|
اقتباس:
ذا الطخما متا يبو محمد يالغالي |
الا بذكر الله تطمئن القلوب لا اله الا الله وحده لا شريك له هلا بالغالين ومرحبا ومسهلا بكبيركم وصغيركم وذكركم ونثاكم لا اله الا الله صلى الله على محمد اليوم ابغى اعلمكم بموقف حاصل لي منها اعلمكم ومنها تنتبهون لا يجيكم اللي جاني سلمكم الله عادة احط معي في السياره كيس واجمع فيه الله يكرمكم الزباله ثمن ارميها في اقرب حاويه يعنني نظيف ومؤدب ما ارمي شي في الشارع المهم ركبت السياره ونا اهيجن بشويش وما عندي للشيطان طريق تخيلوا الموقف واطلع الكيسه بيدي اكيد بيدي اجل برجلي بعض الكلام ما ودك يطلع المهم فتحت الدريشه ومديت يدي يوم وصلت الحاويه تكرمون حقت الزباله واقف وانا في السياره واذب الكيس في الحاويه اثر فيها قطو شوارع وحش ونتق من الحاويه ويخبط بوجهي ويجلس يطامر في السياره من داخل السياره وهي تشتغل وكنت مهدي وتبين سبحان الله الشجاعه فيني تحسبوني هوين الا واطب من السياره وانا اصرخ ومشت السياره والقطو فيها وانا طايح على حيلي وممدد رجلي عند الزباله الله لايفاشل المهم السياره مشت بالقطو ما علي منها انا قمت اتنافض احسبه الموت جاني وقامت براطمي تنافض مدري عاد هي روعه والا واصلة البكيه الاعتراف بالحق فضيله والسياره تمشي الين جاء حرف تي وستر الله ماجا سيارات اصلا وش علي يصير المخطي القطو وانا ماكنت اسوقها ههههههههههههه هو اللي في السياره ترا كلامي صدق وتضرب السياره في الرصيف الاوسط وتاقف وانا قمت اسحب رجلي كني طايح من السماء والسياره واقفه غلط بالطول شبه مسكره الشارع وانا ماجسرت اقرب من القطو لازال فيها ويطامر تصدقون يتمسك بالسقف الخبيث الله لا يفاشل ويمر ولد جاري توه صغير يمكن عمره الله يصلحه 13 سنه المهم جا يمي وقال وش فيك يالله تمشي وماسك ظهرك عسى مهوب يوجعك قلت جابك الله قبل الفضايح تعال يا ولدي انت تخاف من القطاوه ولا ما تخاف انشده قبل لا يجي الولد شي وغشي علي من الضحك قلت في نفسي ايه ماتدري خل عنك بس قال لا ما اخاف قلت متأكد قال اكيد قلت اجل شف في السياره قطو نتق علي من الزباله وانا اجدع كيسه فيها وخبطني مع وجهي وطبيت وخليت السياره له قال وينه قلت مايبي وينه شفه ولاي بديت اشوش يوم فزع الولد الله يخلف علي بالجنه وكل مسلم ورح له يالولد ويدخل عليه بالسياره وينهبل القطو زود اكثر من اول والولد يردد ماسكك ماسكك والقطو الوحش ما يحجر يطمر في وجه الواحد والا يدخل في ثيابه ويقطعك تقطيع المهم ودي اعد كم قلت المهم من مره شطحه خفيفه واقوم واجر الولد واطلعه من السياره قال وراك علي تبي تطلعني والا تطلعه قلت خايف عليك ينقز في وجهك ياولدي وفتحنا البيبان كلها ويطلع طلعت روحه مع اذانه امين انتبهو يالغالين عند براميل الزبايل ينتق القطو من الروعه ولا يدري وينه فيه ويصير ما صار لي وفي النهايه مانقول الا الحمد لله والشكرلله ولااله الا الله والله اكبر عدد خلقه وزنه عرشه ومداد كلماته ورضا نفسه |
السلام عليكم ورحمة الله وبركاته
يا زينك و زين سوالفك يا سحاب شقراء هههههههههه اجل نتق القطو بوجهك انا صار لي موقف مع قطو شوارع اقشر القطو مدخل راسة في قوطي حليب اطفال يلحس الباقي و نشب راسه في القوطي و قلت بفزع له بطلع راسه من القوطي اثاريه ما ينقرب انا خايف منه وهو خايف مني و كل ما قربت وحس فيني يهج مني و يصدم بالجدار و يرجع علي و كل ما حس فيني غير اتجاهه و في اقرب شي يصدم و يرجع و عليه لين جاء موتر مسرع و شاته هو و القوطي و راح عيش |
مرة مخيمين في روضة خريم و لقيت راعي غنم وشريت منه طلي كنه ظبي قام واحد من الاخوان و ربطه في طنب في الارض و طول الحبل له عشان يرعى بزعمه وهو بري ما ينقرب
قربوا منه الصغار و انطلق و الطنب مدقوق في رمل و انقلع و انحاش انا كنت متطرف شوي و اسمع الصجة الخروف انحاش الخروف انحاش و اجيك منطلق انا خوفي لا يدخل الروضة بين المواصير ثم وش يلحقه انا شغلت سيارتي و الثاني شغل سيارته و مطارد و كل ما قربت منه و نزلت امسكه انحاش اخر شي يوم طالت السالفة و يجيك الوالد الله يطول بعمرة و بالصالون صدمة ودخل من قدام السيارة ولا طلع الا من ورى و بعدها قام بينحاش ثانية وهو كله دم وانا امسكه و السكين معي و اذكيه و سلامتك |
اقتباس:
|
هلا بالعم سحاب شقراء
|
عليكم مطر يا سحاب شقراء؟
|
اقتباس:
انا منيب في شقراء انا بالرياض طال عمرك ولا جانا شي يجيب الله الخير |
يقولون الرشوش شمال الرياض ولا ادري انا في حوينا ولا ظهرت منه
|
السلام عليكم ورحمة الله وبركاته
|
اقتباس:
هلا يبو محمد ومرحبا وعليكم السلام ورحمه الله وبركاته |
مرحبا يا سحاب شقراءاسفرت و انورت
|
وين غديت يا سحاب شقراء
|
مالك حس ولا حساس كل ذا برد؟
|
ضروري تواجدك ربي يحفظك
تراك غالي علينا |
اقتباس:
هههههههههههههه هلا يبو محمد ومرحبا ان شاء الله اكون متواجد |
الا بذكر الله تطمئن القلوب لا اله الا الله وحده لا شريك له هلا حبايبي ومرحبا ومسهلا بالجميع اليوم يوم صليت الفجر ماجاني نوم قلت اسولف عليكم اوسع صدوركم جعلها ماتضيق من شر شوفو يالغالين ترا الي مايصلي يعذب نفسه وهو مايدري تلقاه قبل يحس بظيقه ترا راحه النفس ونشدوني ماتلقونها الا في صلاتكم تراي منيب ارائي لا والله ونا شايب بكرا منعفط في قبري بس هذي الحقيقه تجربه سبعين سنه فا الله الله في الصلات لا يثقلها عليكم ابليس والله الله في بر الوالدين تكفون ترا فيها البركه وراحه الباب رضا الله من رضاهم لا تنسون ابي اقول لكم سالفه حاصله لي كنت مره في الاستراحه من زمان ذا الكلام قبل ابيعها وفيه واحد من الاصدقاء قال لي يا سحا ب اذا ممكن اجيب كلب واحطه في الاستراحه لا ن عندي سفر والكلب غالي ذاك اللي كنه ذيب اللي اذانه مشنتره قلت لصا حبي ما فيه مانع وجاب الكلب وكان رابطه بسلسله وقال لي تراي شاريه ب8000 ريال ماهو حق شوارع ويبي له عنايه خاصه كنه ناقصني غثى سافر صاحبي وجيت الاستراحه من بكرا بس بيني وبين الكلب وقفة نفس ما يواطن ام عيشتي على العموم كنت لحالي وماخذ راحتي وكان الجو حا ر وقلت وراك يا سحاب ما تسبح في المسبح حلوه اسبح في المسبح ههههه المهم نزعت الملابس وش ذا الكلام وبعدين تفصخت ومن تفصخت والكلب ابن الكلب ينبح يمكن انه ارتاع اوقال وش قلة الحياء وانا علي صروال السنه الله لا يخزينا على العموم طبيت في المسبح كني طايح من السماء طش طش وماخذ راحتي على الاخر وكانت الساعه 10 مساء والكلب كنه مسبح امه ماسكت الله لا يلومه شاف غوريلا مهوب انسا ن المهم ازعجني بنباحه وقمت ارشه با الماء وانا في المسبح وليتني ما سويت شي ذا ما هوب يلعب حتى اكله من قواطي وعنده عزة نفس قويه تصدقون مربوط بسلسله حديد وقطع السلسله ترا كلامي صدق وصار يدور على المسبح ونا ادور معه الموت جاك ياسحا ب اين المفر وكا ن في المسبح قارب صغير بلاستك اللي ينفخ وقصرت من الدوران من الكلب الله لا يعافيه وجلست على القارب البلاستك وهو بس يبي مسكتي المهم وصلت مع الكلب وقال ما بدهاش وسواها وطب علي وتعال شفني اختبصت واطلع من المسبح وازلق وارتجت الارض وقلت واصل ياسحاب ياروح ما بعدك روح ولا لي الا سطح الملحق اسم الله علي مثل البرق وبغيت اطيح بعد المهم طلع ابن الكلب تصدقون حاول يرقا السلم ما قدر وانا متفصخ ماعلي الا صريويلي:a_laugh2: ترانا في شقراء نصغر كلش يوم اقول صريويلي هههههههه المهم فوق الملحق وانادي ولا حياة لمن تنادي ماعندي احد ولو جاء احد وشلون يدخل الا ستراحه مصكوك البا ب ومنداخل كلب بوليسي واقعد اساحره كوده يعقل ويترك هالحركات اللي مال امها داعي ومن شين الطبايع اسمه جون وطول الليل يا جون قيس قيس يا جون قيس قيس هذي لغه الكلا ب عندنا ومعطيني اشكل ويا ليل ماطولك ومامعي جوال كان اتصل على احد ومتفصخ وعلى سطح ملحق واخزياه يعني اللي يبي يجي يبي يقول لي استح على وجهك امحق من ليله خميس وامحق من سهرة مت عطش ومت جوع وحالتي حاله والمشكله الاسترا حه اللي وراي عوايل واخاف يحسبوني اطل عليهم وماكل تبن وملبد وبن الكلب ينبح الين جاء الفرج اللي بغا يروح فيها تدرون كم السا عه هالحين 8 صباحا يا ملا الصحن اللي يشلخ راس جون ابن الكلب وجاء احد الا صدقا ء الذروقين الله لا يلومه وطق باب الا ستراحه وانا على استحياء اقول جابك الله قال عسى ما شر قلت الا الشر بعينه واعلمه الكلب منطلق وانا فوق الملحق لاتقول افتح لي قال وش اسوي قلت سوات الله ابرك مدري المهم رقى على سيارته ورقى على السور وشاف الكلب قال وشذا قلت ارنب وشو كلب فلان الله لا يعا فيه سا فر وجابه عندي وش السوات قلت مدري قلت له تدري من متى وانا فوق قال من متى قلت من الساعه يمكن عشر ونص البا رح معك مويه تراي اترنح من العطش قال لا قلت الله لا يعافيك قال ترا ابروح واخليك قلت امزح المهم الشقردي جاب مسدس معه في السياره ما دريت انه مهبول الا ذاك اليوم ودليت اخاف منه بعد هذي قا ل وشرا يك يا سحاب قلت الراي رايك انت احترت الشمس حمستني قا م وفعلها واطلق خمس طلقا ت على جون وخفت من الطلق اكثر من جون اللي راح طشاش وقلت لصديقي بيض الله وجهك حليتها والله يعيني على راعيه اذا جاء ومات جون ونزلت من سطح الملحق وقلت لصديقي غمض عيونك الين البس ثيابي انتهى وصلات ربي على نور الهدا محمد ابن عبدالله صلى الله عليه وسلم ترا لولا الله ثم الرسول كان تلقونا مثل البهايم نعيش وسبحان الله وبحمده سبحان الله العظيم عدد خلقه وزنه عرشه ورضا نفسه ومداد كلماته الي يحبكم سحاب شقراء |
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههههههههههه
الله يستر عليك ليت فيه احد مصور المقطع كان علوم هههههههههههههههههههههههه الله يوسع صدرك بالعافية انا عفشي على ظهر سيارتي ناوي اكشت لروضة خريم |
كان لقيت شبكة هناك بتواصل معك من الروضة
|
فمان الله
ههههههههههههههههههه اتخيلك فوق الملحق |
ه
هههههههههههههه انا اليوم في روضه ابومتعب جعله للجنه في روضه خريم ليتني اشوفك :z-attack: |
معي لاند كروزر اسود مظلل والفين وثلاثه ليتني القاك منيب اقول البراري كلها سدره وضلالها فيه كل محشوم |
بسم الله صلى الله على محمد الا بذكر الله تطمئن القلوب لااله الا الله وحده لا شريك له اللهم عافنا فيمن عافيت ورحمنا برحمتك يا ارحم الراحمين يعلم الله اني احبكم كلكم ولا احمل في قلبي مثقال ذره كره لاي احد اللهم اشفي مرضانا وداوي جرحانا ورحم موتانا برحمتك يا ارحم الراحمين اللهم اقضي الدين عن المدينين اللهم فرج هم المهمومين لا ملجا ولا منجا منك الا اليك ياحي ياقيوم -- فيه هكا الواحد والواحد الله في سماه العالي وكل ابليس مخزيه الله -- تصدقون منول الحريم الا لبسن عباياتهن يلفنها على يديهن الين فوق الخصر ولا فقدنا المطر يجي ليله دخول الوسم تصدقون الشياب منول يبخصون ويعرفون كلش بحكم العمر والتجربه قولو وشلون اعلمك جعلي معدم محبتكم في سنه من السنين كانو مجتمعين الشياب وكل واحد يقول دخل الوسم وهو وسم بدايه الامطار وقال شايب وهم كانو الضحى يعني الصبح قال شايب ابد مايدخل الوسم الا بعد صلات العصر قالو وشلون نصدقك قال قوه معي يعني تعالو معي اوريكم وراحو لتينه الطبيب تشديد الياء ههههههه جعل الطبيب في الفردوس امين المهم الي على حد سور شقراء في الحميديه ماورا السور الا مستشفى شقراء القديم ووادي الغدير تراها جنب الباب الصغير الي يطلع على الغدير وجنب المقصوره ام الا ثل وراحو الشياب مع بعض لتينه الطلبيييب ههههه ويقوم الشايب ويكسر غصن من التينه وقال تشوفون بعيونكم ماطلع شي من الغصن هلحين مابعد دخل الوسم ولا صلينا العصر نبي نجي ووريكم ويوم صلو العصر ويجون للتينه ويقوم الشايب ويكسر غصن من التينه ويبدا السايل الا بيض يصب قال الشايب منيب اقول لكم اني ابخص جعلهم للفردوس كلهم امين يارب العالمين الي نعرف والي مانعرف منول يالغالين نحط في الصطح علم علشان نشوف اتجاه الهوا خل اعلمكم بسامي اتجاه الهواء عند الاولين الا جت من غرب يقولون الهوا مغيب نجوم ولا جت بين الغربيه والجنوبيه يقولون هيفي ويصير هواها على الكيف ولا جت بين الشرق والشمال يسمونها نسريه وهي اشد رياح البرد الله يدفع البلا بس في العظم وكثير من الناس مايطيبون منها الا بالكوي هههههههههههه مطرق حامي مع العلبا ههههههههههه جعلكم ماتشوفون شر ولا جا الهوا من شرق يقولون هواها مطلع شمس هاه عرفتو ولوكم تعلموني بس ابا اتوكد منول اصلح علم من التنكه هههههههههههه اقوم طال عمركم وقص من التنكه على شكل مثلث وحط لها مقضاب ولحمه في رمان بلي حق السيكل الي يجي في كفر ورا ولا لحمته احطه على اعلا جدار في البيت وهو لو تنفس عنده يدور مع كل الاتجاهات وميزته الا امطرت مهوب مثل القماش يخمل يعني يثقل ولا يعطيك اتجاه الهوا تمطر ولا ماتمطر يعطيك الاتجاه للهوا الصحيح انا وشوله هلحين اعلمكم ههههههههههههههه امزح عليكم جعل ربي يسعد قلوبكم والله العظيم والله العظيم مرتين ان انحن اطهر شعوب الارض بس الاجناب غيرونا بكثره غشهم وكذبهم علينا وطمعهم فينا اعوذ بالله يوم جتنا النعمه وهم كابين علينا ومنول ترا كانو في العراق والشام يعيشون في نعيم ولا شفنا منهم شي ونحن يعلم الله بحالنا جوع ومرض وحيات الله يعلمها واليوم باهزونا ذا السواريه شعب كامل عندنا ويركبون احدث السيارات ويسكنون في الفلل والقصور وكله يجيهم مجاني من جمعيه الملك عبدالله لرعايه الجاليه السوريه ادري كله علشان حريم الملك عبدالله السوريات بس مهوب شعب كامل الله يرحم الحال بس ويعدل المايل وفي الختام اخاف ينحذف كلش مثل الاوله ههههههههههههه اقول لكم تراكم ملااكه وكلكم طاهرين خذو العلم مني ونتم سكان الفردوس ان شاء الله بعزته وقدرته الله يغفر لي ولكم ووالدينا ويسكنا الفردوس وبشر بالسواليف وكملت ودملت وفي الا صبع الصغييير دملت او كملت وحملت وركبت حميرها وشنقلت وهذي قصيده لي للي يحب القصيد --- الـمــعـجزه بــعـيـونـنـا شــانــهــا شــــآن و حـنــا نــدرعـــم مــا نــعــرف الــركـاده سبـحان مـن يـنـشي مـن الـغــيــم بركـان و يــنزل عـلـيـنا مـن اللـواهـــب بــــراده إلى أبـرقـت شفــنـا اللــواهــب و نيـــران وإلى أرعـــــدت تــرتـــــج دار الـعــبـاده* ثـنـتــيـن وجـتـمعـوا نـقـيـضـن و نقـضـان مــاعــونهــن واحــد وحـــلــون شــرابــه سـبـحــان ربــي عــد كــل كـايـنـــن كــان سـبحـان مـنـشـي الـكـون معـطـي عـبـاده أكـتــب و دمـعــي فـوق الأوجــان هــتــان يــاالله طـلـبتــــك رحـمـتــــك و السعــــاده *دار العــبــاده هـي الأرض سحاب شقراء ------------------------------------------------------------------ وهذي اخرا بعد لي السلام عليكم ورحمه الله وبركاته هذي قصيده لي كاتبها من سنين وجاني رد عليها قلت تشوفونها كودها تجوز لكم يالغالي الحـــــريــرقا ونا فـعـاتـــه سبـــوقـــه والبــوم يـنعــق فـي مــداهـيل الخـراب والحـــر يجـلب في مـــزايـيـن سـوقــه ويـنبـاع ويشـــرابالملايـين وش جـاب والحـــر يـــرقا مــع نسانـيس شـوقــه والبـــوم يجحــر في السراديب مـرتاب وبلقيــس تحكــم فـــي زمـان العقـوبـه وظاعـت مراسيم الثرا وظاعت انساب والشيــن شيـنــن لـــو زها فيه ثوبــه والعـقـــد يسحــر ناظره وسط الارقاب والحــــر يطمـل من الحباري وتعــوقه لا ما يـصـيــد الحـــر والحــر منصاب سحاب شقراء ----------------------------------------------------------------------------------- وهذا الرد من الشاعر البدوي يـــا الله يامـنـشـي مـخـايـل حـقـوقــه بيدك تصاريف البشروالايام بحسـاب عنـي عـلـى نفـسـي طـهـوم سـروقـه تطمـع غـوى وتوثـق الذنـب بعـقـاب سحـاب نجـد الضيـف يلـقـى غبـوقـه ويصبرعـلـى ماضـيـفـوه الاصـحــاب يشـرب بــراد الـمـاء وتـبـرد حلـوقـه والصدر يستوعـب مواليـن واغـراب مـنـهــم ومــنــا نسـتـفـيـد الـلـحـوقـه وشمس المعارف عند عباد الارهاب ان جــاء سمـيـن نسـمـنـه مانـبـوقـه وان جاء هزيل نسمنه لاهـل الالبـاب صــدري وسـيـع مــا تبـيـح عمـوقـه وحـرام مافـي خافقـي غيـر الاحبـاب الـمـسـك فـيـيـدي للنـشـامـا نـسـوقـه والعود الازرق والشحم طب الاطباب هـذي عوايـدنـا مـشـت فــي عـروقـه بــدو خلـقـنـا الله نـصــادم ونـنـصـاب مـــر تـجــي فـيـنـا سـهــوم سـبـوقـه ومـر نصوبـهـا عـلـى كــل مـضـراب الـبـدو وقــت الـوسـم تـتـبـع بـروقــه لعيـون وضـح ترجـي البـرق ليـغـاب والـحـر حــر ولـــو شـلــع ماتـعـوقـه جنحان خفاقه والفضـاء تـوه ابـواب الشاعر البدوي |
السلام عليكم ورحمة الله وبركاته
صبحك الله بالخير اخي سحاب امس في روضة خريم بلشت بعمري و عيالي مالقيت شجرة نجلس تحتها زحمة الله لا يوريك ذكر لي احد الاعضاء هنا ابو مبارك ان جنوب شرق الروضة زين وهو صادق بس كثرة الناس مشكلة بس جاب الله عمال النظافة عشرين ريال ولو تبيه يشيلك مع القش شالك و يدلك محل زين و شجر و ضلال عفشي واجد و بحلت فيه صبور سمر و دبات موية و فرش و قدور كنا حجاج ههههه بس الحقيقة كان الجو و الربيع خيال جدا جدا انبسطو العيال و الصغار و صلحنا قهوتنا و غدانا يوم صلينا العصر الى العمال مواعدهم و مغريهم بعطيهم زود عشان ما يهملوني واشوى جو وشالوا العفش و رحنا شرقيها يم النفود الى بعد المغرب و صلينا و هضلنا و كانت رحلة رائعة بس ياليتني لقيتك و ابشرك ضيعت سيارتي هههه ولا انقذني الا الريموت تضغطه من بعيد و تولع الانوار لكن عمال النظافة يدلونها شبر شبر يوم شالوا العفش قلت براقبهم من بعيد بشوف هم يعرفون مكان السيارة او لا اثاريهم نصوها نصو بس الحقيقة كانت كشتة ملكية و ما نفصني الا شوفتك ليتك معطيني رقم جوالك كان قدرت اتواصل معك |
هلا ومرحبا يبو محمد انا كنت عازم على الروحه لخريم بس اوجعني ذا الظهر وقالو لي عيالي يازينك قاعد بالبيت وخل خريم لهلها ولا رحت |
السلام عليكم ورحمه الله وبركاته بسم الله صلى الله على محمد الا بذكرالله تطمئن القلوب لا اله الا الله وحده لا شريك له عسا ما تقولون ابلشنا ذا العود بسواليفه ههههههههههههههه اذكر فيه عجوز الله يغمد روحها عليين وهي بالحالها ماعندها عيال وشايبها ميت وهي تحبني طبعن للحاجه وهي حرمه مزوحه وعياره وحبيبه جعلها للفردوس ووالدي ووالديكم وكل مسلم رحت لها وانا توي جذع واصوت لها ياام فلان ياام فلان قالت من عند الباب قلت انا قالت يالله تحييه واليا حيا كثر وادخل والقاها ياملا الجنه تسوي كليجا واجلس عندها وكل ماطلعت من الكليجا يصير حار ولين وانا ما اقدر اقاوم وكل ما طلعت كلته وانا جالس عندها اسولف عليها وهي تسوي كليجا واشرب ماء من الزير جنبي (جنة حمار ثغب وثيل ههههههههههه) وحامت كبدها مني والا فيه دجاجه مشغلتنا وقالت وراء ماتقوم تدخل ذا الدجاجه في سحارة الدجاج تراها وانا امك غثتني تجي وتنقر الكليجا واقوم على الدجاجه علشانه دجاجه اتجيود عليها وكل ما جيت امسكها انحاشت وكم مره انقز ابي امسكها وتنحاش واجيك ساح على الارض وحمقتني وصارت مرافقي تصب دم من الطيحات واقوم واحجرها ابيها تطيح في التنور واكشها واكشها والعجوز قاعدة تهوش علي ياوليدي غبرتا علي وامتلا الكليجا والعجين تراب خلاص خل الدجاجه الله لايعقلها ثورتا غبرة الحوش علينا وصدق تكدر الجو مع المطارد واحجر الدجاجه الين طيحتها في التنور وتقوم العجوز الله يرحمها وتلقطها من التنور وترجمها في الحوش والا رجلين الدجاجه ذايبات من الجمر هههههههههه واجي واجلس ثانية عند العجوز وهي تقول لي وش حدك تحجرها على التنور قلت ما حجرتها هي اللي طبت فيه قالت انت تدري هذي ازين دجاجي واكثرهن بيض واقعد اكل كليجا وهي تهوش علي ولا معها مثل مضرب تنس الطاوله حق البنق مخصص للكليجا هو اللي يخلي الكليجا تجي منقشه وحامت كبدها مني عقب الدجاجه وقضييت الكليجا قاعد اكله قالت انت مابعد شبعتا الى هالحين كل كليجاي في بطنك قلت ماكلت الا ثنين قالت لك ساعه وانت تاكل كليجا وتقحن من الزير اسمع عاد تبي تقوم والا الخك بذا اللي معي تقصد اللوح حق الكليجا وصرنا هالحين اعداء واقوم والقط كم واحد وانحاش وتلحقني واذكرها تويق مع بابها علي وتقول هين والله لاعلم امك عليك يالهيس الاربدي وين راح ذاك الترحيب اول ماجيت وانقلب طردي ويجي يوم وانا جالس في السابوط حق المجباب جنب دكان السليمي الله يغمد روحه الجنه ترا السليمي ياملا الجنه مهوب رجال طويل والله اني كني اشوفه هالحين رجال قصير وله لحية بيضاء جعله في عليين ووالدينا وكل مسلم وجنبه دكان ابن سعيد ياملا الجنه البارده وبن سعيد بعد ماهنا طول وكلهم يفتحون جنوب والسليمي دكانه اذا وقفت في الباب اله بالطول وبن سعيد اذا وقفت في الباب اللي ندخل معه تصير فسحه الدكان من يسار وانا جالس في السابوط حق المجباب والاها جايه راعية الكليجا تمشي مخليه حجرة السكور وراها ماانتبهت لها ويوم وصلتني وتطمر علي وارتاع وهي سمينه جعلها في عليين ومع طمرتها علي تخاف انحاش عنها وانا اصلا ماانتبهت لها المهم وتطيح علي وانا على درجه دكان السليمي ويخبط راسي على الحصاه وصراحه دخت وصعرر راسي غدا الصعرور كبر البنق او كبر البيضه حقت الدجاج وتقعد هي ياملا الجنه تفرك الصعرور وتقول لي يوجعك قلت ايه وتقعد تصيح وهي تفرك الصعرور وتقول كله مني كسار يكسرني وتقعد تطق رجلها وتقول كله مني كله مني وقلت لها تراه طاب وهو طالع كنه راس ثاني ويوم قلت تراه طاب معاد يوجعني قالت معاد توجسه قلت لا وقامت ومسكت اذني وفركتها وقالت في حرتن عليك وبظهرها ياملا الجنه المهم ومسك يدها وهي تون توجعها ركبتها هماها طبت علي ظربت ركبتها ياملا الجنه في الحصاه هي بعد خبله ولا تطب علي والله العظيم اني احسب السابوط طايح يوم تطب علي وهي دبيه بعد بس راعيه مزح وقالت لي تكفا ياوليدي امسك يدي معاد اقوا امشي من ركبتي ومسك يدها وكل شوي جالسين الين وصلتها بيتها وهي تقوم وتدخل وتصك الباب في وجهي وتقولي هلحين خذت حقي منك ورح لبيت اهلك الله يصلحك ما عنديش يوكل وهي غشيه من الظحك علي الله يجعلها للجنه البارده الله يحللها ويبيح منها كنها هي المخطيه على هههههههههههه واذكر جيتها مره والاها ماسوت كليجا منول ريحة الكليجا نشمها على بعد نمشي على الريحة واقول لها اثرك ماسويتي كليجا قالت منيب وكيلة الله على خلقه يومك ماتجي الا لبطنك:a_laugh2: وفي النهايه مانقول الا سبحن الله وبحمده سبحان الله العظيم عدد خلقه وزنه عرشه ومداد كلماته ورضى نفسه |
يالغالين انتبهو الا رحتو لروضه خريم انا حصلي موقف لا احسد عليه في سنه 203 وتوي شاري سيارتي لاند كروزر ياحضي ههههههه المهم كان وقت ربيع وروضه خريم مربعه مثل ذا الوقت المهم وقفت سيارتي عند الصبات ونزلت للروضه وبعد ساعه او ساعتين شفت بزور حول سيارتي ويويقون فيها ورحت يمهم يعنني راعيها ونا اخاف يمشخونها انتم خابرين اللون الاسود يبان فيه المهم وصلت السياره وفتحت الباب وراحو البزور الا واحد مبعد الا شوي وصك الباب ونا اناضر بتجاه الروضه ويوم خطيت خطوه وجي ابا اخطي الثانيه وحس جسمي كله كهرب سبحانك ربي ويوم طالعت تحت رجلي ولاي وش اشوف داب يعني ثعبان يجي طوله متر ونص وراسه كبر كف اليد وله قرنين طول الاصبع والظاهر انها ام قرون ولا بين رجلي وراس الداب الا يجي شبرين وبعد رجلي عنها ونسبع يعني مدري وش جاني تيبلدت وقول للبزر شف ذا الداب وهو الي يركض لسياره ابوه ويجيب عجرا ويجلد في الداب الين ذبحه بعد مطارد بين الشجر تصدقون البزر مايجي عمره 9 سنوات بس طلع شقردي وحسن مني الي ابا اقوله انتبهو جعلكم ماتشوفون شر لا انتم ولا عيالكم تراها مليانه دواب وهم شي انكم تدعون دعاء المكان وتتحصنون والباقي على الله سبحانه |
سوالف جميلة يا سحاب ههههههههههههه
اجل اثاريك معشت على هالعجوز كل يوم كليجا بلاش المفروض كل سبوع تعطيها حق اللي اكلته ببلاش ما يتهياش وهي تشري دقيق و دبس و شغل و تعب وانت تجي تاكل و تروح الله يبيح منها و يغمد روحها الجنة |
يا مرحبا يا سحاب شقراء
|
اقتباس:
هلا يبو محمد ومرحبا اذا فيه سواليف عطناها يبو محمد |
يالمسلمين فاقد ابو سيرين عسا مافيه شي علموني وطمنوني
|
ابشر بعزك بس خلني ارجع للبيت
|
اقتباس:
|
السلام عليكم ورحمة الله وبركاته
|
الله العالم سواليف الاولين محد يبيها ولا فيه غيرك يبو محمد يسوي مداخلات جعل ربي يسعد قلبك ويسمح امرك |
هلا يا سحاب مالي في هالمنتدى غيرك احد
والله اني ادخل عشان اسولف معك بس ظروفك ما تسمح لك دايم بالتواجد عطني رقم جوالك خلني اشغلك بالواتس اب يا سنايدي |
اقتباس:
مدامك يبو محمد تقول كذا خلني اعلمك بشي شف يالغالي انا ابا اسوي عمليه في ظهري وخطيره بعد ان الله عافاني ولا جاني شي ابشر اعطيك رقمي ومن عيوني يبو محمد ون لا قدر الله صابني شي وهذي نسبتها كبيره وش ذنبك يبن اخي تظيق صدرك علي هذي الحقيقه يوم شفتك مصر وسلامه قلبك بس وشبلاك يبو محمد ماتكتب لنا سواليف |
هذي قصيده لي وشايلها الغالي وميض الصاعقه جعل ربي يسعد قلبه اهديها لك يبو محمد همن في قلبي لو قسمته على الناس تسمع جميع الناس منه يصيحون قصيده- سحاب شقراء شيله وميض الصاعقه https://cdn.top4top.net/d_fa390538e41.mp3 … … |
اقتباس:
ياليت اسم المستشفى لكي ازورك و اتطمن عليك اذا ممكن |
اخوي سحاب ودي اكتب لك شي بس عجزت
بالي مشغول مع العملية اللي بتسويها وان شاء الله انها طهور والله اني احس اني اعرفك من سنين طويلة مع ان معرفتنا ما صار لها كم شهر لكن بعض الناس ترتاح له من اول سالفة معه ربي يسعدك و يشفيك ويردك لنا و لعيالك سالم و غانم و بأتم الصحة و العافية على فكرة جوالي عندك في الخاص كانه موجود بلغني او ارسله لك ثانية تحياتي الحارة لك |
| الساعة الآن 05:25 PM |
Powered by vBulletin .
جميع الحقوق محفوظة © لشبكة ومنتديات البراري 2010