|
اقتباس:
منيب معلم احد بشي يفشلنا ههههههههههههه شرفتني شرف الله قدرك ومقدارك يالغالي |
اقتباس:
انا يالغالي رابط فرامل على ال خمسه وثلاثين منيب متعديها ابد ابد هههههههههههه انا طالع على جدي ياملا الجنه واصل للميه وكل ماسئلته يقول 90 شرفتني يالغالي شرف الله قدرك ومقدارك |
السلام عليكم ورحمه الله وبركاته ياالمسلمين يازين الشباب زيناه والله اني صادق ياليت الواحد مايتعدا عمره عن 30 سنه يبتل الين يموت وهو ابو 30 سنه هههههههههه انتم تدرون ان اهل الجنه الله يجعلنا منهم كلنا ووالدينا وذرياتنا وحبايبنا جميع اللهم امين انتم تدون ان اعمارهم 33 سنه كل الي في الجنه وما يتعدون ذا العمر ابد سبحان ربي عدد كل شي بس عليكم بعامود الدين الي هي الصلاه لا تخلونها ان صلحت صلح الباقي وبدونها مايصلح شي يقولون الاولين عن الصلاه 1- نور في الوجه 2- سعه في الرزق 3- طول في العمر وهي احب الاعمال الى الله سبحانه وتعالى ولا تذكرون احد الا بالخير - ونتبهو يالغالين اعراض المسلمين لا تقربونها لا بزين ولا بشين تراها عند الله عظيمه وحصنو انفسكم كل ما اصبحتو ومسيتو بئايه الكرسي والمعوذات جعلكم ما تشوفون شر كلكم ولامن تحبون تراها تحميكم بعد الله سبحانه من كل شر === من 60 سنه او اكثر يعني في دخول المربعانيه والبرد الشديد يبدا المشق يعمل عمايله ههههههه تمتلي يدينا ورجلينا وخدودنا بالمشق ههههههههههه والمشق اعتقد انه جفاف يصيب الجلد من استعمال الماء البارد ايام البرد الشديد وتعال شف صياح البزور منه ولا جا مسيان يعني قبل النوم يقعدن الحريم يدهنن رجلين ويدين عيالهن وخدودهم باالكريم زان وهو الدهون الي متوفر منول ولا ابو فاس وذا دهون بعد ويقومن بعد ما يدهنن رجلين عيالهن يجيبن كيس باغه ويدخلن في كل يد وكل رجل كيسه ويربطنهن علشان يلين الجلد ولا يتشقق وطول اليل ماتسمع الا خرفشه اكياس الباغه وذكر بعد الا قمت من النوم مقوا افتح عيوني ابد اقعد اتلمس الجدران ولا ادري الا براسي خابط في الساريه والساريه هي العمود الي تشيل البيت منول نسميهن سواري ويصيرن في وسط المجبب وبعض الحجروهن عمدان مبنيه من حصى ونسميه خرزالسواري شكله دائري من تحت الين السواتسيف ههههههه ماعرفت اكتبها المهم مدري الا براسي يخبط في الساريه ويصعرر راسي من قو الظربه والسبب الي يخلي عيونا ماتفتح هو الغمص شين يصيب العيون منول ماده تفرزها العيون مثل الشمع وتشبك هدب العين مع بعض ونقعد نشيله ويوجع بعد ولا يروح الين ما يبقا ولا رمش في العين يطلع الواحد احمص مافيه ولا رمش الله يرحم الحال منول وبس - ولا جانا مطر وغلب الامطار تجي منول في الليل ولا طوول المطر علينا يصيرون الناس خايفين من بيوتهم لياها تطيح - انتم دارين ان فيه سنه من السنين استمر المطر 58 يوم متواصله ولا شافوالناس الشمس ابد وسموها سنه الهدام والحمد لله شقراء ما طاح فيها بيوت واجد والي تظررو كثير اهل بريده في القصيم هم الي طاحت عندهم بيوت واجد الله يغمد ارواحهم في جنات عليين ويبدلهم عن ما صابهم بالفردوس الاعلى من الجنه ووالدينا وكل مسلم - ترا اهل شقراء يحبون اهل القصيم كلهم والله اني صادق شي اعرفه ومتوكد منه - مره قالي ثلاثه من العيال الي كبري ذاك الوقت الله من زين الحكي اكيد انهم كبري هلحين هههههههههههههههه قالو وشرايكم نطلع كشته ونسوي عشا ونتعشا ووافقنا كلنا وتفقنا ان نكبس كبسه على الحطب جذوع اثل بس كلش زين منول المهم نسوي رز مع تونه ونتواعد في مكان بين النخيل اقرب مالنا مزرعه العليا حقه سعد ابن خضير ياملا الجنه البارده والله كنه قدامي هلحين الله يغفرله ووالدينا وكل مسلم المهم مزرعه العليا ورا ظهورنا وحنا جالسين في حياله مافيها نخل ولا شي اسمها الطالعيه وحد يسميها الزوه حنا جالسين في علو الزوه ونا طالع على رجلي من عند المسيل الين وصلت ولقيتهم فيه اشوا لانهم طالعين على ددسن ابو واحد منهم وكان فيه كلاب كل شوي هاده علينا ونرجمها بالحصى الين تبعد ولا هدن علينا الابعد ما حطينا القدر بين حصاتين وشبينا الضو المهم ونتعشى وكانت القبله فيها بروق مولعه سحاب مقبل علينا ونا اشوف العيال بينهم شي يوصوصون بينهم لمحتهم كم مره كن فيه امر يبي يسوونه المهم يوم بدا السحاب يمطر والكلاب تنبح والبروق تبرق وتروع صواعقها ويقومون العيال ويتطامرون في الددسن وينحاشون عني هههههههههههه اوريكم هين وياقفون من بعيد ويقولون رح ارجع على رجليك بس انتبه لا تزلق ولا يعضك كلب تراهن مسعورات قلت تكفون وقفو قالولا مناب موقفين تذكر يوم انحن نسبح في منحات الوسيطى وتجي تاخذ ثيابنا وتخلينا نجي نمشي قدام الله وخلقه ما علينا الا صراويل هههههههههههههههه هذي بدالها ويروحون ويخلوني ما عندي الى باقي الضو وبدت تطفي والسما تمطر ونا الي انطلق ركض ودخل مع نخل العليا وكان مافيه باب بس مكان الباب موجود الي يطلع على الطالعيه وحاطين فيه جذع اثله عن الحمير لياها تدخل المهم وطلع مع الباب الثاني ولا الكلاب واصلاتني ركض بس فكني الله ان فيه باب وصكه وركض مع ذاك السوق ولف يمين ويجيني المسجد الي بين مزارع العليا والوسيطى وركض الين جيت على دباب مغيليثه هذا اسمه وش اسوي تراه موجود الا هلحين وتمشي عليه السيارات وهو كبري صغير يمشي معه السيل ومنول نسميهن دباب مدري وراه وروح مع شعيب المسيل ويوم دريت ولا هذولي المقاريد يمشون بددسنهم والددسن حق ابو واحد منهم بعد قالو جالسين نحتريك خفنا عليك من الكلاب ان انحن شفنا براهيم الغبيوي الله يجعله للجنه ونه قال لنا ترا الكلاب الي في الرحبه مغلوثه انتبهو منها وخفنا عليك ولاي امشي ونعالي في يدي قلت اجل خفتو علي هاه انتم دارين ماردهن عني الا باب نخل ابن خضير جعله للجنه ولا كان صرت من صيد امس ولا وقفت الركض الا فيذا قالو وحده بوحده قلت هين يجيبكم الله ههههههههههه وتمضي الدنيى على العابدين والله غفور ورحيم سبحانه- انا سويت لي ثلاث عمليات في المستشفى في وقت واحد بس منيب معلمكم وشي هههههههه المهم وطلع من المستشفى ويفرشون لي عيالي فراش في الصاله تحت علشان الاجاني احد يزورني اصير قريب - الله يكفينا شر ها الدنيا ما جاني احد ولا زارني احد ويوم جا نهار رابع ويضيق صدري وتدمع عيني ورا محد جا يزورني وقول لعيالي شيلوفراشي معا د ابيه- وروحوعني ابا اجلس لحالي وقولي كم بيت من خرابيطي ونا ظايق صدري وقول فيها يــااللــه صـــندوق الحشــى ضاقــت ركونـــه وضاقـــت علي الوسيـــعه وقلــت عزالــــــي يــااللــه يـاللـــي تعلــم الحــال وشلونــــــــــه مـا غيـــرك أحـــد,ن يفــرج ظــيقـــة البـــــالي أحـــس بــهموم ثــقل طويـــق مـــازونـــــــــه تبـــرك على الــقلــب ومنـــها الدمــع همــالي قـــالو ســـحابن ثقــــيل وتبــــرق مزونــــــــه قلــت إيـــه مــا تدرون عـــن لاهـــب الصـالي ذا البــاب صكــوه و طــلـبه لا تهـــجونــــــــه خـــلوني أبكـــي واهـــل الدمـــــع بلحــــالـــي أحـــس أنـــا بشـــئ أنتـم مــا تحـــسونــــــــه وبطـــوح الصــوت كنــي مـن العــقل خـــالـــي ســــــــمو عليــــــه و قـــــلبـــي لاتـــلومونــــه ودعـــوا لـي الــلـه أهو للغــــيث نـــزالــــــــي سحاب شقراء ونا ياالغالين لو اجلس اسولف عليكم ما قظت سواليفي - قولو امين الله يوسع صدوركم بالعافيه ويجعلكم من اسعد خلقه هذا الي في قلبي لكم - وقولو امين بعد مر ه اخرا الله يختم لنا ولكم ولوالدينا جميع وذرياتنا وحبايبنا بالفردوس الاعلى من الجنه وكل مسلم اللهم امين خل اعلمكم بشي ما تعرفونه تراي اكتب بصبع واحد يعني انقر مثل ما ينقر الدجاج العيش والله اني صادق وحمدوربكم اني ما اعرف اكتب بصابعي كلهن كان ما تلقون شي فاضي هههههههه وفي حفض الله جميع سبحان الله وبحمده - سبحان الله العظيم - عدد خلقه وزنه عرشه ومداد كلماته |
الله يعطيك العافيه عمنا سحاب على هالسوالف وصح لسانك على القصيده
|
اقتباس:
يالله تحييه هلا ومرحبا راعي العرض شرفتني شرف الله مقامك يالغالي |
السلام عليكم ورحمه الله وبركاته فيه ربع واجد يعني بشكه كبيره وكلهم اهل خير وصلاح ودائما يحبون يخيمون مع بعض ويمزحون مع بعض ويسوون مقالب في بعض والكلام هذا في الرياض المهم خيمو سنه من السنين في البر اكيد مهمب مخيمين في الديره هههههه لا تواخذوني يالربع المهم طقوا خيام في ثمامه الرياض يعني حطوا لهم مخيم ودلو يطلعون فيه المهم والله يعينكم على المهم فيه مجموعه طلعوا ذاك اليوم بدري شوي يبي يسوون الغداء او العشاء للباقين المهم وهم في الطريق لقو غرشه حقه سكار اللي تجي من برا المملكه طبعا الغرشه فاضيه قد قحنت او قد شربت المهم خذوها ومروا على البقاله وخذوا انواع البيره اللي تباع عادي ما فيها شي وراحوا للمخيم وسوو بريق شاهي وصبوه في غرشه السكار وصارت الغرشه كنها مليانه المهم وفرشوا في وسط الخيمه سماط وحطوا البيره دار ما دار على السماط وحطو غرشه الشراب في وسط السماط يبي يلعبون على اخوياهم اذا جو يسوون انفسهم سكرانين المهم سمعوا السيارات جت حقت ربعهم المهم جلسوا يسوون انفسهم سكارى يالله الواحد يقوى يتكلم مع رفيقه ويوم دخلوا عليهم ولاهم مهمب ربعهم ولاهم الشرطه العسكريه ويحشرونهم بالرشاشات هههههههههه المهم ويمسكونهم ويحملونهم في الجيوب حقت الشرطه العسكريه يابن حلال يابن حرام ماينفع والله العظيم انا نمزح مع اخويانا وشوفوا اللي في الغرشه قسم بالله انه شاهي ولاسرت جميع المحاولات المهم كلموا على عملياتهم او مركزهم وبلغوهم انهم مسكوا 8 اشخاص معهم مسكر وعيا يشمه العسكري المهم يقول لي واحد يوم سمعنا الظابط يكلم من مركز عملياتهم وقال من اللي معك ياعسكري قال معي ناس كفشناهم في مخيمهم ومعهم مسكر المهم قال الظابط ماهو عملك تداهم المخيمات ولا تبلشنا مع خلق الله هذا مهوب من اختصاصنا واطلق سراحهم قال العسكري ماني مطلق سراحهم قاله الظابط امر عسكري اطلق سراحهم وعندك حجز ثلاثه ايام متواصله في المركز هههههههه جت على راس العسكري وجاء الفرج من رب العالمين سبحانه خلهم يلعبون مره ثانيه وقام العسكري ووقف وقال لهم انزلوا ونزلهم ورفض يوصلهم مخيمهم هذا الا قالو بعض المزح مهوب زين |
سحاب قل آمين الله يلبسك ثوب الصحة والعافية والجمال والستر وطولة العمر والله أنك مونسنا بسواليفك ولا أخفيك اني قمت أشتاق لسوالفك واحيانا ادخل المنتدى ابي سوالفك الله يعافيك |
اقتباس:
ياجعل ربي يجعلك من اسعد خلقه امين يارب العالمين شرفتني شرف الله قدرك ومقدارك |
هلا ومرحبا بالغالين السالفه هذي من موووووووبطي يوم حنا ساكنين في بيوت الطين من سنين وبنين اذكر اذا جت العطله الطويله نسميها كذا نروح للرياض وشي ما يبي له اي ادنى نقاش البقره معنا هذي السوبرماركت حقتنا منها الحليب ومنها اللبن ومنها الزبادي او الروب اذكر ركبنا في الددسن غماره وحده فيها ابوي وامي الله يرحمهم وانا وبقيه العائله في الصندوق وطبعا البقره ماخذه كل الصندوق وحنا على جوانب الحوض تخيل المنظر وكل شوي تلتفت البقره علي وتلحسني ونعتبر هذا تواضع منها ونضحك اصلا ما نقدر نقول شي لان اي حركه منا يوقف ابوي السياره ويلخني لختين يقول وراك تجفل البقره وانا ماجفلتها يعني خوفتها وكان اذا رقينا ديراب تجيها حاله نفسيه صعبه يمكن مع الا رتفاع او الدوران في ديراب على فكره كنا نحسب ديراب اعلى قمه على وجه الا رض من الدلاخه المهم وصلنا الرياض وحنا في الشوارع نمشي كلن يسلم علينا وحنا فرحين اول مره احد يسلم ويبتسم لنا اثر الناس راحمين حالنا ونا عاد المس البقره مع ظهرها يعنني اعرفها وتعرفني قدام الناس بس احسبهم معجبين بها المنضراثرهم يتحمدون ويتشكرون المهم نبي ندور حوش للست بقره قبل لا ندور لانفسنا مكان المهم لقينا حوش خبابيز صغير واستأجرناه للبقره واذكر انه في شارع العطايف وجاء وقت نزول معاليها من الددسن تخبر حنا وثيابنا ابو كموم فيها رفايع في النص والثوب لنص الساق وهالعصاقيل طالعه ولانعرف تكرمون شكل النعال والله ان كلامي صدق وانحاشت البقره واويلتاه واويلتاه كلش ولا البقره تنحاش لو تقطع المحيط حنا وراها الله لا يعوق بشر ههههههههههههههه المهم تعرفون المثل اللي يقول شوط بقره هذا شوط البقره يعني تكون مربوطه طول السنه وتنطلق يسمونه شوط بقره يعني تجيب ابو جهدها في الركض وحنا وراها حدها حدها حدها تقول مهبل وطلعوا في الشا رع شي لا يوصف وبين هالسيارات ولا نمسكها الا في شا رع الخزان ولا ابوي الله يرحمه يفح قصر ظعيف اصلن مات الله يرحمه وقال كلمته .جعلها للذهاب ما بغينا نمسكها. والعالم تمشي معنا وحنا تقول ماسكين اكبر مجرم نزهو بالفخر وتروح العطله وحنا في سولافه البقره كل مادخلت على ابوي وامي جعلهم للجنه والا هذا حديثهم والاعاد ودك تشوف البقره حقتنا دوووووبيه ورجليها صغيرات يسمونها جرسيه تصدقون ياناس من الدلاخه لو الحكومه قايله كل واحد عنده بقره يسجلها في التابعيه ما خالفوا لو يحطون صورتها عادي تصدقون عاد وحنا في الرياض ما نطلع من البيت ابد الا للبقاله نشتر ي حلاو بقر ونرجع وشوله نجي للرياض مدري بس قوله ان انحن رحنا في العطله الطويله للرياض ترا مهيب بسيطه روحه الرياض منول شي من الخيال وبس قظت السالفه |
السلام عليكم ورحمه الله وبركاته هذي سالفه قديمه جداحاصله لي ايام بيوت الطين اذكر فيه مرة وانا صغير قالت لي امي جعلها للجنه وكل مسلم رح وانا امك لفلانه عجوز الله يغفرلها رح لفلانه جب الغرض الفلاني مانيب معلمكم وش الغرض وش عليكم مني ههههههههههههه واروح للعجوز وادخل عندها قلت امي تسلم عليك وتقول نبي الشغل الفلاني وانا هالحين في المجبب في وسط البيت قالت اقعد في ذييا وانا امك ابا اجيب اللي تقول قلت طيب مؤدب انا ما قلت لا المهم حنا هالحين غايبه الشمس وجت العجوز وجابت الوصاة وبيتهم كبر ابليس لو ماشفت ابليس وعندهم حوش كبييير وفيه مصابيح وصفاف المصابيح سقف وسواري تجي قبل الحجر هذي يسمونها الاولين مصابيح المهم قالت لي العجوز تعال معي وانا امك ابي اعلف البقره قبل لا تروح لاني مااجسر اروح لها لحالي وفتحت الباب باب خشب وش كبره اللي يطلع من المجبب على الحوش اللي فيه البقره وطلعنا في الحوش يصير قدامنا جدار ينصف الحوش نصين بس له باب ما فيه باب ههههههههه الله من زين الحكي يعني فيه مكان الباب بس الباب مهوب فيه واجي انا والعجوز وندخل مع ذا الباب اللي مافيه باب ههههههههههه هالحين نشوف المصابيح والصفاف يعني الحجر وصدقوني كلامي واقعي يوم دخلنا مع ذالباب ونشوف ثلاث بنات صغيرات جالسات يلعبن ويوم سمت العجوز قالت بسم الله الرحمن الرحيم من ذولا قلت مدري وينحاشن كلهن ويدخلن في وحده من الصفاف او الحجر واجيك منطلق من الروعه والعجوز وراي وهي حسها تقول ياوليدي اصبر ابا اجيب عباتي وانطلق واخليها بلا عباتي بلا خراط وانحاش عنها باسرع ما يمكن سرعه امي وابوي هههههههههههه يعني اقصا سرعه ممكنه وارزح باب بيتنا وادخل ومالقيت امي شوي ولا اللي تطق الباب واقول من ولاها العجوز تقول افتح ياوليدي عجل وافتح لها الباب وتنطلق للمجبب حقنا وانا ركضه معها وهي تصوت لامي جعلها في الجنه يم فلان يم فلان قلت لها امي مهيب فيه قالت وينهي فيه قلت مدري قالت والا فيه احد قلت لا قالت وين راحوا قلت مدري وكلنا نتنافض من الخوف قالت جعلها للجنه وراي اقولك اصبر ابي اجيب عباتي وتنحاش عني وتخليني قلت انا خايف قالت وانا عاد ماخفت الا خايفه قلت منهم اللي في بيتك ذا البنات قالت ياوليدي لو اني ادري منهن ابا انحاش مدري وانا امك وشن الله يسامت علينا من الهبال يعني الله يستر علينا لا ننهبل قالت انت وراك تنافض هالحين قلت خايف قلت وانتي بعد تراك تنافضين هههههههه قالت انا مهوب اتنافض وبس وانا امك والله العظيم اني مسويتها على روحي وانا جايه ونجلس يجي ساعه وتجي امي وتطمر العجوز على امي وهي تقول سمي علي انا ووليدك اشونا مانهبلنا قالت امي جعلها في الجنه اسم الله عليكم جميع وشفيك يام فلان وانا واقف جنبها كني مشبوك في الكهرب اتنافض وسنوني ترقل ولا عرفت احكي قالت العجوز لم امي شفت من شوي شوفه انا ووليدك وتناظرني امي واومي براسي مااقوى اتكلم من هول الصدمه قالت امي وشي شوفته يام فلان قالت العجوز يوم عطيت وليدك الغرض اللي انتي موصيته عليه قلت ابيك تجسرني وانا امك ابي اعلف البقره انتي خابرتها في ذاك الحوش الكبير واستاحش لحالي ويوم رحت انا ووليدك ودخلنا على الحوش ولا هناك البنيات الثلاث اللي يلعبن مع بعض وانشدي ولييدك شايفهن معي كان اقول عند عيوني وتناظرني امي واومي براسي بالموافقه مااقوى احكي قالت امي الحمد الله اللي ما جعله اعظم يام فلان قالت العجوز ما ورا انتي داريه اني مسويتها على رويحتي اقول لوليدك اصبر ابا اجيب عباتي واجي معك وينطلق وخلاني والله اني ماوصلت دارك يام فلان تعاني امي الا ونا مطفحه رويحتي اسكتي ليا فيه شي ثاني طالع ماورا مني من شافني يبي يقول انهبلت ام الفلان تركض في السوق ركض وجيت لبيتك وطقيت وفتح لي ولييدك الباب والله اني مدري وين انا فيه ودخلت وامسك يد وليدك واروح انا وياه في مجببكم واقعد اقرا عليه واسمي عليه خفت يجيه شي بسم الله عليه عظيم اسمه دريت انا انها تكذب على امي ما قرت علي ولا حرف ولا سمت علي وعلى طول اقول هههههههههههههه يمه تراها تكذب عليك ما قرت علي شي ولاسمت علي قالت العجوز الا والله بس تلقينه مع الخوف مايدري وينه فيه واقعد احلف انها ماسمت علي هههههههههههههههه قالت امي مايخالف وانا امك هذي ام فلان الحبيبه الله لايحرمنا منها قلت بس ماسمت علي قالت العجوز ياحليل وليدك والله مايدري وينه فيه ههههههههههه واسكت يوم صار فيها ياحليلي |
| الساعة الآن 10:21 PM |
Powered by vBulletin .
جميع الحقوق محفوظة © لشبكة ومنتديات البراري 2010