|
مر السحاب ولا بدا منه رشة
المنتدى يبي سواليف الاجداد سوالف اهل الطين والسقف عشة نبي سوالف عبرة لكل الاحفاد |
سحاب شقراء لك غياب وطول
الناس تسأل وين ماضي منول |
السلام عليكم ورحمه الله وبركاته الغالي الركام ابشرو بالسواليف الله لا يحرمني منكم وقريب ابدا بالسواليف يالله طلبتك رجيتك لا تخليني عبدك دخيلك عظيم الشان فرجها مافيه غيرك رجيته ونت كافيني يسامع الي في بطن الحوت يلهجها سبحان ربي عدد ثقل الموازيني وعداد خلقه وسبحان الي حاسبها سحاب |
السلام عليكم ورحمه الله وبركاته الا بذكر الله تطمئن القلوب لا اله الا الله وحده لا شريك له اول شي انا اسف على الغياب بس غصب علي سامحوني اذكر سنه من السنين القديمه ايام بيوت الطين انقطع اصبع واحد من الربع انصك عليه الباب ونقطع اصبعه ونقوم نكفن اصبعه نلف عليه خرقه لا قينها بالارض ورحنا نمشي في جنازته وراعي الاصبع هو الي شايله ويقول نبي نقبره بالمقبره ونروح لمقبره قديمه مليانه ومسكره من 80 سنه ونطب مع الجدار ونحفر قبر صغييير يمكن على قبر ماندري لان مع الزمن والامطار طاحن بعض النصايب وتواسا القبر مع الارض اقول يمكن وندفن الجنازه ونحط لها نصايب حصاتين وحده عند الراس والثانيه عند الرجلين بس هذا اصبع ماله راس ولا رجلين هههه بس حطينا النصايب ونقعد ندعيله جعله للجنه الي قاهرني راعي الاصبع من انقطع اصبعه ماصاح قال اح اح مرتين وبس ثمن قمنا بتجهيز الجنازه ذكرت سالفته الاسبوع الماضي والناس يباركون له على ترقيته لرتبه لواء يستاهل الاجودي وسحسح على طمام المرحوم ماتغير شي الا انه صار شايب وطايحات سنونه بعد يالله حسن الخاتمه اقول انتم مثلي ولا انا فيني بلا قبل هاجس الموت في بالي بلا اكثر ربعي متوفين ياملا الجنه هماي اقول في قصيده لي انا لي حبايب مالهم ذكر بين الناس تجدعهم صدوف الوقت الا يالله تجزيها ونالي من عقبهم ماطاب لي مجلاس عجزت اتبع الجره وظاعت بي حراويها وسلامه قلوبكم كملت ودملت وركبت حميرها وشنقلت هذي اخر سباحين العجيزات منول يختمونها بكملت ودملت وركبت حميرها وشنقلت وفي الختام استودعكم من لا تنام عينه سبحانه وفي حفض الله سبحان الله وبحمده سبحان الله العظيم عدد خلقه وزنه عرشه ومداد كلماته ورضا نفسه |
|
السلام عليكم ورحمه الله وبركاته الا بذكر الله تطمئن القلوب لا اله الا الله الملك القدوس يالله تحييهم جميع كبيركم وصغيركم ذكركم ونثاكم وليا حيا كثر وتنثر وتزبر بعد عندنا في شقراء مقبره يسمونها اهل شقراء مقبره الشافعي طبعن ذا الكلام ايام بيوت الطين موووبطي وش انت يالشافعي هذا الله يطول بعماركم دكتور جراح نسا وولاده ورئيس الاطباء في مستشفى شقراء وكل عملياته فاشله وكل من جا بين يديه يموت وهذا سبب تسميه المقبره بسمه وجا نا من الرياض لجنه تفتيش وبعد الرجوع للملفات اتضح انه جاي بفيزه سباك وياخذ بدل سكن وهو ساكن بفله داخل المستشفى وتم تسفيره خارج البلاد هذا المفروض يجون اهل الميتين ويقطعون منه عشره سنتي عن كل وفاه الين يقظي او انا مخطي مدري خل اعلمكم يالتوالي بعمالي المنزليه اول شي عندنا قناره يبي من يفسرها القناره كني من اصحاب الكهف :038: القناره جعل ربي يسعدكم هي ثلاث عصي من اغصان الشجر بطول متر ونص او مترين مربوطات من فوق ونعلق فيها القربه ونصب فيها لبن البقره ثمن اجلس على حيلي وفحش برجلي الثنتين وخض القربه مصنوعه من جلد العنز وقعد اغني بصوت مرتفع هذي وحده وهذي ثنتين يالله بالزبد الزين وخض ومي ياملا الفردوس تقولي بعدي وليدي ونخق يعني يجيني فخر بهذا مع موقه الله يعين يبي من يفسر الموقه بعد هي الحماس والافتخار على استحياء امي بعد وش عليكم مني يالي تغارون :a_laugh2::new4: المهم هذي وحده وهذي ثنتين يالله بالزبد الزين وخض وخض وكل شوي اويق في القربه اشوف الزبد تجمع ولا مابعد اخذ لي ساعه ونا اخض ثمن اطلع ذاك الزبد الاصفر الي وش زينه وحنطه ادخل يدي وشيل الزبد يجيله ملا يدي مرتين او ثلاث عادي ادخل يدي وبربس في اللبن الا جيت اطلع الزبد ماعندنا مكروبات منول حافظنا ربي من كل شر خل اعلمكم كم عندنا في بيت الطين من حيوانات وطيور وشجر الا بنشدكم منول عندنا وعند غيرنا بعد شجره العنب هلحين محد يحطها في بيته مدري ورا الناس تغيرو هي صحيح تبي الماء على طول في حوضها ولا تموت بس والله يجي فيها عناقيد عنب هههههه اكيد مهوب رمان بعض الحكي مدري وشوله يطلع بس مشوها :p (18): وعندنا بعد دجاج وكل وحده لها اسم عندنا خل اعلمكم وش نسميهن وحده اسمها الحبيبه تجي عندنا وحنا نفطر ونقطع لها حوايف الخبز وتاكلهن تدرون وشو الفطور حقنا نغط خبز على الحليب ونا كل ولا تحط امي ياملا الفردوس مرقه طماط وبصل تصدقون الين هلحين اسوي انا بنفسي مرقه طمام وقعد اصيح بعض المرات اذكر امي وبوي ياملا الفردوس وش عليكم مني بعد ابا اصيح:p (18): نرجع للدجاج وحده اسمها ام الصجه قبلها تقوقي وتصجنا وحده اسمها ام الفراخه يمشون وراها فراختها وحده اسمها ام البيض بيضها وااااجد ومعهن ابوهن الديك ابو عرف الله من شوفه النفس فيه يعني اني انا الا الابو وعندنا بعد بيتهن نسميه السحاره الا جا مسيان اجي ودخلهن في بيتهن وصك بابه اصير حاط لهن اكل وماء وش يبن بعد علشان القطو ما ياكلهن وعندنا بعد البقره نسميها الجرسيه وعليها سواجير الله يعيني عليكم يالتوالي يبي من يفسر السواجير وشي ترا منيب من اصحاب الكهف كلش تنشدون وشو هذا وشو هذا :anger2: السواجير جعل ربي يسعد قلوبكم امين هي عودين من عسبان النخل مربوط بينهن حبل ويجن من جنب البقره منا ومناك علشان ماترضع البقره نفسها تصدقون انها ترضع نفسها وتشرب الحليب بس السواجير تدق برقبتها الا جت تلتفت لا تقدر تشرب حليبها الحليب لنا مهوب لها ياحليلها بقرتنا دوووووبيه ورجليها صغار تصدقون نروحبها معنا للرياض في العطله الطويله مانخليها ابد هي السوبر ماركت حقتنا منها الحليب ومنها الروب او الزبادي ومنها اللبن ومنها الزبد وش تبون بعد ياربي لك الحمد والشكر وعندنا ارانب كل وحدها لها اسم بس قصرت ونا اكتب تدرون اني اكتب بصبع واحد ونقر الحروف مثل نقر الدجاج للعيش والله العظيم اني صادق نخلي باقي السواليف للجايات انشاء الله وكملت ودملت وركبت حميرها وشنقلت وفي الاخير مانقول الا صلى الله على نبينا محمد وسلم تسليمن كثيرا وسبحان الله العظيم وسبحان الله وبحمده عدد خلقه وزنه عرشه ومداد كلماته ورضى نفسه |
تكفون ادعولي انا بحاجه للدعاء تكفون يحبابي المسلمين |
أسأل الله العظيم رب العرش العظيم ان يشفيك
|
السلام عليكم ورحمه الله وبركاته الا بذكرالله تطمئن القلوب -لا اله الا انت وحدك لاشريك لك يالله تحيي الغالين كبيركم وصغيركم ذكركم ونثاكم وليا حيا كثر وتنثر هذي سالفه حاصله في شقراء جعلها للسيل والي حاصله له السالفه هو الي معلمني فيها وذا الكلام من سنين طويله قبل يجينا التلفون ولا نعرفه يقول توي شاب وتوي بالغ منيب كبير يقول مفتون في بنت الفلان يقول قبلي اجي حول بيتهم وتفرج على الي يلعبون كوره وعيني على بابهم كودها تطلع ولا شفتها طالعه لحقت وراها وقولها انا احبك وقبلي سهران اهوجس فيك والبنت تقول رح عني لا يشوفك ابوي ولا احد اخواني يحسبوني اعرفك فكني من شرك يقول وبحل بنت المسلمين مامن فكه يقول يوم طلعت ذاك اليوم ولحق وراها ونفس الاسطوانه انا احبك وقالت لي خلاص بكرا اشوفك الا قال المذن الله اكبر صلاه العصر تصير حول بابنا ودخلك عندي يقول مانمت ذيك الليله ومن بعد صلاه الظهر ونا جاي احتري العصر بس يذن ومع اذان العصر يوم فتحت الباب وطلت وقالت لي بسرعه لا يشوفك احد وجيك طاير ماشوف دربي ودخل ويصك الباب اخوها ويقفله والبنت راحت تركض ودخلت يقول وشذا الاخوان عندها الطول في العرض يقول فيه شايب جالس عند مدخال البيت وخوها الثاني واقف عند ابوهم وقال الشايب حي الله من جانا وعندهم في الحوش يجي عشرين كيس سميت ويجي 300 بلكه وشحنه بحص وقال الشايب منول نبي ندور احد يرقيها للطايه يعني للسطح وهلحين جابك الله يقول انا عصقول نحيف ولا اتحمل شي وقال الشايب يالله كل ذا الي تشوفه بعيونك رقه للطايه ولا خليت ذا الاثنين ياطون في بطنك يقول لا تكفا ارقيهن بس لا يقربوني ذا الاثنين يقول قسم بالله مقوا اشيل كيس السميت وبالجهاد وعند ثامن كيس يوم انتصفت في الدرج ويغمى علي وما دريت الاوالشايب يصب على وجهي الماء وقال لعياله جيبو له ماء يشرب وشربت قال الشايب علي حلف ولا كان خليتك تروح يالله كمل الي بديت وشيل السميت كله وشيل البلك كله وقال الشايب وعقب هذي خلني اشوفك حول بيتنا بنات الرجال مالك عليهم درب ياولد فلانه يعاير امي ويسحبني واحد من عياله ويفتح الباب ويطحلني مع ظهري ويصك الباب وروح للبيت وطيح بفراشي يومين ماقويت اقوم من التعب الي جاني وكملت ودملت وركبت حميرها وشنقلت واخر كلامي سبحان الله وبحمده -- سبحان الله العظيم عدد خلقه وزنه عرشه ومداد كلماته ورضى نفسه |
ســحـاب شــقـراء وينك اليوم وينك معاد لك يا شــيخ في الحي طــاري اتذكــر الـمـــاضي وكــتابـة يـديـنـك وتزيد في عيوني احـترام ووقــاري كل ســالـفــه تكتبهــا باصـبع يمينك مثل الأحـــاديث في كــتاب البخـاري فـيهـــــا فـــوايد تجــربتك وســنينك وتمسح عن الماضي جميع الغباري ســـلام مني فــــوق يــدك وجـبـينك والله يـديمــك شــيخـــنا في البراري :ordh: |
يا عيوني اللي من حــزن دمـعـك حدر لو تـنـثـريـنـه ما نـشــف منه الـتـراب قلبي تحـمـل كـــــل الاحــــــزان وصبر والـحــزن ذوق قلبي أصـناف الـعـذاب والـيوم أنـا ابكي مـن لـهـم عندي قدر شيخن مـن أخـلاقه ومن طيبه سحاب حـزني عـلـيه ازداد والـــدمــع انـتـثـر والحزن ما يرجع لي أصحاب وشباب ليته يـعــــود ونـســتـمــع لـحـلى خـبر ويشفي حــزني بـعـد ما طـــال الغياب واما الـركــام اللي على الـغــربه صبر الله يجـــازي صبره الـمــاضي ويـثـاب له قدر عندي وغالي أغلى من الـدرر لو يجمعون الـدر فـاقـه في الـحـسـاب وخـتامـهــــا صلوا على خــير الـبـشـر واسـتـغـفـروا ربي قـبل غـلـق الـكتاب :ordh: |
ليت الـسـنـيـن الـمـاضـياتُ تـعـود بي ويعود مــن بـعــد الـقـطـيعـة صاحبي ويقص من قصص الزمان وما مضى مـن سـيرة الـقـرن الـقــريب الـطـيبي إني أتــوق لـــقـــــائــه والــعــيـن في بحــر الــدمــوع وليل حـزني تـنـحبي ولـقــد رجــــوت الله أن يـلـطـف بــه إن كان لا يـقـــوى الـحــديث ويكتبي ورجـــــوتـه ألا يـكـــــون بــــــه أذى ويعيـش في بـاقي الـحـــيـاة مـعــذبي عـهـدي بـه قـبل الـــنـوازل والـفـتـن والــــــنـاس بين مـصــدقٍ ومـكــذبي والـهــرج بين الـمغـربي والـمشـرقي والـكـيـد أبـدى نــــــابـه والـمـخـلـبي والناس في أوكـــارهـــا تخشى الذي يأتي بـه كــيـد الـعـــــدو الــمــرعبي يا لـيـتـني ألـقــى رحــــالــه قـبل مـا تمضي الـسـنين ويســتحـيل المطلبي واعيش ذكـرى الماضي حتى أختفي كالشمس يخفت ضوئها في المغربي :ordh: |
ســحـاب لو مـا انت بمـعـيد نـعــيـدك كل عـام وانت بخـير وايـامـك افـراح ما ودي اكثر من سـؤالي ولا اجهدك ان كنت تسمع صوتي والقلب لا ناح أخـــــاف ودك تكتب ونــاس تـبـعــدك وزادت مـعــــانـاتي وانــا كلي جــراح لا بد مــا الأيـــام تـشـــرق وتوجــدك ويبعد عجــاج الأرض امطــار ورياح أقــولــهــــا مــن قـلـب والله فــاقــدك والله يـردك وانـت طـــيـب ومـــرتـاح :ordh: |
تعـال ورجّــع الـمـاضي وعـلمني عـن اللي فـات غـيابك حـزن في قـلبي وصـدمه أكبر الصدمـات كـفـــايه لا تـزيد في قـلبي آلام وعــنا وجـــروح سواليفـك تصـبرني وانا ادعي مـفـرج الضيقـات أنا مـا انسى رفيقي لــو يغــيب وتنقطــع ذكـراه أمــانـه لا تـخـلـيني أواجـــه وحــــدي الـمـأسـاة أبيك تنـاظـر عـيوني ويـوقـف دمـعـهــا لـو يـوم وقـلبك يـنـتـشــل قلبي مـن الأحــزان والأزمــات حياتي بدون مـن حـبيتهـم غـربـه والـم وشـتات وذكـراهـم تـزيد الـقـلـب كل ليلـه بكى وآهااااات أنا المظلوم في الدنيا وانا في حيره وانا ولهان تكبلت الهـمـوم وفي اللــيالي المظـلمه ما أبـات على درب الرجــاء بامشي ورفيقي منتظر لقـياه وأنا مـا ادري رفيقي في غــيابه حي والا مــات :ordh: |
أدري تعااااني وتشتكي جروووح وهموم وتشكي مـن الـغــربه بعد هجر الأصحاب الـحـــــال مــا يـبـقى على حــــــالـته دوم والعـســر بعـده يـســر في كـل الاســـباب عيش الـعـمــر مظـلوم وتمــــوت مظـلوم غـريب والــدنـيـا رحــل عنهــا الاغــراب ومن عـاش في الدنيا وهـو منها محروم يسـكن في ديـره مــا بهــا غــبار وتـراب يا صــاحبي لا تـحــزن وتـهـجــر الــنـوم وتبكي ودمـــع الـعــيـن يـبـل الأهــــــداب وتـعــد في الأيــــام يـومـــن بـعـــد يـــوم مثل السجين اللي في وسط السجن شاب انفض غـبار الـحــزن عـن كـاهلك قـــوم واقضي العمر من دون حسره ولا عتاب |
سـحـاب طــولـت الـسفـــر واليوم مــا عندك .. عـذر لا تكون في الدنيا ابتليت وفي هــم وإلا في خـطــر وإلا تـزوجــت .. ولهــيت مــع صاحبك عصر وفجـر والا وســط بيتـك حــزين والدمـــع في العين انهمر بكيت وإلا .. مــــا بكيت ما احدن سـأل عنك ويمر :ordh: وانـــا على حــــالي أنــــا ما عندي عن وضعك خبر يا صاحبي عــود .. ترى مـلـيـت .. وانــــا منتظـــر والله لولا .. اني احـــــب والحـب في قلبي اســتقــر واخـــاف لا طــيري يطـير عــن عيني والقلب الخضر واطــرده في صبح ومغيب وإلا يلاقيــه ... الــقــــــدر القلب في غيابه .. يضيق وما لي عــن عيونه صـبر :ordh:لا اجيك مسرع في الطريق وابحث في شقراء عـن أثر في بر والا ... في جبــال والا تحت .. رمل وحـجــر واسأل عن أخبارك صديق واســألك يــا رب الـبـشـــر يا صـــاحبي الصبر الصبر الـعـســر مــن بعده يـســـر والناس في لــهــو ولـعـب ونهــايـة النـاس .. الـقـبـر |
يقـولـوا تايـه في مجــاهـيل الـنـفـــود وما لقــوا لــه غير بشـتـه والـعـقــال وموتره فـاضي مـن المــاء والـوقـود مدفـون تحت الطعس واخفته الرمـال مـا لــه أثـر في المملكة وإلا وجـــود وبكت عليه الناس في شـقـراء لــيال وبيتـه بعـد فـقــده يجي بيتــه وفـــود تعـزي اهـلـه فـقـد محمــود الخصــال عــمّ الحـزن ومـا لـهـم غـير الصمود ويدعــون لــه رب البريه ذو الجــلال والله يعــلــم هـو يعــود أو مــا يعــود هـــذا هــو اللي منتشــر عنه ويقـــال يا اهل المكاشيت افزعوا بكل الجهود واللي لهـم ذود في مــزايين الجـمــال نبي ســحـاب يعــود ونـرش الـــورود غــالي علينا ومـا له في شـقراء بدال يا ربي انتــــه عـــالـم الغـيب الــودود تعـلـم دبيب النمـل في سـهـل وجـــبال ترحم سحاب إن كان في وسط اللحود وإن كــان حي تمد في عـمــره مجـال والله يحفظـــنا ويديم ... ابن السـعــود حكـامــنا اللي قــادوا بالعــدل الرجــال :ordh: |
سـحـاب في بيته بـعــد فـقـده سـنين والحمد لله عــاد في .. خير وسـلام نـفـــودهــم صـغـير والــتايــه يـبـين لـقــوه متلحـف ونـايـم .. في خــيام عليه قـل الصــح وتسـمـع لــه ونين ما يذكر اسمه واسمه ابوه وما يلام وآخر كلامي أشكر واهني المسلمين واللي وقفوا وقـفـة رياجـيل وشـهام وختامها صلوا على الصـادق الأمين محمد اللي حـرر ... البيت الحـــرام :ordh: |
ســحـاب يطلب منكم اليوم .... السـمــاح والله يـحـلـل مــن ..... يحـلله ويـبـيـــــح سهرت مـــع طـير الحــزن حتى الصــباح ومـا لقى مكان في .... قـلبي الجـريــــح أبكي على الماضي وعلى العمر اللي راح وابكي على اللي تــاه في نجـد الفـســـيح ما فيه في الــدينا .... توافــيق ونجـــاح إلا إذا دلـيــت لـك .... دربـن صحــــــيح البس لـــباس الأوفـــياء لبس الوشـــــاح وتلقاها في عمــرك وإذا بت في ضريــح والطيب خل الطيب لك ... درع وســلاح يكفيك شـــر القـيل والقــال .... القبيـــح واحــذر مـن الــدنيا وصــواديف الـريـاح لا تـقــــذفـك بعيد .... وتـزل وتـطـــــيح :ordh: |
يا صــاحبي مجلســـك عــامر بزواره ما نطفي نــاره ولا .. نتركه بغــباره نضيّف الـناس ونصب لهم .. القهوه هذا يسولف وذا ... يرثيك باشـعـاره ونتذكر الماضي ونقلب في صفحــاته واللي من الطيب خــالي يقـل مقـداره واحيان نبكي عليك .. ونمسح العبره من حزن في القلب يشعـل قلبي بناره جدران مجلسـك فيها ... آثـار للقصه قصة فـقـيد اختفى وانقطـعت اخــباره ليت الـزمـن يرجـع ونرجـع لمجلسـنا والــدنيا يا صـــاحبي والـوقـت دواره مهمــا يطــــول الـزمـن وإلا يفـرقـــنا لا بد مـا يفصـح وينشـر لنا اســراره :ordh: |
يا عيد كيف انت يا عيد مـن دون .. غالين غالين في الـقــلـب يا عيد وتـبكـيـهـم العـين راحـــوا ولا ودعــــونا وداع .... المســافر والحــزن يا عيد قــطــــع قـلــوب الـمـحـبين يا عيد بلـغــهــم الــيـوم .... حبي وسـلامي وإن اللي في القلب لا زالوا في القلب حيين واخبرهم اني على ... العهد والـوعـد باقي واخبرهم ان الـعــرب تـورد الـبـيـر كل حين وان العـمــر ما نسى كـــان مــن قبل ناسين ويشهد على المقفي .. لسان وعيون ويدين نعيش في الـــدنيا مــا بين حـاضر ومـاضي ومــا نـفـقــد إلا ... عظيم وكريم وعزيزين واللي مضى يبقى لـــه داخـــل القـلـب تأثير يزيد حـــزن الـقـلــوب ودمــــوع الحــزينين مهـمـا تـطــــول المســـافـه وكــانوا بعـيدين أبي انتظرهم ولو غــابوا عــن عيني سـنين :ordh: |
يــا مشـــاعـل داوي الـقـلـب الـعـلـيل واخــــبرينا وين والـــــــدك الضــليل العــيون تنــاظــر ... وعــيـت تـنـام والله إن اللــيل في غـيابه .. طــويل والحزن في القلب مـا يـنوي الرحيل وما لي مع حزني ولا همومي سبيل كـــانت الــــدنيا مـــع الــوالــد بخـير والــزمـن لازال في وقـته .. جـمـيل والـسـوالف مـعه في ماضي السنين تـثـبـت إن الـــوالــد مـحـنك واصـيل يحســدونه مـــن كــثـر طــيـبـه وهم مــا لـهـم مــع والـــدك حظ وحصيل يـا مشــاعــل جـاوبي وقصـر الكلام مــا لــنا والله للــوالــد ..... بـديــل كان هـــو زعــــــلان نرضيه ونجيه والله الــهــــادي وهــو نعـــم الوكيل :ordh: |
| الساعة الآن 01:51 AM |
Powered by vBulletin .
جميع الحقوق محفوظة © لشبكة ومنتديات البراري 2010