المساعد الشخصي الرقمي

مشاهدة النسخة كاملة : أحاسيس وأسجاع من قصائد الذعذاع


الذعذاع
2010-06-30, 08:55 مساءٍ
بسم الله الرحمن الرحيم
السلام عليكم ورحمة الله وبركاته

بعد إذن الجميع حبيت أرتب قصايدي اللي بالمنتدى للإطلاع
الله يبارك فيكم

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@

الا يالله المعبود يارب كل الناس
يامحصي خلقه وياواسع قياسه

ياعالم باللي توارد بوسط الراس
تعلم خفياتن من كبار وطفاسه

طالبك ياربي ولا فيك احد محتاس
تغفر ذنوب بأوسط الجاش غطاسه

انا البارحه عيت عيوني تجي بنعاس
يوم إن بعض الناس يرقد بلا نعاسه

ياحمس روحي حمسة البن بالمحماس
واحراقها بالحمس من طيش حماسه

ياتل قلبي تل جمس عطا الاطعاس
وسواقه بنمره يساقيه من باسه

أشرب من همومي ومنها أحيك لباس
واكل بعد وأعتاش واتنفس أنفاسه

على باب غفرانك أنا يالولي جلاس
أرجي ثوابك يوم الارياق يباس

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@

رودم سحاب الشعر والبال منساح
وقام يتكاشف بالبروق الحقوقه

وحنت رعود القاف والوبل به لاح
ونثر حرووفه لين سالت طرووقه

عليك ياللي تطلق سهوم ورماح
قلبي تكوى لين بانت حروووقه

اليا عقدت الفكر ماني بمرتاح
طرياك غصب يروح يمة عرووقه

وانته على جرح المجاريح جراح
ما أحدن من أصناف البشر لك يفوقه

دكتور ومهندس ومحرووس بسلاح
دمار شامل للقلوووب الشفوووقه

وأنا لو إني بوصفك صرت شحاح
ما أقدر على وصفك ولا اقدر أحوقه

مير إخذ كلماتي ليا خاطري فاح
وإشرب من الفنجال واصحى تذووقه

أذني آخذ معك سجه ومروااااح
قبل الزمن يمشي علينا بعوووقه

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@

يامل قلب من عنا الحب منصاب
ويجاذب الونات لكن بلا مجيب


يكويه في قلبه ثمانين مشهاب
سبايب المجمول زين الرعابيب


عليك يالنادر غدى حالي أتعاب
دنياي صارت عامره بالمتاعيب


يابو جديل فوق الامتان ينساب
أسود كما ليل الدجى له تصابيب


ونواعسن كنها على نومها أسباب
مكحولة فيها العطب والتصاويب


وخدود فيها الورد غادن له خضاب
ومقوس الشفه بلون التعاجيب


كن الثنايا لا إبتسم برق شباب
في ليلة غدرا لواميعه تهيب


ما فيه شي ينذكر فيك ينعاب
غير إن غنجك يطرب الروح تطريب


إسمح لي بقربك وأنا بقرب الباب
على الحلال ودرب الاسناع ماعيب


هذي شفوفي ياهوى البال بكتاب

كتبتها وانته عليك المقاريب

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@


ياصاحبي رد السلام اللي له أيام ويجيك
وش عذرك بقطع الوصل وانا متيم في رجاك

كاني خطيت بشي قل لي وش أنا سويت فيك
والا غرورك دهور أوضاعك ونقص من حلاك

لا تحسب إني من فعولك صايرن موتي وشيك
بالعكس أحس إن الجفا منك يزود في غلاك

رقيت بك ضلع تعلى كل ذا خوفن عليك
مالي نزول منه ياكود الدروب اللي هلاك

وانته بكيفك بس ما غيري ترى ينضر إليك
كانك مشكك في ولايه قيسه بمن هو ولاك

وانا كلامي عنك والله بالمحبه يحتميك
ما رحت لدروب تفشلني وتطفي من ضياك

أغليك واللي دعج عيونك وانا منها هليك
خلك على ما انته عليه ولا تبين لي رضاك

وأنا بصف حروف شعري جيش وأمرها تجيك
ماهي لحرب بس لعيونك تحوفك يا ملاك

الذعذاع
2010-06-30, 09:04 مساءٍ
يالله ياعالم خفيات الافلاك
يامبينن درب البقا والهلاكا

ما خاب من هو يا إلهي تنجواك
ياناصر من جاك يبغى رجاكا

البارحه درب السنع فيه شرباك
هاجوس سبب بالضمير إرتباكا

طبق ضلوع الصدر تطبيق حباك
وأودع بقلبي مثل زلن يحاكا

يازين حالي من سبايبك يشناك
انت السبب باللي عليه تراكا

ما تخاف من ربك على الظلم يبلاك
وأشوف حالي فيك يومك تباكا

أشرب من حروفك وداريك وادراك
واكل من ضنونك وانا في غطاكا

واليا إسفهل البال ثم مر طرياك
أضما واجوع وخاطري في لقاكا

عليك ياللي ربع القلب من ماك
ما فيه زينن ربنا ما عطاكا

وصوف حسنك مالها غير حسناك
متفردن عن جملة الغيد ذاكا

منطوق فكرك يوم يطلع من شفاك
امغلفن من زين حالي حلاكا

فكر وشوف وقيس وامسح نواياك
يمكن تشوف حدود وش هو غلاكا

انا عطيتك علم وإقراه يقراك
لا تخالف الذعذاع نسمة هواكا


@@@@@@@@@@@@@@@@

قال الذي ممشاه ما يقبل اللوم
دايم مع اهل الطيب دربه يدله

العمر مدات وسواليف وحلوم
يمضي على كل البشر ما تمله

وياللي تقول إنك بدنياك مظلوم
ما تدري إن اللي يعقده يحله

لا صار ربك فيه وهمومك تعوم
إلجا إليه وكل همك يفله

دنيا السعاده دربها واضح اليوم
قران وسنه من دقاقه وجله

ما تخسر بدنياك والدين معلوم
تجني ثماره يوم عرض الادله

أبعد عن اللي يجلب العار والشوم
ترى بعظهم يطرد أيات زله

ولا همك الزوده ليا جات من قوم
لا صرت معروفن وصيتك محله

عليك بالمده على كل معدوم
مدات جودك خلها مستزله

هذا الكلام وكل ما قلت مسيوم
لكن للتذكير واجب أقله

وصلاة ربي عد ما بالسما نجوم
واعداد ما بانت شهور الاهله

على البشير المصطفى دايم الدوم
محمد على الكفار سيفه نسله

@@@@@@@@@@@@@@@@@



الله على اللي مرني بإتصاله
وأركا على كبدي ثمانين عرقاه

الصاحب اللي خصني في وصاله
عليه قلبي شاش حاله ومعناه

أبو ثمان صافيات كماله
مثل البرد من غر مزن منقاه

شدد رحالي يوم شدن رحاله
غصب بلا طوع ولا علم يقفاه

مرباعهن حدب الضلوع النحاله
يرعن من نبت المعاليق حوّاه

لاهب ذعذاعه ورودم خياله
وقامت تكاشف لي بروقه وحسناه

قلت القصيد اللي من الروح جا له
اللي بساتينه معاطيف من ماه

وانا ترى عن هرجت العذل داله
ما أسمع من العذال لو ويش دعواه

ما دامني ما جبتها للسفاله
دربي على وضح النقا ما تعداه

دلوي معي والحبل فوق المحاله
أشرب من مياه قراح مصفاه

@@@@@@@@@@@@@@@@@@@@@@@@@@@@@@




يالله ياللي ترزق الناس والطير
ياواحد بأمرك تصاريف الايام

إنك تنير عقولنا زود تنوير
وتاخذ بيادينا على كل ظلام

قالوا علام الوقت به صار تغيير
ماهو مثل وقت مضى بسالف أعوام

قلت إسمعوا يامهندبين التعابير
الوقت واحد ماتغيره الارقام

كل الكواكب سايرات بتدبير
مافيه متوخر ولا فيه قدام

والارض فيها الوقت مافيه تشفير
سنين وشهور وأسابيع وأيام

قلوب البشر هي سايرات محادير
ولا عاد تجمعها تصاويت وأعلام

مغمورة في حب الاوهام تغمير
في حب لذات الهوى دوم تهتام

لا شك بعد الدين له دوم تأثير
من لا يعرف الدين شيطان حوام

من يوم حطت لا قطات وتصاوير
والكمبيوتر صار له مدخل سام

كنه مخدر عقل الانسان تخدير
والا محاكم فالزمن حكم صدام

الله يجزى ذيك الايام بالخير
يوم الردى ماله عناوين وأحكام

يومن كلن له معزه وتقدير
والجار عون الجار إن طاح وإن قام

متكاتفين كبيرهم سن وصغير
وقت الشدايد للعدا سم سقام

هذا وانا ودي مع الماضي أسير
وأمشي على دروب الرياجيل الاكرام

آخذ وأقزر باقي العمر تقزير
والموت لا بده على الناس سوام

والختم صلى الله عدد ناس تسير
واعداد ماهبت ذعاذيع وانسام

على نبي سطر الدين تسطير
زال الكفر وانزالت أوثان وأصنام

الذعذاع
2010-06-30, 09:12 مساءٍ
ياراكب اللي كاملات وصوفه
جيب على قطع المخاريم له نوب

من وارد اليابان ترهيم جوفه
بديه مصفح ما علق فيه ذاروب

ربع جديد مصفصفات بلوفه
مشيه على قلبي تعاليل وطروب

لا من شريته مبعدن بالحسوفه
شيك موقع بالمرابيح مكتوب

يعجبك في شكله وفعله وحوفه
مثل الخوي عند اللوازيم مندوب

بمقير والا بأعالي طفوفه
على إختلاف الارض تلقاه مرغوب

اليا طرت لك ديرتن لا تروفه
عبه من الممتاز مشين ولاهوب

إحرص على زيوته وباقي حروفه
شيك عليه من الصواديف لا يعوب

وثور من الدقمه شرار يحوفه
متناظم الكهرب على السلف مشبوب

وجه وتوجيهك على الله كلوفه
الواحد المعبود ما غيره ينوب

على ديار الصيد نبغى الهدوفه
مع خوة رجال لها الطيب مجذوب

نا خذ لنا سجات قبل النكوفه
قدام موتن ما لنا عنه مجنوب

ما قدر المولى علينا نشوفه
والعمر يمضي بين معطى ومنهوب

هذي شفوفي يوم كلن شفوفه
ما بين زين وشين سالم ومنكوب

والختم عد بروق مزن رفوفه
على رسول الله صلاتي له تصوب

@@@@@@@@@@@@@@@@@@@@@@@@@@@@@@@

ما أحدن على شعري بيوتي حفرها
ولا أحدن على قلبي يطالع ويرتاد

ابحوري اللي يوم أجاهد خطرها
أبعد بها في عالم ناسه بعاد

ما همني لو كان من هو كسرها
ترجع على من قالها غصب تنقاد

عليك يالمزيون قلبي نشرها
لازم عليّه ياهوى البال تنعاد

شوفت عيونك يوم سلهم نظرها
كنه يخالطها سهر نوم وارقاد

تبعد عناي اللي لروحي قهرها
وتشفي جروح عبر الايام تزداد

همسة من شفاتك تناظم دررها
تنعش فؤادي وتجعل أيامي جداد

ماني بمجبور ولا أحدن جبرها
غيرك تراك أنت القصايد والأبعاد

@@@@@@@@@@@@@@@@@@@@@@@@@@@@@@


الليل راح وتعدت حروة المزيون والقلب هاض من الشجون ولا بقى الا العذاب
عذبت حال المولع ياقمر ياداعج العين ياموتن حمر إرحم على من هواك

إن كان مالك نظر فيه ولا عاد أنت تسأل عليه قول لي لا روح يم السراب
وإن كان هذا تغلي قابله لو مااتعدى محلي كل هذا من سبايب غلاك

هذي طواري غيابك قلتها وانت وضميرك ليا حصلتها ما للمشاعر كتاب
الله يعافيك ويخليك دوم بحضن مغليك ويجنبك يالمجمول درب الهلاك

@@@@@@@@@@@@@@@@@@@@@@@@@@@@@@@



الله من قلب معاليقه صخاف
عين يشيلنه ولا فيه حيله

من شي يشوفه غدا فيه رجاف
من قوته رج الضلوع النحيله

من طال عمره لازم يشوف ويشاف
مافيه شي يختفي مستحيله

سوالف الدنيا على كل الاصناف
متنوعة بإقصارها والطويله

وياجاهل فيها ترى سنينك عجاف
لا تاخذك دنياك غدر وحيله

إخذ النصايح دامها فوق مشراف
متبينه ماهي بوسط النثيله

الدين وفه لا يجي فيه إجحاف
وأحرص تجي بالدين أيات ميله

والوالدين اصحى يجي فيهم اخلاف
بإحسانهم الله أمر في دليله

وصل الرحم بين القرايب والاسلاف
لو كانت ديرهم بعيدن محيله

وتعاملك بالناس ربحك والافلاس
نزه جنابك لا تجي للفشيله

هذي نصايح مابها حمل وكلاف
من رادها يلقى علومن جميله

وصلاة ربي عد ما سطر القاف
على محمد في نهاره وليله

@@@@@@@@@@@@@@@@@@@@@@@@@@@@@@@


ياساكن في قلب قلبي وعايش
أشعل من ضلوعي ليا طاب لك عيش

لا تلتفت للي يقولون طايش
إرقد بمان وخل من تحتك الريش

ومن فوقك أبني لك قوي العرايش
ما تلحقك شمس ولا يلحقك جيش

من دونك الدنيا غبار وغطايش
يا مصفي جوي من النكد والديش

بل العروق المضميات العطايش
ياللي مزونك مردفات مراهيش

هل المزون وخل عنك الرشايش
تارد على وسمك جموع مطاريش

ويربع الخاطر وورده بشايش
وطيوره تغرد بحلو اللحانيش

وان كان ما حوشت منك الحوايش
ولا طاب لك مقعاد وسط العشاعيش

هذا الكفن معيه وهذي النعايش
كفن بها روحي ولا تقول معليش

الذعذاع
2010-06-30, 09:31 مساءٍ
قلبي اللي من معاليقه ندر
من هواجيسي تذير ثم طار

حام في جو هباهيب وكدر
ما عليه من المضامي والقفار

كب صقاره على حيد وحدر
بعد ما جاه وتعنا له وسار

يا بدر هات القلم لي يا بدر
بكتب اللي في ضميري من دمار

صاحب عيونن مظاليل خدر
والشفايف كنها من ضو نار

والوجه حيه كما لون البدر
في دجا ليل تجلى كالنهار

صاحبي حكم طعونه بالغدر
ما عطاني فرصة للإنتظار

الوحيد اللي على حالي قدر
كتف اليمنى وألحقها اليسار

ليت ربي ما جمعنا بالقدر
ياالله إني طالبك عن كل عار

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@


الزمان اللي تحدر من زمان
حدروه الناس من فوق الجبل

حدروه وصار في أرض طمان
ماتجيه الشمس من شتى السبل

في ظلام دامس فيه الهوان
ما تحول له ولو معك الحبل

راح قانونه مع الرجل الجبان
يتصرف به ويظهر لك نبل

والكريم اللي على فعله ضمان
ضاع حقه وان نشد قالوا خبل

صاحب الحق الصريح أصبح مدان
وصاحب الجرم الشنيع بلا كبل

ويش أخلي ويش أقول بكل شان
ما يفيد القول لو معيه طبل

ما حدن يسمع كلامك يا فلان
تندبل كبدك من الهرجه دبل

الكبيره لو تبعد ما تبان
والبعوضه فعلها يهبل هبل

قالها اللي دافن قلبه دفان
ما طلع قافه على العالم قبل

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@


يا صاحبي قلبي تغربل من كثر لوعة جفاك
وش فيك قلي ليه ياحلو النبا هالساويه

تبغى تعذبني وترسم مشيتي يم الهلاك
ما تدري إن الظلم يودع صاحبه للهاويه

أنا بشر عندي مشاعر الله إن يسعد مساك
لا تجعل بحوري تلاطم ثم تصبح خاويه

الله يسلم قلب بصدرك تشيله ما كفاك
هالجرح فيني وانت دكتوره وأنت مداويه

لا تسمع لكلمة عدو ما يبي الفرحه معاك
وده بقطع الوصل والدنيا تجي متهاويه

وان كان لا هذي ولا ذيه ولا الحساد جاك
ماغير ودك تسمع حروفي تجي متعاويه

زيد الجفا وأبشر بشعر أنثره لين يغطاك
ياتحفتن ربي خلقها للوصايف حاويه

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@


سر ياقلم وأكتب على بيض الاوراق
أبيات من فكري تزين ورقها

إبدى الكلام بذكر وهاب الارزاق
الواحد اللي كل خلقه رزقها

ملجاي لامن الصدر صابه ضياق
وايضا ليا صارت بعيد ضيقها

باغوص في بحر من القاف واحتاق
واخذ من بحور القصيد وعمقها

أبترك الهزله ولا ني بطفاق
وأدرك عياري وثور فشقها

بسج في ماضي له الفكر ينساق
ماضي مقانيص على أول رمقها

يوم إن خويايه على كيف ما اشتاق
والكل منا مبعد عن حمقها

مزح وسواليف وتعاليل وعناق
حلو الليالي نحتسي من مرقها

وجدي عليها وجد عود ومفتاق
بأرض خلا وبنيه ربي محقها

والا وجود اللي له ربوع ونياق
والسيل ما خلى له أحد سحقها

مدري تعود أيامنا والزمن باق
والا هبوب الريح عني صفقها

ياوقت خلك بالمشافيق رفاق
رجع زمنك الملتسي في نفقها

لا من ذكرته صار بالقلب خفاق
ذيك السنين الهم مني سرقها

لكن على الله كل تجميع وافراق
وأيامنا ربي يجمع فرقها

وصلاة ربي ما بدى صبح و اشراق
على النبي إعداد من هو نطقها

@@@@@@@@@@@@@@@@@@@@@@@@@@@@@@@@@@@@@@@@@@@@@@@@
@@@@@@@@@@@@@@@@@@@@@@@@@@@@@@@@@@@@@@@@@@@@@@@@


لاحت بواريق القصايد واستهلت وامطرت

في وصف حبك ياربيع القلب لي زان القصيد

صدق المشاعر والاحاسيس الجميله لك جرت

يا قلبي اللي للعروق الناشفه ريه يفيد

يا مداوي جرحي ترى بوجودك جروحي برت

ما لي أحد غيرك بعد ربي يداويها ويجيد


يا مونس حالي من ضروف الزمان اللي طرت

يا جملت أفكاري ويا عيدي ويا زينن فريد


أنت الذي بك شهب الايام العصيبه أخضرت

تعال وارتاح وتغلا واطلب اللي له تريد


تبغى النجوم الساطعات اللي عن الكوكب سرت

والا كنوز الارض أغلفها وتجي عبر البريد


لا تستحي قلها وانا با ظمها ليا محضرت

قلها وتسمع صوتها فيني من شفاتي نشيد

الذعذاع
2010-06-30, 09:41 مساءٍ
الليالي طولت والعمر طال
والقلوب إستوحشت غبر السنين

والحمول اللي على ظهور الجمال
نزلت بالغصب ماهي بكل لين

كل غصن في شديد الريح مال
لو عروقه مالها حد يبين

ما على الدنيا عزيز مريح بال
وما بها زين ويبقى ما يشين

يا زماني لا تطول وانت خال
نوخ ركابك عساكم سالمين

الجروح جروح تبقى ما تزال
لو تروح آلامها تبقى تبين

أتصبر جعل غاياتي تنال
واتجلد من هواجيسي بدين

من تعلى في مراقيب الجبال
إنحدر في حفرة ماله عوين

سنة بالكون من منشي الخيال
والحظيظ اللي له السنه خدين

ياوجودي وجد من خللي لحال
الجماعه عنه كلن لا يذين

إن حكى ما احد بيسمع له مقال
ماله رجول ولا له من يدين

فوق كرسيه لغاياته يشال
طول عمره بالعذاب وبالونين

الله اللي فوق كل الناس عال
هو ونيس العبد ليااحتاجه يعين

والختام إعداد ما هل الهلال
خير تسليمه على محمد تفين
@@@@@@@@@@@@@@@@@@@@@@


بعثرت فكري يالغضي وانته ولا كنك تشوف
ساكت ومتبسم ولا همك ولا كنك ترى
لكن من نظرة عيونك والعيون بها حروف
أدري عن اللي في ضميرك طاري أو ما طرى
إرحم بحالي لا تخليني وناظرني وروف
تكفي جروح في ضميري ما حدن عنها درى
يعني تبيني آخذ كفوفك وناولها الكفوف
والا أنادي بكل صوتي واسمع جموع البرى
لالا تغلى رد هيه أنا أنادي يالهنوف
أنتي تشوفين الكلام اللي كتبته أو سرى
طيب بسيطه ودك أعزف لك من ألحاني عزوف
قللي وش اللي مشتهي واللحن له عندي حرى
قلبي على أمواجك قصيده في بحر حبك يطوف
من عاصف الريح العتيه يالغلا أنته ذرى
بانت ثمانه كنها صفه من اللولو صفوف
قال ابدع القيفان يالذعذاع حبي لك جرى
@@@@@@@@@@@@@@@@@@


ليه يادرب السنع لي منطوي
لا يذ لك في دهاليز الظلام

ما تشوف إني بحالي منكوي
كوية تاصل ليا حد العظام

أتصبر والليالي تنطوي
طي قرطاس تعثر به كلام

ياوجودي وجد من فاقد خوي
في خلا خالي به طيور حيام

في شديد القيض واحدهم غوي
حدر بوادي وناشه سم سام

ما ينال المرجله كود القوي
قوة بالعقل ماهي بالهدام

ما لها يدين يلويها لوي
من بغاها حط في عقله نظام

السباع تجوع ثم تعوي عوي
والعشا لا طاح تصحي ماتنام

يرجهن الفكر من عقب الدوي
ثم يرجع غصب ويفك الخطام

الكلام يطول والخاطر روي
والمعاني كنها صيد العدام
@@@@@@@@@@@@@@@@


ماهو بذنبي ياعرب أوصف الزين
ولا هو بذنبي أرسم الزين بأبيات

إن كان ما يثر على منهج الدين
ولا فيه جرح شعور من داخل الذات

خلوني أكتب للغظي لو بيتين
اللي من أبياتي ترى هو يقتات

سيد البنات المترفات المزايين
الي وصايف حسنها كلها ثبات

أصيلة ما تنعرض بالميادين
مصيونتن عن كل حاسد ولتات

سلام ياعين على حروفي تبين
وسلام ياضي تشكل بوجنات

وسلام يارمش تظلل به العين
وسلام يابيض الثمان المنيرات

لا أحد يلوم إن كان ما أطريه بالشين
وعساك ياقلبي هني بالمسرات

@@@@@@@@@@@@@@@@

الله من قلب سطى فيه هاجوس
زاد العنا به يوم حالي سطابه

مكن صوابه دون دقات وجروس
واحتل دار مبطي ما هقابه

وأنا أدري إن الوقت تجريب ودروس
ونوع البشر فالطيب مثل السحابه

أحدن تمرك غيمته كنها شموس
وأحدن غمامه مير ما حدن درابه

أحدن سحابه رش هتان بطعوس
وأحدن تمري رشته في ترابه

أحدن مناقيعه مثل محكر رسوس
وأحدن يقشوع أرضها والشعابه

أحدن مثل مزن به السيل محسوس
وأحدن يضك الاوديه غزر ما به

هذا وانا ماني على الناس جاسوس
لكن فعول الناس ماهي تشابه

قلته ولا ودي على قولي فلوس
ولا اعد نفسي فاهمن بالكتابه

أوجزت موضوعي والاكثار منكوس
كثر الكلام يعيب من هو حكابه

وصلاة ربي ما ضرب قمع نادوس
وإعداد صيدن حايم في هضابه

على محمد سيرته خير محروس
نبينا المختار ربي هدابه

@@@@@@@@@@@@@@@@

الذعذاع
2010-06-30, 10:12 مساءٍ
ياماحلا الممشى وسجتك بديار ****فيها طرب روحك وفيها ونسها
على جديد بالوكالات له كار **** جيب من اليابان يزهى نسبها
ربع يمجد صاحبه وقت الاخطار *** ماينشبه لو كان صعب نشبها
مع خوة تغنيك لو صار ماصار ****ما للردى سكه عليهم سلكها
خوتهم تنسيك ضيقات الاسفار **** وعلومهم ما يمل منهو سمعها
لامن نوينا طرقة تم باصرار **** وكل يجهز عدته ماتركها
معنا بواريد بها الصيد يحتار **** يحتار يوم انه وقع في شركها
معدد فيها عباريد من نار **** ماتخطي الا ان كان ربي صرفها
لامن مشينا دربنا كله اذكار **** نطلب من الرحمن رزق ومشها
ناصين ضلعان على حدها حرار*** فيها البدون وكل صيد يردها
ولا من وصلنا عصير للموقف اسرار***في تلعة مجلاسنا في شنقها
كل العفوش مرستكات بتدبار *** والعزبة اللي كاملات خرطها
ما فيه ما ينقص ولو كبر مسمار***كل شي تمام وكل واحد حسبها
هشيم سمر شاعمين بها النار*** جمره كما الليتات يضوي طرفها
وبعد الصلاة مجهز الكيف بيطار***في دلة الرسلان لامن حكرها
عليه مقياس من البن وابهار *** لامن رشفت هموم راسك نسفها
معها علوم القنص ونقول الاشوار***والراي واحد ما لنا في حمقها
يا زين شب النار في وقت الاسحار*** بعد الوتر والربع كل ركعها
وبعد الفجر قدم الصدف يكشف المار*** الكل منا بندقه قد خطفها
وعلى طلوع الشمس كلن بمسبار*** متمركز والصيد حذر حركها
ينظر بدربيله وهو ما خذ احذار *** من روغة حذرى وهو ما كشفها
وشوي وان الرمي له عج وغبار*** على بطين الضلع عنز وولدها
يرميه ابو ابراهيم باتقان وعيار*** وهيه جفيل وكل رميه حكمها
مشطين ولياها بلا حراك وفرار*** معها الجذع مافر شبر بعدها
تسلم عساك تصيد تكرار وامرار*** صايد وفايد ربعنا يا سعدها
وبعد الغدا حس الرعد بالسما ثار*** مثل المدافع رجته في سماها
من مزنة سمرا بها البرق شرار*** هلت غزير امطارها مع بردها
وشمام وان الضلع بالسيل هدار*** كل الشرايع سيلها ما رحمها
هذي وناستنا اليا حل تذكار *** فلت حجاج با المناعير تزها
ما هي علومن عند خبل وهذار*** لاجا اللزوم وقلت تكفى تركها
وختامها صلوا عدد هطل الامطار*** وعداد عشب نابت مع زهرها
على النبي المصطفى سيد الاخيار*** محمد رسول الله مذهب جهلها

@@@@@@@@@@@@@@@@@@@@@@

البارحه عيني عن النوم ساهره
من هاجس بالصدر زادت معايره

دك الضلوع العوج من قو باسه
لين إن موق العين ساحت عبايره

أناظر الدنيا واتدبر وافتكر
وأقول ما تخلص على الكل بايره

كم واحد فيها لقا العز وإشتهر
ويوم إنها زانت ولا الموت دايره

ياجاهل بفعولها خذ نصيحتي
ترى النصايح في دجا الليل نايره

نصيحة مجرب ولا هوبشايب
توه شباب وكل دنياه ثايره

لا تامن الدنيا تراها دنيه
مندوبها لا تامنه مع بشايره

تفتح لك أبواب كبار قفولها
وليا دخلت تجرعك من مرايره

يالله يالمعبود يارب طالبك
ياللي لك الحجاج فالبيت زايره

إنك تغفر ذنوبي اللي ارتكبتها
كل الذنوب صغارها مع كبايره

طالبك ياربي ويا رب الملا
يا واحد مافيه شي يسايره

إنك تبدلها بحسنات كثرها
وتدخلني الجنه بعالي سرايره

وصلاة ربي عد ما ذعذع الهوا
على محمد عد ماطيور طايره

@@@@@@@@@@@@@@@@



سر يا قلم واكتب ترى العمر فاني
في دفتر الذكرى حروف بقيات

ترسخ على بيض الورق والمحاني
إن كان عدوني من أصحاب الاموات

أبكتب اللي جاز لي من معاني
ولا أعد نفسي فاهم بالمجا لات

نصيحتي للكل مبعد و داني
والنصح له بين المحبين وقفات

اللي أشوفه في طوارف زماني
إن البشر ياحبهم للملذات

يلهون في بحر الوهم والاماني
يبغون دنياهم على كل مشهات

تفكيرهم في رفع هاك المباني
والا بسهم البنك والا بشركات

ما عندهم للآخره يوم ثاني
أيامهم ما بين دفعه وشيكات

يا غافل فيها عليك الاماني
إرجع لربك قبل ما تصبح رفات

لا تحسب إن العمر ماله هواني
من لا يموت يشيب والياه موات

هذا وكثر الهرج ما له مجاني
من يا خذ المعنى لقا رفعت الذات

وصلاة ربي ما رسن بالمواني
سفن وبواخر وأبحرن بالمحيطات

على رسول سنته في لساني
محمد وخصه ربنا بالشفاعات

@@@@@@@@@@@@@@@@

الذعذاع
2010-06-30, 10:24 مساءٍ
ياراكب جيب حسين التواصيف
أشعل نضيف من الطراز الجديدي

ربع دروبه عاليات الشناظيف
كنه قطار فوق سكة حديدي

من وارد اليابان صب وترصيف
ما حافه التجميع من كل ميدي

في سرعته مثل الرياح العواصيف
يطوي ديار طي لو هي بعيدي

وبلوف ماطوره تصافف تصافيف
وحسابها عشرين واربع تزيدي

عزمه ليا منك نويت الشفاشيف
عطه الدبل وإحذر غياره تعيدي

خله مع السنده تجيله غطاريف
يطرب لها قلبي وروحي تهيدي

نبي لنا درب عن الناس ماشيف
في هظبة فيها الوباره نصيدي

مع خوة رجال نشاما عواريف
ما فيهم اللي بالمخاوى نكيدي

نطاحة الواجب بيوم العواجيف
عدوهم تصلاه نار الوقيدي

يازين جلستنا على دلة الكيف
وسوالف معها نقول القصيدي

أيام نقضيها ولا هي حواسيف
والعمر فاني والبشر للنفيدي

وصلاة ربي عد ما بارق شيف
واعداد ما غنت طيور الغريدي

على نبي بين الحق والزيف
شفيع الامه يوم وقت شديدي


@@@@@@@@@@@@@@@@@@@@@@@@@@@@@


حب الهوى ماهو كذا ياللي تعشقون العذاب
لا مال قلب يمكم حطيتوا بدربه شقا

ماهو كذا لالا ولا ابغا من مشاعركم جواب
ياللي خذيتواقلوب ناس مابقا فيهم بقا

يرتاح قلب اللي يجاوركم ويقبل ما يهاب
في بالكم شي خطير وفي أحاسيسه نقا

عقب الشباب يشيب والدنيا لها ستين ناب
كلن يدور نفعته ياللي بها الدنيا رقا

هذا وانا ما اذمكم أقدر أسميها عتاب
أنتم لكم قدر رفيع بالمعالي مشرقا

يا حي والله شوفكم ياحي تلعات الرقاب
دنيا بلياكم خراب ومن تهقوى ما هقا

هذي علومي والزمن يطوى كما طي الكتاب
واللي يجول بخاطره شي يمشي ما لقا

@@@@@@@@@@@@@@@@@@@@@@@@@@@@@


قلبي تهلوى يوم شاف المحلوى
ما عاد يقوى نظرة من عيونه

في وسط بستانه جذبني حنانه
ثم صك بيبانه وانا في سجونه

أثر على حالي شبيه الغزالي
يومن نوالي بالعنا والمهونه

ما عاد يمديني أحرر يميني
متمكنه فيني ضرايب طعونه

ليت الهوى بيدي وعمره جديدي
لأرسل بريدي وافيات لحونه

مير الهوى عله وحالك يشله
مايعرف المله ولا فيه لونه

هذي مكاتيبي وحظي نصيبي
ربي حسيبي لا توفيت دونه

@@@@@@@@@@@@@@@@@@@@@@@@@@@@@

بسم الإله اللي تعلى عرشه
رب عليم بخافيات النيه

الواحد المعبود محيي الموتى
رافع سماواته بلا عمديه

أبدا بقيفاني وارتب قولي
وآخذ من افكاري علوم حيه

هبت هبوب الشعر تالي ليلي
ذعذاعها ينعش فؤادي ليه

واخذت أسجل في دفاتر صدري
أفكار موزونه لها قافيه

أدله وسلي نفسي المهتمه
عن ما يثير جنونها النفسيه

شيء أقوله وانشره وانفع به
وشيء أكنه لو تقوى كيه

ذوق البشر بالشعر بحر واسع
ولالي على ذوق البشر جبريه

اللي يرحب بي مراحب واهلا
ومن هو تعداني فلاني زيه

موجز أذيعه والبقا بالفاهم
اللي مشاعر طيبته صدقيه

وصلاة ربي ما لمع بارقها
واعداد وبل هلته مزنيه

على محمد مصطفيه المولى
شفيعنا يوم البشر منسيه

الذعذاع

@@@@@@@@@@@@@@@@@@@@@@@@@@@@@

البارحه قلبي عروقه قفلهن
غرون فتني في نواعس جفونه

سلم وقلت اهلاً وسهلين ياهن
ياللي عليك القاف زانت لحونه

ومن بعدها قفا وعينيه قفن
واركا على قلبي خوافي طعونه

بس السلام ولا حصل شيء معلن
غير إن سهم الموت يحرس عيونه

ياليت اقدامي على الدرب ماجن
كان إسترحت من العنا والمهونه

أسلى عن صدوف الليالي ويأتن
اليا تريح خاطري من حزونه

بالصدر تلعب ثم الى فوق يرقن
واتهلها أعياني وترعد مزونه

لو به سجن للحب ياليت يسجن
من هو على الحبلين تمشي ضنونه

كان الوفا يبقى مع الناس ويسن
يمشون به طول الدهر ما تخونه

أبيات من هاجوس للكل يبنن
وكلن على فنه يسوي فنونه

وسلامتكم
الذعذاع

@@@@@@@@@@@@@@@@@@@@@@@@@@@@@


يامل عين شوفها ما صفالها
أحرقتها والدمع جاب العمى لها

سبت هواجيس بصدري تواردن
تزاحمن والقلب إلها إرتكالها

عليك روحي ياهوى البال تصطفق
تلعب بها صلف الهبايب لحالها

اليا صفالي طيف حلمك دقيقه
ياسرع ما تقلع غيومه شمالها

أرجع الذكرى وأجمع مزونها
واسقي خيالي من همايل جمالها


غلاك عندي دايم فوق معتلي
بجبال ما احدن غير زولك رقا لها

منال حبك غايتي بين الملا
والنفس صعبه تنتحي عن منالها

انت الوحيد اللي وصوفك تميزت
ولا احدن من أشباهك محاسنك شالها

ما احلى حضورك وارتسامات بسمتك
وذعذاع عطرك زود براس مالها

سعادتك غايت مناي ورغبتي
ودنياك جعلك ماشي في عدالها

إقبل تحيات الذي فيك منجرح
انت الجروح وانت من هو دوا لها

@@@@@@@@@@@@@@@@@@@@@@@@
@@@@@@@@@@@@@@@@@@@@@@@@

العمر لحظه وانته العمر كله
كل ماوصلت لآخرك ابتدي فيك

والليل حالك بس قربك يفله
شمس الضحى ياغاية الروح تفديك

أغليك واقرى مابقى بالسجلّه
صفحات عمري كلها بين أياديك

غيم المحبه والوفا لك أهلّه
هتان غيثه طول الايام يسقيك

يا واحدن قربك أبد ما امله
وش هو أملّك الا أنا فدوتك عنيك

طيفك ملا كل الاماكن ودلّه
وهمس المشاعر نغمة بين أشافيك

منساك كود الورد ينسى محلّه
والورد يقطف من بساتين خديك

يا باهي بالزين دقه وجله
يافارق بالوصف باللي حواليك

إن كان مالي في مشاعرك شله
ولا لي امل في قربك وفي معاليك

تذكار,, خذ هالقلب عندك وخلّه
هدية من واحدن دووووم شاريك
@@@@@@@@@@@@@@@@@@@@
@@@@@@@@@@@@@@@@@@@@

مادريت إن الهوى يمك يزيد
مادريت إن الغلا منك إرتوى

ياحبيب القلب يالضبي الفريد
ذيب حبي من محبتكم عوى

انت سحري وانت عنوان القصيد
وانت طبي في جروحي والدوى

تقلب احزاني وتجعلني سعيد
خص لا صرنا أنا وانته سوى

سلهمت عينك وناعسها الشديد
من سبح في بحرها ماله قوى

ويش أوصف لو بغيت أبدع واجيد
كل وصف الزين لاوصافك زوى

ارفق بحالي عسى عمرك مديد
دوك روحي لا يعذبها الهوى

في بساتينك ورووود ماتبيد
ماتموت ولالها غيرك حوى

جعل عيدي فيك واعيادك تعيد
والليالي مالها غيرك ضوى

إقبل الترحيب يالحب الاكيد
إقبله للي بحبك ماروووى

وسلامتكم

الذعذاع

كمال البدور
2010-06-30, 10:43 مساءٍ
اخوي الشاعر الذعذاع
اذا بتقدر تجمعلي شعرك في كتيب صغير وتبعثو لي على الاردن
لاني حاب احتفظ فيه ذكرى لك
كل الشكر اخوي يا شاعر المنتدى

الذعذاع
2010-07-01, 01:13 صباحاً
اخوي الشاعر الذعذاع
اذا بتقدر تجمعلي شعرك في كتيب صغير وتبعثو لي على الاردن
لاني حاب احتفظ فيه ذكرى لك
كل الشكر اخوي يا شاعر المنتدى

هلااااابك أخوي
أرسل العنوان على الخاص وأبشر
مشكووور على مروورك

**ابوعمر**
2010-07-01, 02:51 صباحاً
صح لسانك يابو زياد


ماشاء الله عليك , فعلاً انت ممن يحوك خيوط الكلام , ويفصله بأبيات شعريه ذات شاعريه عاليه


بارك الله فيك , وصح لسانك

لا عدمناك

الذعذاع
2010-07-01, 03:02 صباحاً
صح لسانك يابو زياد


ماشاء الله عليك , فعلاً انت ممن يحوك خيوط الكلام , ويفصله بأبيات شعريه ذات شاعريه عاليه


بارك الله فيك , وصح لسانك

لا عدمناك

الله يصح بدنك أبو عمر والله شهاده أعتز فيها ووسام على صدري بارك الله فيك
ومشكووور على إطرائك الله يجملني وأجيب اللي يرضيكم

البراري للعالمية
2010-07-01, 06:45 صباحاً
صح لسانك
الذعذاع شاعر البراري

الركام
2010-07-01, 09:42 صباحاً
صح لسانك ياابو زياد على هذه الروائع
ومشكور على هذا العمل المميز
واتمنى من ابو حمد تثبيت الموضوع لتميزه ولكي يطلع عليه اكثر عدد من الاعضاء

الذعذاع
2010-07-01, 11:13 صباحاً
صح الله بدنك أخوي (البراري للعالميه ) ولا هنت
عساك سالم

الذعذاع
2010-07-01, 11:20 صباحاً
صح لسانك ياابو زياد على هذه الروائع

ومشكور على هذا العمل المميز

واتمنى من ابو حمد تثبيت الموضوع لتميزه ولكي يطلع عليه اكثر عدد من الاعضاء

صح الله بدنك أخوي الغالي أبوووسعود
والعفوووو ماسوينا شي
الله يجملني على إرضائكم
هلاااابك

ام العنود
2010-07-02, 05:39 صباحاً
عظيــم وفـي قمـة آلـعـذوبـة ماطرحته,,
هنـآ كـآن صـرح مـن آلآبـدآع آلآمتنـآهـي
وآللـذي ليـس لـهـ حـدود ,,
فـآلـروعـة لطرحك جـآذبيـة قـويـة
تـجـذب الكـل لقـرآءه
بـوحـكـ وآحسـآسـكـ,,
ويهيمون بيـن حـدآئـق
حـروفـك آلـجميـلهـ ,,
هنيـئـآ لـك علـى هـذآ آلآحسـآس آلـشفـآف
آلـعـذب آلـرآقـي ,,
سلمـت يمينــك وروحـك علـى
هـذه آلـشفـآفيـة آلـفـذه
شاااااعرناااا الذعذاع
آللــتي لآمسـت قلوبنـا بـكل صـدق ,,
ودمــت بـخيــر ,,ودآم مـدآد هـذآ آلـقـلـم آلـرآقـي
آلـشفـآف ,,
تقبل مروري

الذعذاع
2010-07-02, 03:48 مساءٍ
أم العنوووود يعجز اللسان عن الرد في ما قلتيه
الله يسعدك ولا يحرمنا من تواجدك بيننا
دمتي ودام من تحبين
بارك الله فيك

عبدالله العقيل
2010-07-04, 10:29 صباحاً
ماشاء الله
ديوان الذعذاع في أحوال من ذاع

الذعذاع
2010-07-04, 02:03 مساءٍ
مشكووور بارك الله فيك أبو غدي ويعافيك ربي على مرووورك
والشكر موصول لمشرفنا (حبيب الكل ) أبو حمد على تفضله بتثبيت موضوعي والله يقدرني على أرضاء أحبابي بمنتدانا الغالي

ابو حمد
2010-07-04, 04:36 مساءٍ
مشكووور بارك الله فيك أبو غدي ويعافيك ربي على مرووورك
والشكر موصول لمشرفنا (حبيب الكل ) أبو حمد على تفضله بتثبيت موضوعي والله يقدرني على أرضاء أحبابي بمنتدانا الغالي

http://up.albrari.com/uploads/12782504801.jpg

تستاهل وبصراحة انت ممن اشعل المنتدي بقناديله الجميلة وابياته الرائعه
لا حرمنا الله تواجدك ونشاطك الذي لا ينضب
وصح لسانك على الكلمات العذبه والرقيقه والتى يتغني بها الانسان لسهولة وسلاسة كلماتها ..
ابو حمد،،

الذعذاع
2010-07-04, 10:16 مساءٍ
ياعل ماعدمك يا بو حمد وصح الله بدنك
مشكوووور مره ثانيه وبارك الله فيك على الاطراء
الله يجملني على إسعاد كل من بالمنتدى وخارجه
يخليك ربي

مخلب طير
2010-07-11, 07:55 مساءٍ
بل العروق المضميات العطايش يا اللي مزونك مردفات مراهيش
و الله كبيـــــــــــــــــــــــــــــــــــــر يا الذعذاع
لا نعلم أي الفواكه نتذوق من بستانك
صوت(ن) ما يخفى

الذعذاع
2010-07-11, 08:24 مساءٍ
بل العروق المضميات العطايش يا اللي مزونك مردفات مراهيش
و الله كبيـــــــــــــــــــــــــــــــــــــر يا الذعذاع
لا نعلم أي الفواكه نتذوق من بستانك
صوت(ن) ما يخفى
يخليك ربي يالمسعوود
بارك الله فيك على إطرااائك
الله لا يهينك
عساك سالم أخوي

مخلب طير
2010-07-12, 05:03 مساءٍ
بصراحه يا الذعذاع كل ما دخلت المنتدى حنيت لقصائدك
( مثل الخلوج اللي تحن لولدها )..................... ما أروعك

الذعذاع
2010-07-12, 08:08 مساءٍ
جعلك سالم يالمسعوووووود
الله لا يهينك أخوي والله أحرجتني
عساني ما أعدمك

نسمات نور
2010-07-18, 05:49 صباحاً
طًرًحً فٍيٍ قٍمًة الرًوًعةً وًرًآًقًيَ

آًهًنٍيٍكً على آًبداعاتك الٌمٍثيًرة

إًخًتٍيًاًرً آجمل العٍبًارًتً وًرًسٍمً آًحًْلاآًللًوًحًاتً



تًحٍيًه لــٍ قًلٌمًكً الرًآئعً فً نًحًنً ننًتًظًرً جًدًيٍدًك


رًآآآق لي آلمكوووث هنـآآآ ..

تًقًبلٍ مٌرٌووٌوٌرٍي آلٌمٌتوًآآآًضًع ..

http://files.fatakat.com/2010/3/1269842911.gif (http://files.fatakat.com/2010/3/1269842911.gif)

الذعذاع
2010-07-18, 06:33 مساءٍ
طًرًحً فٍيٍ قٍمًة الرًوًعةً وًرًآًقًيَ


آًهًنٍيٍكً على آًبداعاتك الٌمٍثيًرة

إًخًتٍيًاًرً آجمل العٍبًارًتً وًرًسٍمً آًحًْلاآًللًوًحًاتً



تًحٍيًه لــٍ قًلٌمًكً الرًآئعً فً نًحًنً ننًتًظًرً جًدًيٍدًك


رًآآآق لي آلمكوووث هنـآآآ ..

تًقًبلٍ مٌرٌووٌوٌرٍي آلٌمٌتوًآآآًضًع ..


http://files.fatakat.com/2010/3/1269842911.gif (http://files.fatakat.com/2010/3/1269842911.gif)


نسمات نور
أقف حاااااااائراَ في الرد على كلماااااااتك وإطرااااااائك
يسعدني ويشرفني قبول كلماتي لديك
ومرووووورك وسااااام أنار متصفحي
لكي كل الود والتقدير
لا عدمت تواجدك في مواضيعي
وهلاااابك مليووون

ذيب طمية
2010-07-23, 09:24 مساءٍ
هلا بك يالجار وصح لسانك مليون


ماشاء الله عليك والله بلا مجامله انه قصيد جزل ويطرب لاتقف يالغالي كمل


لكن لي عتب بسيط بس اللحين عندك هالزين ومخبيه عنا من مبطي


الله يسامحك

واتمنى اني اشوف مشاركات اكثر لك يالغالي

انت شاعر كمل واطربنا


تقبل تحياتي وامنياتي لك بالتوفيق

محبك.

الذعذاع
2010-07-23, 11:03 مساءٍ
هلا بك يالجار وصح لسانك مليون



ماشاء الله عليك والله بلا مجامله انه قصيد جزل ويطرب لاتقف يالغالي كمل


لكن لي عتب بسيط بس اللحين عندك هالزين ومخبيه عنا من مبطي


الله يسامحك

واتمنى اني اشوف مشاركات اكثر لك يالغالي

انت شاعر كمل واطربنا


تقبل تحياتي وامنياتي لك بالتوفيق


محبك.


يااااااااااهلاااااااااااا ومرحباااااااا يالله حي ذيب طميه
أسفرت وانورت واستهلت وامطرت
الله يصح بدنك مليااااااار أخوي
مشكوووور على حضورك الغااااااااالي
ويشرفني قبولك قصايدي
يعافيك ربي على الاطراااء
وابشر بسعدك
لاخلا ولا عدم أخوي

ابو حمد
2010-07-24, 09:01 صباحاً
تسلم ياشاعرنا الغالي على ها الابداع الغير منقطع النظير
وبصراحة شغل عدل
اهنيك من كل قلبي ..
http://up.albrari.com/uploads/12799512761.gif
ابو حمد،،

الذعذاع
2010-07-24, 05:59 مساءٍ
يخليك ربي أبو حمد
تعبتك معي في إضافة القصائد الجديده
جعلي ما اعدمك أخوي
بارك الله فيك ياحبيب الكل

بدر الرياض
2010-08-08, 12:52 صباحاً
ما شاء الله تبارك الله
تستحق الشكر - بالتوفيق

مدور الغيث
2010-08-08, 10:10 صباحاً
جهد رائع وقصائد جميلة . مشكور أخي الذعذاع .

الذعذاع
2010-08-09, 12:15 صباحاً
ما شاء الله تبارك الله
تستحق الشكر - بالتوفيق

كلك خير وبركه مشكووور يالطيب ولا هنت
بارك الله فيك واسعد لياليك

الذعذاع
2010-08-09, 12:16 صباحاً
جهد رائع وقصائد جميلة . مشكور أخي الذعذاع .


لاهنت اخوي
الراااائع حضووورك الغالي
شرفت ونورت
العفووووووووو

هميلان
2010-09-15, 12:41 صباحاً
صح لسانك , قصائد متميزة وجهد رائع
Keeeeeeeeeeeeeeeeeeeeeeeeep Going

الذعذاع
2010-09-15, 02:16 مساءٍ
هميلااااااااان
صح الله ابدااااااااااانك
لا هنت يالغاااااالي
احترااااامي

حـــــارب
2011-10-27, 09:59 مساءٍ
بيض الله وجه صاحب الطرح

ينقل لملتقى شعراء البراري لروعة الموضوع

سلامي