ياناس وشلون اوصل التنهات من الرياض

[بسيط]

عاد لا تبخلون علي وتقولون منيب راعي بر انا حدي بران سدير .. بس هالمره ناوي اقتحم التنهات

من فيكم يكسب الاجر فيني جزاكم الله خير

[معدي المرقاب]

راجع الرابط التالي ان شاء الله يفيدك

اخوك ابو عزام


http://www.albrari.com/vb/showthread.php?t=4095

[بسيط]

ماقصرت بس المشكله يا حبيب ان طريق الجنادريه هذا ما اعرفه كل اللي اعرفه طريق سدير القصيم السريع ما ينفع اروح مناك

[النمر]

يا طويل العمر اذا تبي تروح للتنهات مع طريق سدير القصيم اتبع الوصف التالي .

اطلع مع طريق القصيم شمال و تعدى نادي الشباب على يمينك (( بالتفصيل الممل و لا تقول ما عرفت الوصف ههه أمزح معك )) ثم واصل على هذا الطريق تتعدى مخرج العمارية ______ ثم تتعدى مخرج قوات الأمن الخاصة وااااااصل على الطريق نفسة حتى تأتيك نقطة تفتيش صلبوخ جهز الرخصة و الإستماره بعدين تعدهم وواااااااااصل على نفس الطريق (( الزبده اذا جاك مخرج رقم 8 و هو مخرج دقلة )) اطلع معه يمين بيجيك تقاطع تعده وواصل بعدين يجيك طريق يسار يودي للطوقي و التنهاة اطلع معه وامش بعدين يطلع فيك الطريق فوق امش معه (( تجيك لوحه نهاية الطريق امامك _ اطلع يسار )) ادعس ادعس و تعد دوار الحفنه و خلك على نفس الطريق يجيك دوار يمين الصمان وقدام التنهاة انت اطلع معه قدام و امش شوي تشوف خضار روضة التنهاة على يسارك (( لف عليها و دور المكان المناسب لك ))
و بالتوفيق (( الله يعينك على هذا الوصف المطول )) ..

تقريباَ تبعد روضة التنهاة عن مدينة الرياض من الـــ 180 كلم يمكن تزيد شوي مع هذا الطريق ..

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ




وهذا وصف مع كروكي اذا حبيت تجرب و تروح مع طريق الجنادرية __ الثمامة :


طريق الروضة، يبدأ من طريق التخصصي شمالا، استمر على نفس الطريق، سيأتيك دوار عنده صفر العداد


استمر شرقا على نفس الطريق سيأتيك دوار آخر استمر على نفس الطريق، وعند العداد 10 ستجد مفرقا يتجه يسارا إلى (الجنادرية - التنهات - الصمان) اتجه معه جهة الشمال


استمر على هذا الطريق حتى يشير العداد إلى 74، عندها ستجد مفرق (حفر العتش- الطوقي- الصمان) على اليمين، اتجه معه شرقا وبعد صعودك الجبال، ستأتيك لوحة تشير إلى أن الطوقي إلى اليمين وحفر العتش إلى اليسار اتجه إلى حفر العتش


استمر على الطريق حتى يصبح العداد 170، ستجد لوحة تشير إلى أن روضة التنهات إلى الأمام بعدها دوار


اتجه إلى التنهات واستمر حتى يصبح العداد 185 تقريبا، هنا ستكون الروضة على يسارك




http://www.albrari.com/up/upload/tenhat.gif

[بسيط]

بيض الله وجهك يالنمر جبتها من الجهتين بس وش اقرب من جهة الجنادريه والا طريق القصيم

ثانيا وشلون اوصل شمال التنهات وراك وراك الين تمل

سؤال ثاني وين مخرج دقله؟؟ هههههههه امزح معك سؤالي ياحبيب الا لفيت من مخرج دقله وعديت التقاطع الاول فيه لفات يسار غير اللي انت تقول والا الف مع اول لفه يسار وبس

وسلامتك

[ابو عبدالمجيد]

اخي الغالي بعد اذن اخي النمر


اذا كنت في الرياض اقرب الجنادرية

اذا كنت في سدير افضل لك طريق مخرج "دقلة" ورح سيدة لانك لو لفيت يسار من عند التقاطع يوديك لرويغب بارك


الله فيك "المهم خلك ماشي على طول حتى يجيك على يدك اليسار مفرق "الطوقي الحفنة التنهاة" ورحلة موفقة ان


شاء الله تعالى

[بسيط]

ماقصرت يا ابو عبد المجيد وجزاكم الله خير

بس ما قلتو لي الفرق بين الطريقين يستاهل العنوه والا كلها عشره كيلو

والا رديتوا علي سؤالي فيه غير اللفه اليسار والا هي اول وحده اقصد اللي من مفرق دقله عساها السيل

وعساكم علي القوه

[النمر]

اخوي بسيط ما اضيف على كلام اخوي ابو عبد المجيد شي .

اذا طلعت مع مخرج دقله و جاك التقاطع تعده و رح على طول بيجيك اول طريق على يسارك مكتوب لوحة الطوقي و التنهاة لف معها يسار و كمل الوصف مثل ما ذكرت لك سابقاَ (( الا اذا كانك ما تعرف تقرأ اللوحات فهذا شي ثاني أمززززززززززح معك يالغالي هههههههههه )) .

اي سؤال حاضرين ...

[بوخليل]

ما شاء الله

يا وسع صدوركم

والله هذا من المحبه والفزعات

ما تبون خوي يخاويكم