|
السلام عليكم ورحمة الله وبركاته
اسعد الله صباحكم بالخيرات والمسرات والبركات وكل عام والجميع بخير .. اخي كما عهدناك نهر جاري لا ينضب ما شاء الله عليك غبنا لظروف ومشاغل الحياة ولكن يعلم الله اننا كنا مشتاقين لسو اليفك التي نستمتع لقرأتها لما لها من فوائد جمة من معترك الحياة الجميلة في الزمن الجميل في العقود السابقة والتي هي بكل المقاييس وفي نظري انها هي الأجمل رغم ما نعيش في وقتنا الحاضر من تقنيات ووسائل حديثة وسيارات فارهة وطائرات عملاقة واتصالات قربت البعيد نعتذر في الاطالة وفي قصورنا نحوكم بإنقطاعنا تحيتي |
بيض الله وجهك يا عم سحاب على هالسواليف اللي ما تمل وجعل والديك في الجنة قل آمين الحقيقة مهما قلنا ومهما فعلنا والله ما نوفيك حقك ولكن بإذن الله تكتب في صحائف أعمالك حسنات وشدني يوم تقول ينهبونهم ويخلونهم حتى بدون ملابس يالله لهالدرجة ... هل هو انعدام الضمير في ذلك الزمن وين الرحمة والعطف على أناس في الخلاء بدون حتى ملابس اش قلوب هؤلاء الناس صحيح زمن غريب والحمد لله نحن في هذا الزمان في نعمة ما نعرف مقدارها لأننا لم نعيش في ذلك الزمان المخيف زمن يأكل فيه القوي الضعيف اللهم أدم علينا نعمة الأمن والأمان واقبضنا إليك وأنت راض عنا آمين أسأل الله أن يجزيك خيراً على ما قدمت لنا بسواليفك هذه نتعلم من الماضي ونعرف مقدار ما نحن فيه من نعمة والله يوفقك دنيا وآخرة |
جعلك ووالديك للفردوس يبو سيرين تقول عن الحنشل او قطاعين الطرق منول مافي قلوبهم رحمه لا مايعرفون شي اسمه رحمه والجهل له دوره تصدق فيه مقوله نقولها الين هلحين ويجهلها الكثيرين وش معناها الحقيقي من طول الغيبات جاب الغنايم هذي يقولونها منول لان مافيه الا سرق وقطع طريق وقبيله تهجم على قبيله وياخذون حلالهم ويذبحون رجالهم ويتقاسمون بناتهم وحريمهم او يبيعونهم ومن طول الغيبات جاب الغنايم يقولونها للي رايح يسرق ويقطع الطريق وطول الغيبه والبدو تراهم مايعدون الواحد فيهم رجال الا ماغزا وسرق حلال غيره لا تقولون وراك تقول البدو تراي بدوي ههههههه بس هذي الحيات منول ونما سرقتا غيرك تموت جوع ولا يجيك من يسرقك مافيه زندك ولا مت والناس منول معدومين ماعندهم مايحطونه في بطونهم خل اعلمك على طاري قولتي البدو يعلمني جدي من امي جعلهم للفردوس ويقولي سحاب تعال اعلمك بعلم صاير قبل لا ياخذ ابوك امك يقول جو اثنين من عيال عمك يعانيني طرقيه يعني مسافرين رجال ومعه ولده كبير يمشون على رجليهم وقت الجوع يقول مرو على القراين بلد جنب شقراء ولقو واحد من اهل القراين من الشيحه رجال ومعه ولده يشتغلون في مزرعه متشطره عن الديره يقول ويجون عيال عمك ويمسكونهم وياخذونهم لغار مهوب بعيد ويقومون ويصلخون مواطي رجلين راعي المزرعه علشان ماينحاش وقامو على ولده وذبحوه وكلو منه وصار حول الغار وفقدو اهل القراين ابن شيحه ووالده وطلعو الرجال يدورونهم ويقصون الجره الين لقوهم في الغار وذبحو عيال عمي هههههههههه وشالو ابن شيحه الي مصلوخه مواطيه ورجعو للقراين وعالجوه الين اشفاه الله بعد سنه وحولها بدا يمشي الله لا يغير علينا ولا يحرمنا من نعيمه ومن امنه ومانه وعافيته الله يجعلها نعمه دائمه بس تبي شكرلله ولا ترا النعمه زواله الله يدفع البلا |
آمين واياك يا عم سحاب والمسلمين جميعاً اعتقد أنهم من قطاعين الطرق والحرامية والمنبوذين لأنه حسب ما تصلني من قصص عن أيام الغزو والغارات القبلية كانوا يغزون بعضهم لنيل المكاسب من مال وأرض تماماً كما يحدث اليوم بين الدول والممالك وهذا طبيعي لأن كل قبيلة كانت دولة بحد ذاتها وكانوا يغيثون الملهوف وينصرون المستضعفين حتى أن من بين القصص نصرتهم لنساء عذبوهم رجالهم من قبائل آخر !! فأعتقد أن هذه الخسة والدناءة من قطاعين طرق منبوذين من قبائلهم وحرامية مثل الصعاليك عند العرب ( الشنفرى وتأبط شراً والسليك بن سلكه ) فهؤلاء منبوذين من قبائلهم لأنهم لصوص وقطاعين طرق . فما ينبغي وصم القبائل باللصوص وقطاعين الطرق والا فالأولى وصم ذلك للدول الموجودة اليوم علماً أن لدينا الافتخار بالأخلاق والدين ومن يشذ عن ذلك ينبذ حتى شارب الدخان منبوذ من مجالسنا وهذه العادات من قديم الزمان وليست وليدة اليوم وهذا ما يؤكد كلامي بعاليه تحياتي وتقديري |
بالنسبه لسليك ابن سلكه زعيم عصابات ويقطع الطريق بس فيه صفه زينه يسرق ويقطع طريق القوافل ويسرقها بس يعطي الفقراء مايخليهم والعرب من ايام الجاهليه عنتره وحاتم الطائي وغيرهم من القبايل عندهم سلوم ماشين عليها ومنها الدخيل عليهم يحمونه ومنها الاسيرمايقتلونه ولا يتعرضون للشايب والعجوز والطفل في حروبهم بس الظاهر ان الجاهليه فيذا الزمن يقتلون الاسير وليته قتل وبس لا يحرقونه ويخونون المئتمن وينقظون المواثيق هذا الزمن غريب من افعال بعض المريضين نفسين لان افعالهم مايصدقها عقل انسان عاقل ونحمد الله ونشكره ونستغفره ان جعلنا في خير ونعيم ومان عساها دايمه ولا الدنيا تروع والعيون علينا من حاسد ومن مغبون ومن مجرم يتمونون زوال هذي النعمه ولا ننسا قول الحبيب المصطفى صلى الله عليه وسلم نعمتان تحسدون عليها نعمه الامن في الوطان ونعمه الصحه في الابدان الله لا يبدلهن ويكفينا شرمن فيه شر علينا |
هذا آخر الزمان الله يكفينا مصائبه ولكل قاعدة شواذ إلا من أتى الله بقلب سليم وهذا ما استفدناه من النقاش الطيب في مجلسك يا عم سحاب تحياتي وتقديري لك حفظك الله ورعاك |
ياهلا ومرحبا يبو سيرين مدري ورا الناس معاد ترد علي او حومت كبودهم ههههه والله مدري وش بلاهم |
يا هلا يا عم سحاب والله مدري وانا اخوك يمكن يوم دروا انك بدوي حامت سبودهم :038::038::038: هههههههههه لا والله أمزح معك لكن انت شوف الدخول للموضوع تعرف مدى أهمية موضوعك من آخر سالفه لا يقل عن 500 مشاهدة تمت على موضوعك وهذا عدد لا يستهان به خمسمية شخص يحررون مدن من أول يا رجل موكب السلطان لا يصل لخمسمية شخص هههههه يعني أنت أهم في منتدانا هههههه عموماً لاحظ هذه المشاهدات والمنتدى أصلاً خالي من المشاركات فما بالك لو أن المنتدى به مشاركات وشعراء يتنافسون بقصائدهم كان وجدت الآلاف يلاحظون موضوعك القيم ويتابعونه عموماً ما يكفي أبو سيرين يتابع سواليفك ويدعي لك والشاعر الكبير الركام وسمو المشاعر وغيرهم من الزملاء يا رجال من أول كان الشياب على الدكة ما هناك الا أربعة أو خمسة ويسولف عليهم ويستانس لسماعهم سواليفه لا تنظر للكثرة بقدر ما تنظر لمن يتفاعل معك فربما أن من يشاهد ولا يشارك لديه عذر يمنعه من ذلك أنت قدم ما لديك وأتحفنا بالجديد وصدقني سيكون له صدى تحياتي وتقديري |
هههههههههه انا بدوي بس موووووووبطي يمكن من ايام عدنان وقحطان هههههههه ابشر يبو سيرين بالسواليف والله يبو سيرين عندي سواليف ولا نيب اخيرمن الناس بالسواليف حاشا لله بس اني اوسع صدري بالسواليف وتخليني انسا الهواجيس ونت خابر الدنيا تبي جهاد الله يخرجنا منها ونحن مسلمين |
يا عم سحاب لقيت لك مقطع في اليوتيوب يصف ( الحياة في المملكة العربية السعودية عام 1966 م ) وأضن انهم لاقطينك وانت بين النخل في شقراء قديماً هههههههه https://youtu.be/ATRcFabpA58 |
مشكورين اخواني على المشاركات المفيدة
استفدنا واستمتعنا معكم بالديوانية الشرحه |
ههههههههههههههههه تصدق اني شكيت انه صدق هههههههههه ابو سيرين بس الي انت مشبه عليه الي يحرث في نخله ولا الي يبيع ضبان ههههههههههه ولا انشاء الله بعد راعي التكسي راعي الشفره ههههههههههه ابد ناضرالي في نخله ولا اهنا فرق جعل ربي يقبلك يبو سيرين ويوسع صدرك امين |
اقتباس:
ماشاء الله تبارك الرحمن يالغالي سليمان زارتنا البركه جعل والديك للفردوس وترا الي يكتب لنا شي نفرح به ولا نقول عنه شايب ابد وهذي الساعه المباركه |
اقتباس:
هههههههه والله قلت يمكن تم تصويرك وانت ما تدري ههههههههه هههههه راعي الضبان هذا شفت مثله في مقطع قبل فترة تطور الصيد لديهم وأصبحوا يصيدون بالمئات ههههههههه من أول نظرة للنخيل والحياة فيها صراحة عذرتك على حنينك لها وتذكرك لأيامك الجميلة فيها حياة جميلة جداً وش اللي قردكم وتركتوها !! والله مثل هالجمال ما أتركه لو يعطوني الدنيا وما فيها ولا يسعني إلا أن أقدم لك في هذه المناسبة أسمى أيات المواساة لتركك لمثل هذا الحب والألفة تحياتي وتقديري |
يا عم سحاب وش حالك وش اخبارك عساك طيب ترى ما منعني من الرد هنا الا خشية أن أثقل عليك والا والله مشتاق لك وانا الوحيد اللي صارحتك والا كل المنتدى مشتاقين لك ويدخلون الموضوع يدورون عليك حتى لو ما به سالفه ... على الأقل طمنا عليك حفظك الله ورعاك |
كم اشتقت لهذه الزاويه الجميله ..
عُدت أبحث عن الإبتسامه والسعاده التي أجدها حينما أتصفّح هذه القصص .. حماك الله ياعم سحاب وأطال في عمرك .. |
مـافـيـه وقــت ما نـمـــــر
نرقب عسى يظهر سحاب ندعي لـه بطــول الـعـمــر وكـــل اجـــل لـه كـتــــــاب مـابـه مـفـر مـن الـقـــــدر ولا بـه مـجـال لـلـعـتــــاب ان كـان ماجـا لـك تـمــــر وانك مـطــول في الغـيـــاب بـنـودعـــك قـبـل الســفـــر يـمــكــن ذهــاب بلا ايــاب تـقـول تشـكي من الكـبـــر وامراض ماهي في الشباب هــذي الــحــيـاة بلا مـقــــر مسكـين من يــتـبع ســـراب الــكـــل مـــنــا يــنـتــظــــر يالـلـه تـيـسـيـر الــحســـاب الركام |
صح لسانك اخوي الركام يا عم سحاب ترى خوفك هو اللي يزيد عليك الأوجاع والآلام حاول تنسى وتشغل نفسك معنا في المنتدى والله يردك لنا سالم ترى أشغلتنا عليك |
يــا مـشــاعـل بـلـغـي الـوالـد سلامي واخـبـريـه اني مـــــن أيــام احـتـريـه مــن ســوالـيفـه ومـن شوفته ضامي والـحـزن في قـلـبي مــن بـعــده بكيه اخشى من يومن يجي صبحه ظلامي يـنـتـهـي عـمــري ومــا عــــاد التقيه أخــبريـه إنـه على صـــدري وسـامي وان بـعــــده أو غـيـابـــه مـــا نـبـيـه ،،،،،،، |
السلام عليكم
لقيت لسحاب مشاركات في منتدى اخر وفي تويتر ولكن انقطاعه متوافق تقريبا مع انقطاعه عن منتدى البراري غاب سحاب وغابت اخباره ونتمنى ان يكون بخير |
اقتباس:
وعليكم السلام اخوي الركام اذكره يقول بسوي عملية الله يستر ... ما فيه أحد يعرفه يطمنا عليه ؟ الله يرده لنا وهو بأتم صحة وعافية |
الله يطمنّـا ويطمنكم عليه يارب ..
أصبح من طاري العمليات هاجس مخيف لديّ بعدما فقدنا غانم رحمهُ الله أثناء إجراء عمليه جراحيه .. الله يرجع سحاب بالسلامه يارب .. |
اقتباس:
ان شاء الله ما فيه إلا كل خير اعتقد انه انتهى من العملية وفي فترة نقاهه وأتمنى يعود ويطمنا سريعاً |
اقتباس:
السلام عليكم ورحمه الله وبركاته اعتذرمنكم على غيابي بسباب ظروفي يعلم ربي عنها والحمد لله من قبل ومن بعد قل مايصيبنا الا ماكتب الله لنا والحمد لله ابشركم كني احسن شوي مهوب مره والعافيه على شوي شوي والحمد لله لي ثلاثه شهور ماقويت ادخل وجيكم ولا فتحت جهازي من عقبكم ابو سيرين انت بمقام ابوي وقدرك على الراس :a_laugh2: شفتا وشلون صغرت ونت تكبر هههههههه ههههههه والله انك غالي وربي يشهد وجعلك ماتفقد غالي وجعل ربي يسعد قلبك دنيا ودين امين |
اقتباس:
انتي يالغاليه رذاذ يعلم ربي قمه في الاخلاق والطيبه جعل ربي يمتعك متاع الصالحين ويجعلك من اسعد خلقه امين بنتي رذاذ سامحيني تراي شايل همك اكتبي لي سماح طلبه رذاذ ليتي عن هروجي تعديت وليت الحروف ابعد عليه رسنها وياليت وش تنفع الا قلت ياليت شايب وظاقت من همومه نسمها في ساعتن كثرت علي التناهيت ومعاد اميز نورها من عسمها اسم الدلع سحسح:a_laugh2: يالله سماح جعل ربي يوفقك وغانم توفا ياملا الفردوس الاعلى من الجنه راح لمنهو ارحم بنا من امهاتنا جل جلاله وسعت رحمته كل شي الله يجمعه مع ولده بالفردوس امين راح غانم ونبي نروح جمعنا الله وياه في جنته امين شفتي وشلون الدنيا تسوي بهلها الله يخرجنا منها وهو راضي عنا وهو السميع العليم وشكرن على مداخلتك ولا عاد تخليني |
اقتباس:
مرحبابك عد ماهل الغمامي او عدد مالاح برقن نحتريه صاحبي قدرك تعلا بالسنامي طير حرن والنوايف تهتويه ناشدن عني ونا بصحرا المظامي ذيبها عاوي وروحي ماتبيه واعذابي مثل مكسور العظامي ماحدن حوله ولابه محتريه سحاب شقراء |
اقتباس:
هلا ومليون مرحبا يالركام الغالي وجعلك ماتفقد عزيز امين وعلى قوله واحد يقول قصرنا من جدي وهو ابو ميه وخمس اسنين و كل ماقلنا مات حرك رجليه وهو انا يقولي واحد ترا لك سنتين ونت تقول احس بالموت ولا طعتا تموت :038: انت خابر اهل شقرا وعيارتهم ماتسلم منهم جعل ربي يغمر قلبك بالسعاده والرضى ويجعلك من اسعد خلقه امين دنيا ودين الركام الي على اسمه بالكتاب معتلي الهامه على طول العمر مايهاب الحر والله مايهاب ماكره دايم على روس الحمر ناشدن عني ونا كني غراب:a_laugh2: صايده جاهل ويلعب بالجمر نتف سبوقه وصابه بالصواب وكل ماروح يشوته لو يمر هذا حالي جعل قدرك مستجاب عندمنهويامر الدنيا بمر الشاعر سحسح :clap: |
حي الله شايبنا الغالي
سحاب شقراء عوداً حميداً وآخر الغيبات أن شاء الله تحياتي |
السلام عليكم
حي الله سحاب والحمدلله على سلامتك ولياصرت حي لاتغيب |
اقتباس:
أعذب حروفك طيبك اللي وسمها نشتاق لك مع كل شاعر كتب بيت وأحلى المشاعر في غيابك رسمها أهلاً وسهـلاً وعوداً حميداً :icon31: رذرذ |
اقتباس:
يالله تحييه وتبارك فيه وتسعد قلبه امين ماغبت يالغالي من هوا نفسي بس وش اسوي غصب علي وبعدين منيب شايب احس ان روحي توها ولوي اتعكز على عصاي ههههههه سبحانك ربي تلاحض معي مهما كبرنا فيه شي داخلنا متمسك بالشباب ههههه انت مثلي شرفتني جعل ربي يشرف مقامك ويعلي قدرك امين |
حمد لله ع السلامه يابومشاعل
مرحبا تراااااحيب المطر يالغالي ،، |
اقتباس:
هلا ومرحبا ومسهلا بالغالي الله يسلم قلبك من كل شر ويسعدك دنيا ودين الله يعلي مقدارك ومقامك شرفتني جعل ربي يحفظك |
ياهلا ومرحبا بالغالين منول يوم الحيات البسيطه والطاهره ايام بيوت الطين الا اقبل علينا السحاب نروح فوق تله مرتفعه ونجلس نخيل السحاب وكلن يبدي رايه بالي يشوفه وحيان يصيرفيه اختلاف في الراي وكلن يجيب دليله بالراي وهم يلهجون بالتسبيح والاستعفار ويشوفون من ربهم الخيرالعظيم النافع ولا قالو بكرا يدخل الوسم تمطر في الليل سبحانك ربي الان احيان كثيره تجي مشاكل ومعارك بسباب اختلاف التوقعات وزعل ومزاعل وكلام ماينقال سلامات يالغالين وعلى الراس والعين قدركم جميع ونستانس ونسعد برايكم وخبرتكم ونستبشرخير بس ترا علم السحاب والمطر عند ربه يسوقه سبحانه للي يبي ويصرفه عن الي يبي والبشريصيبون مره بالراي ويخطون الف مره يعلم الله ماودي يجي شي بينكم ومواقف تزعلون من بعض فيها ونتم طاهره قلوبكم وسلامتكم |
صادق والله يالشايب الله على ذيك الايام
أما الآن أصبح تواصلنا مع بعضنا سلبي لدرجة أنك تخالفني الرأي فأنت عدوي الله يهدي الجميع ويردهم اليه رداً جميل كل التحايا |
الامطار بدت ورحمه ربي عامه الكون سبحانه وفيه ثنتين خلوهن ولا تقربونهن الاوله لاتجازفون برواحكم وتقطعون الوادي والسيل في مجراه والاولين يقولون ثلاث الا هاجن انحش وخلهن وفك نفسك منهن ونزع الثقه فيهن مهما كان 1- البعيرالا هاج 2- والسيل في مجراه 3-والعبد الا صاق او زعل الثانيه ايام الصيف والحر الشديد شل من راسك الكشتات وحب البرخله الين يربع وش يحدك تدخل الصحاري بمسافات هذا اعتبره انتحار صريح وهلاك احرصو ونصحو ربعكم عن الاغلاط وتصير نهايه العمر والموت ماحدكم ربكم للتهلكه وما اجبركم احد عليها بالغصب الله يحفظكم ويخليكم لعيالكم ووالديكم ويبعد عنكم الفقد من غالين وبس هذا الي عندي |
الله يسعدك يا شايبنا الغالي
وين اللي يقبل النصيحه الآن أذن من طين وأذن من عجين والله الهادي البشر الحين كلٍ يقول عقلي الكامل تحياتي لك |
بسم الله صلى الله على محمد الابذكرالله تطمئن القلوب لا اله الا الله وحده لا شريك له يالله تحييهم وليا حيا كثر وتنثر بعد بصغيركم وكبيركم بعد اقول ابو سيرين ماتدرون عنه تراي فاقده من موووبطي عساه يكون بعافيه امين يارب العالمين ترا كل شي تلقاله بديل في الدنيا الا امك الله يمتع الحي منهن متاع الصالحين والميت الله يسكنه الفردوس امين يارب العالمين اذكر مره طحت ونشقت جبهتي ههههههه قولو وتضحك بعد وتروحبي امي للصحيه منول نسمي المستشفى الصحيه المهم والله يعينا على المهم ويخيط الدكتور الجرح ويوم جينا من بكرا وتعلق في الدريشه يعني يالتوالي النافذه :a_laugh2: وطيح منها وتنشق لحيتي يعني الفك السفلي انشق وتروحبي امي للصحيه والدم يضرب ويجي الدكتور وقال الله مهونتا امس مخيط لك راسك برضو اليوم تجي فيك اصابه تانيه بالمصري دنتا ولد شقي :crying: ويخيط الفك السفلي مكان اللحيه الا كبرت ويوم خاطه ويخلي الخيوط ماقصهن بطول تقريبن شبر او اقل شوي خيطين اثنين يتدودلن ويقول عشان ادبك راح اسيبهم كم يوم ههههههه والله وسواها الدكتور ومي ماخالفت جعلها للجنه ويصيرون البزارين الا شافوني يقولون ابو لحيه ابو لحيه ههههههه وصرت اتوزا عنهم الين صار اخر الاسبوع وروح للصحيه ويقصهن الدكتور وهو يضحك وقالي لو جيت مره تانيه راح اسوي لك لحيه وشوارب والحمد لله مارحت صارت لي درس بس وشذا الدكتور الي يعقد عيال الناس :anger2: اصبرو خل اعلمكم بذا السالفه الثانيه علشاني مبطي عنكم خل اعلمك بسالفتي يومني صغيييرتوي دعنوني اوجعتني اللوز الي في الحلق لان عند الواحد اربع لوز ثنتين في الحلق وثنتين منيب معلمكم وينها فيه كل واحد يتلمس روحه ويلقاهن:new4: المهم والله يعينا على المهم تنفخت اللوز عندي وطيح في فراشي سبوع كامل ولا طب في بطني شي مقدر ابلع شي وبغيت اموت منهن وذكر اني منسدح عند الوجار ومي ياملا الفردوس تقرب البيز الي يمسكون به البريق او الدله تقربه عند الضو شوي الين يدفا ثمن تحطه على حلقي يعني تكمدهن وكنا في ايام البرد يعني الشتا ويوم صرنا في اخر الاسبوع ويتظخمن اللوز خلاص مستويات ويتفجرن بغيت اموت منهن الله يكرمكم ويوم تشاويت شوي قالت امي وش ودك تاكل ونا امك لك اسبوع ماطب في بطنك شي قلت ابي جحه ههههههه يالله حلها ونحن في الشتا هههههه منول مافيه جح في الشتاء كل فاكهه في وقتها بس ومي ماتبي شي غير الجحه ونا امك ونا مصر ماابي الا جحه ولا حس ابوي ياملا الجنه جاي وهو يقول منذا الي مشتهي جحه قالت امي سحاب قال والله ياوليدي تبي تحتري الصيف الين يجي ابشر بالجح والجراوه بعد وقعد اصيح ابي جحه يعني ابي جحه :crying: ومي ياملا الجنه تعرف نقطه الضعف الي فيني وتقوم وتجيب طماط وبصل وتسوي على الضو في الوجار تسوي مرقه طماط وهي تطبخه وتقولي ياوليدي لك اسبوع ماكلتا شي ونا اشاهق ماابي الا جح ويوم صارت جاهزه مرقه الطماط ونا كنت منسدح وقوم بشويش ونا اشاهق شره عليهم وراكم ماجبتولي جحه ويوم قربته امي عندي في قدر صغيير خلاص مااقدر اقاوم صابني انهيار ونا الي امسك الخبزه وعينك ماتشوف الا النور ماتسمع الا الرشخ وبلع الي في القديير كله ثمن قال ابوي هاه هلحين تشتهي جحه ونا ابوك ولا مالها شهوه ونا الي ارسم ذيك الابتسامه تشوف ضرس العقل منها وهذي يسمونها ابتسامه الرضى الله يغفر لهم ويرحمهم ويسكنهم الفردوس وكل مسلم وفي حفض الله وما نقول الا سبحان الله والحمد لله ولااله الا الله والله اكبر عددخلقه وزنه عرشه ومداد كلماته ورضى نفسه |
يا مرحبا بك
من طوَّل الغيبات جاب الغنايم مشتاقين والله لسواليفك لا تقطعنا |
اقتباس:
ياهلا ويامرحبا ومسهلا بالغالي بشرني عن صحتك جعل ربي يوفقك ويسعد قلبك ويرفع قدرك امين |
| الساعة الآن 09:34 PM |
Powered by vBulletin .
جميع الحقوق محفوظة © لشبكة ومنتديات البراري 2010