بسم الله الرحمن الرحيم
اقدم عذري الشديد عن التأخير بسبب ارتباطي بدورة لتعليم اللغة الأنجليزيه
والي بصراحه قررت اني اتقن هاللغة
وابشركم تجاوزت المستوى الأول بنسبة 94%
لاتنسون تباركون لي وتعطونن نجاحه
نرجع للتقرير
اليوم مختلف عن كل الأيام
والسبب يعود لحريق يهز اركان الفندق
واين يقع هذا الحريق
في غرفتنا
صفارات الأنظار تطلق صيحاتها
وفرقة المطافي بأنترلكن تتحرك صوب فندق كريستال
والسبب يعود للقهوة
وتفاصيل القصه تقول
عند اعداد القهوة كالعاده الضرورية بالنسبة لي
فاحة القهوة على الهيتر وكان الهيتر تحت جهاز الحريق بالغرفة
الدخان كان كثيف
وعلى طول هالصفارة تصيح
ويجيون الي بالفندق كلهم طع طع طع بالباب
وت وت وت
قلت يالربع ماصار غير الخير
كلها فوحة قهوه
وتجلس الي بالرسبشن تبربر علي E
قالت افتحو البيبان على شان تتهوى الغرفه
المهم هالسالفة كلفتنا مبلغ من المال اقول لكم قصته بعدين
وهذي صور للفندق والمنطقة المحيطة
المهم كالمعتاد فنجال وفطور
وترتيب اغراض للنزهه اليوميه
بعد تسخين السيارة مع هالبرد
تم ظبط القارمن بأتجاه مدينة بيرين
الطريق يمر من انترلاكن مدينة ثون
ثم مدينة بيرين مروراً بعدة قرى
بصراحه المدينة لم تعجبني او لم اكتشفها على حقيقتها
بحكم تعلقي بأنترلاكن وقراها والتي تكون بين الجبال
مدينة بيرين في مساحات بين الجبال ومدينة فيها المباني العاليه
المهم خذينا كم لفه فيها
وهذي صور لهذه المدينة
ونرجع لأنترلاكن لكن هالمره مع الطريق السريع لكسب الوقت
رحنا بعدها لشلالات تروميل باخ
نزلنا وشلنا اغراضنا من حامل للكميرا وعدسات وبعض المرطبات
المهم كان فيه شخص يمشى ورانا
استغربت بالبدايه من عدم تواجد اشخاص بالمكان
غير هالحمر ورانا
وكل ماوقفت اصور يوقف وكنه يتفرج
المهم يوم وصلنا للبوابة ولا مسكره
يمين يسار
مافيه امل
وبصراحه اقدر انقز من الحاجز لعدم ارتفاعه
لكن ماحبيت اشوه صورة السائح الخليجي
وخاصه ان فيه واحد ورانا
المهم بعد التشاور قررنا الرحيل
وكان الشخص واقف قبل البوابه بعيد شوي عنا
ويوم تحركنا راح بجهة البوابه
استغربت وقلت وش يبي يسوي والبوابة مسكره
المهم الرجال طلع معه مفتاح ودخل وسكر الباب
اااااااااه قهرني بصراحه
هالحين مافيه غيرنا وعجزان يدخلنا
رجعنا وخذينا الفرشه ونزلنا القهوة لعلها تبرد من القهر على هالحمر
مشينا من مواقف الشلال بدون وجهه
المهم لقينا مكان فيه عربات كثيره
كأنه معسكر
وهو ماكن للتنزه وفيه شاليهات مبنيه وشاليها متحركه
والصور توضح كل شيئ
طلعنا منها بأتجاه قريةwengen
والقريه مكانها رائع
وفيها فنادق كثيره
وسياح كثير وخاصه من شرق اسيا
اخذنا صور من القريه
[IMG]
https://dl.dropbox.com/u/20395846/s/%...8%B1%20326.jpg [/IMG]
وطلعنا بأتجاه انترلاكن
والنيه اننا نتمشى فيها بحكم انه اخر يوم
وكانت الجوله مفتوحه بدون قارمن
بصراحه اكتشفت اماكن كثيره
غير ماكنت احدد احداثيات بالقارمن
مرينا بمواقف اخذت مناه كم صورة
وكان فيها دوراة مياه بصراحه تذكرت حال طرقنا ودوراة المياه فيها
والفرق كبيرررررررررررررر
المهم لقينا قريه صغيره لكن مميزه واسمها lseltwald-See
فيها فنادق صغير لكن كلها مطله على البحيرة الشرقيه لأنترلاكن
شوارعها صغيره مررررررررره
لكن مناظرها خياليه
وجلسنا على احد الكراسي المطله على البحيره
ولاتمر بطه صغيره وارمي لها بطاطسه صغيره من الأغراض الي معنا
وشوي ولا انواع البط والطيور تجمع علينا
كنا بوحده وصرنا بمجموعه
المهم قلت لأم العيال عطيهن كل شوي
وانا ابي اصور
وانواع المخانق بين البط والطيور
قلت افا سببنا مشاكل بهالقريه
لكن المهم اني طلعت بصور
رجعنا نبي نتمشى بأنترلاكن
وبصراحه تفاجئت بالأسواق فيها
ماتوقعت كل هذا فيها وانا احسب انها صغيره مره
ونجلس نفرفر بهالأسواق والمقاهي
لكن الوقت كان تأخر وبدت المحلات تسكر
رجعنا للفندق
ولقينا موظف الرسبشن ينتظرنا
وكان محضر ورقه
واستغربت لقيتها عربي
اثريه مترجمها لي ههههههه
ومكتوب فيها
عزيزي البغيق
لدى وصولك علينا احيطم علماً بما يلي:
وصلت الأحداث التاليه:
7 تشرين الثاني : غمر من المواد الغذائية المتبقيه في الغرفة بالوعه
(وكان يقصد اننا اذا غسلنا بقايا عدة الطبخ يكون فيها بقايا طعام وسكر بالوعة المغسله)
9 تشرين الثاني: إنذار الحريق من قبل الطهي وألأمساك نظراً لبقايا الطعام
ويجب أن نضع هذه الأحداث في الأعتبار
وعليك الأتي:
مزيد من العمل تنظيف وتجفيف 50 فرنك سويسري
انتقال إنذار الحريق الى النار 79.50 فرنك سويسري
المزيد من الجهد تنظيف 35 فرنك سويسري
مجموع 164.50 فرنك سويسري
===
طبعاً الكلام الي كتبته كان هو مترجمه عن طريق مواقع الترجمه
لكن الزبده قال لازم تدفع هالمبلغ
بخصوص الحريق المبلغ يروح للمطافي لأنهم تحركو من مكانهم
بسبب ان الأنذار كان موصول معه
المهم دفعت وانا اضحك
وش اسوي يعني
رجعنا الغرفة وقلت لعيونك ابي اضبط كبسه على الكيف
واقوم وافسر عن ذرعاني
لكن من الذله طبخت بالبلكونه هههههه
بعد هالكبسه فتحت النت شوي
وجلست اكتب نقاط من تقرير اليوم
موعدنا مع مغادرة السااااااحرة انترلكن الى جنيف