تبيه يركب معك او تركب معه

[ابو فراس]

السلام عليكم ورحمة الله وبركاته

الان جاء وقت الرحلات والكشتات وحتى ذلك الحين نبي نتسائل عن

اذا كشتوا وش ودك تطلع بسيارتك او تطلع مع احد بسيارته ؟

انا احب اطلع بسيارتي ولو كنا فقط اثنين بسيارتين لاني احب سيارتي واغراضي تكون معي دائما وهو حر يطلع بسيارته او يطلع بالنقل الجماعي او باللي يبي المهم لا يقول ابطلع معك تكفينا سيارة وحدة
تراه معصي

وانتم وش تحبون ؟

[هنا القريات]

اذا اعرف المكان
بسيارتي
والعكس
واذا كلنا نعرف المكان
بسيارتي

[محمد النجيبان]

انا أحب نطلع بسيارة واحدةسواء بسيارتي أو بسيارة صاحبي
وأفضل نكون ثلاثة على شان السواليف ووساعة الصدر
ومسألة الأغراض أمرها سهل
وإن شاء الله يابو فراس ما ني قايل لك أبروح معك

[ابوطارق]

احب اطلع بسيارتي ولحالي لو اناعشره ما احب احد يركب معي الا طويري0

[ااابوصالح]

أخ ابوفراس أنا بالنسبة لي أحب أطلع بسيارتي وأغراضي تكون معي نفس تفكيرك وكذلك أحب إنه يركب معي لكن إذا كان هو ملزم ماراح نختلف
.
.

[محمـد المحمـدي]

اهم شيء سعة الصدر والوناسة ولا السيارة انا اشوف انها ماهي مشكلة سواء سيارتي او سيارته والاغراض امرها هين

وكل ماكثر العدد في السيارة الوحدة كان افضل لتبادل السواليف والعلوم الغانمة

[رعد شقراء]

اخي ابو فراس
احب اطلع بسيارتي ولا استطيع استغني عنها مهما حدث

[مهدي فواز]

مع حملة ..............

[ابو طلال الفيفي]

أفضل كل واحد وسيارته ..

[الشيخ]

والله حنا بسدير((تمير)) يابو فراس نركب ثلاثة فما فوق في سياره واحده
ثلاثه اربعه سيارتين سيارة كلها واحد وكل سياره بها عزبة
امعصي الواحد يطلع لوحده بسيارته
الاحظ يابو فراس ان
أهل القصيم وأهل شقراء كل يطلع بسيارته حتى اللأخوان معصي يطلعون جميع
مادري ماهو السر في ذالك
الاحظ وقت الربيع كل يطلع بسيارته لوحده

أن رجلا قدم من سفر ، فقال رسول الله صلى الله عليه وسلم :
من صحبت ؟ فقال:ما صحبت أحدا ، فقال رسول الله صلى الله عليه وسلم :
" الراكب شيطان و الراكبان شيطانان و الثلاثة ركب ".

قال النبي صلى الله عليه وسلم (لو يعلم الناس ما في الوحدة ما سار راكب بليل قط)

[عبدالرحمن الغامدي]

لا أنا أحب اركب معاه بسيارته والبنزين عليه
خاصة لو كانت الرحله بعيدة
والله تعبنى من السواقه

[ابو فراس]

يا اخوان الراكب شيطان نعم وصدق الرسول الكريم

ولكن اعتقد بأن المقصود بالراكب واحد هو انك تسافر لوحدك وحنا ولله الحمد نسافر جميعا ولكن كل واحد بسيارته كما لو كان على بعير وحده والا هل من المعقول ان ثلاثة يركبون بعير واحد هذا فهمي للحديث الشريق

[النايف]

بالنسبة لي أحب أطلع بسيارتي لأن أغراضي معي من كمرة لجهاز أيكوم ودربيل وواير سحب وأشتراك وأي شي يخطر ببالكم تراه معي
والي يجي معي الله يحييه وتراني راعي صجه بالجهاز يعني لازم أفتح جهاز الكنود وأراسل وأقصد
ابو فراس يازين زينك أنت ومواضيعك توسع الصدر
تقبل مروري

[فواز القاسم]

انا ما أحب أركب لحالي أبدا. ..... أما مسألة السيارات فاللي دائم اطلع معهم فاحب كل مرة على واحد ارضاء لخاطر الجميع ... إلا إذا كانت سيارتي أو سيارة خويي مثل السيارة النائف فاكيد لها الاولوية

وأما إذا ناس أول مرة اطلع معهم فعلى سيارتي حتى لا احرجهم

والمهم عندي تكون السيارة المناسبة


شكرا لك

[عبدالرحمن المطيري]

انا اشوف ان اللمه زينه
للسواليف والعلوم الغانمه

والسيارة ماتفرق وحسب الاحيتاج (كمثال كشته بر جيب او بيك اب) تكون مجهزه كاملا
سيارة او سيارتين

اما كل واحد بسيارته فلي تحفظ عليها ولاحظتها كثيرا

طبعا انا افضل سيارتي الا اذا لزم مانختلف

[Al-KHUSHAIBY]

أهم شي الوناسه

[ابو ياسر 001]

والله نشوف اللي مناسب سوا نطلع على وحدة ثنتين او سيارتي اهم شي راحة الركاب

[rhaal]

الله يسلمك أبو فراس
أنا لا يمكن ولا أرتاح إلا بسيارتي حتى لو ما أسوق وساق غيري
لكن ما أرتاح إلا بموتري لعلمي بأن أغلب المستلزمات متوفره بشكل دايم تحت المراتب والمخابي والطرابيل (أذكر أن أحد عيال عمي تحداني بأحد الجمعات العائلية قدام الشيبان ومن ذبيحه إنه بيطلب أشياء وأطلعها من الموتر توقع وش طلب واير أو اشتراك أو دربيل أو أجهزة أو أي شي يتعلق بالبر لا .. طلب خيط أسنان قلتله بس هذا اللي تبي خذ المفتاح ويروح معك أثنين لتأكد ووصفتله مكانه .. والله يركبه الحق) عشان كذا ما أرتاح إلآ بموتري
بالنسبة للركوب بالعكس أخالفك الرأي إلى أربعة أشخاص ممتاز على موتر واحد أما إذا كانوا أكثر فنتوازع على المواتر بشرط الآ يقل الموتر عن ثلاثة ركاب

دمت بحفظ الله