رثائية

[صبح المطر]

السلام عليكم

مرثية في الفقيد الخال الغالي أبو نادر رحمة الله عليه


علم ٍ لفاني هزني وأشغل البال @
نكد علي وصار نومي حريبي ،،،
ما أمسيت يوم اني قريته بالإرسال @
وقعه على مثلي ثقيل وصعيبي ،،،
يقطعك يا بعض المراسيل زلزال @
يسطي خبرها بالخفوق ويصيبي ،،،
قريت بتويتر رحيل ابن هلال @
وجريت مع بوح القوافي نحيبي ،،،
لا يا مساء الاثنين يا شاحب الفال @
ضوك تواقد بالضلوع الحطيبي ،،،
هاذي ثلاث سنين والموت يختال @
فوق الرحيل وتحت شمس المغيبي ،،،
يقبل ويقفي في عزيزين وثقال @
مع سكة الفرقى يسل العطيبي ،،،
تمشي ركابه مالها قيد وعقال @
مأمورة ٍ ما هي شتات وذهيبي ،،،
بأمر الله المعبود علام الآجال @
اللي على خلقه عليم وحسيبي ،،،
والموت درب وكلنا فيه رحال @
لابد كل ٍ في كتابه يغيبي ،،،
مرحوم يا كاسب جزيلات الأفعال @
يا راعي الناموس عز الصحيبي ،،،
ياللي مع الدين المراجل لك جزال @
من غير ابو نادر تجيه ويطيبي ،،،
الله يجبر كسرنا فيك يا خال @
عسى عليك القبر نور ورحيبي ،،،
عسى الجنان الخضر لك خير منزال @
تلقى مقرك من نعيمه عشيبي ،،،
عوض عوضنا فيك نادر والأنجال @
الفالحين الطيبين العريبي ،،،
الله يسلمهم عواريف ورجال @
عسى البقاء فيهم يعوض النصيبي ،،،
الله يصبرهم على حمل الأثقال @
ويعينهم والله سميع ومجيبي ،،،
وصلاة ربي عد ما هل همال @
وعداد ما كبر وهلل خطيبي ،،،
على الشفيع اللي يجي يوم الأهوال @
اللي بهديه ما يزل ويخيبي ،،،

[بقآيآ .. حرف]

عظم الله أجرك وجبر عزاءك
واسأل الله للفقيد المغفره والرضوان

كل التحايا

[راع العرض]

عظم الله آجركم وصح لسانك شاعرنا القدير

[ابن حماد]

عظم الله اجركم ورحم الله ميتكم واسكنه فسيح جناته

ماجور يابو زياد ياطيب الفال
صبر جميل وكل نجم يغيبي

ذي حالة الدنيا على مر الاجيال
كلن في الدنيا مسافر غريبي

سنة حياه وكل نزال رحال
صغير والا طاعنن بالمشيبي

ماتنفع السلطه وﻻينفع المال
ولاتمنع الرقيه وجهد الطبيبي


يامنزل التوبه وطاها والانفال
على فواد المصطفى والحبيبي

عسى لهم في جنة الخلد منزال
ندعوك ياللي لدعاء تستجيبي

[عابر سبيل]

عظم الله اجركم ورحم الله ميتكم واسكنه فسيح جناته...

[ابو سلطان العتيبي]

عظم الله أجركم أخي صبح المطر
وجبر مصابكم وغفر لفقيدكم
تحيتي
-

[غانم الضومري]

لله ما أعطى ولله ما شال
الله يعظم أجركم يا الحبيبي

هذي هي الدنيا على مر الاجيال
يومٍ فرح واليوم الاخر مصيبي


أسأل الله له الجنة ولكم الصبر والسلوان

تحيتي

[عبدالمحسن الرحمه]

ياسلام عليك صح الله السانك وأحسن الله عزاك

[صبح المطر]

الله يجزاكم خير جميعا
ولا يوريكم مكروها بعزيز
صحت ابدانكم والله يسلمكم
تحاياي