تسجيل الدخول

مشاهدة النسخة كاملة : سواليف ... يرزقني رزاق الحيايا بجحرها لا خايلة برق ولاهيب حايلة


الوااا(بالله)اااثق
2011-08-16, 01:23 AM
بسم الله الرحمن الرحيم

السلام عليكم ورحمه الله وبركاته

اليوم عندنا سالفه من عرض هالسوالف اللي فيها من العبر الشئ الكثير ...
سالفتنا تحتسي عن الاعتماد على الله والتوكل عليه في أي وقت من الاوقات


سالفتنا اليوم جرت على الشيخ حجرف الذويبي شيخ بني عمر من قبيله حرب

الشيخ حجرف مشهود له ومثل غيره من فرسان وشيوخ العرب بالشجاعه والكرم ...وزاد بالكرم لدرجه ان العربان اذا نزلوا بالقيظ لم الابار قام وذبح ماعنده اكرام لهم وصار على هالحال مثل العاده الى ان وصل الامر ان بعض السنين يقضي على جميع حلاله من زود الكرم
ولكن العرب لهم خصال وعوايد طيبه مع الشيخ حجرف وغيره خاصه انهم يجمعون له ابل وغنم اذا احتاج وهذا من العادات الطيبه عند العرب اذا ضاقت بالواحد الدنيا قاموا ربعه وجماعته وفزعوا له



الشيخ حجرف الذويبي بسنه من السنين اقضى على اللي عنده كله من زود الكرم والطيب وربعه تضايقوا منه كل سنه يقضي على حلاله كله فقرروا انهم يتركونه بالمنزل اللي هم نازلينه ولا يعاونونه مثل العاده لعله يجوز عن فعايله وهم طبعا ناوين النيه انهم يرجعون عليه بالليل ويعطونه بعض الابل لسبب انه يشيل بيته واغراضه عليهم
ولكن الطبع يغلب على التطبع وحجرف معروف مهوب بتارك طبعه


وبيوم شديد ربعه ورحيلهم عنه قامت مرة حجرف الذويبي تلومه على سواته وكرمه الزايد وتقوله شف ربعك وجماعتك ووش سواتهم بك
لكن الشيخ حجرف متيقن بالله وان رب العباد ما يخلي عبده فطلع يتمشى بعيد عن منازل القوم

وهو يتفكر بحاله شاف له داب عمى بوسط شجرة وكان هالداب هذا كل ماوقع على الشجرة طير فتح اثمه فالطير يحسبه من فرع من فروع هالشجرة فيطير عليه واذا وقع عليه اكله وعلى هالحال ويوم جاء مسيان وقع طير ثاني على الشجرة والداب مثل سواته بالمرة الاولى وحجرف جالس يتابعه شافه بالمرة الاولى وشافه الثانيه فعرف ان هذا رزق من الله لهالداب العمى وقال... اللي يرزق الداب العمى ماهوب بيتركني


والله وصدق توقع الشيخ حجرف وضنه برب العباد... الله ما تركه وجاب له رزقه ... وهو راجع الشيخ لم بيته ويمر على الماء اللي هم نازلين عنده وهو اللي يشوف ذود ابل وخير كثير ضايعه من قوم وهو اللي يسقيه وياخذه وكان من ضمن هالذود خلفات ومسح وزمل خير ما يعلمه الا الله
ويوم انه اصبح وهو اللي يسوق الابل و يشد ورا جماعته ويلحقهم


وقال الشيخ حجرف بهالمناسبه قصيده حلوة بصراحه ما قدرت اوثق منها الا هالابيات هذا فمن قدر يحصلنا باقي هالابيات فله الشكر الكبير


يقول حجرف الذويبي :





يقول ابن عيـاد وان بـات ليلـه


مانيب مسكين وهمومـه تشايلـه


انا لا ضاقـت علـي تفرجـت


يرزقني اللي ما تعـدد فضايلـه


يرزقني رزاق الحيايا بجحرهـا


لا خايله برق ولا هيـب حايلـه


ترى رزق غيري ياملا ما ينولني


ورزقي يجي لو كل حي يحايلـه


جميع ما حشنا نـدور بـه الثنـا


وماراح منا عاضنـا الله بدايلـه


نوب نخوش الفود من ديرة العـدا


ونخزز اللـي ذاهبـات عدايلـه


خز بالايدي ما دفعنا بـه الثمـن


ثمنها الدمي بمطارد الخيل سايلـه


مع لابة فرسان ننطح بـه العـدا


كم طامع جانـا غنمنـا زمايلـه


نكسب بهم عز وننزل بهم الخطر


ولاهيب من قفر رعينـا مسايلـه





هذا ماقدرت اوثقه من القصيده وما اقول الا ان شاء الله تكون السالفه والقصيده تحوز على اعجابكم
ورضاكم والعذر والسموحه اذا كان اهنا تقصير

منقوووووول

سفيرالنوض
2011-08-16, 05:50 AM
ونعم في حجرف الذويبي راع الكرم قصه مشهوره ومعروفه يرددونها الشياب
ويضربون فيها الامثال

راعي نجد
2011-08-16, 01:58 PM
رزقي يجي لو كل حي (ن) يحايله

سبحان الله شف مقدار الثقة عنده بالله سبحانه وتعالى

لك من جزيل الشكر على هذه القصيدة والله يرزقنا واياك والاعضاء الرزق الحلال والعمل الصالح.

ابو طلال الفيفي
2011-08-16, 08:59 PM
وعليكم السلام ورحمة الله وبركاته
والله ونعم بالشيخ الفارس رحمة الله عليه
واذكر له قصص جميله ومواقف ينضرب بها المثل
الله يعطيك العافيه اخي الفاضل الواثق بالله

برق المدى
2011-08-16, 10:42 PM
ان اشهد ان الله الرزاق الكريم
سالفة معبرة اشكرك اخي الواثق بالله

أبو وليد الشيخ
2011-08-16, 11:34 PM
بارك الله فيك والله يعطيك العافيه

محمد آلحربي
2011-08-17, 01:48 AM
قصه مفيده جدا والكرم لابد منه

يجزاك بالخير