|
أسأل الله أن يثبتك على طاعته امثال وحكم كثيره يبيلها كتاب ما أدري إذا فيه كتاب ياليت تقولي شسمه لا والله يالغالي مااخذتها من كتاب هذي اسجلها عندي في دفتر ولا تذكرت او سمعت من احد كتبته بس والله تبي نطلع كتاب انا وياك يبو سيرين ونسميه امثال شعبيه وكتاب ثاني ونسميه سواليف الاولين انا علي اكتب ونت عليك تطبع بس هاه النص بالنص انت خابر راعي شقراء كلش الا الدراهم هههههههههههههه |
اذكرمره جالس اسولف وعندي ناس ومادريت الا يوم قامو وخلوني اسولف على روحي وضاق صدري وقلت بيني وبين روحي كم بيت وقلت باكـــر امـــوت ثمــن تحسف عليه والله ماتـلــقا احــد فــي مـكـانــي ربي عطاني الطيب مع صدق نيـه ومالي هدف غير الي قاله لساني قالــو تسولف قلت وش فـي يديـه والــي مـظا منساه لـوهـو نساني يسرح بــي الهـوجاس دنين خفيه وذكــر قــديــم الوقت ويـرتاح بالي وسـج سـجاتـن تـجـيـنـي قــويــه وعيش ماظي الوقت لوني لحالي سحاب شقراء |
يسرح بــي الهـوجاس دنين خفيه
وذكــر قــديــم الوقت ويـرتاح بالي وسـج سـجاتـن تـجـيـنـي قــويــه وعيش ماظي الوقت لوني لحالي أقول صح لسانك مليوووووون شاعر وراوي مبدع |
اقتباس:
ماعليك زود جعل ربي يحفظك اقول يالغالي علمني تكفا كلامي ينفهم ولا انا حايس الدنيا كني من اصحاب الكهف صعب يفهموني هههههههههههههههه شرفتني يالغالي |
اقتباس:
وقول أمين الله يعطيك العافيه والصحه ويطول بعمرك |
اقتباس:
جعل ربي يفرج همك ريحتني يالغالي |
السلام عليكم ورحمه الله وبركاته يالله تحيي الغالين كلن بسمه خل اعلمكم بذا السالفه يعلمني بها راعيها يقول ايام الطين والجوع طرالي اني اعرس يقول فيه روشن في الطايه يعني غرفه في السطح يسمونها منول روشن المهم والله يعينا على المهم يقول فيه الروشن في بيت اهلي خليته غرفه لي ترا مافيه حمامات منول مافيه الا برج ويصير بالعاده في الطايه يعني السطح ونتبه بعد لا تزل رجلك مع شق البرج ثمن تنكسر الله يستر ولا فيه ماء كانك ولد ابوك توض بالماء عقب الاح هههههههه يجي ابوك ويرنك الين يغني حمار بطنك ممنوع استخدام الماء في البرج منعن باتن مافيه الا كسر جمش امخرها بجمشه وتكل على الله هههههههههههههههههههههه المهم يقول في اول اسبوع من عرسي الا جيت من شغلي في النخيل وهو يشتغل فلاح الاي القا الحرمه تبكي وش فيك يابنت الحلال تقول مافيني شي شهر شهرين ثلاثه وهذا حال بنت الحلال كل ماجيت القاها تبكي ولا طاعت تعلمني وش فيها يقول في ثالث شهر رحت للبرج ابا اقضي حاجتي ولا والله الرجال الي فاحش في وسط البرج يقضي حاجته وناضر هو صدق هو كذب خفت انه مع الظلام يورا لي ويوم قربت ماشفت شي يقول يوم جيت من شغلي وهو مايجي للبيت الا بعد صلات المغرب او العشا يعني الاخير يقول يوم رقيت للروشن والدنيا ظلام يقول ولا ذاك الكلب الاسود الي واقف عند باب الروشن بسم الله الرحمن الرحيم انت وش انت يالماخوذ يقول يوم قربت منها ويختفي يقول ماعلمت الحرمه اخاف انها معاد تجسر تقعد بالحالها سكت وبس يقول يوم فتحت باب الحجره ودخلت على حرمتي الا مثل وضعها تصيح ولا قلت وش فيك تقول مافيني شي يقول في رابع شهر ونا وحرمتي نسوي عمليه تكاثر هههههههههه يقول مادرينا الا بالسراج يوم ولع بالحاله ويوم قمت ورحت يمه يوم طفا قبل اصله يقول مادرينا الا بالزبيل الخوص صار له رجلين وصار يمشي ههههههههههههه وطمر انا والحرمه وسباق مع الدرج وروح لبوي ومي في حجرتهم وعلمهم يولع السراج ولا رحت يمه يطفي بس الزبيل الخوص يصير له رجلين ويمشي لا والف لا ههههههههه يقول معاد طبينا في الروشن من بعدها ويقول وتعلمني حرمتي وتقول تشوفني اصيح كل ليله تدري ليش يقول قلت ليش قالت اني اشوف الرجال يمرمن عندي في الحجره رايح جاي وخايفه منه ويوم علمت امي قالت انتبهي يدري رجلك عن شي تراه يبي يقول هذي خبله ثمن يطلقك ونتي توك معرسه هههههههههههههه وبس قظت السالفه وهذي سالفه لي انا علشان تعرفون تشجيع المواهب وشلون تصير انا مره ابوي الله يغفر له قالي تعال ياسحاب سمعنا من قصايدك ونا اول مره احد يقولي سمعني قصيده وجي عند ابوي ياملا الفردوس وتحسبوني اقول القصيده كذا لا لازم اديونها يعني اغنيها ورفع صوتي الله من زين القصيد بعد ههههههههههه المهم ونا منفعل وبوي يناظرني ويهز براسه باالاعجاب ونفعل زود ههههههههههه وصير اشر بيدي من زود الانفعال اثر اخوي الصغير جاي ومعه الدله حقه القهوه ماشفته ونا اضرب الدله وكبها على اخوي ماشفته وش اسوي وقبل لا تطيح الدله على الارض ولا بذاك الكف الي خلاني اتدربا من ابوي وهو يقولي تكب الدله على اخوك يذا السلوقي قلت ماشفته قال قاعد تناهق كنك حمار عندي وصجيتني بصراخك انت وقصيدك وخرابيطك عاد تعالو شوفيو وجهي ذيك الحزه جميع الالوان موجوده من الفشله وصلى الله على نبينا محمد وسلم عليه وفي حفض الله |
عز الله انك توسع الصدر اضحكتني بسالفتك الله يوسع صدرك
|
هههههه باين ان الجن واجد في شقرا لكن والله غريبة اللي أعرفه انهم يتواجدون في الأماكن المهجورة .... وسبحان الله على كثر ما سمعت عنهم إلا أني لم أرى أو أسمع أو حتى أحس فيهم وكأن ما يقال عنهم بالنسبة لي قصص فقط وبالنسبة للكلمات مثل ( روشن وطايه ) فعندنا نسميها حالياً ( ملحق وسطح ) ما أدري يا عم سحاب التسميات في نجد هل هي مختلفة بين كل مدينة وأخرى ولا نفسها يعني أنتم في شقرا تسمون الغرفة فوق السطح ( روشن ) طيب في اليمامة أو منفوحه أو الرياض حالياً يسمونها مثلكم أو لها أسم آخر وأيضاً في القصيم وما حولكم هل نفس التسميات أو مختلفة ؟ أما سالفة الحرمه اللي تبكي ... والله امها ذكيه يعني فعلاً لو قالت لرجالها كل اللي شافته عن الجن كان ممكن يقول بنت الناس فيها شي لكن خلته لين يلاحظ بنفسه وبعدين قالت له وهذا تصرف حكيم الله يعطيك العافية يا عم سحاب على القصة وجزاك الله خيراً |
اقتباس:
جعل ربي يسعد قلبك يالغالي ههههههههههههه بس وش رايك مهوب تحطيم للمواهب شرفتني شرف الله مقامك |
اقتباس:
ياهلا ومرحبا يبو سيرين بالنسبه للجن متواجدين في كل بيت قديم ولا جديد بس الاماكن المهجوره ياخذون راحتهم فيها اكثر ويتصورون يعني يبانون فيها على هيئه قطو اسود ولا كلب اسود وحيانن على هيئه البشر يابزر ولا شايب ولا عجوز بس اعتقد ان الي يبان للناس ويخوفهم يعتبر مهدور دمه عندهم والله اعلم تصدق يبو سيرين ايام بيوت الطين فيه واحد من ربعي كنت انا وياه نتقهوا عندي في بيتي ويوم جايبي يروح لبيته ونت خابرمهنا سيارات قالي تكفا ياسحاب ابيك تروح معي لبيتي ابا اوريك شي قلت اتكلنا على الله ابا اروح معك ويوم وصلنا بيته وفتح الباب حق الحوش ودخلنا قالي انت تشوف الي انا اشوف ولا عند عيوني قلت له ماشاء الله عليك اثرك شاري ناقه ولا علمتني وهي حقيقه كانت متوسطه في حوشه ومنوخه قالي هذا غثابالي والله ياسحاب ماشريت ناقه بس ذالي تشوفها لها كم يوم اشوفها وخص بعد صلات العشاء ولا اصبحنا ماتشوف شي مهيب تجي الا بالليل ونا اخاف ان الحرمه وعيالها يشوفونها ثمن والله مايجلسون فيذا البيت ونت خابر مهنا دنيا ولا عندي مصاريف ونا واقف اناضرها وهي مركزه علي قلت لرفيقي بصوت مسموع انت تبي تسمح لها الليله انها تقعد في حوشك ونا ابيها تسمع كلامي قال رفيقي الليله ميخالف تقعد ثمن طرا على بالي شي ثاني وقلت لرفيقي انت ماعندك سكاكين وساطور قال الا بلا عندي قلت له وش رايك نذبحها وتشارك انا وياك في لحمها ونا اناضر رفيقي وشرله بعيني والناقه ورا ضهري قالي التفت ياسحاب معاد هيب فيه ويوم ناظرت ولا مهيب فيه وجي عند مكانها ابا اشوف اثر شي ولا مافيه اثر قلت اجل ونا اخوك الا شفتها علمني اجي انا وياك ونتقاسم لحمها ونىا قصدي كودها تخاف ولا عاد تجي وتروع الرجال وعياله وسبحان ربي معاد شافها الا مره يقول اني شفتها منوخه ورا جدار بيتي يعني برا البيت ثمن ماعاد شافها يقولي نجحت الخطه والحمد لله هههههههههههههه خلني اجل اعلمك بسالفتي من يمكن ثلاث او اربع سنوات ادري منتاب مصدقني بس هذا الواقع الي صار سمعت ان شقراء جايها السيل وشعبانها كلها تمشي ونا الي اركب سيارتي ولا يردني الا شقراء وروح عند وادي او شعيب الريمه ولاها تمشي بس ضعيفه وحول من السياره ونحن الضحا يعني الصبح وخوض بعصاقيلي في السيل ودخل مع العباره الي تحت طريق المستوي وطلعت مع الجهه الثاني ونت خابر المصب او المخر يكون منحفر ومجتمع فيه السيل ويوم جيت وطليت على الحفره ولا فيها خمس حريم هههههههههههههه وكلهن لا بسات عبايات وبراقع وغايصات جوا الماء كلهن وكلهن يطالعن علي فوق وشوف عيونهن ونا شفت ذا الشوفه وجيك ركض للسياره ولا وقفت الا في بيتي فيء الر ياض وسلامه قلبك يالغالي |
السلام عليكم ورحمه الله وبركاته اخواني اخواتي الغالين كلكم وربي يشهد اني احبكم في الله وبااعلمكم بشي تراي ونا اكتب انقر مثل نقر الدجاج يعني اكتب بصبع واحد عجزت اعرف بصابعي كلهن بس احمدو ربكم اني معرف بصابعي كلهن كان ماتلقون مكانن تردون علي فيه هههههههههه ابا املا كلش ههههههههه وهذي سالفه حاصله لي ونا توي صغيييير منيب كبير اتركم معها عساها ترسم البسمه على وجيهكم الطاهره وهذي سالفه ماني ناسيها ماحييت اذكر وحده بنت مهيب عجوز ذا المره دخلت نخلهم وانا ماني كبير واشوفها تلقط ليمون ابوزهيره واللوميه او الشجره طايحه على الارض يعني ملامسه الارض يعني نصها تقريبا والنص الاخر مرتفع شوي والقاها تلقط لومي وهي تحبي على ركبها المهم اخذت عسيب نخل لقيته طايح وجيتها من وراها ماشافتني هذا المزح هالحين واكلخ عليها واخرفش بالعسيب وتاقف من الروعه وهي تصرخ يمه يمه وتصير وسط الليمونه الشجره يعني ماتقوا تتحرك وصبت اذانها ووجها دم الضعيفه وابحل بها وانا توي صغير ماني كبير وتجلس تصيح وتنافض من الروعه وانا غشي عليها من الضحك من هبالي وهي اكبر مني واجلس اكسر الغصون حقة الليمونه الين طلعتها وتمسكني وهي تغولني غول وتحوسني حوس وتاطا في بطني مانيب ناسيها ذيك البنت ما حييت مردغتني مردغه الين غنا حمار بطني والاعتراف بالحق فضيله يانشطها اجل ترفعني وتخبط بي ايه بنت فلاليح وش عليها تصدقون حمقت هالحين هههههههه بس عزالله ان ابوها جاب بنت ماهي بنت وبس الا رجال ذيك فعايل رجال ههههههههههه اخاف انها من المتابعين للسباحين وتبي تعرفني ههههههه اتحداها هالحين تمد يدها علي هههههه وشو عقبه الله ستر علي صرت احلم فيها في الليل جلدتني الين صرت مثل البطانيه الله من النشاط ماشاء الله عليها المفروض ذيك في المصارعه الحره تبي تاخذ الحزام على طول ابد تشوفون المصارعه اللي في التلفزيون مثلها بالظبط تشيلني فوق وتخبط بي كم مره وانا اذا قومتني تبي تسوي حركه ثانيه اقوم اطاوعها اصلا مدري وين انا فيه مستسلم واختلطت اموري في بعضها وتكرمون بولت على روحي منها بس عزالله انها خذت حقها وحق غيرها مني اخاف انها هالحين تقرأ ومبسوطه باللي سوته فيني هالحين تلقونها يدق لها الماء والتمر يعبطونه لها اكيد مالها ولاسن اصلا تبي تصير مهذريه ههههههههه تراها يوم تطقني ابا اعلم عليك تراها دوبيييييه هالحين خذت حقي ههههههههههه هالحين الله يمتعها متاع الصالحين وابا اقولك شي يالعجوز الله يحللك ويبيحك مني بس مهوب حق ولا هوب واجب اللي سويتيه فيني انتي توحين والله مدري يالله حسن الخاتمه تلقونها مهذريه هههههههههههههه هذا كانها حيه هههههههههههههه مابعد قوه الا ضعف هههههههههههههو وكانها ميته الله يغمد روحها في الجنه والله يحللها ويبيح منها |
هههههههه البنات منول متعافيات ما شاء الله وين يا عم سحاب بنات أول تعين وتعاون وفي الأخير مرهم على الجرح على عكس بنات اليوم يزيدونك هم وجروح لين تكره حياتك ولكن لولا الأمل بحياة أفضل لما تحلينا بالصبر تحيتي وتقديري لقلمك يا عم سحاب وجعلك ذخراً للبراري ولك مني أحلى ورده <<<< ههههه :038: من كثر الورد في البراري ههههه :ordh: |
الله يطول في اعماركم هذي سالفه اربعه من الزكرت يعني الشباب اللي ما يخالفون بشي يسمونهم منول الزكرت المهم ذا الشباب يحبون السامري وكلش في شقراء منول حرام واتفقوا بينهم ذا الشباب انهم يبي يطقون سامري في بيت في نخل في طرف الديره مهجور والا فيه واحد محرول الله يعافيه.. اصلا مات الله يرحمه وكل مسلم.. ذا المحرول اسمه عبد العزيز ويحب السامري بعد وهو محرول الله يعافيه قلنا مات وهو يحفض القصيد ويبونه ذا الشباب يروحون به معهم وقالوا له ووافق هو صدق فيه سامري ومعهم طبلين بس وشالوا عبدالعزيز في زبيل وتشاقله اثنين يعني كل واحد شايله مع عروه كني اشوفهم وهو حاطينه في زبيل المهم وصلوا البيت حق النخل المهجور ودخلوا وصكوا الباب وبدو بالسامري وهذا كله في الليل ومعهم سراج واحد منول الدنيا في الليل هاجده مافيه حس المهم بدو يطقون سامري والصوت في الليل يسري يعني ينسمع من بعيد علشان السكون الرهيب منول وراح واحد وعلم النواب وقال لهم انا سامع طق طبول في النخل الفلاني وجوك النواب واسمعوهم وطقوا عليهم الباب وتطامروا وبحلوا بعبد العزيز مايدرون وين يودونه ويقومون ويحطونه في الجصه محرول مايمشي وش يسون به وقالوا له البد ولا يطلع لك حس وراح ثلاثه وطبوا على جهة النخل وانحاشوا وبقي واحد فتح الباب وتعلق فيه ويوم دخلوا النواب ويطب وينحاش ولقوا طبولهم وشابين ضو يحمون الطبول بعد وخلو السراج في مكانه قام واحد من النواب وخذ السراج ودور في البيت ما لقا احد ويروح للجصه ويفتح باب الجصه وهي المكان الي يجمعون فيه التمر المهم فتح باب الجصه ودخل السراج ولا ذا اللي عيونه تلاقط قال النايب له عبدالعزيز وش جايبك فيذا قال معروج بي وضحكوا النواب من كلامه لانه عيار عبد العزيز ايه الله سبحانه ياخذ شي ويعطي اشياء المهم طلعوه النواب من الجصه وحطوه في زبيله وشالوه وودوه لبيتهم منول الناس سمحين وقلوبهم طاهره ويحبون بعض |
اقتباس:
هلا و مليو ن مرحبا وين بنات منو ل عن هلحين فرق السماء عن الارض ونت صادق تقول بنات ذا الوقت يزيدونك هم وجروح ونت كافل لهم مصاريفهم اجل لو ماعندنا رواتب تلقانا في دور العجزه وبنات ذا الوقت مايبونك لو تنصحهم الله يصلحهم هههههههههههههههه اجل مهدي لي ورده جعل والديك للفردوس اهديتا لي ورده ونا اهديلك التاج تاج الغلا ياصاحبي لك هديه عندي لبو سيرين قصرن من العاج بين المحاني ومعتلي بالبنيه والله رفع قدرك على طيب منهاج وهو الذي يدري عن الطيب فيه سحاب شقراء |
يا الله يا عم سحاب فعلاً زمان أول كان مختلف تماماً عما نحن عليه الآن يعني أحس كان هناك انضباطية وهمة أكبر مما هي عليه اليوم وبالنسبة للمحرول والله حزني .... وده ينبسط لكن خربت عليه ههههههه نهايته الجصه << مدري وش معناه هههه بير والا فرن والا مكب نفايات ههههههه سألت عن الزبيل وقالوا لي عربية أو ما شابه لكن الجصه محد عرفها هههههههههه كان الناس فيهم بساطة وعدم تكلف وتكاتف المجتمع اليوم مغاير تماماً واعتقد ذلك غير صحي الله يعطيك العافية يا عم سحاب ويجمعنا بك في الجنة حفظك الله ورعاك :ordh: |
اقتباس:
هلا بالغالي و مرحبا الجصه هي مكان مخصص للتمر الزبيل وهو يكون مصنوع من جريد النخل يعني من خوص ويكون بشكل دائري وله مساكتين او عروتين يشال معهم البير او القليب او الركيه اخترالي تبي كلهن واحد البرج هو مكان قظاء الحاجه اكرمكم الله |
ابداع وتميز كالعادة صح لسانك وكلك ولنا عوده للتمعن بين سطور ما سطرت
تحيتي |
والزبلان الكبيرة اذكر من مبطي يجلبوا التمور فيها ويبيعوها في حلقة ألمقيبرة قبل عام 1396هـ ومن ثم الى عتيقة اذا ماني بغلطان !! الله يا زمان اول كل ما فيه زين
|
اقتباس:
الله يسعد قلبك ويسمح امرك شرفتني شرف الله مقامك |
اقتباس:
صدقت يالغالي كانو يحطون التمر في زبلان ولا في قله تمر - والقله - يخيطونها بجريد النخل بس تصير مثل الكيس |
فيه سالفه واحد فيه كحه شديده ويروح للمسجد يصلي وازعج الناس بكحته المهم يوم طلعوا من الصلاه ويجي يمه ذاك العود وقاله اوحيك يا ولدي تكح وكحتك شينه ما عالجتها قال ماخليت شي ولا نفع قال الشايب تبي العافيه من الله اسمع كلامي ورح اشتر لسان ثور وكله تبي تروح وبحول الله الكحه يقول ومن صليت الفجر وانا اروح للمقصب اللي في الحله والكلام هذا في الرياض يقول رحت للمقصب ولا خليت لسان ثور الا شريته كرتون موز ماليه ملي واسبوع كامل وانا افطر على لسان ثور واتغدى على لسان ثور واتعشى على لسان ثور الين بغيت اثغي ولا راحت الكحه بالعكس زادت يقول واروح اصلي ويوم طلعنا من الصلاه واتشوف للشايب والا هذا هو توه يطلع من المسجد واجي يمه واقول يا عم ماخليت لسان ثور في الرياض الا كلته ولا راحت الكحه زادت زود قال الشايب عجيب ولا خفت قال ولا خفت قال الشايب انت متأكد انه لسان ثورقال اكيد ولو تصبر شوي ثغيت قال الشايب وينك شاريه يا ولدي منه قال ويني شاريه من المقصب قال الشايب وشو مقصبه قال اللي في الحله ويغشى الشايب عليه ضحك قال الشايب لا ياولدي لسان ثور عشبه تباع عند العطارين اسمها لسان ثور والرجال باغي يثاغي. |
هههههههههههه الله يسعدك اخي الفاضل
لكن الحق على الشايب ما علمه ان لسان الثور يوجد عند العطارين الحياة جامعة كل يوم تتعلم فائدة تحيتي |
اقتباس:
هههههههههههههه هلا بالغالي ومرحبا اجل يقول باغي اثاغي مثل الثور |
هلا ومرحبا بالغالين كلكم عنوان ذا السالفه -- تويق على جدتنا ياحصان بليس --:a_laugh2: هلحين خل اعلمكم بسالفتي يومني صغييير اذكر سنه من السنين يومني توي صغييير ولا ينشره علي اذكر اني راقي في الطايه او السطح الظهروسمع عجيييز تقطع بطنها من الضحك وكل شوي اسمعها تقول يحيك يحيك ثمن تغشا من الضحك ياحليلها ذا العجوز وعلشاني صغييير وسفيه ولا علي شرهه رقيت على الجداركني قطو هههه ابا اشوف ذا العجيز وش يضحكها الله من القافه فيني ولا وشعلي منها المهم والله يعينا على المهم انا بزر بزرت عيون العدو ولا علي شرهه ابد ابد ويوم رقيت على الجدار وذا الكلام طبعن ايام بيوت الطين ويوم رقيت على الجدار ابااشوف وش يضحك ذا العجوزويوم طليت ولا ام اهل البيت تروش جدتهم في الطايه ياحليل العجوز وبس كل ماصبت عليها غظاره الماء تغشا من الضحك يصقعها الماء تحمدربها بعد تلقا من يروشها وفي الطايه بعد بس انا قلت ماخافو عليها يخطفها الطير وهي تلوفح في الطايه ويخطفها الطير مهوب يعني يجي طير وياخذها لا مار وش يبيها الطير كان يبحلبها ونا اقصد في يخطفها الطير يعني تصخن وتمرض وش اسوي بعد هذا الي يقولونه الاولين اذكرالا تروشنا قالوغط راسك لا يخطفك الطير كلش منول رعب المهم ويوم ضحكت العجيز وناالي اضحك معها بقوه مادريت بس علشان الموقف ونتم خابريني صغيييرالمهم سمعوني يوم ضحكت تحسبوني توزيت لا علا طلتي قالت امهم بعد ماغطت جدتهم بجلال سحاب قلت سمي قالت ورا ماتحول عن الجدار لياك تطيح قلت لا منيب طايح ثمن قالت تووليدي فلان صايد فرخ حمام ابيضن وش زينه وني قلت لوليدي لياه حق سحاب وعلا طول قلت حقي وينه ونا والله اكذب بس تراي بزر بزرت عيون العدو قالت شفه مع وليدي فلان توه محول به في المجبب ثمن قالت تقوا تطب علينا علشان تاخذ الحمامه وعلى طول قلت ايه اقوا ومادرت الا ونا عندها في السطح او الطايه كلهن واحد المهم انا طبيت عليهم ولا ماطبيت وهي الي تدودلني بذاني وتسطرني كف وتقبصني بعد مع يدي وتقبصني بعد مع مكان منيب معلمكم وشوبس يوجع ويخليك تشوف مناير مصر من الوجع وتحول بي تحت وهي تجرني بذني هذا الي مخلي اذاني شتار وش طولهن باغي اطلع ارنب من كثر ما مصعوهن الناس والله اني صادق هماي عندي صوره لي ابا انزلها علشان تشوفون اذاني وشلون مشنترات ههههه المهم وتجرني مع الدرجه وتحول بي وتفتح باب السوق وتطحلني مع ظهري ثمن قالت خلني اشوفك علا الجدران مره ثانيه يالي ماتستحي تويق على جديدتنا وهي مفصخه ونحن نروشها ياحصان ابليس الله عاد من زين جديدتهم هيكل عظمي ماتسوا الطق الي جاني والروعه وبس خلصت السالفه سبحان الله والحمد لله ولا اله الا الله والله اكبر عدد خلقه وزنه عرشه ورضا نفسه ومداد كلماته |
الله يا عم سحاب على بساطة البيوت من أول وجمالها أما الآن مع المدن الحديثة بعدت المسافة بين الجيران يغيب الجار عن جارٍ قريبُ // كـأن الـناس في وضـعٍ مريبُ كأن الناس تنظر ما ستبدي // لهـا الأيـام والمـوقف عصيبُ تمنيت الـزمـان يعـود يـوماً // وأخـــبـره بـعـيـشٍ لا يـطـيبُ وأخـبـره بـأن الــناس بـاتُ // بـلا عـقــلٍ ولا قــلـبٍ يـجـيبُ وأني بعـد أن أفنيت عمري // أعـيـش الـيوم بالـدنيا غريبُ أساير مـا بقى منهـا وحيداً // لعلي أنجو من غضب الرقيبُ تحيتي وتقديري |
اقتباس:
هلا ومرحبا ومسهلا يبو سيرين انت صادق يالغالي الدنيا غيرت اهلها ونشغلو الناس بحياتهم بس ابا اقولك يالغالي ترا القلوب طيبه ورحيمه وتخاف الله سبحانه وتحب الخير واذا فيه قطاعيه بين الناس والجيران انا اعتبر نفسي انا المقصر الاول بسبب الضروف والانشغال وخص الي ساكن الرياض ونت تعرف الزحمات واذا عندك شغل عساك تنهيه في يوم بس الي عايشين في القرا بالعكس تلقا ترابطهم اكثر وجتماعاتهم شبه يوميه الله يرحم الحال يبو سيرين جونا شعوب الارض الغير متعلمين وغيرو من طباعنا وصرنا مانثق في احد بسببهم وغشهم علينا ولا لوه على الشعب السعودي قسم بالله لا يوجد على الكره الارضيه مثلهم وطيبتهم وتراحمهم وفزعتهم وتدينهم وهذي نعمه من الرحمن الرحيم علينا |
السلام عليكم ورحمه الله وبركاته يالله تحيي الغالين كلن بسمه خل اسولف عليكم هماي البارح احلم ومدري من انا اقوله ونا في نخلي في شقراء اقوله شغل المكينه وخل الجابيه مليانه والجابيه يالغالين هي المكان الي نجمع الماء فيها قبل لانسقي النخل تصدقون منول ان الجابيه هلي اقولكم عليها طبعن تكون مرتفعه عن سطح الارض بنص متر وقبلها مليانه بالماء تصدقون ياسنين راحت ان الذيب يجي وحنا نتوضا لصلاه الفجر يجي الذيب ويشرب مابينك وبينه 5 او 6 امتار يشرب وعيونه طايره فيك يخاف تغدره بشي المهم انه يشرب ويتكل لا يخالف على احد ولاشي شبعان ونتم خابرين منول البر كله غنم يازين تكفون الا صرتا في نخل وعايش فيه عندك الرمان والترنج والبردقان وليمون ابو زهيره مع النخل جنه الدنيا وتارك الدنيا ورا ظهرك معاد بالدنيا دنيا صارت تظيق الصدر وملل وخص الي ساكن بالرياض الله يعظم اجره بس ولا وين حياتنا منول وبساطتها الا جا عقب العصر ولا مسيان يازين ذا الوقت عندي يمكن انه عند غير مهوب زين الناس يختلفون احدن يحب النهار وحدن يحب الليل وحدن يحب الصبح ومثل كذا اذكر الا جا مسيان وطفيت المكينه البلاكستون الهنديه محبوبه الجميع فيه رمل جنب النخل اروح والي معي كان معي احد ونصلي المغرب فيه وبعض المرات نصلي العشاء فيه الا صار فيه بروق ورعود وسحاب ويازين بعد جلسه فيه في ايام الصيف الحاره يجيك براد مغير نقول يالله براد ك من براد الجنه من زينه وسواليف وسعه صدر ادري الدنيا ماتخلا من الغثا بس ولو شي يعوض عن شي مهوب مثل هلحين صاك دونك الباب ماتواطن تطلع زحمات وسواويق يدورون الي يصدمونه اغلبهم مايعرف يسوق سيكل ويجي عندنا ويمسكونه اخر موديل للسيارات ويطلقونه على المسلمين في الشوارع الا قالو قالو مئمنين تئمين شامل ولا امنتو شامل تذبحون المسلمين بذا السواويق الي خلها على ربك بس تصدقون مره كنت مودي بنتي لمدرستها ويوم جيت راجع للبيت وتوي ماتعديت شارع المدرسه ويطلع علي باكستاني يمشي اسرع شي من وسط الحاره وينصاني اظرب له بوري ابيه يلتفت يمي وهو على سرعته وملتفت يناظر على وراه عاكف رقبته وحاول انحاش بس مكني مع ورا السياره من جنب وقربعععع هذي الصدمه هههههههههههه ونحول من السيارات جعلك للعما ماتشوف جعل عيونك ينبقن ماتناظر تسوق قدام ولاف برقبتك على ورا انت منهبل تدرون وش قالي قالي انت غلطان مافي انا غلطان انا لله وانااليه راجعون هذا وش اقولبه وننتظر الين جانا كفيله ويوم جا ابن الحلال قال لسواقه انت منجوم انت منهبل خابط راسك ماصوره طالع على الرجال من وسط الحاره على شارع عام وتنصاه وتصدمه وتتصل علي تقولي انه هو الي مخطي علي ثمن قالي الي تبي امرني امر الخطا على السواق وش تبي بس قلت مدام هذا كلامك ماابي الا سلامتك والله يستر علي وعليك بس انتبه تركب عيالك معه تراه الله يستر يبي يسوي بهم حادث هذا مهوب سواق هذا مااخليه يرعا الغنم والله يالمسلمين يازين منول خلو عنكم بس ها الحزه 8 في الليل قد رقدنا في سابع نومه ونصير راقدين مثل ذا الوقت في الطايه يعني السطح كلش يبيله تفسير هههههههههه ويجينا بعض المرات رش مطر ولا نحول ننام في المجبب يعني في المصاله او الصاله الين تركخ الشراشف بالمطر ونشوف وقت هجره الطيور وهن يطيرن قل والله وقسم اعاني نفسي ههههههههه اجل تبيهن ياسحاب يمشن على رجليهن ونشوفهن يطيرن وهن يقولن واق واق واق ويطيرن سبحان الله على شكل سبعه بالعربي او راس سهم ونشوفهن الي بيض والي سود والي مدري وش لونهن على نور القمر والدنيا تصير ساكنه هدوووووووء لو يمشي احد في الشارع نسمعه وهو يمشي ونعرف اتجاه الهوا انكان نسمع صوت مكينه اللعليا حقه سعد ابن خظير ياملا الجنه قلنا هواها شمالي ون سمعنا السيارات في القهاوي قلنا هواها جنوب ترا القهاوي اسم المحلات الي في القهاوي هههههههههههههه الله من زين التفسير يعني المحلات الي كانت على الخط الزفلت لان منول مافيه زفلت الا الخط الي يجينا من الرياض ويروح لمكه بس وباقي شوارع شقراء كلها ترابيه مانعرف الزفلت ابد كلها ريغا اقول انتم تستعملون ذا الكلام قصدي ريغا تعرفونها والله مدري عنكم يالتوالي بس تراها شي مهوب يوكل منول عندنا في بيتنا الطين عنبه الا اصبرو ماتلاحظون معاد فيه احد يزرع عنبه في بيته الله يدفع البلا بس يازينها الا عنقدت المهم فيه سحبله وهذي تجي تزحف على بطنها مالها رجلين مثل الداب بس صغيره طول شبر المهم ذا السحبله كل يوم نشوفها تجي من الحوش وتدخل في حجره امي ومي جعلها للفردوس تتعوذ منها الا شافتها وتقولي اياني وياك ونا امك تسوي لها شي هذي من اهل بسم الله وكل ماشافتها تعوذت منها وهي الا دخلت حجره امي معاد نلقاها لو نطلع كلش مانلقاها وتوذت امي ياملا الجنه منها الله لا يلومها بعد حجرتها وذي تباهزها فيها المهم يوم اصبحنا يوم من الايام وطلعت امي من الحجره ولا السحبله مقطعه ثلاث وصل ومحطوطه تحت الساريه الي قبال حجره امي في المجبب شفتو وش انا اقولكم لياكم تطقون شي ترا كلش يجهش جن ههههههههههههههههههه ترا هذا البيت الي شفت فيه من كم سنه وهو مهجور ونصه طايح شفت فيه بنت جن صغيره تويق علي من ورا الساريه وعليها كرته نفس الكرته الي كانت امي تلبسني يومني صعنون اخاف انها كرتتي ونا مدري وماخذتها بنيتهم او انها تبي تذكرني بالماظي العريق تراي صادق في بنت الجن والله العظيم ماشفتها الا بالتصوير الي صورته بالجوال وريته كم رجال وكلهم قالو مايبيلها نشده واظحه البنت وضوح الشمس بس واحد من الربع قالي ياسحاب امسح التصوير لا يلحقك وراه غثا قصده من اهلها اخاف انهم مثلنا مايبون احد يصور بناتهم وش يدريني وسلامه قلوبكم يالغالين وفي النهايه اقول سبحان الله وبحمده سبحان الله العظيم عدد خلقه وزنه عرشه ومداد كلماته ورضا نفسه |
السلام عليكم ورحمه الله وبركاته يالله تحيي الغالين كلكم صغيركم وكبيركم خل اعلمكم انتم دارين ان الي مصلحين اسلاك التلفون ابو هندل هم من شياب شقراء اذكرهم وهم يوصلون الاسلاك على جذوع الخشب حقات الكهرب مهومب لعب ذا العويد تكنلوجيا على طول هههههههه وبالنسبه لوسائل السلامه مايعرفونها كل واحد يلف ثوبه على وسطه وبسم الله ويرقون عامود الكهرب وحتا الله يكرمكم النعال مهيب عليهم ومن خشبه كهرب الا خشبه ثانيه والحمد لله مامحط بهم الكهرب ساتر عليهم ربي سبحانه هذا الهبال بعينه وعلمه ولا قال احد لهم وشذا الي تسوون يومكم راقين على خشب الكهرب يردون الشياب هذا الي ينقل الحكي او يقولون هذا الي يبي يخليكم تحاكون البعيد ونتم قاعدين في بيوتكم ويردون الي ينشدونهم لا بالله فلان وفلان طاير من روسهم وشره يعني انهبلو ويقولون بعد وشذاالي يخليك تحاكي البعيد ونت قاعد في دارك لا بالله هذا سحر بعينه وعلمه ويبي من يمسك على يدين فلان وفلان ويعلم الشيخ عليهم هذا شي ماينسكت عليه هذا شي من عمل الشيطان والعياذو بالله تراي اعرفهم بس اخاف انهم ماودهم او عيالهم ماودهم اني اذكر اساميهم وبعد التلفون ابو هندل جونا الفلبينيين او الكوريين والله مدري تراهم يشبهون لبعض المهم الي يمدون اسلاك التلفون من تحت الارض المهم الفلبينيين الا مرو من عند الشياب قالوالشياب لبعظهم شف شف تكفا ذالي اقبل علينا ويقول العود الثاني وش فيه قال انت ماتشوف الي هو حاطه على راسه يعاني الكبوس الي مثل الطاقيه بس له شي طالع يحجب الشمس عن عيونهم ثمن يقول الشايب شايفه ويرد الشايب الاول انت ماتدري انهم يحطونه على روسهم علشان مايشوفهم رب العالمين متوزين عنه ذا الكلاب الذاهبه ويرد الثاني اهبو يالحمير قال الاول انت تدري ان الله معاقبهم ويرد الثاني وشو معاقبهم به قال الاول انت ماتشوف بعيونك قال الثاني وش اشوف قال تراه معاقبهم رب العالمين ومخليهم مثل بعض شبهم واحد وطولهم واحد وعيونهم صغيرات ولا تفرقهن عن بعض علشان مايعرفون بعظهم الله يدفع البلا لا حولا ولا قوه الا بالله هههههههههههههههههههههههه ----------------------- ما علمتكم مره من المرات وشعيب وادي الغديرفي شقراء يمشي جيت اشوفه من عند الحميديه مزرعه قديمه والي قبالي المستشفى القديم وروح من عند المخار الي مزينه بالحصى من موبطي الا هلحين وهي وشزينها ولا فيه مع الجهه المقابله الي من يم المستشفى حريم وبنات وبزور يناظرون السيل ويوم شفتهم وجيك اتميلح عندهم ابا اقطع الشعيب وهو وش قوه يمشي وطلع عصاقيلي وجيك اخوض والناس يقولون لي ارجع انت منهبل ارجع والحريم يصايحن والبنات والبزور ونا مستمرهذا الا قالو منول منخق عند الحريم هذي الخقاقه وبس ههههههههه ويوم انتصفت يعني ما بقا الا نصه وقطعه وهو الي يشيلني السيل ويمحطبي في وسط المخر ويدربيني الين المخر الثاني وبسم الله ويمحطبي فيه بعد هههههههههه خل تميلحك ينفعك هههههههههههه ونا مدري وين انا فيه ههههههههههه ويدربيني الين جيت قبال سوق الحريم منول وقبل لا يصير سوق للحريم ماكان فيه الا صنادق وعشاش لبعض اللحوج يعني العبيد المهم يوم وصلت قبالهم وطلع روحي من الشعيب بس وشو عقبه شارب من الغريف الين شبعت والغريف الطين السايل مع الماء هذا الغريف ولا كلي جروح وزلوط كلش يدمي يديني ورجلي ومرافقي وركبي حتا اذاني الشتار يصبصبن دم ههههههههههه خربت على الناس فرحتهم بالسيل وخليتهم على اعصابهم ههههههههه وذكر فيه بعض الرجال يركضون على جال الشعيب يلحقوني بس ربي نجاني وهماي يوم طلعت من الفشيله عظيت ثوبي ونحشت هههههههههههه ----------------------------- خل اعلمكم بذا السالفه الي حاصله لي انا قبلي قطوفها دانيه يعني الصياح او البكا اقرب من عيني لعيني الثانيه اللهم لك الحمد والشكر بس وش خليت للبزور بزرت عيون العدو بس المهم والله يعينا على المهم سمعت من واحد من الربع قالي ترا فلان تعبااان قلت لا والله ماادري وفلان هذا احبه في الله واااجد وهو بعد يحبني جعل ربي يحبه وملائكته قلت وش فيه قالي والله مدري بس اني سامع ان فيه ضيقه في صدره ونه معاد يطلع من حجرته ونه ماعاد يبي احد يجيه ابد ابد وناعاد لي خبره طويله مع ضيقه الصدرولا زلت بس انها يالله لك الحمد والشكرصارت ماتطول مثل منول باالايام صارت يومين اوثلاثه او اربعه اوخمسه ههههه وتخف علي الله يجعل قلوبكم يالي تقرون او تسمعون يحرم عليها من الضيقه امين نرجع للرفيق الي ضايق صدره وروح يمه وطق الباب اكيد اني منيب ناط مع السوربعض الكلام مدري وشوله يطلع المهم ويفتح لي ابوه وسلم عليه وحب راسه يعنني صغيييير ومادريت الا يوم ابوه شهق وده يصيح لانه يدري عن حبي له المهم ويدخلني للمجلس وقلت فلان وينه قالي فلان قبله في غرفته لا يروح لعمله وحتا انا ومه مايبي يشوفنا ابد عجزنا عنه نبيه يعلمنا وش فيه ثمن قالي تكفا ياسحسح يدلعني هذا اسم الدلع حقي ههههههه وقالي لا تخليه ماقاويه الاانت بعد رب العالمين قلت رح قله من ورا الباب ترا سحاب في المجلس ويبيك ضروري ثمن قالي ابوه ان طاع ينزل لا اوصيك تشوف وش فيه وجلس ابوه شوي يوصيني ونا مغير ابشر ابشر مالك الا الي يرضيك وراح ابوه وقاله سحسح في المجلس يبيك قال معه احد يقول ابوه ماصدقت يرد علي وقلت مامعه احد ابد ويوم اخذ ربع ساعه او ثلث ساعه وينزل وبوه رايح يقول ابا اخليكم مع بعض المهم يوم دخل علي في المجلس ويبدا الشخير والنخيروهو مثلي وش اسوي ماقويت امسك نفسي وشذا الفزعه ههههههههههه ولا قويت امسك روحي وصار هو الي يهديني مالت عليك بلا مالت عليك ياسحسح ومادرينا الا ابوه داخل علينا في المجلس وقال كلمه وراح تدرون وش قال --يقول جيناك ياعبد المعين تعين ولقيناك ياعبد المعين تعان ---- وطلع ابوه على طول وناضره وهوناضرني وننفجرضحك على كلمه ابوه ومادرينا الا ابوه يدخل علينا ثانيه ونحن على ضحكنا قال يالله لك الحمد والشكرالضاهر كلكم فيكم بلا وهو يضحك ثمن جلسنا نسولف وعلمني وش الي مضيق صدره وزانت اموره يالله لك الحمدوالشكر خل بس اعلمكم وشو الي مضيق صدره يحب بنت عمه وسمع انها مخطوبه وبغا يطير عقله هههههههههههه بس الحمد لله صارت من نصيبه ورتحت منه وغثاه هههههههههههههههههههه وفي النهايه اقول سبحان الله والحمد لله ولااله الا الله والله اكبر عدد خلقه وزنه عرشه ورضا نفسه ومداد كلماته |
يا الله حي العم سحاب أثرك لحقت أيام ما قبل الازفلت ... والله معاناة بس حلاتها رتم الحياة كان بطيئ ويجعلك تحس بساعات اليوم مع سرعة الأحداث والتواصل أصبح الواحد ما يحس بالوقت أعتقد تخفيف سرعة رتم الحياة فيه استقرار أكثر للناس ويجعلهم يهتمون بأمور حياتهم أكثر من أي أمر آخر بالنسبة للكرته اللي كنت تلبسها وانت صغير ... ابي أسألك سؤال ... هل ( ناصر القصبي ) من شقراء ؟ لأني الاحظ انه يلبس ملابس النساء الآن بدون خجل فقلت يمكن كان وهو صغير يلبسونه كرت هههههههه وبعدين يا عم سحاب بعض الأمور يبيلك تنتبه من ذكرها مثل حادثة اللي حاولوا يمنعون اللي يمدون أسلاك التلفون لأن مثل هذه القصص تجعل بعض الجهلاء يستغلها في الإساءة لعلماء الدين بأنهم كانوا يحرمون كل شيء ومن هذا القبيل فا يبيلك تنتبه للنقطة هذه ولا تغفل عنها . والحقيقة سواليفك بالنسبة لجيلنا تعتبر مهمة جداً لأنه ويشهد الله علي أمور كثيرة لم أكن أعرف عنها شيء اتضحت لي من خلال متابعتي لما سردته في هذا الموضوع والله يجزاك بالخير ويحفظك يا عم سحاب ويديم لباس الصحة والعافية عليك . تحيتي وتقديري |
كل ما مرينا من هنا نجد ما يبهج الخاطر
سرد جميل لاحداث في زمن جميل قصص تجذب الأفئدة بما فيها من تناقضات في الحياة في تلك الحقبة البسيطة ببساطة اهلها الطيبين فالله درك اخي سحاب على هذا النهج القصصي المتميز السلسل وهنا يجب ان اشيد بتكرير بعض الكلمات او توضيح المعاني التي قد يغيب على البعض فهمها نظراً لاضمحلالها استمر نحن مستمتعون بما تسطره سلمت يمينك ولابو سيرين بيتين على السريع على قافية الأبيات بعاليه . هنا ابيات كاملة المعاني ابو سيرين البسها الغشيب تجلا.. بين. أسطرها الألي تطرز نظمها تاجٌ مهيب تطورعصرنا بشتى المناحي فمن كان البعيد اصبح قريب الا ليت الشباب يعود يوماُ واخبرهُ بما فعل المشيب تحيتي للجميع |
الله يبيض وجهك سحاب شقراء ع هالطرح القصصي الشيق .. واااصل انت مميز ومبدع فااالك الجنة ،،،،،
|
سلمت ياسحاب شقراء على هذا التميز في طرح
القصص بارك الله فيك |
اقتباس:
ياهلا ومرحبا يبو سيرين الغالي ناصر القصبي يقولون انه من القصب علمن انهم يقولون انه من اهل الزبير والله اعلم والي من شقراء عبدالله السدحان تراي اعرف ابوه دحيم جعله للجنه تقول يبو سيرين أن مثل هذه القصص تجعل بعض الجهلاء يستغلها في الإساءة لعلماء الدين بأنهم كانوا يحرمون كل شيء ومن هذا القبيل ان شاء الله تعالى ابشر بس ترا فيه امور كانت محرمه اول ماطلعت منها الرادو ومنها التلفزيون ومنها السيكل بس يدل على جهل الناس وحرصهم على دينهم هذا الي خلاهم يحرمونها وبعد ماتبينت الامور تنبهو وعرفو ان مافيها شي يستدعي التحريم |
اقتباس:
هلا ومرحبا ومسهلا جعلك ووالديك للفردوس على كلامك وتشجيعك لي ونا والله خايف ان الناس مايعجبهم كلامي |
اقتباس:
وجهك ابيض ياملا الفردوس شرفتني يالغالي |
اقتباس:
هلا ومرحبا براعي الزلفي ترا رفيقي الي احبه وهو يحبني بعد جعله للفردوس من اهل الزلفي ومما في الخاطر قلت ذا الخرابيط وهي على قدي للزلفي في قلبي غلا دوم يزداد وزود الغلا زايدن من حب راعيها اجواد وكل الي سكن برضك اجواد شهادتن لله ومنيب مخفيها يعل من عنا القدم لك ولك عاد في جنه الفردوس يجني الجنا فيها |
السلام عليكم ورحمه الله وبركاته يالله تحييهم وتخليهم لعين ترجيهم وتحفظهم من كل شر اليوم ابا اعلمكم بسالفه انا عندي مزرعه ياحضي ههههههههههههه المهم شريت لي فقاسات بيض وحده تحط فيها 500 بيضه وحده تحط فيها 1000 بيضه الاخ ناويها تجاره المهم امتلت المزرعه من الدجاج ولا نيب اصك عليهن الا بالليل بس ولا جا الصبح فتحت لهن وتعال شف افواج كل فوج بروح لجهه معينه من المزرعه وغلبهن ديكه بس ما فيهن من الملح عينه يعني شينااااات مره مالهن عروف ولا لهن ذيل طويل ولا الوان ولا شي كلش ابيض في ابيض ما تعرف الديك من الدجاجه بس امتلت المزرعه منهن تقول اسرح لي غنم وهظل غنم - المهم كنت ذاك اليوم جالس في مدخال المزرعه فارش لي الفرش والمراكي والشاهي وكنت توي مصلي العصر وراش المكان بالماء ونا تراي من الناس الي ينسا عمره الا صارمعي لي ورش مدري وش ذا الهوايه المهم جالس وبراد وفله وكان فيه فوج من دجاجي ما يتعدا بعيد عن بيته يجيلهن فوق الخمسين وما دريت الا واحد من اخواني جاي ويسلم ويجلس ثمن قال للعامل تعال نزل الكرتون الي في السياره قلت وشو ذا قال يبن الحلال هذا ديك توي جايبه من خوالي مذيهم ومذي بزورهم ومذي دجاجهم مغير ينقر في كل شي يجي قدامه وقالولي خوالي تعال تكفا وده لبليس الي ما يعقله انه باغي يفظخ عين واحد من بزورهم ونهم ما يبونه وقلت يعني انا بيلس يومك جايبه لي ههههههههه قلت للعامل طلعه من الكرتون خل نشوفه ويقوم العامل ويطلعه من كرتونه ولاه ياجماعه الخير اجمل ديك بلدي شفته في حياتي عليه هكا العرف الي ينسفه يمين ويسار وعليه هكا الذيل الي فيه جميع الالوان وعليه هكا الريش الي مغطي عصاقيله بصراحه بعذره لو شاف نفسه وكان وراي جدار طين وراح ورقا على الجدار الطين مغير مستنكر وظعه يقول قر قر قر قر قلت لخوي مهوب كنه في شوفه النفس كنه اخوي فلان يوم غشي علي اخوي من الظحك ونا صادق عندي واحد من اخواني المفروض والواجب انه من سلاله امراء بس الله سبحانه ما اراد له ذالك المهم وما درينا الي يجي فوج من الديكه حقه المكاين وياقفن يناظرن في بعضهن وشذا الي جانا والله معاد نسوا عند الدجاج ولا شي ان شافنه هذا كلام ديكه المكاين والله ياجماعه الخير انهن انطلقن وراه وهو بسرع شي وماط رقبته قدامه يبي الفكه والمزرعه كبيره مهيب صغيره ويلحقه يجي حول الميه منهن صدقوني ان السالفه ما فيها اي مبالغه ونها واقعيه راح يركض وراحن وراه ويوم جا عقب العصر ويهظلن الدجاج والديكه حقه المكاين افواج يروحن للحوش حقهن ونجلس انا وخوي ويذن المغرب ونصلي قلت لخوي مدري وين ديك خوالك ونا اخوك اخاف ياكلنه القطاوه قال قلعته ونجلس شوي يوم قال اخوي بسم الله الر حمن الرحيم شف وشذا الي وراك واقف ولتفت قلت لخوي هذا من اهل الارض ابد خلك عنه اسفهه والله العظيم ياجماعه الخير ان كنه جني طلع هو ديك خواله تدرون وشلون طلع اول شي ماله ولا ريشه في ذيله ولا فيه ولا اثر للعرف ومنقاره الي فوق هماهن اثنين الي فوق ما فيه شي طالع منقاره كنه مغرفه مرق ورجليه ما فيهن ولا ريشه صدقوني ان هذا الي حاصل يعني طلع مخلوق ثاني قلت لخوي عقب ها العصر ادبناه شله تكفا ووده لخوالك وقلهم تراه يقول التوبه معاد هوب مخالف على احد ابد يوم وداه لهم وشافوه قالو لا مهوب ديكنا ذا قال الا والله انه هو بس اني وديته لمزرعه اخوي سحاب وهذي النتيجه - على طاري المزرعه والله ياجماعه الخير اني قبل قبل افقد الله يكرمكم نعالي معاد القاها ويجيني ضيوف ليله من الليالي ويوم جو يبي يروحون مالقينا نعالهم هههههههههههه وشذا الي ياخذ نعالنا وسئل العامل لياه يتميلح علينا وقالي مافي معلوم بابا والله ويروحون ضيوفي حافين ماعليهم نعال ويوم صرنا من بكرا وروح وشتري تكرمون نعال جديده ومن خوفي عليهن صرت قبلي شايلهن بيدي اخاف يسرقهن احد المفروض هن الي شايلاتني هههههههههههه بس بلاوي الزمان وضروف الحياه خلتني قبلي شايلهن :038: وقلت لنفسي والله مشكله ابا ابتل ونا خايف من السرق ونا في مزرعتي ويجي في بالي فكره وقلت ابا اخلي تكرمون نعالي عند الباب وبا اراقبهن مع الدريشه وشوف السروقي منهو ويوم صرنا من بكرا الصبح وشوف ذاك السلوقي يعني كلب ويجي ويعض النعله ويروح يركض ويطلع برا المزرعه ويحفر للنعال ويدفنهن ويرجع ياخذ الباقي ههههههههههههههههه وشذا البلوا المهم لقيت تكرمون نعالي ونعال ربعي كلهن مدفونات في نفس المكان ونا الله لا يواخذني شكيت في العمال انهم هم الي ياخذونهن وطلع الحرامي السلوقي او الكلب بس اول مره اسمع بكلب يسرق النعال هههههههههههههههههه وفي النهايه مانقول غير سبحان الله وبحمده سبحان الله العظيم عدد خلقه وزنه عرشه ومداد كلماته ورضا نفسه |
يالله تحييهم وتبييهم كلهم كبيرهم وصغيرهم ذكرهم ونثاهم وليا حيا كثر وليا كثر تنثر وليا تنثر تزبر :038::clap: اذكر من اكثر من 45 سنه كنت اروح مع ابوي جعله للجنه وكل ومسلم نحش صبط من نفود السر الي يجي غربي شقراء وكنا نطلع انا وياه لحالنا بعد صلاه الفجر مباشره ومعنا الشمله والشمله شبيهه بشكل كبير بشبكه كوره القدم ونسميها باالشمله الا حشينا السبط نجمعه فيها المهم كنا نمر من عند اماكن جلوس ناس يعني ما فيه الا الاثر فقط ثمن يقولي ابوي هذولي الي كانو جالسين في هذا المكان قحاطين او يقولي هذولي عتبان او اي قبيله كانت معروفه في نجد يعرف اثرهم الوالد قولو وشلون يعرف اقول لكم يعرفهم من طريقه رمي العبس او النوا حق التمر يعني القحاطين يرمون العبس من خلفهم والعتبان يرمون العبس من امامهم وبعض القبائل يرمون العبس عن يسارهم وبعض القبائل يرمون العبس عن يمينهم وبعض القبائل يرمون العبس في وسط مجلسهم وهذا شي سبحان الله العظيم فيه العجب العجاب يعني شي فطري لا يتصنعه احد وربما هذي السالفه لم يسمع بها احد ولا كن اسئلو شيبانكم عنها وسوف يذكرونها تدرون وشلون ذكرت السالفه لاني جيت مصلي الفجر وجلس اتقهوا واكل تمر وهوجس رايح بعيد مره ونا الي اقوم ودلي اجدع العبس من وراي من غير ادراك لشرود الفكر وتذكرت ابوي وكلامه جعله للجنه وكل مسلم وقلت اوسع صدوركم بها جعلها ما تظيق من شر والله المستعان على كل شي |
اقتباس:
صح لسانك أخي سمو المشاعر إذا ما عالجت جزل المثاني // جـروح الـناس أو أمراً معيبُ ولم ترقى بصاحبها العناني // ولــم تـقــنـع امــيراً أو حبيبُ فلا خـيراً بها طول الزماني // سطوراً دون معنى أو نصيبُ تحيتي وتقديري :ordh: |
| الساعة الآن 07:10 PM |
Powered by vBulletin .
جميع الحقوق محفوظة © لشبكة ومنتديات البراري 2010