قالوا عشقت وقلت ماهوب ذلحين // انا بعد مليت من وقتنا الشين

[الركام]

قالوا عشقت وقلت ماهو بذالحين
ماعاد في ذهني من العشق صورة

ذبلت زهور العشق والملح والزين
واقفى ربيع العمر وأقبل دهوره

ظنيت عمري دون خمسه وعشرين
وريع الشباب أعيش قمة شعوره

لاشك فاجأني مع الوقت ثنتين
زادت على قلب المعنى حروره

قصر النظر بين على ناظر العين
والشيب في وجهي تتابع ظهوره

كنت احسب اني وين واثري مسيكين
راحت حياتي بين دوره ودوره

والعشق عندي له دروس وقوانين
عارف قوانينه وسابح بحوره

فيما مضى يوم العوارف مجانين
يوم الصبي يتبع هواه وسروره

واليوم قفينا وحنا معيفين
وعسى الذنوب الماضيات مغفوره

عيسى بن عبدالله السبيعي

00000000000000000000000
00000000000000000000000

انـا بـعـد مليت من وقتنـا الشـيـن
وعرفـت معـنـى ذابلات زهـوره

ولانـيـب مخـدوع ولا قـول بتـزيـن
ولانيب اقلـد من يصبـغ شـعـوره

مابــه دوام ولـلنـهــايـات ماشـيـن
ومنهــو سعــيد مايـداوم سـروره

سمعت هذا من تجاريب ماضيـن
ناس لهم في ماضي الوقت دوره

ناس بحفظ الوقت والدين واعين
ولا يطمعـون بعـشـق دنيـا غروره

ياليتنا فـي مايقولون مصـغيـن
وياليتنا نسـمـع لـمن قـال شـوره

قـل للــذي يقــول بعديـن بعديـن
تـرا زهـو الـعـمـر لحـظـة وفــوره

كم واحد يمشي وهو مادرى وين
عميان يحسب هاالحياة معمورة

يـارب اذا كنـا عـن المـوت لاهـيـن
وان الزمــن زيـن لنـا بعـض زوره

فانا عليك اليـوم يـارب شـاكـيـن
وعسى الذنوب الماضيات مغفورة


ابراهيم بن سعود الخريف

[رعد الشمال]

صح لسان الشاعر عيسي

وصح لسانك شاعرنا ابو سعود

ابيات قمة الروعة لاتحرمنا جديدك
وتقبل مروري

[غانم الضومري]

الله الله على الصوت والصدى

صح الله لسان الشاعر/ عيسى السبيعي

وصح الله لسانك ملايين يابو سعود

أسعدتني أسعدك الله

تحيتي

[رذاذ]

صح لسان الشاعر عيسى السبيعي

وصح لسانك شاعرنا الركام حتى ترضى ..
مبدع دوماً كما عهدناك

سعدت بتواجدك بيننا .. فلاتحرمنا من كل مالديك...

رذاذ

[تابع سحاب]

صح لساااااااااااااااااااانك