المساعد الشخصي الرقمي

مشاهدة النسخة كاملة : قصتي مع الاندكروزر


حـاتـم
2006-04-03, 09:32 صباحاً
السلام عليكم ورحمه الله وبركاته

أغلب الي يشوفني أحب النيسان والباترول ومأحب التايوتا

يستغرب ليش ؟

والبعض يقول أكيد ماجرب التايوتا علشان كذا مايدري

وحبيت اوضح ليش انا مأحب التايوتا نهائين

لأسباب كثيره

خلونا اولا في الاسعار

سعر الاندكروزر GX-R الفل كامل 160 الف !!!!!!!!!! جديد 2006
سعر الاندكروزر VX-R الفل كامل 215 الف !!!!!!!!!! جديد 2006

معقوله هالاسعار على سياره أخذت من الفخامه القليل

طيب تخيلوا اني اقتنعت بالاسعار وشريت VX-R وطلعت البر وقعدت فشعيب ولا نفد

وجاني باترول 80 مايسوى ولا 5 الاف وطلعني !!!!!!!!

مب غبنه

ولو تركنا الاسعار

حنا دايم والحمدلله نطلع البر وغالباَ اذا طلبنا نفود الدهناء نطلع

مره طلعنا لدهناء وكانت الـ طلعه لي بالشيخ الازرق الباترول

وكان معنا هالموتر

http://9q9q.com/March/1144044523.jpg

وهاذي صوره مخيمنا وكم باترول وكم لاند

http://9q9q.com/March/1144044912.jpg

المهم :

طلعنا الدهناء وخوينا راعي لاند ال2004 GX-R

قال لنا بجيكم من تمير قطوع وقلنا زين افتح الكينوود علشان نراسلك

وحنا عارفين الرجال كفو ويقطع لحاله يعني يسوق ويعرف يدبر نفسه

المهم كنا في مخيمنا وقت العصريه آآآآآآآآآآآآآآآآآآآآآآآآه الا السماء سالت وانا طبعا

ما أقدر اقاوم طلعت بموتري والذهبي البترول ال99 وال94 لحقوني

ونتمشى فهالنفد يالله لك الحمد الا نسمع خوينا يصوت وكأنه وصلنا انا اادقق واطول على الصوت الا الرجال

يقول ياشباب شكلي نشبت ومع المحاولات ماقدر يطلع قالنا تعالوا قلنا أبشر عطنا الاحداثيه

ونطلع له من الساعه 5 عصرا تقريبا ووصلنا حدود الساعه 6:30 المهم الا الرجال قاعد على الاستبنه

قدام وراء مافيه المكان كان رباضه ونحاول معه يمين يسار دف عجزنا عنه ( الرجال ماوده بترول يسحبه )

وبعد عجزنا عنه عاد الاندكروزر ثقيل وش يحركه لا قعد المهم

قلت انا مالك الا نسحبه بالجيوب وتخيلوا يا شباب اني نازل للرباضه بالازرق ( مع العلم ان كفراتي بالون )

واشبكه من الخلف وأسحبه ووالله من أول نتله الا الاند طلع انا قلت كفو يالكينق

والحين عرفت اني ماحطيت فلوسي الا فموتر كفو وهو ضاق صدره وحنا راجعين نقوله ارفق قال مفيه والرجال مسرررررررررررررررررررررررررررررررررررررررررررررررر رررررررررررررررررررررررررررررررررررررررررع

وحنا وراه مسرررررررررررررررررررررررررررررررررررررررررررررررر رررررررررررررررررعين

يوم وصلنا للمخيم الا صدام الاند منعفط وحنا طابين مع قص

والرجال قرر يبيعه عقبها انا قلت اشتر لك بترول 2005

والرجال كن وده يقتنع وباع موتره ال2004 الا الرجال جاب لنا GX-R 2005

قلنا وراك والظاهر الرجال معاندي قلنا على هواك

وبعدها طلعنا مع VX-R 99 وغرز وهو يسايف وثولث وسحبه الكينق الازرق

فكيف ماتبوني اعشـــــــــــــــــــــــــــــــــــــقه

انا مأقول الباترول لايمكن يغرز لا انا قد قعدت برباضه بس مع الثقيل والديف لوك طلع ولا أحتاج لمساعده

وتخيلوا


سعر الباترول الفل كامل فل اوبشن 156 الف فقط

والسفاري الاقل منه

قير عادي خشب مسجل 6 سي دي طاره خشب جنط 17 ومكينه 4800

فقط 123 الف !!!!!!!!!!!!!!!!!!!!!!!!!!!!!!!!!!!!!!!! جديد 2006

الاسعار ماتخليك تعيد التفكير !!!!!!!!!!!


واتمنى اني اكون خفيف نفس عليكم

ورجوا اني ماطولت عليكم




وهاذا رأيي وعندي قناعه

وشكرا

أخوكم / حاتم

nahham
2006-04-03, 09:43 صباحاً
هلا ابو عبدالله

كلامك على العين والراس ز لكن ....................

عمر اللي حب حاجه ما يذكر الا محاسنها

ما الومك لكن ارفع ايدي للسماء وادعو الله يعوضك خير

والخير قدام ان شاء الله

محمد القحطاني
2006-04-03, 10:13 صباحاً
معليس ما نقول في السفاري اي كلام

ولكن الناس تبحث عن الكشخه بس

ولكن الشيروكي احس انه افضل بس عيبه انه صغير

بارك الله فيك

لك كل شكر وتقدير

الحنون
2006-04-03, 11:09 صباحاً
مشكور اخوي على اختيارك سيارة كفو تشد ظهرك وقت التعب

تحياتي لك ،،،،




الحنون

الغربي
2006-04-03, 11:44 صباحاً
وعليكم السلام ورحمه الله وبركاته

هلا وغلا يالغالي

والله يالغالي مانقول شي كلامك صحيح

الله يرزقك باطيبهن ان شاء الله

عاشق الطير
2006-04-03, 03:39 مساءٍ
نعم الالنكروزر ليس كالسفاري

الفخمه في الاندكروزر ولكن الخفه والنشاط في الفاري

مثله الددسن اخف وانشط


عاشق الطير

حـاتـم
2006-04-04, 12:24 صباحاً
مشكورين أخواني على الردود

والله يجزاك الف خير اخوي نهام والله يوسع صدوركم بالعفو والعافيه

أخوي البري مقارنه الباترول مع السيارات الكبيره ولو قارنا الشروكي هاذي لها معادله ثانيه

أخوي الحنون أشهد انه كفو

أخوي راع الغرابه تسلم ياخوي ويرزقنا وياك الصالح

أخوي عاشق الطير تفكيرك مثل تفكيري !!!!!!

ومشكور على مرورك

أخوكم / حاتم

هيثم المحيلان
2006-04-06, 12:19 صباحاً
أقول ياحبيلك

اللي ما يعرف للصقر يشويه

أحسلك خلك بالمهربد ذا

الباترول معروف أنواع الهربده


وثاني شيء
السعر ماجاء من عبث
وأبزيد من الشعر بيت
الفي أكس آر
سعره فل 245

بس يستاهل
عليك كل بعد طلعه تمر
تربط موترك خلاص

وغير القطع

حـاتـم
2006-04-06, 06:56 مساءٍ
أخوي الغالي القصيم الرس

مشكور على مرورك وعلى إبدا رأيك

وعلى ماقال

( الناس فيما يعشقون مذاهب )

وشكرا

أخوك / حاتم

A7MAD
2006-04-07, 10:27 صباحاً
اقول غير ونيت نيسان لا تدور
وخلو عنك السوالف الله يهديك

هيثم المحيلان
2006-04-07, 08:37 مساءٍ
وش دخل الددسن
بالهرجه


تراه ولا شيء عند الهلي
لا عزم ولا قوه ولا تحمل
ــــــــــــــــــــــــــــــــــــــــــــــــــ ــــ
حاتم
غريبه ماعبة على كلامي قل شيء

راعي ال 8100
2006-04-08, 04:39 مساءٍ
مشكور اخوي حاتم عالموضوع والناس اذواق (النفس وماتهوى )

أبو ثابت
2006-04-08, 04:59 مساءٍ
هلا وغلا حاتم .. وش أخبارك عساك بخير وش أخبار الباترول ..


المهم أخوي حاتم بصراحة فيه مثل يقول لولا إختلاف الأذواق لبارت السلع ..!!

كلن له ذوووقه وأنا ذوقي شيروكي .. !!


وعلى طاري التغريز أنا مره بددسن دفرنسين 98 ساحبن جيبين باترول في المحلية .!!!


ومع ذلك راعي الددسن باعه وشرى جيب سفاري !!


ومع هذا كله لاغنى عن الشيروكي عطية الله ..!!

سويتز
2006-04-08, 08:06 مساءٍ
هلا ابو عبدالله

كلامك على العين والراس ز لكن ....................

حـاتـم
2006-04-10, 03:18 صباحاً
هاذا رأيي وعندي قناعه


ووالله العظيم ان جينا للجد هاذا الكلام


ومايهونون الربع

أخوي ابو ثابت ياهلا ومسهلا دامه نياسين يصلحون مع بعض
هههههههههههههههههههههههه
أهم شي لايجينا الاند

وأنا ما اقول ان الباترو لايمكن يغرز لا والله التغريز لابد من في كل سياره مهما كانت

لكن انا أقول الافضل من ناحيه القوه والتحمل والدبلات والقيور والحراره والعزم


ووالله لولا تجربتي الخاصه ماجزمت ولا أقتنعت بالباترول

وشكرا

أخوكم / حاتم

منصور المناع
2006-04-14, 09:15 صباحاً
ماقول شي عن الجيوب أنتم أدرى بجيوبكم

أنا يالله حدي ونيت متمسحه نقشت الكفرات

يوديني ويجيبني للبر ماقد قال لا

حـاتـم
2006-04-16, 11:09 صباحاً
أخوي اتيكا أحس ان معك جيب رانج روفر 2006

ليش مادري




ومشكوووووووووووور

أخوك / حاتم

الأعصـــــار
2006-04-26, 10:55 صباحاً
يعطيك العافيه ياحاتم وشلونك عساك طيب ووشلون الكنق الأزرق أنشالله مرتاح هههههههههههه
تجربتي مع التيوتا في البر تفقع الكبد وترفع الحراره الحين أنت طالع تبي تمشى وتستانس شوي الا أنت نازل
تحفر وتشر وتنادي أحد يساعدك لأن تغريزة الكروزر تسد النفس ثقيل يا لله يمشي سلملي على عطي الله النيسان
يجيك يتمختر تبيه يغرز مايخليك هذا حتى الغشيم الي مايعرف يسوق في البر يسوقه يطلع أكبر سواق

نيســـــــــــــــان وبس والباقي خس

حـاتـم
2006-04-30, 06:43 صباحاً
صدقت أخوي الاعصار

تغريزه الاند ثقيله مره وبالطقاق يطلع

وحنا نسميه البطه من ثقل حركته

لكن فيه انواع من الاند قويه مثل الـvx-r السياحي خفيف ومكينه قويه

والـgx الهدد خفيف


لكن مافيه مثل الباترول فالنفود


وشكرا


أخوك / حاتم

مرافق النشاما
2006-05-11, 02:33 مساءٍ
الله يكووون بالعووون

تصدقووون ما اعرف اسوق الجيب

يعطيك الف عااافيه

ريف النشامااا

هاوي بر
2006-05-29, 06:47 مساءٍ
اخوي حاتم قصه روعه

يازين الطلعه وياكم

عبدالهادي المفرج التميمي
2006-05-29, 09:19 مساءٍ
ماااااااااااااشاء الله

طلعااااااات وكشتاااااااااااااااات

وتطعيسات وجيووووووب

وحنا يا غافلين لكم الله

ايه الشكووووووووى لله

بس قصيتك مع الجيب حلووووووووووه

مشكوووووووووووووووور





سلام

أبو يوسف
2006-06-13, 12:54 مساءٍ
على هونكم لا تهاوشون كل بعقله راضي
وهذي قناعات

أما اللي يقول الباترول يقربع ما جرب اللانت من 98 وفوق وعندي الدليل
قربعة وقل تحمل واللي يعارض مكابر أو ما جرب
الباترول لا يعلى عليه من ناحية القير والدفرنسات وهذا اخذت عليه نيسان جوائز عالمية
من ناحية الفخامة شف رزة 2005 و 2006 ومميزاته وتعرف الفرق

بالنهاية انا عاشق للنيسان مثل حاتم ويا وجدي على الباترول باب واحد بس قلة الحيلة

مشكور يا حاتم على الموضوع

تحيتي

عبد الله الحقيل
2006-06-13, 01:19 مساءٍ
النيسان وبسسسسسسسسسس

.............................................

دله وفنجال
2006-06-14, 04:11 صباحاً
السلام عليكم...
هلا وغلا بخوي حاتم مدمن النيسان اعلوم الياي الاسترالي ما أشوف صورتة المهم..
يابعدهم وراك على التايوتا تراك ظالمة وما أوفيتة حقة ماهوب دفاع عنة لاكن التايوتا له أفعول طيبة وفعول ماوصلها النيسان ولو بعد حين يكفي انه مركب الشيوخ .
ماهوب حقران للنيسان لاوالله لاكن الحق يقال رغم ان موتري نيسان ربع 97 .
النيسان فعلة بنفود خيال التايوتا مايصف معه ماهوب خف بنيسان لاكن محركاتة ازين من محركات التايوتا وخاصة بتحميل يعني عندك الشاصي التايوتا لاحملوه توانك الماء 1000 لتر وبانزين 1000 لتر ماهنا اكثر من فرطة دفرنساتة خاصة لاكان السواق حار اما الشاصي النيسان لو تحملة الي تحمل يشيل ولا يخالف لاكن عيبة المكينة لو يقوونة وتصير 4800 وياي امامي كان الربع اتركو التايوتا وجهو للنيسان.(مع تغيير الشكل).(والدعوى على السواق ماهيب على الموتر)
النيسان مهما يقولون علية مايتفكك خاصة الجديد اقول كلامكم مردود علية صحيح انهم زينو الفصالات وهندسة الموتر بحيث يتماسك اكثر لاكن العيب باقي ولازالت سيارات نيسان تعاني منه بشكل كبير.
ومن ناحية المركب لاوالله ولافرق التايوتا لامنك سقتة تشوف الدنيا واضحة تحتك والنقاط العمياء بلموتر مكشوفة عند التايوتا لاكن النيسان كأنك أمقعد بوسط بير ماتشوف ألا العدادات والدركسون يالله يبيلك اتدبل المرتبة وترفعة اشوي لجل تشوف ولاهوب بلحيل.(الكلام من 98 فمافوق).
النيسان الجديد نشيط والكل يشهدلة بشيء هذا لاكن حرقة الكلتش ماتبيش علطول واذا كان كلتشك أمطرف لاتهور وتطلع علية لانك وبكل بساطة تبي ترجع على سطحة .(وهذي احصلتلي شخصين)
اما التايوتا ياحبيلة يمشيك لو بغيت من اليابان للدهنا وقطوع ماهوب مع المزفلت.
اما من ناحيت الفخامة فلاوالله التايوتا فيه فخامة يناقز النيسان امناقز يعجز لاياصلة والله لو يجيبون مصممين ومهندسين الروز رايز ان يعجزون لان النيسان له سياسات غريبة بأشكال الديكور .(وهذا لايعني ان النيسان ليس بموتر فخم لاكن الفرق واضح)
وأخيراً لفت نظري مشاركة اخوي الغالي ابو يوسف ان التايوتا من 98 وفوق يتفكك . لاوالله انه من اطيب المواتر وجربت بصيد ومطاعس وطرد ولا لقو افضل منه لا وتركب الموتر ولاتنقد علية بشيء تقول ماتعدا المزفلت .والي جرب من موديل 98 و 2001 و2002 و 2003 جي وفكس .
المهم ماودي افقع روسكم بطولت الكلام .
والشكر لاخوي حاتم على اثراء الموضوع.

حـاتـم
2006-06-14, 07:29 صباحاً
هلا أخوي الغالي ابو يوسف

وحياك معنا والله

ولقيت خوي لي ههههههههه


______________-

أخوي دله وفنجال

أخوي الغالي أسمح لي

الكلتش على حسب السواق

صحيح ان الباترول معروف بصرف الكلتش لكن كل 3 الى 4 سنوات يتغير مره وسعره بحدود 1200 مع التركيب حق ال4800


اما من ناحيه القربعه كلها تقربع

لكن النيسان من جواء المقصوره يعني بيبان في العادي والتنده في النوع الي فيه فتحه سقف

وهاذا انا مجربها

والتاوتا اسأل حقين التربيط عنه

يتفكك من بطن الموتر والاغلبيه الرفارف وهاذا على كلام صاحب ورشه النويصر للتربيط

لكن أخوي الغالي خلنا نطلع بالنيسان الجديد 2006 بدون اي اضافات والتايوتا الجديد 2006 ونشوف من الي يقطع والي يربض

اخوي دله وفنجال

من ناحيه ياله تشوف بمرتبه الباترول افا عليك بس هاذا وانا أقصر منك وأشوف تمام ولاعمري شكيت

من اي شي وشلون انت

بس ترى الناس ذواق

ومن ناحيه الفخامه ليتك تركب الجديد


وانا أقول كلام واضح

وهو التايوتا مجرد سمعه أكثر من انه موتر كفو

والنيسان مجرد افعال لا اقوال مثل التايوتا




يعني سعر الفكسار الفل 225 الف وفيها

اما الباترول الفل 156 الف وفيها

ولو بنطلع عليهم كلهم شرط الباترول مايرده شي بينما الفكسار هناك اماكن يتعب فيها

ولو على التحمل

يكفيك ان الباترول دفرنسات وقيور ودبلات مشهود لها

اما التيوتا فريول امامي وانا اعرف ناس شخصيا

راعي كروزرات ولا عمرهم سبوها بالعكس يمدحونها ولكن من كثر طلعات البر يغيرون الكرونه الخلفيه ؟!!!!!!!

ويقولون شي عادي استهلاكيه

وكأن الكلتش شي غير استهلاكي وطبيبعي لراعي البر تغييره وخاصه راعي النفود


واخوي الغالي من ناحيه الباترول قزازه صغير والاند كبير

ليش مساحه الرؤيه بالاند أكثر

لكن أخوي الغالي هاذا من اجل السلامه

يعني لاقدر الله وانقلب الموتر

تشوف الحديد كثير بين السقف والبدي اما الاند كروزر الحديد قليل

فبمجيد انقلاب السياره لاسمح الله تلتصق التنده بالمراتب حقت الاند

لكن لو بنفس قوه الانقلاب فالاقرب فالباترول ان التنده ماتدخل لمستوى عالي



الكلام يطول


بالموضوع

لكن انا الي يضايقني

سعر الاند المجنون الي Gx-r سياحي بـ148 الف مع الخصم ((( اي خصم )))

ومع ذلك اداء عادي مع شكل قديم مع مشاكل تظهر بالسياره

مع قطع واكسسوارات بالسياره ليست من المصنع بل ملفقه من مصانع بجده




ونهايه الكلام





التايوتا مجرد دعـــــــــــــــــايـــــــــــــه

للاسف


التايوتا من97 وتحت فقط





وشكرا

أخوكم / حاتم

الأعصـــــار
2006-06-14, 01:44 مساءٍ
صح لسانك ياحاتم ماقصرت
يلا ياشباب الي عنده شي ضد النيسان يتكلم
وحاتم أن شالله يرد عليكم .... طيب ممكن أسئل ياحاتم
أنا أسولف مع واحد من أهل الجنوب
يقولي النيسان مايصلح في الجبال مره
أبي أعرف وش الحكمه مع أن التيوتا دبل والنيسان دبل .....

دله وفنجال
2006-06-15, 04:55 صباحاً
السلام عليكم...
حياك وبياك اخوي حاتم .
اخوي الغالي ابو عبدالله أبسردلك عيوب النيسان والتايوتا ونت الحكم وأذا كان عندي غلط فأرجو انك أتصحح معلوماتي وليكن الاول النيسان:
1: تقولي ان النيسان مايتفكك الا شيء داخلي وبسيط والتايوتا بطن الموتر والرفارف. وكلامي لك هو . النيسان أكثر مايتفكك فيه العوارض الي بتندة (سقف الموتر) وكذالك العوارض الي برفارف الاماميه والعارضة الي بطبلون وتلقاها خلف المسجل اذا فكيتة وفصالات البيبان وشدادات القزاز وخاصة الكهرب ودواسات الرجلين الله يعزكم والباب الخلفي ولاصطبات الامامية . هذا غير الغبرة .
والمراتب خاصة الربع والديكور الداخلي مافي أسرع من قرقعتة لانه كلبسات وتكسر مع الوقت.
2: سوء الرؤيه بلباترول والسبب ليس لان قزاز الباترول مساحتة بسيطة واذا كان هذا السبب فهذا عيب بتصميم وليس حماية ولو كان حماية لكتفة الشركة بعوارض سمك الوحدة 1سم *1سم من الفولاذ لحمايت الراكب. ولاكن شغلها هذا يجني على قائد السيارة لانه مايناضر شي او بلأصح الرؤيه ماهيب واضحة عندة ممايسبب الحوادث وأذا كان التايوتا اكبر مساحه من النيسان فأنا اقولك رح قس وتأكد قبل. تبي تلقا المساحة عند التايوتا اقل لاكن البلا ماهوب من القزاز وترا الصلابة بتايوتا اكثر والدليل ثقل التايوتا بنسبة للباترول .
3: الكلتش مشكلته مشكلة وكلامي فيما سبق ان الكلتش لوصار فية نص عمر لاتهور وتطلعلك طلعات بعيدة وخاصة طلعات الصيد والمقناص لانه يبي ينكبك وعند التغيير يكلفك 1200 زي ماقلت اما التايوتا 800 ريال .
4: حرارة الباترول ترتفع اذا شديت على الموتر بخط ولا بنفود وهذي لها مشاكل أخرى خاصة ان امبيرات النيسان غير دقيقة بقياس الحرارة والعلم عند كهربائية السيارات .
اما التايوتا فمشاكلة كمايلي:
1: أكثر مايتفكك بتايوتا الاصطبات الامامية وهي تكسر مع المطناج وهذي حلوها مع الموديل الجديد 2006 والي عند النويصر تضميد للموتر يعني تدبيل ربط الصدامات والاصطبات لجل تماسك أزيادة.
أما من ناحية الاشياء الاخرى فمالاحضنا شيء أبداً على السيارة وهذا ليس لللأنحياز لاكن الحق يقال .
وكذالك فية صوت قرقعة تطلع ولاكن هذي سببها الي ينسون الجلنط مربوط ويمشون علية فيتسبب بضهور صوت بلخلف ويضن الناس انه من الهوبات او الكليبرات والسبب ان سلك الجلنط مرتخي وحتا لو شديته مايفيد والعلاج مالحقت علية لأني بعت الموتر ولاصلحتة.
2:الدفرنس الخلفي ماينفرط ألا من سوء الاستخدام يعني أمحمل كومة عفش وتوانك وبلاوي وتمشي علية بنفود وتشد على الموتر أكيد انه يبي ينفرط مع العلم ان عندنا موتر 2001 ماشي 290000 كيلو ومع ذالك مالاحضنا علية شيء والكارونة زي ماهي ولافيها اخلاف والكلام هذا كلامي ماهو من كلام (يقولون) . ومع ذالك النيسان ازين من التايوتا بدفرنشات.
3: ثقل الموتر في الـgx-r أما الـvx-r فوالله انه يتندح تندح.
اما من ناحية أنه غالي فهذي اعتبرها ميزة لأن ماكل سيارة سيارة وفعول التايوتا نار على علم .

وأستميحك عذراً اخوي حاتم بلرد على الاعصار .
اخوي الغالي ليس كل سيارة فيها دبل سيارة . (هذا الكلام ليس على النيسان) ولو كان الكلام هذا صحيح كان طلع السنتافي والسانج يونج افضل من التايوتا والباترول .

يقول الشاعر:
(لك شوفةٍ وحده ولناس شوفات.........ولا واديِ سيل يفيض بوادي).
اشكرك اخوي على سعت صدرك لي وأسف على الاطاله...

أبو يوسف
2006-06-15, 11:54 مساءٍ
يبدو ان الكلام بدأ يأخذ مجال العاطفية اكثر من الكلام العلمي
ولكن ما تزال المفاخرة موجودة بين قطبا التويوتا والنيسان
أما أنا فما ودي أضيف على اللي قلته شي وهذا عن قناعة
والنيسان من عرفت عمري وهو مسجل معي بدفتر العائلة يعني صلة وثيقة إلى ما شاء الله


هذا ما عندي واستميحكم عذرا اني كثرت المشاركة بهالموضوع

تحيتي

البيـــراوي
2006-06-16, 01:36 صباحاً
ماقول الا يازين الهدد والهايلكسز
في البر بريره وفي الديرة راعي ديره
وترى النيسان انا الي اسمع عنه انه يبيله تربيط لانه يتفكك بسرعه
بس ماش ينخاف منه انا الحقيقه ماقد جربيته بس الحق يقال انا عندي ربع النيسان اوجه من التيوتا في الشكل

بس يقولون ان قطع غياره غاليه بقوه عن التيوتا
هل هالكلام صحيح

وشكرا.......

حـاتـم
2006-06-16, 10:01 صباحاً
أخوي الغالي

دلع وفنجال

صدقت في التنده انها تتفكك بس ماذكرت النوع

بس النوع الي يجي فتحه سقف كما ذكرت سابقا

اما النوع الي بدون فتحه مايتفكك ابد ابدا ابدا

.

اما الرفارف انا هاذا هو معي موديل 98 ولا عمر الرفارف تحرك من مكانها وهاذا قول مزوراء ومحشوم يا خوي فهد

والطبلون كذلك لايمكن يتفكك فالباترول لكن ممكن يتفكك مع الكرف بالبر واتحدا الاندكروزر اذ يصبر طبلونه أكثر

لان معنا هدد 2003 ومتفكك طبلونه

اما المراتب صدقت فالنوع السفاري تتفكك مع الوقت ويبيله تربيط

اما عن البيبان والشدادات عمرنا ماشكينا منها الا بالددسن فقط اما الباترول ولا عمرنا شكينا منها

اما لبيبان الخلفيه صدقت تتفكك ويطلع منها صوت مع الوقت لكن مب هاك الصوت القوي الي يزعجك جدا

انا أكلمك من موديل 98 وطالع

اما عن الاسطبات اسمحلي انس اسطبات الباترول 98 وفوق تتحرك من مكانها وحنا معنا كم باترول حدود ال7 باترولات

ولا واحد تحركت من مكانها ولو تشوف وش نسويبها بالنفود والله تعرف قدر النيسان

والحراره معروف النيسان الحراره تمام اذا كانت مافي مشاكل بالمراوح وغيرها

ماعندك اي مشكله اخوي

وكل كلامي عن تجربه

مب كلام من فراغ

أخوي الغالي انا احب الهدد

لكن طلعنا اليوم مع واحد 2006 ومركب هدرز وفلتر ومع ذلك عجز عن مواترنا لا خط ولا بالنفود

وكنا واقفين براس طعس ونازلين منه يوم كلنا دقينا الريوس والباترول رقا والهدد قام يحفر مكانه ولا قدر يرجه ريوس

لان الميوله كانت قويه شوي

اخوي الغالي

كان معي انا Vx-r 99 مطلعه وكاله جديد ومعنا يطلع ولد عمي Vx-r 99 كذلك بس الي معي فل وهو سياحي

صحيح نشيط بس مايقرب الباترول فالنفود وخاصه الجديد الفتك

وعلى فكره يوم حبيت ارفع النور الزينون بالبر لقيت القواعد حقت الانوار متكسره حقت الفكسار وكلما ارفعها تطيح

ومعنا جكسار 99 وهدد 2003 وهدد 2006 معدل وجكسار 2003 وجكسار 2000

ومع ذلك والله ولا واحد منها قدر على النيسان لا بالبر ولا بالخط

التايوتا يشد بالارض المستويه لكن اذا جت الرقيات يبرد عزمه

وهاذي لاحظتها بالهدد 2006 لاني ركبت معه وتجاكرت انا وياه فالطعس

وانا موتر جديد مبعد خذ حقه من النشاط والهدد معدل

أخوي الغالي

دله وفنجال

كلامي مب من فراغ

حنا مجربين كل الموترين فالنفود لاتدور غير الباترول

اما الاندكروزر أسمحلي

على قول الشاعر الدهماني :

(( الناس تتطور وانت لي وراء *** كنك بصير وتتبع العمياني )))


وكلامي من تعصب ولا شي

لاوالله لو اني معجب او مشكك في قدرات النيسان كان اخذت تايوتا الجديد

لكن كلامي من واقع تجربه عشتها


واتمنى اني اعطيت الموضوع حقه ووضحت بعض الامور

ومشكور


أخوك / حاتم

دله وفنجال
2006-06-17, 03:22 صباحاً
السلام عليكلم...
ياهلابك وياهلابردك...
اخوي الغالي انا معك ان الباترول الجديد محركة اقوى من التايوتا وهذا كلام لايختلف علية اثنين . ومن كلامك انك راعي نفود اكيد ان السيارة ماراح تفكك .
عزيزي الغالي كلامي ماجبتة من باب تزوير الحقائق لاكن هذا الكلام الصحيح ومن باب تجربة واذا كان موترك ماتفكك هذا لانك راعي نفود .
اما من ناحيت العوارض الي برفارف والتندة وعوارض الكبوت والطبلون والبيبان فهذي اكثر مايتفكك بلباترول والمشاكل هذي لم تقضي عليها نيسان من الشكل القديم للاسف صحيح انه اخف وأن الشكل الجديد اكثر صبر من الاول لاكن مازال يؤرقهم هذا الشي . (والمشاكل هذي واجهتنا ولم أأتي بها من باب التزوير واكثر واحد صلحها لنا النويصر وخاصة العوارض الي بتندة).
اخي العزيز حاتم في أجازة الحج كشتنا ومن ضمن المواترباترول 2006 بصمان ومع المطانيج بدأ الباب الايمن يطقطق ويدخل اغبرة مع الجلد ألىدرجة ان راعي الموتر كرهة (الموتر ماشي 3000 كيلو فقط) ويوم رجعنا وداه للوكالة علطول ويغيرولة الفصالات وعلاكلام المهندس الي دخلنا الموتر عنده ان هذي المشكلة طبيعية بلباترول طبعن الشباب حطو ؟؟؟؟؟؟ الف استفهام على الكلام هذا.(وتراي الي مقنعهم بشراء الباترول ).
وخوينا على طلعت 2005 شراه وعلى ام دباب والمسيكين ماتهنابه طلعتبة طقطقة من تحت خاصة لاقام يتروجح الموتر ويوم وداه للوكالة غيرولة عامود توازن الخلفي .
طبعن الي اقولة ان الشيء هذا حالات نادرة .وهي اعيوب مصنعية .
عزيزي حاتم الله يهنيك بلموتر الجديد ويعطيك خيرة ويكفيك شره .
وثانياً تراني اقدر النيسان رغم اني 16 سنه مع التايوتا واول الامر اتعبث بـvx 86 ثم البداية الفعلية Gx 91 ثم Vx-r 94 وهلم جرا هذا غير مواتر الاخوان من موديلات 98 وفوق . وابشرك شرينا Vx-r 2006 وموتر اللبر باترول 97 ربع يمكنك شفتة يوم اجتماع مكشات .
ما اطول عليك يالغالي وياهلابك على سعت صدرك وهذا مالدي ...
اخوك فهد...

حـاتـم
2006-06-17, 07:17 صباحاً
أخوي فهد

هلا فيك

كلامك في التنده صحيح في نوع ابو فتحه فقط

والبيبان صحيح ايضا



لكن بقولك كلمتين


للان الموضوع طوووووووووووووووويل جدا جدا جدا بل ماله نهايه

بس الكلام


هل التايوتا خالي من التفكك والله بالعكس تماما

يتفكك وياليت نجتمع يوم ونطلع ونقارن صح

بالتايوتا والنيسان ما فالنفود ولا الحجر

انا ما أقول الكلام عن ثقه عميا

لا والله كلها فيها عيوب

لكن تقولي لااند أحسن بمراحل أقول وقف

اي مراحل هاذي الي تخليني اقصم ضهري واشتريه فوق ال150 الف

والنيسان افضل من ناحيه السعر والمحركات والنشاط





لكن فالنهايه كل واحد في الي يرتاح له


يعني انا ما أرتاح الا بالبترول وان سقت الاند احس بثقل

وما أحس اني حر مثل الباترول


وشكرا


أخوك / حاتم

دله وفنجال
2006-06-19, 05:01 صباحاً
السلام عليكم...
ياهلابك اخوي حاتم بأي وقت ونتشرف ابطلعة معك انت والشباب ...