هل سبق ان حصل لك مثل هولاء

[خوي النشاما]

هل سبق ان حصل لك مثل هولاء وهروبهم داخل محطة بنزين أو اي مكان قريب

http://backyardchaser.net/gallery/albums/album47/IM003035.sized.jpg

[الصلبوخي]

حياك الله اخي الكريم خوي النشاما

نسأل الله ان يرزقنا الغيث المبارك

نعم سبق وان حصل ذلك في طريق القصيم وطريق حايل وعلى طريق صلبوخ

المشكلة الى صارت بردية وانت في البر الله يرحمنا برحمته

كل الشكروالتقدير على الصورة

دمت في حفظ الله ورعايته

[خوي النشاما]

الله يحييك ويبقيك يالصلبوخي

ماشاء الله عليك اجل انت موفق بمقابل الخير الله يجيبه ويعم به بلاد المسلمين

ومثل ماقلت المشكلة لاصرت بالبر وش بتسوي

بيني وبينك بعطيه قفى الموتر لين الله يفرجها

شكرا لحسن ردك

[ولد حريملاء]

السلام عليكم ورحمه الله وبركاته


الله لا يورينا قوته

أخبر أن ناس تخبو تحت الانفاق خوفا من الامطار والبرد وغرقو كما حصل في مخرج 13 في الرياض

رحم الله موتانا وموتى المسلمين

استغفر الله واتوب اليه

[خوي النشاما]

حياك اخو ولد حريملاء

نعم الله لا يورينا قوته وخبرك مؤسف رحمهم الله واموات المسلمين

شكرا لردك

[التمثال]

يازين ذا المطر ,,,

بس وينهي فيه ياخوي النشاما ..

وعموما مشكور جدا على هالصورة

الله يرزقنا مثل هالمطر من غير شر ..

[خوي النشاما]

اخي التمثال الصور من موقع اجنبي واعتقد انه في استراليا

وان شاء الله يرزقنا الله باطيب منها من غير ضرر

[صاهود]

البرد يروع

والحمد لله ما صار لي هذا الموقف

[خوي النشاما]

ااخوي صاهود

نعم البرد مشكلة كبيرة وخطر لاصار حبته كبير

يسولف على واحدن من الاخوان يقول

كنت اسرح بالغنم انا واخواني يوم كنا صغار وما كان معنا سيارة

يقول في يوم من الايام جتنا بردية قوية وماكان حولنا احد ولا مكان نتخبى فيه ، ومالقينا حل الا التخفي تحت الشياه

والحمد لله فكنا الله وصارت الخساير في كم راس غنم ، والحمد لله على ماصار

[النمر]

الله يجيب الخير .
و بالنسبه لمواقف البرد كثيره ، و مثل ما تفضلو الأخوان اذا كنت في البر و لا حولك شي فخل قفى السياره مواجه للبرديه و حاول تغطيه بفرشه او طربال او اي شي . لأن مواجه البرديه بوجه السياره او جنبها ضرره أكبر .

مره كنت في جبال السوده و تجينا ذيك البرديه و لا فيه الا شجره , و من قوة الهواء حاولة اني اتذرى بطرف الشجره على الأقل تخفف من البرد و اضمن بإذن الله عدم سقوط الشجره .

واسئل الله ان يحفظنا و جميع اخواننا المسلمين ..

[الهبايب]

مشكور اخوي على الصورة

في مرة كنا في شعيب وجانا برد ية و كان في الشعيب طلح والحمد لله تذرينا به وفكنا الله

أستغفر الله واتوب اليه أستغفر الله واتوب اليه

الهبايب

[أبو خالد]

السلام عليكم ورحمة الله وبركاته


آه يا قلبي

الله يهديك

جزاك الله خير

[بن غازي]

الله المستعان

المواقف كثيرة

ولكن الحمد لله صرت انتبه اكثرمن اول

[بن سليمان]

انا اذكر مرة على طريق ثادق

ويالله نلحق مظله دواجن وكان البرد كثير بس صغير

والحمد لله على السلامة

[ولد الديرة]

انا اذا حويت اسم مطر دخلت داري الين يزل المطر ثم طلعت اتمشى

[مخايل البروق]

الحمد لله اني ما احب اغامر

لكن قد تجبر الضروف على البقاء في الامان وقت الامطار

[ولد نجد]

بهالمناسبة السعيدة عن البردية
قبل كم سنة وفي آخر الربيع وكان الكشاته في كل مكان من السبلة والكسر
وكان الوقت عصراً وفيه سحابة سوداء كبيرة وتزحف ببطء وشكلها يخوف وبارقها ما يفصل ابد
وكل المكاشيت هربوا يعني مهوب معقول اجلس لحالي مشيت معهم :19:
المهم كنت اسير بطريق الخدمة وتعديت أخر محطة إلا راعي ونيت عاكس السايد .. شوي إلا يصدمني وجه بوجه
قلت وش فيه هالمجنون :87:
ماامداه يطوفني الا صقع البردي في الموتر
ومن العجلة اديور واعكس السايد مثله :77:
وازبن تحت مضلة محطة البنزين وكانت مليانه من السيارة
والحمد لله عدت على خير