يا حلو جمعتنا ،،

[صبح المطر]

السلام عليكم

مساء الخير على الجميع

أتمنى تنال قبولكم الجميل


،


يالله توفقنا لدرب التساهيل ،،، يم الديار اللي ربيع وطريه
يم الفياض اللي سقتها المخاييل ،،، غر المزون الصادقات الرويه
نبا نسج أقدامنا للمداهيل ،،، يومين برباع النفود العذيه
ندله عن الروتين والحط والشيل ،،، مع النسائم والهبوب النديه
شمال مع نشر العرب والمحاويل ،،، صوب الديار المخضره والزهيه
يا حلو جمعتنا وطيب التعاليل ،،، في فيضة ٍ بالعشب قفر وبهيه
هاتو من قروم الغضاء للمعاميل ،،،، الكيف روّق والمشاعر طنيه
وشلون ما استانس برفقة مشاكيل ،،، دام الوفاء والطيب فيهم سجيه
خوة نشاما من زحول الرجاجيل ،،،، لهم بوسط الصدر قدر وتحيه
شرواكم الطيب صدوق المواصيل ،،، الغانم العارف عديم الخطيه
يا أهل المحبة ناض قاف التماثيل ،،، واسرجت فكري والمعاني شذيه
سقته لكم من فايح البن والهيل ،،، فنجاله مسوى على نار حيه



صبح المطر

[راع العرض]

صح لسانك ياصبح المطر لين ترضى والله هيضتني علا السجه

[حـــــارب]

أجدت وأبدعت

صح لسانك .

[صبح المطر]

صح بدنك يا راع العرض
تشرفت بمرورك وتوقيعك لا هنت
الربيع يشوق ويروق
تحيتي

[عبدالمحسن الرحمه]

صح الله السانك جزل ياصبح المطر نترقب كل جديد يالذوق

[محمد السمران]

الله يجمعكم على العز والطاعه
عشنا اجواء الربيع والمطر ياصبح المطر

صح لسانك


دمت بخير
تحياتي

[غانم الضومري]

صح الله لسانك يا صبح المطر

يا حلو جمعتنا وطيب التعاليل ،،، في فيضة ٍ بالعشب قفر وبهيه

تصوير ولا أروع ..

تحيتي

[ابن حماد]

يالله عساه يعلها صادق السيل ..... من ناوة همالة رفرفيه
تاخذ ثلاث ايام غر الهماليل ..... على الديار اللي لها قابليه

صح لسانك يامشرفنا وشاعرنا دائم مبدع وجزل.

[صبح المطر]

الأخ حارب

ممتن لتواجدك الكريم
صح بدنك لا هنت

[صبح المطر]

الأخ عبدالمحسن عمر

تسلم لا هنت
مما عندكم
صح بدنك ممتن لمرورك الجميل