|
اقتباس:
يامرحبابك عد مزنن نثرمن ماه وعداد مالاحت مزونه عجايبها ابشر يالركام الغالي ومن عيوني |
وين ابو سيرين غايب عساه طيب بس |
يا هلا عم سحاب المعذره منك ظروف الحياة اشغلتني تحيتي وتقديري |
الحمد لله على السلامه يبو سيرين |
الله يسلمك يا عم سحاب منور المنتدى :ordh::038: |
بسم الله صلى الله على محمد الابذكرالله تطمئن القلوب لااله الا الله وحده لاشريك له يالله تحييهم جميع كبيركم وصغيركم وليا حيا كثر هلا بالغالين ومرحبا ومسهلا ولوكم ماتردون منول يالغالين ماننطل شي من النخله ابد ابد عسبانها او جريدها نستخدمه لعده اشياء اول شي مكنسه نكنس بكسره العسيب والييف نغسل فيه المواعين ولا نحطه في ثعبه الدله يمسك الهيل ولا فيه مانع نستخدمه نفرك فيه اجسامنا وحنا نتروش وعساها تنضف بعد :a_laugh2: والكرب والصنوخ والعسبان بعد نستخدمهن في شبه النار ويصير عند الوجار عقب ماتطورنا طاحونه نطحن فيها القهوه عقب مانحمسها ونطحنه فيها وهي مهيب على الكهرب لا مابعد جانا الكهرب ندور بها باليد ولونها يجي احمر نبرمها وتطحن القهوه وبس ولا قبل مهنا الا بالنجر والعبس او الفصم نجمعه مانرجمه ونعطيه البقره تجتر فيه ولا نعطيه الغنم ماعندنا شي ينطل ابد ابد :038: ويصير فيه بيت الحطب ورا الي جالس يصلح القهوه نحط فيه الحطب وخوص العسبان نصلح فيه زبيل الخوص ويصير له عروتين للشيل ونحط تحت زبيل الخوص من برا قطعه جلد ونخيطها فيه علشان يتحمل الشيل ولا ينخبق علينا وكلمه ينخبق يعني لا ينشق اسفل الزبيل ونسوي من الخوص بعد الحصيرالي مثل هلحين الفرشات ونجلس عليه ونصلي عليه ونرقد عليه بعد وبعد وجذوع النخل تصير قويه وتتحمل نحطها مثل السواري او العمدان الي تشيل البيت وكثرمانحطها للمساجد الصغيره الي تجي بين النخيل ولا نحطها بين الزرانيق حقه القليب ونعلق عليها المحال او السواني تدرون منهو الي يركب الرشاء على المحال الا انفصخ منه ونتم تخبرون العمليه خطيره اي خلل يحدث يطيح وسط القليب والموت لا محاله لا قدر الله الي يركب الرشا رجال اعما مايشوف صدق او لا تصدق هذا الي حاصل يتلمس الين ياصل الرشاء ويركبه على السواني عاد اهل النخل يعطونه قاسمه الله ياتمر ولا عيش ولا الي يجي مهمب يخالفون خل اعلمكم بذا السالفه الي حاصله من مووووبطي هذي سالفه واحد راعي نخل عنده للصدر بقره وحمار المهم يوم قظوذاك اليوم من الصدر قال لحرمته روحي ادخلي الحمار في الحوش وصكي عليه الباب المهم راحت حرمته ودخلت الحمار في الحوش وصكت عليه الباب ويقوم الحمار ويهوش الباب براسه يعني يظرب الباب براسه الين انفتح الباب ويطلع الحمار وينحاش ويوم جو من بكرا ولا الحمار مهوب فيه ويقعد يهوش الرجال على حرمته يالي فيك مايخطيك انتي السبب في نحاشه الحمار ثمن قالها تعالي مكانه :p (18)::p (18):هههههههههه ويربط الرشا في بطنها ويربط الرشا الثاني في البقره ويصدر على حرمته ذاك يعني خلا حرمته تجر السواني وتطلع الماء من القليب هههههههه ماعندهم منول الرجال هو كلش مهوب مثل هلحين انقلبت الايه :wallbash::wallbash: بس هاه ترانا في سعاده من ربنا مهيب عند غيرنا لله الحمد والشكر وبس ابا اروح اصلي هلحين ولا حقين على الباقي بخير انشاء الله سبحانه وتعالى ودعتكم الله وفي حفض الله وفي الاخير مانقول الا سبحان الله وبحمده سبحان الله العظيم عدد خلقه وزنه عرشه ومداد كلماته ورضى نفسه |
يا هلا يا عم سحاب والله ممتاز استفادتكم من النخل في مجالات عدة هههه لكن سالفة تستخدمونه في الدله وبعدين تفركون فيه أجسامكم في الاستحمام هههههه هذي ما دخلت مخي ... اش يعني القهوه مثل الصابون أجسامكم يعني لها ريحه حلوه ؟ صراحه استخدامات ما تخطر على البال وياليت تحفظ في كتب اليوم قبل نسيانها أما المرأة زمان فكانت نعم المرأة تتحمل المسئوليات العظام ولا يغير ذلك من ابتسامة وجهها وصفاء قلبها . أما اليوم فجعلوها المجني عليها بكلمة خيالية اسمها ( يقولون ) هذا كان شعار حملتهم على المرأة في عدة سنوات مضت يقولون ويقولون وكأن أزواجهم وحوش كاسرة ما تزوجتهم إلا من أجل افتراسهم وللأسف هناك من صدق هذه الطغمة الفاسدة ومشى في اتجاههم حتى أصبحت المرأة اليوم تريد الشغالة وتذهب بلا محرم وتسافر بلا محرم وغيره الكثير من الانحلال الذي يندى له الجبين .... وكله بكلمة ( يقولون ) ولو طلبتهم بحالة واقعية لأتوا لك بالمجنسين المستأجرين من أجل سرد قصص لا أساس لها من الصحة .... يقولون ويقولون وضعنا في يقولون بينما تناسوا آلاف النماذج الناجحة ولم يسلطوا عليها الإعلام لتمرير أهدافهم للأسف . تخيل في يوم ما صليت العصر وإذا بأحد المحدثين يحدثنا بكلام الرسول صلى الله عليه وسلم وبعض النصائح ودخل في موضوع المرأة فأخذ يسرد لنا القصص الخيالية والنصائح حتى وصل إلى أن قال ( هي أسيرة ) تخيل المرأة أسيرة في نظر هذا المتمشيخ .... نسي هذا الجاهل أن المرأة بطبيعتها تحب الرجل بصلابته وقوة شخصيته وعنفوانه في بعض الأحيان ... هي كذلك كما خلقها الله تحب القوة والشخصية والعنف في بعض الأحيان كما نحب نحن العكس .... ولو أنها تزوجت رجل عكس ذلك لأحرمته المنام من أجل أن ترى شخصيته وقوته وعنفوانه كما تحب أن تراها .... هذه هي طبيعة المرأة كما خلقها الله ... لماذا نعتبر تحملها ذلك أنها مظلومة بل أسيرة كما قال للأسف . أتمنى أن نعي لما يظهر به هؤلاء الجهال الذين لا يعلمون من الدين أو العلوم الحضارية إلا القليل واستلموا المنابر ليضلوا الناس عن طبيعتهم وعن ما يحبه الله ويرضاه . حفظك الله ورعاك يا عم سحاب وأتمنى أن لا أكون أثقلت عليكم بهذه المداخلات التي أتمنى أن تتقبلوها بصدر رحب . تحيتي وتقديري |
هلا يبو سيرين ومرحبا لو نبي نطيع المتحدثين الي تقول عليهم تذابحنا في الشوارع يبن حلال هلحين كلن صار يفتي وكلن صار شيخ وينصح على جهل وظلال المشيخه مالها الا رجالها مهوب كل من هب ودب صار شيخ ويفتي وبالنسبه للحريم معاد هن مثل حريم اول ولا حولهن منول غير وهلحين غير الا من رحم ربي بس نوادر |
بسم الله صلى الله على محمد الا بذكرالله تطمئن القلوب لا اله الا الله وحده لا شريك له يالله تحيي الغالين الي يردون والي مايردون ميخالف هين لا تردون ونا مغير انقر بصبع واحد مثل نقرالدجاج للعيش :a_laugh2: منول يالغالين عندي في نخلي سور مطوق المزرعه ولا زال فيه وكان فيه بابين باب يدخل معه السيل وباب ندخل معه انحن وفيه بيت طين بس طاح من السيل دخله السيل في الليل ونا منيب فيه وجدع البيت ياسفابه المهم يوم جيت يوم من الايام مع شقه النور ولا الباب الكبير مشبوب فيه وطايح ويدخن وقص الجره الين وصلت مكان الي شاب في الباب وعرفته وشكيته ومسكوه وسجنوه يوم دريت ولا ابوه جايني ونا اعرف ابوه وجلس يطلبني السماح وروح انا وياه للشرطه وكفله وطلعه يعني انا الي شاكيه ونا الي اكفله :038: ياسفاب ذاك الباب الي وش كبره وفي وسطه خوخه ههههههه مهيب الي توكل لا الباب الصغير الي يجي في وسط الباب الكبير نسميه خوخه وش اسوي هذا اسمه :new12: الشي الثاني بعد في النخل يوم جيت يوم من الايام ولا فيه فراخه نخل مسروقه هههههههههههه الدنيا شقا وبس ويوم جيت بعدها بيومين ولقا صطول الماء حقه الغنم ماخوذه هههههههه منيب اقول لكم الدنيا شقا :a_laugh2: ويوم شفت ولا الي ماخذ الصطول معبيها من الجابيه بالماء ورايح بها ونتم خابرين الصطول مع المشي ينكب منها بعض الماء وتبع الجره وتبع نواقيط الماء ويوم وصلت مكانه ولاه غارس النخل ويسقيه بعد بصطولي وماي ومنول اعرف الجره ودري منهي جرته بس مهوب كل الجرر لا الي اعرفهم بس هذا بعد ان ماغلطت بعض المرات بس ذاالي ماخذ نخلي وصطولي عرفته وهو رجال مهنا صح جعله للجنه توفا من موبطي وجلست احتريه يجي لاني اشوفه جاي يمشي من بعيد ويوم وصلني وهو مادرا اني فيه الا يوم وصل وقلت له تراي داري عنك بس ليتك الا اسقيتا النخل ترجع الصطول تراهن للغنم وشوا قال ميخالف :p (18)::p (18): قال اجل ابا اجي املاهن بالماء من اللزا او الجابيه وسقي نخلي ماشاء الله صارن نخله هههههههههههه يالله بصره والدنيا فانيه وش اسوي به قصرت منيب اقول لكم الدنيا شقا وسنه من السنين زرعت جح يعني بطيخ كلهن واحد :038: ويجون بزارين ويسرقونهن هههههههههههه وشذا التجاره راحت وطي وليتهم ذا البزور يقطعون الجحه وياخذونها لا يجرها بشجرتها وهو يركض ثمن يجرها وراه عشره امتار هههه ومره من المرات توزيت بين الشجر ويوم جا واحد من البزارين يبي ياخذ جحه ونا الي اكلخ عليه:shutup: يعني اروعه بين الشجر وهو مادرا عني وهو الي يطمرويصرخ ويروح يركض من الروعه ومن بعد هذي معاد شفتهم منيب اقول لكم الدنيا شقا وكثر بعد مايغثني الكلاب ايام الصيف والحر يجن يلعبن على البرسيم وش اسوي اسمه ماينكتب برسيم وبس المهم الاجيت احصد يقطع يديني المحش يصير البرسيم متواسي مع الارض بسبب الكلاب ونا من اصبح معي المرجامه وهي حبل وفي وسطه رقعه نحط فيها الحصات ثمن نبرمها وننطلها على الكلاب منيب اقول لكم الدنيا شقا هههههههههههه ومره ونا في نخلي هدن علي كلاب ويقولون ان ابوهن ذيب هذا كلام اهل المزارع الي حولي وهو صدق فعولهن فعل ذياب لعبن في غنمهم المهم جني ونا اروس يعني اسقي النخل يجن سبعه ويهدن علي يبي ياكلني:p (18)::p (18): ونا الي انطلق عركوبي يطق في قفاراسي من السرعه هههههههههه انتم عاد خابرين مهنا صراويل تصير المغطه شي مايوصف لانها متحرره من القيود ههههههه وروح اركض والكلاب وراي كل واحد راسه اكبر من راس الحمار وركض ولالي الا حجره المكينه ورقا فوق الصطح والمكينه تشتغل ولكلاب تنبح انا وين اروح وتقطع المكينه معنا تقطع يعني يصير الماء بعيد عن المراوح الي في القليب ثمن تقعد تدرج حول ماتفكك حذافاتها تنطلق بسرع شي وهذا فيه خطر على المكينه لا زم تطفا ونا وشلون اطفيها والكلاب تبي مسكتي علشان يعرمشني ويوسعن صدورهن علي منيب محول لو كلش ومادريت مع صجه صوت المكينه ونباح الكلاب الا بصوت الرمي ويذبح اثنين منهن ويصوب اثنين ونحاشن ولاه واحد من ربعي جاي يمي ويوم شافهن حول الشوزن وفكني من شرهن منيب اقول لكم الدنيا شقا وخل اعلمكم مره من المرات جلست احتري الشعيب يجي لان جاينا مطر وجلست في مدخال السيل وكان الوقت الضحى يعني الصبح وجالس على ذاك الرمل الي توه ممطور يالله من فضلك الجنه والسيل مابعد وصل وقوم اتسدح على الرمل ويدخل عيني النوم ومادريت الا بالي شايلني ويدربيني وصلني السيل ونا راقد هههههههههههه وشوا وفك روحي منه سبحان الله وصير امشي جنب الشعيب ويجيني دوار مدري وشو ذاك الي جاني وجلس على الارض الين ركدت الدنيا ولا قبل تقلب في عيوني منيب ناسيه ابد ذاك الموقف وبس هذي سواليفي عن نخلي وهذا بعض الي حصل الله يجمعنا في واسع رحمته ويسكنا الفردوس ووالدينا وذراياتنا وجميع المسلمين امين وسبحان الله العظيم سبحان الله وبحمده عدد خلقه وزنه عرشه ومداد كلماته ورضى نفسه |
هههههههه ما شاء الله عليك يا عم سحاب صاير قصاص أثر ههههههه الحياة اللي عشتها في ذاك الوقت الشهر فيها عن عمر |
اقتباس:
ياهلا يبوسيرين ومرحبا ايه صاير مري قصاص اثر ههههههه انت خابر منول اكثر الناس يمشون حافين ونعرف الجرر تقول الشهر عن عمر والله انك صادق متا نصبح ومتا نمسي وتوي عرفت السبب ابشرك منول مهنا اجهزه تسرق الوقت ماندري عنها مثل الجوال ومثل الكمبيوتر عرفت يوم خرب الكمبيوتر حقي ونا منيب راعي جوال الا اكلم فيه بس طلع اليوم عندي كنه شهر هههههههههه وتوي جاي مصلحه الساعه هلحين 9 الا ربع ويوم اروح اصلحه بعد صلات العصر مباشره يخوي ياشين العود الا تعلق في شي يصير كنه بزر وهو انا ماقويت اصبر عنه ابد حتا اني اقول لنفسي وش كنت اقضي فيه وقتي قبل اتعلم على الكمبيوتر |
ورا معاد فيه احد يرد الله يدفع البلا |
هين يالعويد ماتردون علي كله علشان لا يقول احد انكم شياب ان خلاكم الكبر ماخلاكم الموت خلوها حلقه في الاذن بس طيعو شوري ردو علي لياني اكتب فيكم قصيده هجائيه هههههههههههههههههههههه تراي امزح عاد لا تصدقون بس هذا التميلح الي يقولون :a_laugh2: |
أبشر طال عمرك يالامير متابعين معك كلش ولا تهجانا بالقصيد
|
اقتباس:
ههههههههههههه ياهلا والله ومرحبا براعي العرض وش اسوي فيهم كلهم مسبطين ولا احد يكتب لي شي علشان يشجعني قلت مافيه الا هجائيه هههههههههه شرفتني شرف الله مقامك يالغالي |
السلام عليكم ورحمه الله وبركاته يالله تحييهم جميع كبيركم وصغيركم ذكركم ونثاكم وليا حيا كثر وتنثر وتزبر بعد اذكرسنه من السنين القريبه مهيب مبطي جاينا في الرياض مطر وطلعت اتمشا انا وبنتي الصغيره العصر ورحنا عند شبك المطار الي عند رادار المطار من شرق وجلسنا على ذاك الرمل الممطور يالله من فظلك الجنه ويجن عندنا عصافير كلكم تعرفونهن بس فيه شي غريب معهن عصفور لونه ابيض اول مره اشوف عصفور ابيض اي والله العظيم اني صادق شوف عيني مهوب يقالي المهم والله يعينا على المهم يوم اذن المغرب قلت لبنتي ابا اصلي وبنتي جالسه وراي وقبل مااكبر قالت بنتي ابوي وشذا الي جاي يمنا يركض ويوم ناضرت ولا وش اشوف راس كله شعر وله رجلين ثنتين ادق من قلم المرسم وطول ذراع ويوم وصلنا ويلف عنا ولوي ماد رجلي ظربته ويرقا العقم ويخترق الشبك الي وراه وهو على ركظه ودريت في هذي انه من اهل بسم الله راسه كبر راس البزر بس فيه شعر منفوش ولاله وجه ابد ونتم خابرين الجن في كل مكان موجودين حتا بيوتنا هلحين كل بيت وفيه سكانه بس مهومب يخطون على احد فيه بيت عجوز في شقراء بيت طين وراعيته رايحه مع ولدها للرياض وهلحين توفت ياملا الفردوس المهم جو عيال وطبو في بيتها لان الحاره كلها خراب بيوت طين طايحات ويوم طبو في دارها وهم يدورون الاثار القديمه مثل البنادق القديمه وغيرها من الاثار ويوم جو في الحوش ويلقون خيشه مليانه بنادق قديمه مقمع وم فتيل وغيرهن من بنادق منول ويلقون الخيشه مسنده على الجدار ويوم جو يبي ياخذونها وكان جنبهم باب الخشب الكبير الي يطلع على السوق ويوم وصلو الخيشه وقبل لا ياخذونها ويجي شي يظرب على الباب الخشب بقوه ويهز الباب وجو يبي ياخذون الخيشه وينحاشون ويجي شي ينفض الباب نفض بغا يطيح من محامله وهو باب كبير وينحاشون ويخلون الخيشه في مكانها وهذا يالغالين بعض سكان البيوت من الجن يحرسون بيوت المسلمين في غيابهم وترا هذا كلام الي طابين على البيت وهم يعلموني بالي صاير لهم وشبلاي ذا المره كل سواليفي عنهم ههههههههههههه وبس هذا الي عندي اليوم ونتم بصركم لا تردون علي |
يا هلا يا عم سحاب والله الجن على كثر ما أسمع عنهم إلا إني والحمد لله ما قد شفتهم ولا حسيت فيهم ما أدري يمكن يخافون مني هههههههه وترى شقرا وما حولها أنسب مكان للجن لأنها في وسط الصحراء وهم يسكنون الصحاري والقفار . ومن بعد المدن والكهرباء والانارات بعدوا عن الناس وأصبحوا في المناطق البعيدة جداً في الطايف منطقة يقال لها ( حضن ) وفيها جبل يقال له ( عِنّ ) بكسر العين وتشديد النون ... وهو معروف بتواجد شعب كامل من الجن أو مثل ما يسمونها مملكة للجن وصاحب اخوي كان عنده دورة في تلك المنطقة فسكن بالقرب من جبل عن وكان يحب الرقص وفي ليلة من الليالي سمع صوت طق طبول وطيران وفرح فرحاً شديداً يحسب أن هناك من يرقص ويغني ... فألقى نظرة وإذا هم على سفح الجبل .. فقرر أنه يطلع لهم ويرقص معهم المهم يوم طلع الجبل ووجدهم قام بالرقص معهم وكان فرح جداً ولم ينغص عليه إلا شخص بجواره يدفه بذراعه ... زي اللي يقوله روح لا ترقص معنا ... المهم تضايق منه والتفت له وقاله ( وش فيك بسم الله ) يوم قال الكلام هذا الا كل الموجود أمامه من نار وأشخاص يرقصون اختفوا تماماً !!!!! بعد تلك الليله تدريجياً جن جنونه ونقل إلى مستشفى شهار والله يكفينا شرهم ويعطينا خيرهم . تحيتي وتقديري |
ياهلا ومرحبا يبو سيرين انت صادق يالغالي وسالفه الرجال الي تقول قد صارت لناس واجد منهم الي يستخف ومنهم الي ياقاه ربه ونا في نخلي اذكرفيه حياله يعني مزرعه قديمه الا جا مسيان يعني عقب العصر او توه مذن المغرب الا جيت ادخل للبلاد يعني للديره بس منول نسميها البلاد الا جيت ادخل ونا على رجلي مامعي سياره ذاك الحد او ذاك الوقت اشوف فيه اثنين متسدحين على الرمل على جال الحياله وهم مهمب بعيد اشوفهم واظحين المهم قلت ذاك اليوم ابا اروح اشوف وشم هذولا وباقي في الدنيا شوي سفر مهوب ظلما المهم وروح يمهم ويوم وصلتهم مالقيت احد وناضر الرمل ابا اشوف جره ومقعادهم ولا شفت شي الرمل متواسي ولا كن فيه احد جايه قلت بصوت مرتفع شوي الله يقاصرنا ويقاصركم بالحسان وسميت بالله وتكلت عليه ورحت امشي ونا كل شوي التفت لياه جايني احد يمشي وراي والحمد لله ماشفت من ربي شر سبحانه عدد خلقه وزنه عرشه ومن اتكل على الله كفاه لااله الا هو ونا بعض المرات الا صار جاينا مطر ولا شفت السحاب على روس الشعبان اقعد في نخلي اتحرا للشعيب يجي ويدخل في النخل ونتم خابرين مهنا كهرب يصير معي سراج وحاط على راسي خيشه ياحقه الرز ولا السكر ادخل زاويه في زاويه وتصير مثل القحفيه ولا مثل ثياب المغاربه ويد فيها السراج ويد فيها المسحات كني عاد ابا ارد السيل بمسحاتي وذكر كم مره اشوف في الحياله او المزرعه الي اقولكم عليها اشوف فيه واحد معه كشاف او بجلي كلهن واحد وشوفه يكشف او يولع بالكشاف ويطفيه يولع ويطفيه وكان معي ذاك اليوم واحد من ربعي قال ابااروح اشوف وشو ذالي يكشف علينا وراح يمه على رجليه ويدور ويدور اثر مالقا شي وجايمي وهويقول هذولي عيال الجن يتميلحون علينا ويقول مالقيت حتا اثر جره الله يقاصرنا ويقاصرهم بالاحسان ومنول نقول للي جنبنا قصرانا مانقول جيرانا نستخدم كلمه قصارنا اكثر من كلمه جيرانا منول |
الله يكفينا شرهم لكن والله يا عم سحاب على كثر ما سمعت عن الجن ما شفت قصص فيها جراءة منهم مثل ما يحدث من ساكني جبل عن !! يحكي لأخي ..... صديقه الذي أصبح مجنون الله يشفيه ويغفرله ... أنه في يوم من الأيام كان ذاهباً للصلاة وقد تأخر عنهم ولم يلحق المصلين إلا وهم في التشهد الآخير المهم أكمل الصلاة وهو في الصلاة ذهب جميع المصلين وأصبح المسجد فاضي ولا يوجد به أحد غيره .... المهم عندما جلس للتشهد الأخير وسلم التسليمة الأول كان وجهه جهة باب المسجد تقريباً يبعد عنه 10 إلى 15 متر وإذا عند الباب قطة ( قطو ، هره ، بس ) تنظر إليه فنظر إليها وإذا برقبة القطة تتمدد حتى وصل رأس القطة أمام رأسه بالضبط ورجعت كما كانت مرة أخرى هههههههه أخونا طبعاً سلم التسليمة الثانية وعينك ما تشوف إلا النور حتى ما سبح ولا استغفر أخذ يجري ويجري حتى وصل إلى مكان سكنه وهو خائف جداً ولا يستطيع حتى الكلام . صراحه الجن في منطقة حضن فيهم جراءة عجيبة حتى اللي يسوقون السيارات في تلك المنطقة يصابون بما يسمونه ( انجم ) أي ( أصبح لا يعرف الطريق ويدور في المنطقة من دون أن يصل إلى المكان الذي يريده ) ههههههه وهذه تحصل كثير جداً للناس هناك وهذا من أذية الجن وأسأل الله أن يحفظنا ونلقاه وأعيننا ما رأت جني واحد ههههههه تحيتي وتقديري |
اما ذالي مط رقبته هههههههههههههه تصير يبو سيرين خص الا صرتا في منازلهم واحد يقولي مره رحت لجبله منطقه حول عفيف او الدوادمي يقول رحتلها في الليل يقول ونا امشي بالسياره صحرا طبعن ولا فيه سياره مقابلتني تمشي طبلونها مسرعه يقول وتنصاني على سرعتها يبي يصدمني وجه لوجه يقول وقفت انا وتجيني وغمض عيوني اتحرا الصدمه وتعداني ماجاني شي وشوي ونا اناظرها الا يوم اختفت مدري وينها راحت ويوم وصل ربعه وعلمهم جلسو يظحكون ويقولون هذا جني قبله محسر فينا الا جينا في الليل |
على طاري قوقل ارث هذا النضام كان تابع للاستخبارات الامريكيه ايام كنا في بيوت الطين اذكر منول ايام بيوت الطين طلعت اشاعه ان الامريكان يشوفونا ونحن نايمين في الطايه ياخزياه كانهم يشوفون كلش لان فيه معارك صامته تصير في الصطوح منول هههههه وذكر واحد يقولي يقرون معك الجريده ونت تقراها وطلع كلامهم صدق وستغنو عن ذا النضام القديم وباعوه لقوقل وهلحين يقولون عندهم شي يشوفون ويسمعون الي في وسط البيت الله لا يوفقهم صرت مااعرف البس ثيابي يشوفوني بعد ثمن يقولون مخلوق فضائي في سعوديا اريبيا شفوفو صرت اعرف اتكلم انقليزي |
لسلام عليكم ايها الصامتون :038: انا كنت عالم من صغري بس الا هلحين مااكتشفني احد هههههههههههه اذكر ونا صغير كان عندنا حياله نخل مهجوره وكنت اروح لها ومعي صطل فيه ماء ولقا فيها بيوت العقارب وقوم وحجر بالتراب على البيت ثمن اصب من الماء الين يمتلي ثمن احفر عليهن وتبع الرطوبه الين القا العقرب وحطها في قوطي معي وكرر العمليه عشر وعشرين الين تشوف العلبه تخترش بالعقارب مليانه ثمن طال عمركم اروح وجلس عند بيت النمل الاسود يصير فيه نثيله بالتراب مرتفعه عن الارض في بيوتهن ثمن تبدا العمليه العلميه وقوم اخذ العقارب على وحده ورميهن على بيت النمل ثمن تعال شف النمل وش يسوي فيها يقطعنها تقطيع ويدخلن بها في بيوتهن وسبحانك ربي لااله غيرك الا جدعت عليهن عقرب كبيره يروحن النمل الصغار بسرعه داخل بيوتهن ثمن يجن ومعهن نمل كبر ابليس من كبرهن كبار مررررره ويمسكن العقرب ويفصلنا تفصيل كل عضو بالحاله ويدخلن بها في مستودعاتهن سبحانك ربي ماخلقتا هذا باطل فقنا عذاب النار تعلمني خالتي جعلها للفردوس وميمتي وبيي وخيي وجدي ونا معهم بعد وكل من يقراء وكل مسلم تقولي تعال اعلمك ياسحاب ايام الجوع وش نسوي تقول الا جانا مطر ذيك الليله وصبحنا وصارت الشمس طالعه نروح لبيوت النمل ونلقاهن مطلعات كل العيش الي عندهن في الشمس علشان ييبس لان المطر جايهن تقول نقوم وناخذ العيش حقهن تقول ماعندنا مانحطه في بطونا من الجوع تقول نجمعه مايجي جمعين في اليد ونضفه من التراب والحصا ثمن نجرشه بالرحى ثمن نطبخه وناكله شوفو النعمه الي انحن فيها يالتوالي الله يكفينا شر الدنيا وميلاتها وبس هذا الي عندي اليوم ونتم بصركم لا تردون علي |
انا معلمكم عن الشايب الي امام احد المساجد القديمه هذا طال عمركم امام مسجد وفي صلات الاخيريقرا ويقول وكانتا حدرا عبدين من عبادنا ويردون الي وراه وكانتا تحتا عبدين من عبادنا ويصوق الامام عليهم ويقول وكانتا حدرا عبدين من عبادنا ويردون عليه وكانتا تحتا عبدين من عبادنا ويقول الامام وكانتا حدرا عبدين من عبادنا ولا انتمب ابخص مني وينفجرون الي وراه من الظحك --------------------- وفيه بعد سالفه يوم جاطاري الامام والمسجد فيه واحد راح يسير على ربع له في قريه من قرا نجد المهم يوم اذن الاخير ويروحون للمسجد وكانت البيوت تعد على اليد المهم اهل القريه هذي دارين انه غريب عن الديره المهم كبر الامام وبدا بالقرائه ونسا الايه وصار يرددها يبي الي وراه يعلمونه وهم كلهم زكرت ولا اهنا حفض للقرءان وصار ضيفهم احسن منهم ورد على الامام وينطق الي جنبه يقول ارفع صوتك تراه مهوب يوحي وينفجرون من الضحك كلهم وقطعو صلاتهم |
قريت عن شايب عاقينه عياله وهو بهذا العمر يحتاج للرعايه وحق على عياله يوفون دينه في تعبه في تربيتهم وشقاه في سنينه وهو يخاف ينقصهم شي وتاليتها يوم كبرو وتزوجو وصار لكل واحد بيت بالحاله صارو كلن يتعذر من رعايته بعذار مثل وجيههم الي يقول اعمالي والي يقول مشاريعي والي تقوله زوجته لا تجيبه عندنا ويتعبنا برعايته ويقطعنا من الروحات والجيات الله وكبر بس مادرو ان بر الوالدين دين عليهم ويبي يشوفونه من عيالهم مادرو ان رضا الله من رضا الوالدين وين راحت ولا تقل لهم اف ولا تنهرهما -تعدو مراحلها وصارو يتعذرون من رعايته ولا يبونه وضاق صدري انا بالحيل منذا السالفه ودمعت عيني وبس هذي تاليتها يالدنيا وقلت لي بيتين الشايب الي مايبونه عياله من كبر سنه كلهم عايفينه جعل الظنامايدرج الساق فاله جزاك يالجاحدتذوق الغبينه سحاب شقراء الله الله في بر الوالدين طيعوشوري يالي والدينه موجودين او احد منهم لا اوصيكم تشيلونهم في عيونكم تراهم مايتكررون في الدنيا ون شفتو منهم شين النفس تحملوهم ترا الدنيا متعبتهم وهذي بيتين من قصيده طويله لي ولخطاك شايب قد مضا عمره سنين فعرف جراله من سنينه مخزه يالله شاب الراس من نايح البين سحاب نجد وطالبك لا تلزه سحاب شقراء امك وبوك وش عذرك عند ربك ياويلهم من ربهم الي والديهم موجودين وياخذ له ايام ماشافهم ولا يقضي حوايجهم خل اعلمكم تراهم تضيق صدورهم منكم وتدمع عيونهم الا ابطوماشافوكم وصدقوني مهمب معلمينك يخافون تضيق صدوركم لازال العطا منهم وكثر تغير العيال من زوجاتهم ومن قل المراجل فيهم خلوني معكم صريح والي مايبر والديه مهوب رجال صدقوني والزوجه الي ماتحثك على بريره والديك تراها تبي تعقك الا كبرتا وعيالك يعقونك اللهم اني بلغت اللهم فشهد وكلن يشوف الدرب وعقله دليله |
اخي سحاب كل ماتقدمه فيه نصيحه جعل ماتقدمه في ميزان حسناتك
(وبالوالادين أحسانا) تقبل استاذي مروري مع احترامي لشخصك الكريم |
اقتباس:
ياهلا وغلا ومرحبا ياعايد شرفتني بحظورك جعل ربي يشرف مقامك دنيا ودين |
الله يا أيام مضت لو تعودين
نفسي تبيها والليال تعصاها قارنتها باالوقت الأول وذالحين وحنت لها روحٍ تزايد عناها رسمتها من عام خمس وثمانين راحت سنين وخاطري ماسلاها الله على بيتٍ لنا خابرة طين في حارةٍ مادنس الغدر ماها الله على ذيك الغرف واللياوين محلا برودتها ومحلا دفاها ياجا المطر نرقى على السطح عجلين نفتح مرازيم الغرف ونتباها شعر فرحان العنزي https://m.youtube.com/watch?v=iMAsFaXcc3U |
الله الله يالركام الغالي هوصادق تولم جاك الرد الي على قد الحال هههههههههه قالو تحب الدار الي من الطين قلت ايه ماتدرون وشو غلاها هذي ترا تسوا بعيني الملايين مضا العمربي عايشن في ذراها وليمن ذكرت الي مضالي من سنين كني غريرن حارمينه حلاها الله وكبر كيف صارت ميادين مثل السحاب الي شمالن محاها الله وكبر يوم شقراء بساتين كان المطرماينفقد في سماها واليوم صارالبوم ينعق بصوتين مهوب واحد لا رحم الله نماها سحاب شقراء |
السلام عليكم ورحمه الله وبركاته يالله تحييهم وليا حيا كثروليا كثر تنثر وليا تنثر تزبر بعد وش اسوي بكم بعد منول يقولن العجيزات يسقم العيد بلاحنا وهذا مثل يقولنه منول ويسقم يعني شي مهوب لازم ومثل ذا الوقت يصيرن العجيزات مولمات شرط العيدمن القريض وحلاو البرميت وحلاو العسل وحلاو الساعات وحلاو مدري وش اسمه يخلطونه مع القريض وبسكوت ابو ميزان وعلك الطابع ذاك الي يجي فيه ورقه عليها رسمه ونلحسها ثمن نطبعها على يدينا وتطلع صوره على اليد وزق العطار ههههههههههه يقصدون به السبال يسمونه منول زق العطار ولا نعرفه الا بهذا الاسم وسئلو العجيزات والعويد عنه ويبي يعرفونه بسم زق العطار خل اعلمكم بعد ترانا منول نسمي الحبحر البارد نسميه الخكري علشانه بارد ونقول لراعي الخظره كم ذا الخكري عليه ويعلمنا بسعره ويقول صندوق الخكري الكبير بكذا وصندوق الخكري الصغير بكذا شي عادي اسمه عندنا ومنول اغلب البيوت عندهم شرط العيد يفرحون البزور ويحببونهم في شهر رمضان ويصيرون يحترونه كل سنه متا يجي بس والي مازالو متمسكين بهذي العاده الطيبه هم اهل القراين في الوقف وغسله جعل ربي يسعدهم ويمتعهم متاع الصالحين تشوف شوارعهم تمتلي بالبزور وكلن معه كيسه مليانه بالحلاو وهم مبسوطين وفرحانين وصار لهل القراين شهره كبيره بسبب تمسكهم بذا العاده الطيبه وفي شقراء بعد بعض الاحياء يصير عندهم تشرط او عيديه الله يجزاهم بالخير ويسعد قلوبهم بس ايام بيوت الطين كانو في شقراء اكثر من هلحين ولاجا يوم التشرط منول في شقراءايام بيوت الطين تشوف البزارين مجموعات من عيال وبنات يمشون في السكيك ويتشرطون ويطقون البيبان ويقولون عطونا عيديتنا عطونا عيديتنا جعل ربي يعيده عليكم ومبسوطين ثمن يطلع عليهم جذاعين كل واحد منهم كنه حصان بليس ثمن الا شافو البزور ومعهم الكيس مليانات حلاو قالو قمرق قمرق ويلحقون البزارين وياخذون الي معهم ويدحوسونهم في التراب وتعال شف ذا الصغيرين كلن يصيح طول بطنه يعني بقوا صوت الله لا يلومهم وذا الي جايهم شوي يكفي روعتهم جعله فيذا الجذاعين شهب العصاقيل ليت والله من يمسكهم ويمصع اذانهم تراهم هلحين ابوان يعني صارو شياب بس مايذكرون سواياهم الشنيعه منول اعرف منهم ناس واجد الي يقمرقون منول بس منيب معلم عليهم ونا الحمد لله ماعمري سويت قمرق ولا لحقت البزارين ولا اخذت منهم شي ابد ابد الا مره اذكرها وصارت حاسمه الشر معاد سويتها الاوله والاخيره اذكر قالي واحد منذا الشياطين وش رايك ياسحاب نقمرق البزارين الي يتشرطون وقلت وشو يعني نقمرق قالي الا شفناهم ومعهم كيس مليانات حلاونقول قمرق ثمن نلحقهم وناخذها منهم ويبدا ابليس يوسوس لي قل طيب قل طيب ثمن قلت بصرك ورحنا نمشي منعند مسجد شيحان ونحن متجهين غرب وبعد المسجد بيت ثمن تجي سكه على اليمين الي تروح يم المجباب ولفينا مع السكه ونشوف ذوليك البزارين ومعهم بنتين جذيعات ومعهم كيس مليانات حلاو ثمن قلنا بصوت مرتفع قمرق قمرق ونلحقهم وينحاشون والي يصيح والي يطيح ونحاسو ضعيفين ونا لحقت البنت الكبيره هي الي معها حلاو وااااجد وكيس مليانات وهي الي تنحاش ياسبقها ذيك البنت ونا اركض معها على عماها مابين عيوني الا الحلاو ابا اخذه وتدخل في بيتهم كان الباب خشب ومفتوح ودخل معها على سرعتي ومادريت الا يوم طمرت ذيك الحرمه وهي الي تصك الباب وتاقف عنده وقالت للباقيات امسكوه وهن ماصدقن على الله يصير فيه مطارد ويقومن ثنتين يلحقني بين السواري وفيه وحد منهن دوووبيه وجالسه ماتقوا تقوم ويوم مريت من عندها وهي الي تمسكني مع عصقولي وتحطني تحت رجلها وتقعد تقبص فيني وتلشط مقعدتي وتقبص وتلشط وقبصتها مثل الزراديه توجع ونا افرفش تحت رجلها وش اسوي مقوا اتحرك وتحصل الكارثه ونا في امس الحاجه لهذي الكارثه ومادريت الا بنتهم الي انا لاحقها تجي وتسحبني منهم وهي تشاهق وتصيح تقول خلوه خلوه لا تطقونه وتمسكني مع يدي وقوم مع بنتهم وتروحبي للحوش حقهم وتعطيني حلاو ونا اكل وشاهق وتعطيني زود وحط في مخباتي ونا اشاهق بعد ثمن جابت مصاقيل وقعدنا نلعب الصقله انا وبنتهم وصرت كل يوم ونا في حوشهم نلعب الين كبرت بنتهم وصارو يعيونا نلعب مع بعض وقالو لها خلاص صرتي كبيره وقولي له الا شفتيه لاعاد يجي يسحب رجليه عند بابنا ولا طلع عليه ابوك وسطره بكف وبس بعد هذا التهديد حصلت مواقف بس منيب معلمكم لو تطيرون وزرره وزرره تبخق عين العدو اعلمكم وش الي صار علشان تقعدون تضحكون علي منيب معلمكم ابد ابد وكملت ودملت وركبت حميرها وشنقلت الله يوسع صدورنا ويشتت همومنا ويختم لنا بالجنه ووالدينا وذرياتنا وجميع حبايبنا وترا الدنيا خيبه للي هيله هذا كلام العويد والعجيزات منول ونا اقوله هلحين بعد خيبه للي هيله وكان ودكم تدعون لي تراي تعيبان وسبحان الله والحمد لله ولااله الا الله والله اكبر عدد خلقه وزنه عرشه ورضا نفسه ومداد كلماته |
عيدكم مبارك جعل ربي يعيده اعوامن عديده بصحه ورغد واامن ومان وكل عام ووطننا وقادتنا وشعبنا المظياف وأمننا بخير وعز وتمكين بحول الله وقوته وقول لهل الشروالحقد والتفجيرات مسكين يالي تبـتغي الشرفينا ابشرك زدنا المحبه ميه عام حنا جسدوالروح راعي السنينا ابو فهدبالحزم والعزم ضرغام حكامنا روح وجسد ماحيينا ياكود تطلع شمسنا غرب قدام ولاقامت الساعه رضاالله علينا ونتم على درب الشياطين خدام سحاب شقراء |
كل عام والجميع بصحة وسلامة
تقبل الله منا ومنكم صالح الأعمال اللهم أدم علينا نعمة الآمن والأيمان وأحفظ بلادنا وبلاد المسلمين من كل مكروه صح لسانك شاعرنا الغالي كل التحايا |
اقتباس:
امين الله يديم علينا الامن والامان والصحه في الابدان يالله ادمهن ولا تحرمنا منهن مايعرفهن الا الي فاقدهن شرفتني يالغالي شرف الله قدرك ومقدارك |
طرح شيق يستحق المتابعه .
|
|
سـلام يـا شــيـخ لك في قلبي حظ ونصيب الــروح مــا تـنـقـبـض مــن قـبـل آجــالها يـا شــيـخ إذا غبت أنا قلبي معك ما يغيب تـمـــر الأيـــــام والـــــــدنـيـا على حــالها ما قـلـت يـوم وفعلت وخفت غـير الرقيب ما خوض بحـر ومحـيط واخشى أهـوالها مثل المزن في البراري والقرى والشعيب تـهـطـل ولا هـمـهـــــــا الـنـاس وهـبـالها بلا حـــدود وشـبـوك وفي المفالي تصيب بلا جـــواز ووثـيـقـه تـمـــــنـع اهـطــالها ما غــيرت لـبـسـهــا ولا تخــاف المشيب ما غيرتها الـسـنـيـن وســاءت أحـــوالها حــرّه مـثل مــن ولــد حــرّ وبعقـله لبيب يعـرف وش يقــول والكلمه لـهــا رجالها نـرد عــج الـسـنين ونـنتـظـر وش تجيب والله يـحـمــيـنـا مــن الـــــدنـيـا وانـذالها :ordh: |
سـحـاب مــا عــاد باقي لك مــن الـعـمـر كثر ما راحي الخـوف مــا عــاد يعني لك ان كـنـت لـلـســــر فضاحي يا شـيخ عــــود أنــادي لك فضفض لـنا وانت مرتاحي إن مــت والله لا أدعــي لك وانشد من الشعر الامداحي يــا كـثر مـا راح مـن جيلك ولا بـقـى غـيـر الاصحاحي مــا يـنــفـعـك يـــوم منديلك تمسـحـبه دمــوع وجراحي اســـتـغـفـر الله ووصي لك من قبل ما تزور الارواحي :ordh: |
يـا مــرحـــبا باللي لـفـانا مــن بـعـيد
ونـحـمـد الله عـــودتـه بـالـســلامــه شيخن من شيوخ البراري الصناديد ولـه بـقـلب الـناس حـب وكــــرامـه :ordh: |
ياجعلك يبو سيرين ماتفقد غالي وجعل عينك ماتدمع الا من خشيه ربك امين يارب العالمين علمتني بنتي الله يصلح لنا ولك العطا تقول ابوسيرين بح صوته يدورك وبالقصايد ينادي وقلت اكتبي ذا الخريبطات على قوله جدتي وكتبيهن رد من جهازي وخليه يدري عني وبشريه اني بخير وبنعمه من ربن كريم :ordh::ordh::ordh: العــود عــودن وطايحاتن سنــونه والعـمــــرولا واليـالــي ســريـعات والسين صارت شين والناس يبلونه والنـــاس ماتفـقـد كبـيـــرن الا مات يومين اوهي ثلاثه والعزيزين ينسونه ونت الـوحـيد الـي يناديني بجزلات يالله عسا الفردوس للي خلفك مضمونه ويالله عساها لك وللحبيبين مهــدات من واحدن يعطي وعطاياه مضمونه سبحان منهو يسمع النمل بخطوات يامرحبابـك عـددماهلـت من مــزونـه وعــداد مالاحـت بروق المنـيـفات وعداد خلق الي له الناس يرجونه وعداد علمه هو عالمن بالخفيات وعداد حلمه وكثيرالناس يعصونه وسبحان منهو يغفرذنوب وزلات مني لبوسيرين وللطيب مفتونه الي على حمل اليالي يجي وقات ومن صلب منهم بالمواثيق ماتخونه وللطيب مفتونن وللطيب فوحات اهل المراجل ولوهي تتعب متونه شيال لحمـول الدهــروالثقيــلات من نسل منهم تعجز القاف من دونه هذا الخوي الي عليه المهمات الطيب منك وفيك يامنبعه وفنونه حيرتني والقاف من عجزها جات وقبل جزيل القول ودمح المعجونه وللوقت روحاتن وللوقت جيات والبنج فيني شف عظته وسنونه وبشرك نجحت كثــيـر المهــمات هـذاترا قــول الـدكـاتر هم يقولونه والعلم عند الي جعل للطيب نفحات العمـرمثـل اكـتاب يالـي تقــرونــه مايفهمه كود طاهرالقلب بوفات والمنجيه المنجيه عمود الدار وركونه احفض صلاتك هي للمخاليق منجات سحاب شقراء |
بيض الله وجهك يا شيخنا وردك لمنتداك سالم وغانم والله اني اشتقت لك ولسواليفك |
السلام عليكم ورحمه الله وبركاته يالله تحييهم وتبييهم وولكم ابو سيرين و كل اعظاء البراري الكرام فيه يالغالين اشياء كنا نسويها ايام بيوت الطين من 60 سنه تقريبن وقبل والان اندثرت ولا احد يذكرها الا اذا ذكرتا فيها الشياب والعجيزات جعل ربي يختم لهم بالفردوس الاحياء منهم والاموات في جميع مناطق مملكتنا الغاليه ومن هذي الاشياء طال عمركم كان معروف عند الجميع ان الواحد ماينام متوسط الابواب في داخل البيوت ولا ينامون في الدروب داخل البيت ولو يجيك شايب ولا عجوز يقولون وش بلاك يافلان راقد في الدرب تراك توذي غيرك قم غير مكانك يادافع البلا ويقصدون بغيرك اخواننا من الجن وكان هذا شي مفروغ منه وكلن يعرفه الشي الثاني جعل ربي يجمعني وياكم ووالدينا بالفردوس امين الا جت حرمه تروح للحج وعندها بزران رضع ولا كبيرين شوي يعني من الي في مهاده وكبر شوي تقوم الحرمه وتودع وليدها عند اختها ولا جارتها وهم شي تسويه تخلي ثوب من ثيابها الي ماغسل وفيه ريحهتها علشان بعض البزارين الا فقد ريحه امه يقعد يصيح ليله مع النهار لوه في مهاده وكثير منهم يموتون ونشدو العجيزات ويعلمونكم وفي ذا الحاله الا عيا يرضع ولا قبله صياح يحطون ثوب امه على وجهه وسبحانك ياربي يسكت الطفل ويرضع وينام الا اروح ريحه امه الله اكبر ودي اصيح بس مهوب هلحين ودي بمي وش عليكم مني بعد ولوي عود :038: والشي الثالث طال عمركم بعد التطور وبدت السيارات تنشاف يعني في القصيم ثنتين وفي شقراء مثل او وحده كانو الناس يقولون هذا سحر وشذا الحديد الي يمشي وخل اعلمكم بشي تعلمني خالتي جعلها للفردوس وتقولي الا اقبلت السياره يجينا روعه ونحط لها قبل تاصل صطل فيه الماء وعلف نحسبها تشرب وتاكل والي يسوقها نسميه الدريول هذا شي ماله مثيل ومره مطاع وكلمته مسموعه ولا جا يبي يروح للرياض والا اي ديره نركب في الصندوق كلنا الا واحد يختاره الدريول يركب معه وهم شي نعطي السواق ديك رجل الدجاجه هذا له بالحاله يطبخه وياكله بس لا يزعل الدريول وخل اعلمكم بسالفه حاصله لاشهر السواقين وسمه عفتان جعله للجنه وكان موقف عند ثرمداء ديره العناقر وجاه شايب يالله يقوا يمشي بعصاه من كبره وقال ياعفتان ابا اعطيك خطيط يعني رساله بس يسمونها خط ابا اعطيك خطيط توصله لولدي محمد في الصفات بالرياض قال عفتان اصبر يبو محمد وكان عفتان عيار وقال اصبر يبو محمد معي شوير ان طاع نودي خطك لولدك ميخالف قال الشايب وين الشوير ياعفتان ويقوم عفتان ويطق على رفرف السياره وهو يقول هذا ابو محمد يبي يعطينا خط لولده محمد في الرياض نعم ام لا ههههههههههه وطبعن ماسمع صوت قال عفتان والله يبو محمد عيا الشويرنودي خط ولدك هههههههه وقال الشايب اجل متا ماوافق شويرك علمني وراح لبيته ويجلس عفتان في ثرمداء 4 ايام عيت سيارته تشتغل ويوم جا نهار رابع او خامس ويوم صلو الفجر ويروح عفتان لبيت الامير العنقري وقال اسمع يا الامير فكني من شر فلان قال الامير وش فيه قال عفتان موقف سيارتي لها كم يوم عيت تشتغل ومافيه شي ماكشفت عنه ولا لقيت شي في السياره وقعد الامير يضحك على سالفه عفتان وقال الحل بيدك ياعفتان قال عفتان وشلون بيدي قال الامير رح لبيته وقله طاع الشوير وخذ الخط ووصله لولده ولا تراك تبي تقبر سيارتك في مكانها وراح عفتان وطق بابه وقاله من عند الباب قال عفتان قال الشايب اجل طاع الشوير قال عفتان عطني خطك وفكني من شرك ويجيب الرساله ويعطيها عفتان وهو يضحك الشايب ومن ركب سيارته ويدق سلف وتشتغل من احسن مايكون والشايب معروف في ثرمدا انه عابر القارات يعني نظول جعل ربي يغفر له وكل مسلم شوفو وشلون منول يتعبون في سفرهم على البعارين وعساهم ياصلون بسلامه يجيهم قطاعين الطرق ويسمونهم منول الحنشل ويذبحونهم وياخذون حلالهم وتصدقون ياخذون الثياب الي عليهم ويخلونهم مفاصيخ ان ماذبحوهم بعد وحنا في نعمه تبي شكر من رب العالمين قبل ولا ترا النعمه زواله الله لا يحرمنا من نعيمه ورحمته وعافيته ومنه ومانه ولا تغفلون عن الشكر والاستغفار وتراي اعلمكم ونا ارداكم الله لا يتكلنا على اعمالنا وفيه شي تعرفونه اكثر مني بس ابا اذكركم فيه جعل ربي يفتح على قلبي وقلوبكم امين اهم شي الصلات وبعدها رضا الوالدين وبعدها لا تخلي لمسلم في رقبتك شي من دين وسلف ولا تتكلمون في احد لا بخير ولا بشر ون طلب منكم تكلمو بالخير بس ولا تكثرون بعد وما يبقا الا الشي الي بينكم وبين الرحمن الرحيم وربي سبحانه تسبق رحمته عذابه وما خلقنا علشان يعذبنا وهو نافخ فينا من روحه جل جلاله وش اعضم منذا الكرامه لبن ادم الله اكبر من قبل ومن بعد ماودكم تسطعوني مع جبهتي وتقولون ياملقح النخل لقح روحك ههههههههههه:a_laugh2: تقرير يوضح المسافه بين الرياض وبعض الاقاليم ايام السفر على ظهور الإبل pic.twitter.com/Qv47eVL1wh مدري وراه ماطاع يشتغل تكفون الي يعرف يشغل ذا الرابط يشغله انا مااعرف جعل والديكم للفردوس وتكفون ردو علي لا تخلوني ولا سكت اتهدد بعد :clap: ودعتكم الرحمن الرحيم والله يحفظكم جميع ويستر عليكم وفي النهايه مانقول الا سبحان الله والحمد لله ولا اله الا الله والله اكبر عدد خلقه وزنه عرشه ورضا نفسه ومداد كلماته |
| الساعة الآن 08:00 PM |
Powered by vBulletin .
جميع الحقوق محفوظة © لشبكة ومنتديات البراري 2010