ماذا يوجد في سيارتك من ادوات البر؟

[عمر القرينيس]

بسم الله الرحمن الرحيم

اللهم صلي على محمد وعلى اله وصحبة وسلم


هذا موضوع مشغلني منذ زمان وحبيت اطرح الموضوع عندكم يالوجيه الطيبة

كل واحد منا معه اغراض خاصة للبر بسيارته وبعضنا معه اغراض تفك ازمه وبعضنا اغراضه كاملة بس فيه اكسسوارات زياده عليها مادرى عنها

فياليت كل عضو يذكر السيارة وموديلها والاغراض الي معه بالسيارة وانا راح ابدا

السيارة:- لومينا2006

الاغراض:- فرشة +تكاية+كرسي جالس+لمبة خارجية+سكر+شاي+ملح+فصفص+كاسات+فناجين+سجادة صلاة+كشاف +شرابات احتياط+جكيت احتياط+مخدة صغيرة+سكاريب +سكين+اسعافات اوليه+وبس


أتمنى نشوف مشاركات توسع الصدر وتذكرنا باشياء ناسينها او ماندري عنها

[صقر المجزل]

سيارتي ددسن غمارتين

عندي شنطة عدة البر خاصة بالغداء

وشنطة ثانية للشاهي والقهور وجركل ماء اسود مربوط على طول بالسيارة

ومسحاة وعتله وسلسلة لجر السيارات

[salman]

سيارتي جيب شاص كل شيء موجود فيها من الالف للياء بدون مبالغه حتى مكينة اللحام

[عمر القرينيس]

اشكركم على المرور وامنى مايكون استعراض كثر ماهو إفادة ياليت لو تكون هناك لسته وتقبلوا تحياتي

[هماليل]

جيب حوض 98 كل شي فيه حتى الابره والمناقيش بس عذروبه الكشن مكسور

[ابوياسرالبلوي]

والله يالطيب سيارتي ددسن غمارتين
وكنت حاط فيها صندوق العزبه بالحوض فيها كل المتطلبات للغداء وللقهوه والشاهي لكن انسرق
وشريت ليس شنطه خاصه بعزبة الشاهي والقهوه وكل فترة ازيدها عده جديده
على فكرة ناوي اشتري سنارة صيد مايدري الواحد يمكن يجي سيل فيه سمك:78:

[عمر القرينيس]

يا اخوان تكفى عدد ولا تعمم لسته كامله تكفوووووووون

[صاهود]

ابشر

العزبة

قدور طبخ وسكاكين ومقص علب ومبرد واسيخ شوي وشبك شوي وصحون وملاعق وليف تنظيف وفيري وملح وبهارات غير مطحونه ونجر وعلب طماطم وصلصة ورز وبصل وفلفل مجفف ومطحون

بالاضافه لعزبة الشاهي والقهوة

الاضافات مسحات ومحش وكريك صغير

[عمر القرينيس]

مشكور صاهود استفدنا منك كثير الله يعطيك العافية

[قناص الاردن]

وعندي اضافه على اخوي صاهود

رواق اللي يصد الهواء وكذلك فاس مع عدة سيارة كاملة وماطور هواء

[عمر القرينيس]

قناص الاردن مشكووووووووووور الفأس مهم جدا

[سلوم]

ولا نسون لفة حبال

وكذلك جهاز القارمن والكنود

ولمبة لليل وكشاف

وصيدلية فيها بندول وبعض الادوية المهمة

[خشم واقف]

عزبة شاهي وقهوه + لمبه + فرشه + مركا + شرابات + بالطو
بس السياره ما تساعد ياليت لو فيه يخبرلي موتر حليو

[عمر القرينيس]

سلوم مشكور على المرور وش موترك؟


خشم واقف مشكور على مرورك وش موترك ؟

[ضلع السروات]

فيه حاجة مهمة بعد وهو اشتراك البطارية وجهاز محول حق الكهرب

[عمر القرينيس]

ضلع خزة شكرا لك على المرور وعلى الإضافة الجميلة

[عمر القرينيس]

وين الناس؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[خشم واقف]

موتري يا عمر القرينيس كامري،،،،،،،،،،،،،،،،،،،

[عمر القرينيس]

Thank you for this answer mr.kashm alhossan

[دندشه]

بسم الله الرحمن الرحيم
السياره جيب شاص الغماره

عدد اثنين كنود واحد والثاني يدوي + سلك احتياطي للريشه
تريكات عدد 2
مقص كبير وصغير
سكين صغير وامواس
اقلام واوراق
كبس
سنارة عدد 2 6 متر و 3 متر ونصف
لمبات للسكن وللاسطبات وفيوز واسلاك وشطرطون عريض ونحيف
محول كهرب عدد 2
اكياس مقاسات
دربيل
شنطة اسعافات اولية
عده خفيفه
فروه +الكوت +فنايل وثياب + شراريب +دسوس ايدي+قبع +شمغ من الثقال الدافيات
لمبات مع السلك 12 فولت ابيض +اصفر
معجون اسنان 2*1 للاسنان وللحروق وحده بوحده
خيزرانه
بسطار حق الجيش ( اعزكم الله )
حمالات (لا يروح فكرك لشي ثاني ) اذا بغيت تحمل شي على الضهر وتمشي (من اغراض الجيش)
عيار هواء
دس للطير
صواميل للجنوط استبنه
سيور عدد 3
ولاعات وكباريت كوم
الصندوق

الشنطة الاولى للطبخ
كاتم
قدور عدد 3
مقرصه
واغراض الاكل معروفه
شنيطة سكاكين وملاعق وملاس الخ....
صحن عدد 2
سمط +قسدير + بيوز درزن (اكثر شي يضيع)

الشنطة الثانية للشاهي والقهوة
برقان
دلة قهوه
دلة حليب
نجر
شنطة بيالات وفناجيل
فوط لتمسيح
سكر شاهي قهوه.... الخ
ترمس ماء
فرشات عدد 2 كبير 3*4
فرشات صغير عدد 4 مقاس 2*1
ــــــــــــــــــــــــــــــــــــــــــــــــــ ــ
عدد اثنين رواق 6 متر و 8 متر
طربال ازرق عدد 2 مقاس 4*4
عدد 2 ماصوره طول 3 متر متداخلاتفي بعض
فاروع
اكريك
شنطة عده عدد 2
ماطور هواء
اشتراك
واير سحب
طنب كبير بطول 1 متر
مركى طبخ عدد 2 كبير و صغير
جيكه وضوء
لي غاز
ملقاط

وسلامتكم والعذر على القصور


وتقبلوا تحيات
دندشه

[سداااااح]

مشاء الله تبارك الله عليك اخوي دندشه
لكن السياره وشنوعها اللي تبي تشيل الدنيا ذي كلها

[دندشه]

جيب شاص موديل 2005
الله يطعمني من خيرها ويكفيني شرها
قولوا امين

http://www.up07.com/up6/uploads/fb2b139c71.jpg (http://www.up07.com/up6)

وتقبلوا تحيات

دندشه

[برق الوسيعه]

تسلم يمنااااااك0000000



:83:

[سداااااح]

امين الله يطعمك من خيره ويكفيك شره
اخوى دندنشه

[دندشه]

برق الوسيعه
ومن قال سالم
سداح
الله يجزاك خير

والشكر لصاحب الفكره

وتقبلوا تحيات
دندشه

[راعي كيف]

السلام عليكم ورحمة الله وبركاته
السيارة باترول 2001 صالون
العزبة مختصرة الى ابعد درجة بمعنى اي شىء تبيه موجود ( واقصد اللي تحتاجة )
جراكل ماء بخاخ ماء للأقتصاد
خيمة للمبيت وفراش لنوم
فرشات للجلوس ومراكي
شدادات للعفش
منفاخ هواء عدة فك وربط واير للسحب اشتراك ذاتي 900امبير
طفاية حريق
جهاز للمراسله
قارمن
والباقي معروف
اية نسيت قطعة لحمة مدودة من شهر ناسيها بالسيارة . :eek: ههههههههههههههههههههههههههههههههه

اخوكم راعي كيف
ابو ناصر

[الطيري]

السيارة ددسن موديل 84 غمارة شنطة عزبة مفصله من حديد ثابته بصندوق وفي هالشنطة شنطة العزبه من قهوه وشاهي واغرض الطبخ كلها ورواق بس مااشيله الإوقت الشتاء عن البردومسحاه وفاس ومدقه وعتله ومركا ضوء وفرشات السنيدي المشمعه قابله لطي الى حجم صغير
وتقدر تفله وتحطه مضله عن المطر وعن الشمس كذلك ولمبات على محول شاحن سيارة وكشافات راس ويد وكشاف مليون شمعه قابل لشحن ومركا عدد 2 ودافوراصغر من الغاز شوي وعلى الجنب الإيمن تانكي مويه حلوه والجنب الإيسر تانكي مويه هماج هذا على الجنبين وبنص فاضي ومكان الحطب على أتوانك مفصل لها مكان وقارمن وكنود وسلسله لسيارت الي تسحبنا وسياره حلوه على كيف كيفك شرط ماترتفع حرارة ولاينقص زيتها وقير ممتاز وكامل المتحركات ممتازه وانوار زينون وكاملا الإناره ممتازه من داخل ومن برا وعليه شد مقوس عليه شراع مشمع ضد المطر بس ماأركبه الإعند اللزوم وداخلي السيارة مايعتاز على كيفك ونسينا حاجه ولاهي الإهم وهي الثلاجه حقت المشروبات واللحم والمويه البارده وحقت الضبان وماتصدق ون أذا قلت أني رايح عليه مسافة 500 كيلو كله تمشي في البر في الصمان ودهناء ودبدبه والعرمه ولاستفسار 0553083686

[rhaal]

مشكوووووووووور
أخوي علىالموضوع

[rhaal]

بسم الله الرحمن الرحيم
عدة الطبخ/
قدرين , كاتم , مقلا صغير وكبير , سكاكين , ملاعق ، ملاسات ,شخال ( مشخله )
بلامات ( صحون الجفي ) , غرشه ( سحله ) , مفك صلصا
وباقي اغراض الطبخ من / البهارات , اللومي , الملح الخشن والناعم , دارسين ,
فلفل أسود , هيل ما طحن , قطمت الرز , إيه قبل ما أنسى البلاستيكات اللي مع عدة الطبخ /
سمط , صحون بلاستك صغير وكبير ومقسمه ( للفطور ) ملاعق بلاستك توفير الماء طبعاً
أكياس زباله أعزكم الله , قصدير كبير ( أهاااا شكلكم فهمتو غلط ) الشيشه يأم أيمن
لا تراها علشان طبخ الخضره مع اللحم بالقصدير أو البطاطس المشويه اللي تلفها
بالقصديير وتحطها فوق النار ( الحطب ) نصف ساعه نرجع لموضوعنا
كيسان الورق والبلاستك , مداسيس طبيه تلبس لتقطيع وتجهيز الأكل توفير للماء
هذا بالنسبه اللي تذكرته الحين والله الباقي نسيت اروح اشيك على السيارة
عدة الشاهي /
بريق تفويح كبير , بريقين شاهي , بريق تفويح القهوه , دله كبيره وصغيره اللي بهيل
واللي بدون هيل تخبرون الحرقان , دلة الحليب , بريق وسط زنجبيل , شاهي , سكر
قهوه , هيل مطحون , ليف الدله , عويدي مطحون , زنجبيل , مولع الحطب
( الغاز والمكعبات البيض ) , ملح ناعم , مداسيس جلد مقاس طويل , بيوز
كشاف صغير يدوي معهن
وهذا بالنسبه للي تذكرته من عدة الشاهي والقهوة

أما بالنسبة لباقي الأغراض اللي منطله في الصندوق /
زرايه كبيره وصغيره , دافور كبير وصغير , منشار يدوي ( سويدي ) تراه فله
مسحاة , فاس , واير ( قلص) , أحبال لفه ومقطعه , فرشات عددهن 3 , مراكي الحمر
طربال أزرق كبير , فرش نوم ثلاثه 3 تخبروني راعي فزعات , حطب ويا كثره
جيك الماء وسط , جيكت وضوء , شنطة الثلج صغيره , صوابين يد وصحون
سفنج وليف خشن , خيمة السنيدي الصغيره شكل محميات لخمس أشخاص, رواق
شنطه صغيره للملابس والبشت والجاكيت ( كوت )
أما بالنسبة للأغراض اللي داخل الغمارة فهي /
مصحف صغير , كتيبات دينية وثقافية
كشاف كبير , كشاف على الراس , قارمن , جهاز ارسال ( كنود )
عيار الهواء , شربات , دسوس , قبع راس , شالات , ماطور هواء , مروحة المكينه
ابرة الكوره , خيزرانه , بلف , مقص ظفور , لمبة كبوت , شمعات اضافيه , فيوز
عدة المفكات ( أبو جلمبو والباقي ) بنادول , فازلين , كاميره
أمواس , شطرطون ولزاق , شاحن جوال , شمغ البر ياعليها لون
مناقيش , أشرطه قصايد البر والمكاشيت ,

واعذرونا على القصور والنقص

أما بالنسبة للسيارة فهي /
هايلكس غماره 2002م

http://members.lycos.co.uk/albrari/up/ar/IMG_0031.JPG

وبرضو هذي الصورة الثانية
http://members.lycos.co.uk/albrari/up/ar/IMG_0059.JPG
متميلح موتري صح
هههههههههههههه

وتقبلو تحيات أخوكم

rhaal

[دندشه]

مشاء الله عليك

كفيت وفيت

الله يبارك لك فيما رزقك
ويطعمك من خير موترك ويكفيك شره

وتقبل تحيات


دندشه

[rhaal]

مشاء الله عليك

كفيت وفيت

الله يبارك لك فيما رزقك
ويطعمك من خير موترك ويكفيك شره

وتقبل تحيات


دندشه

مشكور أخوي دندشه على الإطراء

آمين وإياك
لاهنت على ردك لمشاركتي المتواضعة