يمــــــــــــــــه ...

[هند الربيعان]

( يمّه ) عسى شَرّك يزول و تطيبين تقضين عمرك في صلاة وعبادة
و إلى لفيتك زائرٍ لي تقومين تستقبليني في حنان وسعادة
يضمني صدرك و تدمع لك العين يطيح فوق الكفّ يعلن وداده
( يمّه ) فداك العمر وش بك تونّين ( يا يوه ) عقبك عايشين بنكادة
( يمّه ) يِتلّ الروح يوم أنتِ تبكين تَلّة طيور القصّ لحظة هداده
( يمّه ) فداك الكون و الناس تكفين ما ودي أسمع ما اتحمّل زيادة
ردّي علي ( يا يوه ) وش بك نسيتين ردّي عليّ ما عاد فيني جَلادة
ردّي عليّ ( يا يوه ) ما عرفتين ( يمّه ) ذبحني ضمّتك للوسادة
( يمّه ) بَدَت بالصبر ثورة براكين تفجرت أحزان همّ و لهادة
و من الحزن ذبلت زهور البساتين ورد الهدا ( يا يوه ) أعلن حداده
دكتور خذ قلبي و كبدي مع العين عطهن دفا عمر العمر هي مراده
رمز الوفاء و التضحية أمي منين ألقى ربع ربع الربع من جهاده ؟
( يمّه ) عساي أردّ له أول الدين يَفداه قلبي و الجوارح قِلاده
يا الله يا مِنْزِل تبارك و ياسين باسمك نطق عيسى و هو في امهاده
تشافِي أمي أم كل المساكين اللي لها بالطيب طبعٍ و عادة

دمتم بود احبتي

[الذعذاع]

شموخي تعداك

الله لله
ابيات جميله ومعبره جداااااااااا
صح ذوووووقك مليون ولايسدووون
بإنتظار جديدك
بوووووركتي

[الركام]

حياك الله
وتسلمين على هذا الاختيار الجميل

[صاهود]

الله يعطيك العافيه وماقصرت

[هند الربيعان]

مشكورين نورتو متصفحي
بمروركم العطر
دمتم بود

[احساس انسان]

صح لسان شاعرها وتسلم يمنى ناقلها
أهنئك على هذا الانتقاء الرائع

[ابو طلال الفيفي]

آبيات جميله واختيار موفق

بارك الله فيك أختي الفاضله