اذكروها |
ليست سرية
ولمن سوف تكون مفاجأه للجميع ونحن نحب المفاجات مشكووووور سلام |
يابجاد لاتنشد عن الحال يابجاد **** حالي كما طير (ن) عديم الهدادي يبغا الهدد ومقيدينه بالاقيــاد **** سبعة شهور(ن) حالته في ترادي الصيد روح مع ربيعه ولاعاد ولارجع المقفي بحاح المنادي والغيم قفا من سمانا بالافراد وارسل لنا جملة سمومٍ حدادي يجف منها ريق من كان وراد وتشهب القلبان عقب السوادي ويصبح لهيب القيض سرداد مرداد من عقب ماكانت شمال وبرادي يلفح بوجه اللي من العام معتاد براد نجد اليا اختزن كل وادي يالله بشغمومٍ من الودق مزداد تسبق بروقه للرعد فالهدادي حده شمالي نجد واقصاه فبلاد من للعرب جذر واصل كل بادي يامره ربي عقب عصرٍ وهجاد ولايوقف لين ترضى العبادي خمسة عشر يومٍ وهو يزبد ازباد ولاقيل وقف ارتزم ثم عادي تروى بها قلوب وحناجر وطراد ويفيض منها كل سدٍ يشادي وتعود ديار العرب خضر وجداد ماكنها الا ملعب اشهره نادي يارب صدفه خير من الف ميعاد وسط البراري عيد غير العيادي سامحونا يالربع تراها ارتجاليه بدون اعداد |
يابجاد
يا بجاد لاتنشد عن الحــــال يابجــــــــاد
حالى كمى طير ن) عديــــم الهــــــدادى يبغا الهدد وفديتـــه بالاجيــــــــــــــــــاد سبعه شهور ن)حــــالته فى تـــــــرادى والقيض يابجاد شد حـــاله يابجــــــــاد وصارو الناس فى منـــازلهم كالجرادى هذا قضينا فى الدنيـــا يا بجـــــــــــــاد وكفانا الله قيض الميعــــــــــــــــــــادى يوم تعرض الاعمال يابجاد لرب العباد وخذ منى يابجاد علم( ن) اوكــــــادي هذه حياه البدو فى قيض يابجـــــــــاد دله ونجر وربابه وبـــــــــــــــــــرادى ماهى حياه الحضر يابجاد مرقـــــــــاد بيت مجهز بالتكيف ومكبر الوســادى تحيه منى يابجاد يابجــــــــــــــــــــاد وصلاه ربى على رسول الله خير العبادى |
فكره اكثرمن رائعه نشكر من فكر واصاب نعم القائد
مجاراة ابو خالد طيبه وبيض الله وجهه نريد باقي الأخوان الشعراء يسعدونا بمالديهم من جديد ومفيدلاعدمنا وجودهم والله يعطيهم العافيه |
يابجاد لاتنشد عن الحال يابجاد **** حالي كما طير (ن) عديم الهدادي يبغا الهدد ومقيدينه بالاقيــاد **** سبعة شهور(ن) حالته في ترادي ولا كما شيب غدا اليوم منصاد = ومن اول معواه روس المبادي يجمع له الشاوي من الملح ما زاد=لين اعطبت رجليه ضرب الزنادي هذا كما حالي مع القيض لاعاد = ياجعلها يابجاد حال المعادي إلا بغيت البر فالحر وقاد = يغشاك من لفح السموم السوادي اقول مابه قيظ وان رحت مافاد = يحدا ضميري بشهب الال حادي ماشوف غير معكف الذيل ينقاد = ولا جهام الضب في نادي تحكمني الضيقات بطناب واوتاد = يارب فرجها ترى الحال زادي ومتى على الله نجمة سهيل تنعاد= يضوي سناها مظلمة كل وادي والا بغيت الحال طربات واعياد = تعال وانشدني بوقت البرادي خذ الكلام اللي تسلسل بالاسناد = يزهاه ختمي يالشنب واعتمادي |
موضوع جميل ولكن فيه غياب شعراء بارزين في الشبكه وياليت يكون هناك حماس مثل شاعر المليون .
|
الله حيه
السلام عليكم ورحمة الله وبركاته كيف حالكم بشرونا عنكم طيبين ان شاء الله صح لسانكم واااافين
|
لو اشتكي لبجاد وعناد مافاد من قيض ولا برد ولا زهادي ابسط يدي للي له الخلق تنقاد اللي رفعه سبعه بلايا عمادي هون على ابراهيم من بعد مازاد همه وخلا النار برد وبرادي يارب هونها على العبد ماعاد يقدر على قيض الدهر والنكادي متى تشوف العين غيمه ورعاد واشوف شعبانن تسيل وحمادي واشوف لي مخضار تبتل الاكباد في شوفته وتعيش مع جو هادي العيشه اللي بين ريضان وبراد ارخص لها حالي ومالي وزادي هذا وانا مانيب هاوي وقصاد شاعر وقدح البيت قدح الزنادي ماجيت ادور شرهتن بين الاجواد اهيم والشعار في كل وادي الشعر له هيبه وحكام وبلاد ويفرض علينا نلتزم في المبادي اخوكم / سعيد بن فالح ال قير القحطاني |
بيض الله وجيهكم جميع وصحت السنتكم وننتظر بقية الاخوان |
ياسلام
بيض الله وجيهكم ياشعار البراري |
========== بيض الله وجيهكم يا إخوان // حقيقة إستمتعنا بهذه المجاراه // ============= |
ما شاء الله تبارك الله //
بيض الله هالوجيه المنوره // اتحفتمونا // |
هل لازال المجال مفتوح ؟؟
ياليت تردون بسرعة لأني مادريت الا هالحين |
اقتباس:
نعم لا زال المجال مفنوحا // اتحفنا بابداعاتك // |
اقتباس:
الله الله وانا اخوك مفتوح لهالحين شد حيلك وحنا بإنتظار قصيدتك |
| الساعة الآن 11:12 PM |
Powered by vBulletin .
جميع الحقوق محفوظة © لشبكة ومنتديات البراري 2010